Ihalö ’Gangetula ba Dödönia’

1, 2. Tutunö wofanö Maria, ba hana wa serege dödönia wofanö?

IʼATULÖʼÖ wedadaonia Maria börö me lö ohahau dödönia. No hauga za modadao ia ba hulu gurifö side-ide andrö. Tanö föna iʼagö Yosefo, numalö ba Mbetilekhema saröu. Irasoi Maria wa so zaliwa-liwa bakha ba dalunia.

² No ebua saʼae dabina Maria; irugi baŵania woʼono. (Luk. 2:5, 6) Me oya lataluʼi nowi, so ösa zamaku laza mazui samazaewe tanömö zinanö ba daʼö. Ahöli dödöra me laʼila ndra alawe sanabina si lö aratö moʼono sofanö ba zaröu. Hadia mbörö wa aröu mofanö Maria moroi ba nomonia numalö ba Nazareta?

3. Hadia halöwö nitema Maria, ba hadia wamahaʼö sinangea tahalö moroi khönia?

³ Fefu daʼa tebörögö ba zi hauga waŵa silalö me itema halöwö si sökhi ba si faböʼö ira alawe Yahudi andre ba waö-waö niha gulidanö. Iʼadonogö nono si tobali Mesia, Ono Lowalangi! (Luk. 1:35) Me arakhagö tumbu nono andrö, so goroisa enaʼö mofanö ba Mbetilekhema. Sagötö fofanö ba lala, oya zi tobali fanandraigö wamati Maria. Datafaigi hadia zi tola manolo yaʼia aro ba wamati.

Fofanö ba Mbetilekhema

4, 5. (a) Hana wa möi Yosefo faoma Maria ba Mbetilekhema? (b) Hadia wamaʼeleʼö salua ba fareta Kaizaro andrö?

⁴ Tenga ha Yosefo faoma Maria zamalua fofanö simane daʼö. Awena ibeʼe fareta Kaizaro Auguso enaʼö fefu niha si so ba soi andrö mangawuli ira ba mbanua si tumbu yaʼira ba wamasuraʼö töira. Hewisa Yosefo me irongo fareta daʼö? Imane sura andrö, ”Ba möi göi misiyawa Yosefo andrö, moroi ba Galilaia, moroi ba mbanua Nazareta; isawa sotöi Betilekhema, me maʼuwu Dawido ia.”​—Luk. 2:1-4.

⁵ Tenga si lö mudöna-döna fareta nibeʼe Kaizaro me luo daʼö. No tefaʼeleʼö mato fitu abad silalö wa ba Mbetilekhema tumbu Mesia. So göi mbanua sotöi Betilekhema ha 11 kilometer moroi ba Nazareta. Hizaʼi, imane ba wamaʼeleʼö andrö wa moroi ba ”Mbetilekhema Eferata” iʼotarai Mesia. (Baso Mikha 5:1.) Enaʼö murugi mbanua side-ide daʼö moroi ba Nazareta, si toʼölönia faʼaröu nitörö so mato 150 kilometer sanörö Zamaria. Ba Mbetilekhema daʼa möi Yosefo, börö me ba daʼö iʼotarai ngaʼötö Razo Dawido—tua Yosefo hegöi Maria.

6, 7. (a) Hana wa sambua fanandraigö daʼa khö Maria weʼamöi ba Mbetilekhema? (b) Börö me no tobali ia foʼomo Yosefo, hadia lua-luania khö Maria ba gangetula nihalönia? (Faigi nisura ba gahe zura.)

⁶ Hadia fao Maria ba wotuhini angetula nihalö Yosefo ba woloʼö fareta daʼö? Abua khönia wofanöra andrö. Me luo daʼö te böröta musim gugur, andrö asese alua deu awu na arakhagö tohare mbaŵa lökhö. Tefaudu sibai ba ngawua wehede, ’möi misiyawa moroi ba Galilaia’ börö me Betilekhema andrö töra 760 meter waʼalawa si yawa ba hili—si marase ira wanösö awena larugi. Te abölö ara wanösöra hili andre moroi ba zi toʼölö, börö me tebai Maria, asese molombase ira. Ba zi famane daʼa, samösa ira alawe omasi ira na laʼagö manö nomo, börö me ato nösi nomo hegöi si fahatö si tola manolo yaʼia na tumbu nononia. Tatu manö moguna khö Maria waʼabarani wofanö simane daʼa.

⁷ Hewaʼae simanö, Luka zanura wa mofanö Yosefo ”ba wamatanöʼö ba zura töira, awö Maria”. Ifatunö göi wa Maria andrö ”foʼomo Yosefo”. (Luk. 2:4, 5) Börö me no tobali ia foʼomo Yosefo oya zinangea iʼangeraigö Maria ba wangai angetula. Ba wamaiginia, foʼomo ira matua zi tobali högö ba nomo sanandrösa ba halöwö wamati, ba itema halöwö nibeʼe Lowalangi khönia tobali sotuhini halöwö woʼomonia.a Tobali, daʼa zi möi fanandraigö wamati hegöi foloʼönia.

