Baŵa si Lima

Iʼotarai ba waʼide-idenia, no ifili Yesu ba woloʼö niwaʼö ndra satuania. Lö irai iwaʼö tödönia wa abölö oya niʼilania moroi khöra. Börö daʼö, lö irai itimbagö mene-mene nibeʼera. Tatu no ihaogö sibai Yesu ba wamalua noro dödönia tobali ono siaʼa. Iforege ba wamahaʼö yaʼia moroi khö namania sotöi Yosefo, enaʼö iʼokhögö nekhe-nekhe danga tobali tuka eu ba tola ilului ba wombönökhi soguna ba nösi nomonia. Tola manö no lafatunö khö Yesu ira satuania sanandrösa ba waʼatumbunia sahöli-höli dödö. Te göi no lafatunö khönia wehede ndra malaʼika sanandrösa khönia. (Luk. 2:8-19, 25-38) Hizaʼi, tenga ha ba wehede ndra satuania ifahaʼö ia Yesu. Ifahaʼö samösa göi ia ba nösi Zura Niʼamoniʼö. Hadia dandra sangoromaʼö wa owölö-ölö Yesu ba wamahaʼö yaʼia ba Daromali Lowalangi? Me fahuhuo ia khö ndra samahaʼö ba agama me ide-ide ia, ”ahöli-höli dödö zamondrongo börö me oya zaboto ba dödönia hegöi fanema li nibeʼenia”. (Luk. 2:46, 47) Hewaʼae na awena 12 fakhe ndröfinia, no iforege sibai Yesu ba wamahaʼö yaʼia ba Zura Niʼamoniʼö irege tola faduhu dödönia wa Amania Yehowa andrö.—Luk. 2:42, 43, 49. w20.10 29-30 ¶13-14

Famatida ba wanusugi Yesu zi tobali dane-dane wanötönada sanandrösa ba wanusugi. Me itutunö sinenge sotöi Faulo sanandrösa ba wanusugi, itötöi zindruhu si tölu ngawalö andre: (1) ”Mate Keriso börö horöda”. (2) ”No lakoʼo” ia. (3) ʼTesusugi ia ba ngaluo si tölu simane nisura ba Mbuku Niʼamoniʼö’. (1 Ko. 15:3, 4) Hana wa tohude sibai khöda zindruhu si tölu ngawalö andre? Me ifaʼeleʼö Yesaya sanandrösa khö Mesia, iwaʼö wa hasambalö ”tetibo ia moroi ba danö niha sauri”, ba ”so lewatönia ba gotalua niha si lö sökhi”. Baero daʼö, ifaʼeleʼö göi Yesaya wa hasambalö ”iluʼi horö niha sato” Mesia. Ifalua daʼö Yesu me ibeʼe nosonia tobali höli. (Yes. 53:8, 9, 12; Mat. 20:28; Rom. 5:8) Andrö, börö me no mate Yesu, lakoʼo, ba tesusugi ia, tola taʼokhögö dötönafö wa hasambalö teʼefaʼö ita moroi ba horö hegöi faʼamate, ba ifuli falukha ita ba niha niʼomasiʼöda si no mate. w20.12 2-3 ¶4-6; 5 ¶11

Asese manuriaigö sinenge sotöi Faulo ba nahia waʼowulo niha Yahudi. Duma-dumania, ba nahia waʼowulo si so ba Desalonika. ”Sagötö ba zi tölu ngaluo sabato, ihaogö wamatunö [ba niha Yahudi] enaʼö aboto ba dödöra hewisa moloʼö Buku Niʼamoniʼö.” (Hal. 17:1, 2) Börö me ba agama niha Yahudi teʼebuaʼö ia, tola manö lö khönia faʼaombö dödö me ilau manuriaigö ba nahia waʼowulo andrö. (Hal. 26:4, 5) Aboto ba dödönia lala wangera-ngera niha Yahudi, andrö wa lö aombö dödönia me manuriaigö ia khöra. (Fil. 3:5) Me no aefa lafakao Waulo ba lafofanö ia moroi ba Desalonika hegöi ba Mberea, ofeta ia ba Atena. Ba daʼö, ifuli zui ’ibörögö fahuhuo ba nahia waʼowulo, ba niha Yahudi hegöi niha böʼö samosumange Lowalangi’. (Hal. 17:17) Hizaʼi, me manuriaigö Waulo ba fasa, tenga ba niha Yahudi manuriaigö ia. Ba daʼö, fahuhuo Waulo khö ndra filsuf hegöi ba Niha Baero. Moloʼö yaʼira, turia nifaʼema Waulo andrö no sambua ”wamahaʼö si bohou”. Lamane khönia, ”Öfatunö ngawalö zi lö irai marongo.”—Hal. 17:18-20. w20.04 9 ¶5-6

