Fanofu Zombaso

Me no aefa tumbu Yesu, hana wa lö tebulö toröi Yosefo hegöi Maria ba Mbetilekhema ba lö mangawuli ira ba Nazareta?

Lö nifatunö Zura Niʼamoniʼö daʼö. Hizaʼi, iforomaʼö ösa zadöni dödöda Sura Niʼamoniʼö si tola molua-lua ba gangetula nihalöra.

So samösa malaʼika zamatunö khö Maria wa manabina ia ba tumbu khönia nono matua. Me lafatunö khö Maria sanandrösa ba daʼö, yaʼia hegöi Yosefo ba Nazareta toröi ira, banua si tumbu Yosefo ba Galilaia. (Luk. 1:26-31; 2:4) Ba gafuriata, me findra ira ba Miserai, mangawuli ira ba Nazareta. Ba mbanua daʼö teʼebuaʼö Yesu, ba laʼila niha wa yaʼia andrö niha Nazareta. (Mat. 2:19-23) Daʼö mbörö wa itörö tödöda Yesu, Yosefo, hegöi Maria, na tarongo mbanua Nazareta.

So zi fahatö khö Maria sotöi Elizabe, si toröi ba Yehuda. Elizabe andre foʼomo gere sotöi Zakharia, ba gafuriata tobali ia ina Yohane Samayagö Idanö. (Luk. 1:5, 9, 13, 36) No irai ifalukhaisi Gelizabe Maria ba toröi ia tölu waŵa waʼara ba Yehuda. Me no aefa daʼö, mangawuli ia ba Nazareta. (Luk. 1:39, 40, 56) Daʼö mbörö wa iʼila maʼifu sanandrösa ba mbanua Yehuda.

Ba gafuriata, ibeʼe fareta samatörö Romawi enaʼö ”möi fefu niha ba mbanuara zamösana ba wamasuraʼö töira”. Daʼö mbörö wa mofanö Yosefo moroi ba Nazareta numalö ba Mbetilekhema, nifotöi ’banua Dawido’. No tefaʼeleʼö wa ba mbanua daʼö tumbu Mesia. (Luk. 2:3, 4; 1 Sa. 17:15; 20:6; Mi. 5:2) Me no aefa moʼono Maria, lö itötöna khönia Yosefo wanörö lala saröu weʼamöi ba Nazareta ba iʼohe Yesu sawena tumbu andrö. Lö tebulö toröi ira ba Mbetilekhema, siwa kilometer waʼaröunia moroi ba Yeruzalema. Daʼö mbörö wa aoha khöra wolohe Yesu ba gosali si so ba Yeruzalema, ba labeʼe zumange simane si no mufakhoi ba Goroisa Moze.—3 Mo. 12:2, 6-8; Luk. 2:22-24.

Ba zilalö, no irai ifatunö malaʼika Lowalangi khö Maria wa ono niʼadonogönia dania zanema ’dadaoma Dawido’ ba ”tobali ia Razo”. Te so ba wangera-ngera Yosefo hegöi Maria wa lö tola löʼö ba mbanua Dawido tumbu Yesu. (Luk. 1:32, 33; 2:11, 17) Ba tola manö larasoi wa abölö sökhi toröi ira ba daʼö, ba labaloi wanuturu lala tanö böʼö moroi khö Lowalangi.

Lö taʼila hawaʼara no toröi ira ba Mbetilekhema me tohare zanahö döfi. Hizaʼi, iforomaʼö Sura Niʼamoniʼö wa me luo daʼö toröi ira ba zi sambua omo, ba lafotöi Yesu andrö ’ono side-ide’, tenga ono sawuyu. (Mat. 2:11) Moroi ba daʼa taʼila wa lö si möi ira ba Nazareta, ba no ara toröi ira ba Mbetilekhema irege no lafazökhi nomora ba daʼö.

Ibeʼe fareta Herode enaʼö ”labunu fefu nono matua ba Mbetilekhema . . . sambö dua fakhe faʼebua”. (Mat. 2:16) Me no aefa ifangelama Yosefo malaʼika sanandrösa ba daʼa, yaʼia hegöi Maria, moloi ira ba Miserai ba toröi ira ba daʼö irege mate Herode. Ba gafuriata, iʼohe nösi nomonia Yosefo ba Nazareta. Hana wa lö mangawuli ira ba Mbetilekhema? Börö me samatörö Yudea me luo daʼö yaʼia daʼö Arikhelao ono Herode, niha si lö sökhi. Baero daʼö, ifangelama Yosefo Lowalangi enaʼö lö ifuli ia ba daʼö. Ba Nazareta, isöndra waʼahono dödö Yosefo ba wangebuaʼö Yesu tobali samosumange Yehowa.—Mat. 2:19-22; 13:55; Luk. 2:39, 52.

Hulö no mate Yosefo fatua lö ibokai lala Yesu ba niha weʼamöi ba zorugo. Daʼö mbörö wa ba gulidanö mususugi Yosefo. Ato niha si tola mamalukhaisi yaʼia dania, ba tola lasofu hana wa lö tebulö toröi ia hegöi Maria ba Mbetilekhema me no aefa tumbu Yesu.