8. (a) Hadia nasa danö böʼö sangoʼou Maria wefao khö Yosefo ba Mbetilekhema? (b) Hadia zi tobali famarou dödö niha si lö faröi moroi ba duma-duma Maria?

⁸ Hadia nasa zamarou tödö Maria wa moloʼö ia? Hadia iʼila zi no tefaʼeleʼö wa ba Mbetilekhema tumbu dania Mesia? Lö nitutunö Zura Niʼamoniʼö. Hizaʼi, lö taʼila tawaʼö wa lö aboto ba dödö Maria, börö me oi larongo ira sondröniaʼö ba agama hegöi niha sato. (Mat. 2:1-7; Yoh. 7:40-42) Aboto ba dödö Maria nösi mbuku Niʼamoniʼö. (Luk. 1:46-55) Gofu hadia zi so ba dödönia, no tobali ia duma-duma si sökhi khöda, hewaʼae ihalö gangetula börö woloʼö foʼomonia, ma börö woloʼö fareta zamatörö, mazui si no ifaʼeleʼö Yehowa ba tanö böʼönia. Iʼameʼegö tödö Yehowa ndra matua hegöi ira alawe si so fangide-ngideʼö ba soloʼö. Ba ginötö andre foloʼö laʼaohasi ba dödö, hizaʼi duma-duma nibeʼe Maria no sambua famarou dödö ba niha si lö faröi gofu hezo so ira.

Faʼatumbu Keriso

9, 10. (a) Hadia zi tumbu ba dödö Maria faoma Yosefo me arakhagö larugi Mbetilekhema? (b)  Hana wa ba kandra gurifö toröi Yosefo faoma Maria?

⁹ Tatu omuso dödö Maria me arakhagö irugi Mbetilekhema. Itohugö wofanö ba wohene ahe hili, itörö kabu zaitun—sinanö safuria mubasi—te itörö tödö Yosefo hegöi Maria waö-waö salua ba mbanua side-ide andre. Banua daʼa lö eluahania moroi ba mbanua tanö böʼö si so ba Yehuda, simane niwaʼö zamaʼeleʼö Mikha; hizaʼi, ba daʼa tumbu Mboasi, Naʼemi, ba aefa daʼö Dawido, töra saribu fakhe silalö.

¹⁰ Afönu niha ba mbanua andrö me larugi ira Yosefo ba Maria. Niha samasuraʼö töira no oföna larugi, irege lö hadöi bateʼe nahiara wemörö.b Lö hadöi si tola lafili baero wemörö ba kandra gurifö. Tola takhalaigö hewisa waʼahakhö dödö Yosefo khö woʼomonia ba wanaögö faʼafökhö, si lö iʼila tebato. Ba daʼa, irasoi waʼafökhö dabinania.

11. (a) Hana wa aboto ba dödö ndra alawe sato zalua khö Maria? (b) Hezo manö lafotöi Yesu ”ono siaʼa”?

¹¹ Aboto ba dödö ndra alawe sato hadia nirasoi Maria. Kira-kira 4.000 fakhe silalö, no ifaʼeleʼö Yehowa börö lua-lua horö ngaʼötö, andrö latörö waʼamarase ira alawe ba woʼono. (I Moz. 3:16) Lö hadöi tandra sangoromaʼö wa lö alua khö Maria daʼö. No ihaogö wamatunö Luka, lö iʼositengagö zalua andre, me imane wangumaʼö, ”Ba madono ia, ono siaʼa, ono matua.” (Luk. 2:7) Atulö wa ”ono siaʼa” khönia no tumbu, siaʼa moroi ba zi hadauga nono Maria, si löʼö-löʼönia dafitu fefu. (Mrk. 6:3) Hizaʼi, faböʼö daʼa moroi ba zato. Ono andre tenga ha ononia siaʼa, tobali ”siaʼa moroi ba nifazökhi” Yehowa samösa, Ononia si ha sambua niwöwöinia!​—Kol. 1:15.

12. Hezo ifagaya nononia Maria, ba hadia zi faböʼönia moroi ba drama, lukisan, hegöi nifaehagö ba Wanunu Fandru?

¹² Ba daʼa lanönö wanura waö-waönia si tehöngö, ”Ilölö ba ifagaya ba luha.” (Luk. 2:7) Drama, lukisan, hegöi nifalua ba Wanunu Fandru ba zi sagörö ulidanö talafo laʼabakhaiʼö wogambaraini salua andre. Hizaʼi, faigi hewisa zindruhunia. Luha yaʼia daʼö naha gö gurifö. Toröi ira ba naha gurifö, tenga ba nahia si sökhi mazui si lö taʼunö, he me föna hegöi iadaʼa. Sindruhunia, haniha zatua somasi moʼono ba daʼa na so nahia böʼö si baga? Ato zatua somasi mameʼe si sökhi ba ndraonora. Töra-töra nasa Maria faoma Yosefo omasi ira labeʼe zabölö sökhi khö Nono Lowalangi!