Na öforege iadaʼa ba wolawa falömoʼahonoamö samösa, böi irai öwaʼö tödömö wa lö eluaha waʼaurimö. Törö tödömö wa niha si lö moʼahonoa fefu ita ba asese tafalua zala. Moguna khöda fefu waʼasökhi dödö Yehowa sahöli-höli dödö niforomaʼönia me ibeʼe Yesu tobali höli. (Ef. 1:7; 1 Yo. 4:10) Ba tola lafarou dödöda ira talifusöda ba mbanua niha Keriso! Lafondrondrongo ita na omasi ita tatutunö nösi dödöda, ba lafaʼema khöda wehede si möi famarou dödöda. (Amd. 12:25; 1 Te. 5:14) No irai irasoi waʼide-ide dödö talifusöda ira alawe sotöi Joy si toröi ba Nigeria. Imane wangumaʼö, ”Te lö khögu faʼanau gölö na lö fanolo moroi khö ndra talifusöda. Fanolo moroi khöra zangoromaʼö wa ifondrondrongo wangandrögu Yehowa. Tola göi ufahaʼö ndraʼo khöra ba wangabölöʼö niha tanö böʼö sorasoi faʼide-ide dödö.” Hizaʼi, moguna tatörö tödöda wa itaria lö laʼila ira talifusöda wa so khöda waʼide-ide dödö. Börö daʼö, te yaʼita zinangea mangondrasi talifusöda saro ba wamati, ba tafatunö khönia wa moguna khöda wanolo. w20.12 24 ¶7-8

Si toʼölönia, enaʼö tola fahuwu ita ba zi samösa niha, moguna fariawö ita ba niha daʼö. Me no aefa tadunö-dunö nösi dödöda hegöi si no irai alua khöda, awena tola fahuwu ita khönia. Hizaʼi, na omasi ita fahuwu khö Yesu, so ösa daha-taha nitaögöda. Sambua ba gotaluania, lö irai falukha ita khö Yesu. Ato göi niha Keriso ba götö siföföna si lö irai falukha khö Yesu. Hewaʼae simanö, imane sinenge sotöi Fetero, ”Hewaʼae lö irai miʼila ia, hizaʼi miʼomasiʼö ia. Lö miʼila ia iadaʼa, ba tola mamati ami khönia.” (1 Fe. 1:8) Börö daʼö, tola fahuwu ita khö Yesu hewaʼae na lö irai falukha ita khönia. Tebai göi fahuhuo ita khö Yesu. Na mangandrö ita, fahuhuo ita khö Yehowa. Sindruhu sa wa mangandrö ita ba döi Yesu, hizaʼi tenga khönia fahuhuo ita. Baero daʼö, lö omasi Yesu na khönia talau mangandrö. Hana? Börö me fangandrö andrö, tefarahu ia ba lala wamosumange, ba ha Yehowa zinangea tafosumange. (Mat. 4:10) Hewaʼae simanö, tola taforomaʼö wa taʼomasiʼö Yesu. w20.04 20 ¶1-3

Niha si fao ba watandrisa fagohi ba Yunani me götö siföföna, lataögö ngawalö daha-taha, simane faʼafökhö hegöi faʼamarase. Hizaʼi, laʼodaligö wamomaha si no latema hegöi faʼabölöra samösa. Abölö tohude ita moroi khöra. Tenga ha famomaha nitemada enaʼö lö awuwu ita ba wagohisa. Tatema göi waʼabölö moroi khö Yehowa, faʼabölö si tola manolo yaʼita ba ngawalö hadia ia. Na taʼodaligö Yehowa, ifabuʼu wa ifomaha ita ba ibeʼe khöda waʼabölö! Iforege sinenge sotöi Faulo ba wanaögö ngawalö daha-taha. Duma-dumania, laʼoʼaya ia niha ba göna ia folohi. Itaria göi irasoi Faulo wa lö faʼabölönia, ba so ’ndroi bakha ba mbotonia’. (2 Ko. 12:7) Hizaʼi, hewaʼae na alua khönia daha-taha andrö, lö ibato Faulo ba wamosumange Yehowa. Ba wamaiginia, daha-taha andrö zameʼe khönia inötö ba wangodaligö Yehowa. (2 Ko. 12:9, 10) Börö lala wangera-ngera Waulo andre, itolo ia Yehowa ba wanaögö fefu daha-taha salua khönia. w20.04 29 ¶13-14

