Laturiaigö Waʼatumbu Yesu Ira Malaʼika

Kaisaro Auguso zamatörö me luo daʼö ba Wamatörö Romawi, ifaretakö fefu niha Yahudi enaʼö lafasuraʼö döira ba mbanua si tumbu yaʼira. Börö daʼö, mofanö Yosefo faoma Maria ba Mbetilekhema banua si tumbu Yosefo. Me luo daʼö, arakhagö tumbu nono Maria.

Me larugi Mbetilekhema, no afönu fefu naha wemörö irege toröi ira ba kandra gurifö. Ba daʼö tumbu Yesu. Ihaogö Maria wobukusi Yesu ba nukha si baga aefa daʼö ifegaya ba luha naha gö gurifö.

Bongi daʼö, ahatö ba Mbetilekhema, so ösa ndra kubalo sanaro biri-biri baero ba kabu. Ba zi lö mudöna-döna, tohare samösa malaʼika ba ihagaini ira haga lakhömi Yehowa. Oi so waʼataʼura. Hizaʼi, imane khöra malaʼika daʼö, ’Böi miʼataʼufi. So duria somuso dödö. Maʼökhö andre, no tumbu Mesia ba Mbetilekhema.’ Iʼanemaiʼö ba ginötö daʼö ato ndra malaʼika si tohare moroi ba mbanua si yawa lamane, ’Nisuno Lowalangi ba zorugo, ba faʼatulö ba gulidanö.’ Aefa daʼö, mofanö ndra malaʼika andrö fefu. Hadia nifalua ndra kubalo?

Faoma lamane khö nawöra, ’Aine, möi ita ba Mbetilekhema.’ Mofanö ira ba falukha ira Yosefo, Maria, hegöi ono sawena tumbu khöra ba kandra.

Ahöli-höli dödö niha samondrongo nitutunö ndra kubalo andrö. Ihaogö woʼangeragö Maria wehede malaʼika daʼö ba lö irai olifu ia. Mangawuli ndra kubalo ba naha mbiri-biri khöra. Laʼandrö saohagölö khö Yehowa ba zi no larongo hegöi niʼilara.