13. (a) Hewisa Yosefo faoma Maria ba wameʼe si sökhi si tola lafalua? (b) Hewisa zatua ba ginötö andre tola laʼofönaiʼö zimane nifalua Yosefo faoma Maria?

¹³ Hewaʼae simanö lö tobali taha-tahara daʼö; laforege wamalua si sökhi si tola lafalua. Duma-dumania, faigi atö wa ihaogö wondrorogö ono sawuyu andrö Maria, iʼolohuni faoma nukha si sökhi, aefa daʼö ihaogö idaʼi-daʼi wamagaya yawa ba luha enaʼö lö oʼafu ba ohahau dödönia. Hewaʼae na aombö dödönia zalua me luo daʼö, ihonogö dödönia Maria. Iʼodödögö wondrorogö ba ibeʼe zi sökhi khö nono andrö. Aboto ba dödö Maria hegöi Yosefo wa moguna labeʼe zoguna ba wamati khö nono daʼa börö me daʼö zabölö moguna si tola lafalua. (Baso V Moze 6:6-8.) Iadaʼa, lafalua zimane daʼö satua si so iraono laʼodödögö ba wangebua iraonora si fao faʼatua-tua ba gulidanö solofo ba wamati andre.

Faʼafalukhata si Möi Faʼomuso Dödö

14, 15. (a) Hana wa möi ndra kubalo wamaigi ono sawuyu andrö? (b) Hadia nifalua ndra kubalo me laʼondrasi kandra gurifö andrö?

¹⁴ Faʼomuso dödö salua andre iʼanemai tebato. Izumaigö tohare ndra kubalo möi ira ba kandra wamaigi ösi nomo daʼa mendrua manö nono sawena tumbu. Omuso dödö ndra kubalo andre ba wanutunö, oroma ba zikhalara. Fagohi-gohi ira moroi ba gahe hili, nahiara ba wokubaloi biri-biri hegöi nambi.c Lafatunö khö Yosefo hegöi khö Maria zahöli-höli dödö salua khöra sawena larongo. Ba zi talu mbongi me so ira ba mbenua, lö ladöna-döna tohare samösa malaʼika zamalukhaisi yaʼira. Humaga lakhömi Yehowa ba zi fasuira, ba iʼombakhaʼö khöra malaʼika andrö wa Keriso mazui Mesia, awena sibai tumbu ba Mbetilekhema. Laʼila nono andrö no mufagaya yawa ba luha, no mulölö faoma nukha. Aefa daʼö, alua zahöli-höli dödö zui—oroma ngahönö ndra malaʼika, laʼanunöisi zinunö lakhömi khö Lowalangi!​—Luk. 2:8-14.

¹⁵ Lö ahöli dödöda ndra kubalo me möi ira ba Mbetilekhema si fao fangide-ngideʼö! Tatu manö ahöli-höli dödöra nono sawena tumbu andrö simane nifatunö malaʼika khöra. Lö labiniʼö duria somuso dödö andre khöra samösa. ”Laʼombakhaʼö daromalinia andrö . . . Ba dozi samondrongo ba ahöli-höli dödö, ba niʼombakhaʼö gubalo andrö khöra.” (Luk. 2:17, 18) Ira sondröniaʼö ba agama me luo daʼö laʼoʼaya-aya sibai gubalo. Hizaʼi, iʼameʼegö tödö ira Yehowa börö me mangide-ngideʼö ba mamati ira. Tobali, hadia lua-luania khö Maria me laʼondrasi ia ira kubalo?

16. Hewisa wangoromaʼö Maria wa omasi ia mangera-ngera, ba hadia mbörö wa mamati ia?

¹⁶ Tatu manö alö waʼabölö Maria me no moʼono ia, hizaʼi ihaogö wamondro-ndrongo fefu hadia ia niwaʼö. Tenga ha daʼö, ”Ba lö olifu Maria fefu niwaʼö andrö.” (Luk. 2:19) Omasi ndra alawe sawuyu-wuyu andre mangera-ngera. Aboto ba dödönia wa moguna sibai nifaʼema malaʼika andrö. Omasi Lowalangi Yehowa na aboto ba dödönia hewisa waö-waö waʼauri nono si no iʼadonogö andrö. Tobali, tenga ha asala irongo manö. Ibeʼe ba dödönia wehede andrö enaʼö lö aetu iʼangerönusi ba zi so föna. Daʼa mbörö wa mamati Maria sandrohu faʼaurinia.​—Baso Heberaiʼo 11:1.