Buala sebua böli niʼokhögöda yaʼia daʼö töi si sökhi tobali si ”falulu fohalöwö” khö Yehowa. (2 Ko. 6:1) Falulu fohalöwö ita khönia ero na tafalua halöwö ba wombaliʼö nifahaʼö. Iwaʼö Faulo wa yaʼia hegöi niha si fao khönia ba wamalua halöwö ba wombaliʼö nifahaʼö, no ’si falulu fohalöwö khö Lowalangi’. (1 Ko. 3:9) Falulu fohalöwö göi ita khö Yesu na tafalua halöwö ba wombaliʼö nifahaʼö. Me no aefa ifaretakö ndra soloʼö yaʼia ba wombaliʼö nifahaʼö fefu niha moroi ba ngawalö soi, ifabuʼu khöra imane, ”Fao khömi ndraʼo.” (Mat. 28:19, 20) Hewisa göi sanandrösa khö ndra malaʼika? Taʼandrö sibai saohagölö börö me laforege ba wondröniaʼö yaʼita na taturiaigö ”duria somuso dödö si lö tebulö . . . ba ngawalö soi, ba ngawalö mado, banua, hegöi li”. (Fam. 14:6) Hadia mbuania khöda börö me tatema wanolo moroi ba zorugo? Ba ginötö tafazaewe danömö zindruhu, so danömö saekhu ba dödö niha si sökhi ba tedou. (Mat. 13:18, 23) Haniha zamanöi tanömö andrö irege tola mowua? Ifatunö daʼö Yesu simane ba ayati maʼökhö andre. w20.05 30 ¶14-15

So mato hauga zuta wongambatö si no fabali moloʼö huku. So göi nösi nomo si toröi ba zi sambua omo, hizaʼi hulö niha böʼö ira khö nawöra. Imane samösa penasihat perkawinan, ”No arörö ndra satua hegöi iraono ba wangogunaʼö komputer, tablet, HP, hegöi video game, irege lö inötöra saʼae fahuhuo khö nawöra zamösana. Hewaʼae na toröi ira ba zi sambua omo, faoma lö aboto ba dödöra nawöra.” Böi tafaomagö ita ba niha gulidanö andre si lö mangomasiʼö awöra. Moguna tadouʼö waʼomasida, tenga ha ba nösi nomoda, hizaʼi khö ndra talifusöda ba mbanua niha Keriso. (Rom. 12:10) Moguna taʼomasiʼö nösi nomoda ba wamati, yaʼia daʼö ira talifusöda ba mbanua niha Keriso, simane fangomasiʼöda ösi nomoda. Daʼa waʼomasi sinangea tadouʼö. Na taʼomasiʼö niha böʼö simane fangomasiʼöda ösi nomoda, no tatolo fefu niha ba wamosumange Yehowa si fao fahasara dödö ba faʼomuso dödö.—Mi. 2:12. w21.01 20 ¶1-2

Na so wahasara dödö ba zi sambua tim sepak bola, tola itugu aoha khöra ba wokalaisi lawara. Hulö simane tim si so fahasara dödö ndraʼugö na öʼosambalöʼö gera-eramö hegöi tödömö ba wamosumange Yehowa. Törö tödömö wa omasi Zatana na mamodombua dödömö. Omasi ia na öʼangeragö ba öʼokhögö gisö-isö dödö si fasala, hewaʼae na öʼila wa lö omasi Yehowa na öfalua daʼö. Hizaʼi, böi tehegö mofozu Zatana irege mamodombua dödömö! Na omasiʼö öfosumange Yehowa, moguna öfalua daʼö soroi ba dödö. (Mat. 22:36-38) Simane Dawido, angandrö khö Yehowa, ”Osambuaʼö dödögu ba wangataʼufi töimö.” Forege ba wamalua hadia zi no ötutunö ba wangandrömö. Ero maʼökhö, foromaʼö ba gangetula nihalömö, sebua mazui side-ide, wa öfosumange döi Yehowa niʼamoniʼö. Na öfalua daʼö, tola öfolakhömi döi Yehowa. (Amd. 27:11) Ba tola göi tawaʼö wehede niwaʼö zamaʼeleʼö sotöi Mikha, ”Na yaʼaga, maʼoʼö Yehowa Lowalangima götö-götö waʼara.”—Mi. 4:5. w20.06 13 ¶17-18

Me isuwö nono mbanua Lowalangi razo tanö yöu hegöi famatörö tanö böʼö si fao khönia, mofönu sibai Lowalangi, ba ibörögö alua wasuwöta Hamagedo. (Fam. 16:14, 16) Na luo daʼö, ihori fefu wamatörö andrö Yehowa, yaʼia daʼö Gogi moroi ba danö Magogi, ”ba lö hadöi sanolo yaʼia”. (Dan. 11:45) Ba ayati daʼa, itutunö khöda nasa sanandrösa ba wangohori razo tanö yöu hegöi famatörö tanö böʼö. Itutunö göi hewisa wa tola teʼorifi ita. (Dan. 12:1) Hadia geluaha ayati daʼa? Mikhaʼeli, no töi tanö böʼö niʼokhögö Razoda, Yesu Keriso. Iʼotarai me döfi 1914, me tobali ia Razo ba Wamatörö Lowalangi ba zorugo, ibörögö ’mozizio ia ba wangoʼawögö’ nono mbanua Lowalangi. Ba zi lö ara tö, ”maoso” ia mazui ihori fefu nudunia ba wasuwöta Hamagedo. Fasuwöta andrö zangasiwai inötö nifotöi Danieli ’inötö wamakao’ sabölö abua sagötö waö-waö waʼauri niha.—Fam. 6:2; 7:14. w20.05 15-16 ¶15-17

Me tobali ia sawuyu hegöi me mukuru ia ba gafuriata, lö hadöi si tola ifalua Yosefo ba wombulöʼö salua khönia. Hadia nifaluania enaʼö lö aetu iʼokhögö lala wangera-ngera si sökhi ba lö irasoi waʼide-ide dödö? Lö iʼosambuaʼö dödönia ba zi tebai saʼae ifalua. Hizaʼi, owölö-ölö ia ba wamalua halöwö si no tebeʼe khönia. Iʼosambuaʼö dödönia Yosefo ba wangomusoiʼö tödö Yehowa. Buania, ifahowuʼö fefu nifaluania Yehowa. (1 Mo. 39:21-23) Waö-waö waʼauri Yosefo andrö zamasugi ba dödöda wa ba gulidanö si lö sökhi andre, asese lafalua khöda zi lö atulö ira niha tanö böʼö. Tola manö göi lafalua khöda zi lö atulö ira talifusöda ba wamati. Na tabaliʼö nahia wolumöʼöda Yehowa, tola tatayaigö waʼide-ide dödöda ba lö taböhöli ba wamosumange yaʼia. (Si. 62:6, 7; 1 Fe. 5:10) Baero daʼö, törö tödömö wa te awena 17 fakhe ndröfi Yosefo me itema wangifi si dombua andrö moroi khö Yehowa. Daʼa zangoromaʼö faʼafaduhu dödö Yehowa khö nono mbanuania sagawuyu-wuyu, wa tola lö faröi ira. Simane Yosefo, ato ndra si bohou ebua ba götöda andre zangokhögö famati saro khö Yehowa. So ösa ba gotaluara zanaögö falöʼatulö irege mukuru ira börö me lö omasi ira lasawö goroisa Lowalangi.—Si. 110:3. w20.12 16 ¶3; 17 ¶5, 7

Faduhu dödö Wetero hegöi Yohane wa na göna ira folohi börö me laʼoʼö Keriso ba lafahaʼö niha böʼö sanandrösa khönia, no töi si sökhi daʼö. (Hal. 4:18-21; 5:27-29, 41, 42) Lö moguna aila ndra nifahaʼö Yesu. Ba gafuriata, abölö oya gamuata si sökhi nifaluara moroi ba nifalua niha si fatuwu khöra. Duma-dumania, so ösa ba gotalua niha Keriso andrö zanura Sura Niʼamoniʼö, si tobali fanolo ba sameʼe fanötöna ba niha si zuta faʼato. Baero daʼö, no tefasindro Wamatörö nituriaigöra andrö, ba lö ara tö mamatörö daʼö ba gulidanö. (Mat. 24:14) Na tafaehusi, no ara tedudugö wamatörö Romawi samakao niha Keriso me abad siföföna, hizaʼi, no tobali razo ba zorugo ndra nifahaʼö Keriso si lö faröi. No ahori mate fefu niha solohi niha Keriso me götö daʼö, ba na so nisusugi ba gotaluara, tobali ira dania ono mbanua ba Wamatörö nituriaigö niha Keriso si fatuwu ira ba zilalö.—Fam. 5:10. w20.07 15 ¶4

Mamati sibai Gaberahamo ba mbuʼusa li Lowalangi irege hulö no iʼila Mesia, si tobali Razo ba Wamatörö Lowalangi. Daʼö mbörö wa imane Yesu ba niha Yahudi, ”Omuso sibai dödö namami Aberahamo börö me iʼila ngaluo waʼatoharegu. No ikhalaigö ba omuso dödönia.” (Yoh. 8:56) Sindruhu-ndruhu aboto ba dödö Gaberahamo wa tefarahu ngaʼötönia ba Wamatörö nifasindro Yehowa. Si fao faʼebolo dödö, idöna-döna wamalua Yehowa mbuʼusa li andrö. Hadia dandra sangoromaʼö wa idöna-döna Aberahamo mbanua andrö mazui Famatörö nifasindro Lowalangi? Si oföna, lö irai tobali ia ono mbanua ba zi sambua famatörö. Asese findra ia, lö manaroʼo ia ba zi sambua nahia, ba lö irai ituhini razo ba zi sambua famatörö. Si dua, lö ifasindro wamatörönia samösa Aberahamo. Hizaʼi, lö aetu iʼoʼö niwaʼö Yehowa ba idöna-döna waʼalua mbuʼusa linia. Daʼa zangoromaʼö wa mamati sibai Gaberahamo khö Yehowa. w20.08 3 ¶4-5