17. Hewisa woloʼöda duma-duma Maria sanandrösa ba zindruhu?

¹⁷ Hadia omasi öʼoʼö duma-duma Maria? No ifönui ngaʼörö Daromalinia Yehowa faoma sindruhu. Hizaʼi, na omasi ita so gunania khöda, si oföna tafalua yaʼia daʼö, taʼameʼegö tödö zindruhu andrö. Tola tafalua ia na tabaso Zura Niʼamoniʼö ero maʼökhö—tenga ha sambua buku karya sastra, hizaʼi Taromali Lowalangi si no teʼehehaini. (II Tim. 3:16) Aefa daʼö, simane Maria, moguna tatanö ba dödöda ba tahalö gangetula. Na taʼangerönusi zi no tabaso ba Zura Niʼamoniʼö, tafatou-tou tödöda hewisa wamalua mene-mene Yehowa, daʼö mbörö wa tedou wamatida.

Oya Wehede si No Itanögö ba Dödönia

18. (a) Hewisa Maria hegöi Yosefo woloʼöra Oroisa Moze me ono sawuyu Yesu? (b) Hadia niʼilada me labeʼe zumange ira Yosefo hegöi Maria ba gosali?

¹⁸ Me no irugi walu hari, lasuna nono sawuyu andrö ira Maria faoma Yosefo moloʼö Oroisa Moze, ba labeʼe töinia Yesu simane si no mufaretakö. (Luk. 1:31) Aefa daʼö, ba ngaluo si-40, laʼohe ia moroi ba Mbetilekhema numalö ba Yeruzalema, faʼaröunia mato hauga kilometer, ba wameʼe sumange fangamoniʼö simane nitatugöi Goroisa ba niha si numana—dombua wune mazui dombua nono marafadi. Na aila ira wameʼe sumange börö me lö sagu khöra wameʼe biri-biri si matua ba sambua nono marafadi simane nifalua zatua böʼö, lalawa wangera-ngera simanö. Gofu hewisa, tobali famarou dödöra weʼasora ba daʼö.​—Luk. 2:21-24.

19. (a) Hadia manö wehede Zimeoni si no itanö ba dödönia Maria? (b) Hewisa Khana me iʼila Yesu?

¹⁹ Samösa ndra matua si no atua sotöi Simeoni iʼondrasi ira ba ibeʼe khö Maria wehede sinangea itanö ba dödönia. Fatua lö mate ndra matua andre iʼila Mesia si no tefabuʼu, ba eheha Yehowa zangombakha khönia wa ono andrö sotöi Yesu daʼö Zangefaʼö si no tefaʼeleʼö. Ibeʼe wamangelama Simeoni khö Maria wa samuza inötö dania göna ia abula dödö. Imane khö Maria wa hulö gari sanau dania zi göna dödöu. (Luk. 2:25-35) Hewaʼae no mufatunö wa alua zi lö sökhi, fehede daʼö zanolo Maria ba wanaögö salua, tölu ngafulu fakhe aefa daʼö. Aefa Zimeoni, samösa zamaʼeleʼö sotöi Khana iʼila Yesu side-ide andrö ba ibörögö itutunö ba niha si no ara manötöna fangefaʼö Yeruzalema.​—Baso Luka 2:36-38.

20. Hana wa angetula si sökhi nihalö Yosefo faoma Maria me laʼohe Yesu ba gosali Yeruzalema?

²⁰ Hawaʼasökhi gangetula nihalö Maria faoma Yosefo me laʼohe nonora ba gosali Yehowa ba Yeruzalema! Hulö laʼombakhaʼö khö nonora matua andrö zi no toʼölö lafalua sandrohu faʼaurira weʼamöi ba gosali Yehowa. Laʼodödögö wamalua fanuturu lala hegöi famarou dödö si tola sagu khöra. Tatu manö mangawuli Maria moroi ba gosali Lowalangi me luo daʼö si fao famati saro, tödö safönu famati sinangea iʼangerönusi ba ifadunö-dunö ba niha böʼö.

21. Simane Maria, hewisa wotatugöida enaʼö itugu aro wamatida?

²¹ Hawaʼomuso dödöda na so zatua ba ginötö andre soloʼö duma-duma simane daʼö. Ira Samaduhuʼö Yehowa, lö faröi ira wolohe iraonora ba gangowuloa niha Keriso. Laʼodödögö wamosumange Lowalangi ba labeʼe wamarou dödö khö ndra talifusöra si sara lala wamati. Mangawuli ira si fao angetula saro, faʼomuso dödö, ba oya zi sökhi sinangea lafatunö ba niha. Hawaʼomuso dödöda na owulo ita khöra! Sagötö tafalua daʼö, taʼila wa itugu aro wamatida, simane famati Maria.