No ifabuʼu Yehowa wa lö hadöi dania niha si toröi ba Waradaiso sangumaʼö, ”Mofökhö ndraʼo.” (Yes. 33:24) Eluahania, hasambalö wa lö fökhö ba mboto niha nisusugi. Hewaʼae simanö, lö iʼanemaiʼö moʼahonoa ira. Na daʼö zalua, tola manö lö anehe niha niʼomasiʼöra khöra. Sagötö Wamatörö Keriso si Saribu Fakhe, tezara-zara dania waʼatebulö mboto niha tobali boto soʼahonoa. Ba gangohorita zi saribu fakhe dania, ifangawuli Wamatörö Lowalangi Yesu khö Namania. Ba ginötö daʼö, hasambalö no mofozu Wamatörö Lowalangi ba wamalua ohitö dödö Yehowa, farahu ba daʼö ba wamuli yaʼita ba wamoʼahonoa. (1 Ko. 15:24-28; Fam. 20:1-3) Khalaigö hewisa dödömö na ifuli falukha dania ndraʼugö ba niha niʼomasiʼömö. Te maʼiki mazui meʼe dania ndraʼugö börö waʼomuso dödömö, ba tola manö göi öʼanunöisi zinunö fanuno khö Yehowa. Tola faduhu dödöda wa hasambalö itugu taʼomasiʼö Namada safönu faʼomasi hegöi Ononia, si no mamorege enaʼö tola tesusugi niha si no mate. w20.08 16-17 ¶9-10

Ifarou dödö niha Keriso Faulo ba woʼangeragö hadia tola lahalö gangetula enaʼö lö mangowalu ira. (1 Ko. 7:8, 9) Sindruhu-ndruhu wa iʼosinangegö niha si lö sangowalu Faulo. Daʼö mbörö wa lö aombö dödö Waulo ba wamili Dimoteo si lö sangowalu, ba wamalua ngawalö halöwö si tohude khö Yehowa. (Fil. 2:19-22) Börö daʼö, he na no mangowalu zi samösa niha mazui löʼö, tola labeʼe khönia noro dödö ba mbanua niha Keriso na no sinangea ia ba wanema daʼö. (1 Ko. 7:32-35, 38) Yesu hegöi Faulo, lö irai lafarou niha Keriso enaʼö mangowalu mazui böi mangowalu. Na simanö, hewisa zinangeania lala wangera-ngerada sanandrösa ba niha si no mongambatö hegöi si lö sangowalu? Imane Menara Pengawal 1 Mbaŵa si Fulu 2012, ”Sindruhunia, si dombua ngawalö andre, [he fangowalu hegöi falömangowalu] no buala moroi khö Lowalangi. . . . Ba wamaigi Yehowa, tenga fangaila mazui fangabu dödö na lö sangowalu zi samösa niha.” Börö daʼö, moguna taʼosinangegö ndra talifusöda si lö sangowalu. w20.08 28 ¶8-9

Ba zi hauga soi, ato niha somasi manemaʼö turia somuso dödö. Daʼö niʼalu-aluira ba zilalö. Hizaʼi, ba soi tanö böʼö, lö adöni dödö niha ba wanutunö sanandrösa khö Lowalangi mazui Sura Niʼamoniʼö. Hewisa göi ba mbanua si toröi yaʼugö? Gofu hewisa wanemaʼö niha, omasi Yehowa na lö taböhöli wanuriaigö irege iwaʼö wa no awai halöwö andre. Ba ginötö si no itatugöi Yehowa, mubatogö dania halöwö fanuriaigö. Aefa daʼö, ”awena dania amozua götö danö andre”. (Mat. 24:14) No ifatunö Yesu wa fakhili-khili ngaluo safuria andrö ba götö Noakhi. Me luo daʼö, oya sibai wamangoloi dödö irege lö labeʼe dödöra niha wamangelama nifaʼema Noakhi. Aboto ba dödö Yesu wa oya sibai göi wamangoloi dödö simane daʼö ba götöda iadaʼa, irege tebai taʼosambuaʼö dödöda ba wamalua fanuriaigö. Börö daʼö, ifangelama ndra soloʼö khönia Yesu, imane, ”Böi miförö.” (Mat. 24:37-39, 42; 2 Fe. 2:5) Moguna taʼoʼö mene-mene andrö, ba taforege enaʼö taʼosambuaʼö dödöda ba wamalua halöwö moroi khö Yehowa. w20.09 8 ¶1-2, 4

Ebua sibai wönu Zatana, ba alio ara, hasambalö tarasoi lua-lua wönunia andrö. (Fam. 12:12) Ba zi lö ara tö, hasambalö tetandraigö wamatida. Lö ara tö tohare ”wamakao sabölö-bölö si lö irai alua, iʼotarai me tewöwöi gulidanö irugi iadaʼa”. (Mat. 24:21) Ba ginötö daʼö, tola manö laʼuduni ita ira ösi nomoda, ba lö latehegö halöwö nifaluada ira samatörö. (Mat. 10:35, 36) Simane Razo Asa, hadia faduhu dödöda wa hasambalö itolo ba ilumöʼö ita Yehowa? (2 Ng. 14:11) No ifaʼanö wamatida Yehowa iʼotarai iadaʼa enaʼö tola tefaʼanö ita ba wanaögö fanandraigö salua ba zi so miföna. Iʼogunaʼö ”zawuyu si lö faröi ba satua-tua” ba wameʼe ’öda ba ginötö si tefaudu’, enaʼö lö tebulö aro wamatida. (Mat. 24:45) Hizaʼi, moguna göi taforege ba wangaʼaroʼö famatida khö Yehowa.—Heb. 10:38, 39. w20.09 18-19 ¶16-18

Tola iʼogunaʼö gehehania niʼamoniʼö Yehowa ba wamarou tödö niha si so kuaso ba wamalua somasi ia, na iwaʼö tödönia wa no sinangea mufalua daʼö. Tola ikhao lala nidanö si samösa niha, ba ifonumalö lala nidanö andrö ba zomasi dödönia. Simanö göi, tola iʼogunaʼö gehehania niʼamoniʼö Yehowa ba wondrönisi fangera-ngera niha si so kuaso irege lafalua zomasi dödönia. Ba ginötö ifalua daʼö Yehowa, tola terou dödö niha si so kuaso ba wangai angetula sangaʼasogö bua si sökhi ba nono mbanua Lowalangi. (Fareso göi Gesera 7:21, 25, 26.) Hadia zi tola tafalua? Tola mangandrö ita ”salahi razo hegöi ira samatörö fefu” ba ginötö lahalö gangetula si tola molua-lua ba lala wamosumange nifaluada. (1 Ti. 2:1, 2; Neh. 1:11) Baero daʼö, simane niha Keriso ba abad siföföna, tola tafaʼema wangandrö soroi ba dödö salahi ndra talifusöda si so ba gurunga.—Hal. 12:5; Heb. 13:3. w20.11 15 ¶13-14

Na yaʼugö zondröniaʼö famahaʼö ba Zura Niʼamoniʼö khö zi samösa niha, hasambalö owua-wua sibai dödömö ba ginötö tebayagö ia idanö! (1 Te. 2:19, 20) Tola tedou ia ba wamati ba tebayagö idanö börö me no öforege ba wanolo yaʼia, ba lafalua göi zimane daʼö ira talifusöda ba mbanua niha Keriso. Börö daʼö, na tebayagö idanö zi samösa nifahaʼö, tola mufotöi ia ’sura wanuno’ khö zamahaʼö yaʼia hegöi ba mbanua niha Keriso. (2 Ko. 3:1-3) Barö zi öfa fakhe andre, so mato 10.000.000 wamahaʼö ba Zura Niʼamoniʼö nifalua ba zi sagörö ulidanö, si no musura ba laporan dinas ero waŵa. Baero daʼö, so mato 280.000 niha nibayagö idanö ero röfi. Börö me so nasa niha tanö böʼö nifahaʼö ba Zura Niʼamoniʼö si zuta faʼato, hewisa lalada ba wanolo yaʼira enaʼö tebayagö idanö? Ibeʼe nasa ginötö ba niha Yehowa enaʼö tola tobali ira nifahaʼö Keriso. Börö daʼö, tafalua zabölö sökhi ba wanolo niha nifahaʼö ba Zura Niʼamoniʼö enaʼö itugu tedou ira ba wamati, ba tebayagö ira idanö ba waʼalio. No arakhagö ahori ginötö ba wamalua daʼö!—1 Ko. 7:29a; 1 Fe. 4:7. w20.10 6 ¶1-2

Lö iʼoʼö Razo Saulo niwaʼö Yehowa. Ba me itegu ia Samueli, lö omasi ifaduhuʼö Saulo wa no ifalua zala. Hizaʼi, iwaʼö wa tenga amuata si fasala sibai daʼö, ba ibörögö itahigö niha böʼö. (1 Sa. 15:13-24) No göi irai ifalua zimane daʼö Saulo ba zilalö. (1 Sa. 13:10-14) Alimagö sibai, itehegö so wayawasa ba dödönia. Börö me lö ibulöʼö lala wangera-ngerania, mofönu khönia Yehowa ba itimbagö ia. Enaʼö lö tafalua zimane nifalua Zaulo, moguna tasofu khöda samösa, ’Na so mene-mene nibasogu ba Daromali Lowalangi, hadia uʼalu-alui dane-dane enaʼö lö ufalua mene-mene andrö? Hadia uwaʼö tödögu wa tenga sala sebua sibai daʼö? Hadia utahigö niha böʼö ba gamuatagu andrö?’ Na fanema li nibeʼeda atö, yaʼia, moguna tabulöʼö lala wangera-ngerada. Na lö tafalua daʼö, tola manö tumbu ba dödöda wayawasa irege lö saʼae omasi Yehowa tobali si fahuwu khöda. w20.11 20 ¶4-5

Si bohou ebua, fili haniha nifosumangeu. Moguna sindruhu-ndruhu aboto ba dödöu hewisa mbua-bua Yehowa, hadia gohitö dödönia, ba hewisa lala enaʼö tola öfalua gohitö dödönia andrö. (Rom. 12:2) Tola möi fanolou fefu daʼö ba wangai angetula fondrege zi tohude ba waʼauriu, yaʼia daʼö ba wamosumange Yehowa. (Yos. 24:15) Andrö, böi böhöli ba wombaso hegöi ba wamahaʼö yaʼugö ba Zura Niʼamoniʼö si fao faʼowölö-ölö. Na öfalua daʼö, tola itugu öʼomasiʼö Yehowa ba itugu mamati ndraʼugö khönia. Ofönaiʼö wamalua ohitö dödö Yehowa ba waʼauriu. No ifabuʼu ulidanö Zatana andre wa hasambalö örasoi waʼowua-wua dödö na öʼogunaʼö waʼatua-tuamö ba zoguna khöu samösa. Hizaʼi sindruhunia, niha solohi faʼakayo andrö, ”oya nifoböröra khöra faʼafökhö”. (1 Ti. 6:9, 10) Hizaʼi, na öfondrondrongo niwaʼö Yehowa ba öʼofönaiʼö wamalua ohitö dödönia, hasambalö ”atua-tua ndraʼugö ba wangai angetula”.—Yos. 1:8. w20.10 30-31 ¶17-18

Me abad siföföna, turia somuso dödö nifaʼema Yesu zameʼe fanötöna ba niha gulidanö. Omasi Yesu na latohugö ira nifahaʼönia halöwö si no ibörögö. Omasi göi ia na lafaʼema duria somuso dödö andrö ”irugi wondrege danö”. (Hal. 1:8) Hizaʼi, tebai lafalua halöwö andrö na laʼodaligö waʼabölöra samösa. Moguna khöra ’zanolo’ si no ifabuʼu Yesu, yaʼia daʼö eheha niʼamoniʼö moroi khö Lowalangi. (Yoh. 14:26; Zak. 4:6) Latema geheha niʼamoniʼö ira nifahaʼö Yesu me Fendrakose 33 M. Börö wanolo geheha niʼamoniʼö, tola iʼanemaiʼö lafalua halöwö fanuriaigö. Buania, ha ba zi lö arara, so ribu waʼato niha sanemaʼö turia somuso dödö. (Hal. 2:41; 4:4) Hewaʼae na göna ira folohi ba gafuriata, lö laböhöli wanuriaigö ira nifahaʼö andrö. Lö khöra faʼataʼu börö me laʼandrö wanolo moroi khö Yehowa. Mangandrö ira, lamane, ”Ba yaʼaga sawuyumö andre, beʼe khöma waʼabarani ba wamaʼema taromalimö.” Aefa daʼö, fahöna khöra geheha niʼamoniʼö, ba ”lö ataʼu ira wamatunö taromali Lowalangi”.—Hal. 4:18-20, 29, 31. w20.10 21 ¶4-5

Hana wa tola faduhu dödöda wa no isusugi Yesu andrö Yehowa? Ato niha si falukha khö Yesu me no aefa tesusugi ia. (1 Ko. 15:5-7) Duma-dumania, iwaʼö Faulo wa no falukha Wetero (Kefa) khö Yesu me no aefa tesusugi ia. So göi ösa nifahaʼönia tanö böʼö samaduhuʼö wa sindruhu no alua daʼö. (Luk. 24:33, 34) Baero daʼö, iwaʼö göi Faulo wa no falukha ndra sinenge khö Yesu me no aefa tesusugi ia. Aefa daʼö, ”isamuzaigö wamalukhaisi ira talifusö si töra 500 niha”. Te salua ba Galilaia daʼa, simane nisura ba Mataiʼo 28:16-20. Ba gafuriata, ”ifalukhaisi Yakobo”. Tola manö, Yakobo nitutunö ba daʼa yaʼia daʼö akhi tiri Yesu si lö faduhu tödö ba wamobörö wa yaʼia andrö Mesia. (Yoh. 7:5) Me no iʼila wa no tesusugi Yesu, awena mamati Yakobo khönia. Sadöni dödöda, me isura zurania Faulo ba niha Gorindro te me döfi 55 M, ato niha sangila faʼatesusugi Yesu si lö nasa si mate. Börö daʼö, na so niha saombö tödö sanandrösa ba wanusugi Yesu, tola lasofu daʼö ba niha si no mangila faʼaluania. w20.12 3 ¶5, 7-8

Tola manö abua khöda ba wangokhögö lala wangera-ngera si sökhi na tataögö waʼatebai mboto mazui no ara göna ita fökhö. Andrö wanolo moroi khö Yehowa. Sindruhu sa, lö iʼogunaʼö dandra sahöli-höli dödö ba wamadöhö yaʼita iadaʼa. Hizaʼi, tola irara dödöda ba ibeʼe khöda waʼabölö enaʼö anau gölöda. (Si. 94:19) Duma-dumania, te ifarou dödö zi samösa talifusöda ba wamati ba wanolo yaʼita ba wamalua halöwö ba nomo mazui ba wowöli soguna. Te göi ifarou dödö dalifusöda ba wamati enaʼö fao ira khöda ba wangandrö. Mazui, tola manö itolo ita enaʼö ifuli itörö tödöda ngawalö zi möi fondrara dödö si so ba Daromalinia. Duma-dumania, tötönafö sanandrösa ba waʼauri soʼahonoa hegöi si lö fökhö ba gulidanö si bohou. (Rom. 15:4) Hewaʼae simanö, ato ba gotaluada zanöndra lala si tefaudu ba wamalua fanuriaigö. So samösa dalifusöda ira alawe sotöi Laurel sangogunaʼö mesin sanolo yaʼia ba wohanu-hanu. No tefadölö ia bakha ba mesin daʼö ba zi 37 fakhe faʼara! Baero daʼö, no göi irai göna ia fökhö kanker, itörö ngawalö operasi sebua, ba itaögö wökhö guli si tebai mufadöhö. Hewaʼae na alua khönia fefu daʼö, lö irai iböhöli wanuriaigö. Manuriaigö ia khö ndra perawat hegöi ba niha sangondrasi omonia ba so mato 17 waʼato niha si no itolo ba wangokhögö faʼaboto ba dödö sanandrösa khö Yehowa! w20.12 24 ¶9; 25 ¶12

Moguna wanolo khö Waulo. Te me döfi 56 M, lasöbi ia baero gosali si so ba Yeruzalema ira niha sato, ba latandraigö wamunu yaʼia. Mahemolunia, laʼohe Waulo föna Zangetuʼö Huku, ba arakhagö labunu ia ira udunia. (Hal. 21:30-32; 22:30; 23:6-10) Ba ginötö daʼö, tola manö manofu-nofu Waulo, ’Hawaʼara tö tola utaögö wamakao si göna khögu andre?’ Hadia wanolo nitema Waulo? Ba mbongi me no aefa mukuru ia, mozizio ba zingania ”Zoʼaya” yaʼita Yesu Keriso, ba imane khönia, ”Böi ataʼufi! Böi böhöli wamaduhuʼö ba Roma, simane famaduhuʼöu yaʼo ba Yeruzalema.” (Hal. 23:11) Tatu tefarou sibai dödö Waulo me irongo mbuʼusa li andrö! Isuno ia Yesu ba halöwö fanuriaigö si no ifalua ba Yeruzalema. Ifabuʼu göi khönia Yesu wa hasambalö telumöʼö ia ofeta ba Roma, enaʼö tola ifalua halöwö fanuriaigö ba daʼö. Me no aefa itema mbuʼusa li andrö Faulo, tatu irasoi waʼahono dödö simane nirasoi nono side-ide nitalagui namania. w20.11 12 ¶1; 13 ¶3-4

Tötönafö nibeʼe Yehowa andrö ”no amaedola zao ba waʼaurida”. Eluahania, tola itolo ita enaʼö lö mangiwa dödöda hewaʼae na alua khöda gabula dödö mazui tarasoi waʼaombö-aombö dödö. Angeragö dötönafö nifabuʼu Yehowa ba zi so miföna. Ba luo daʼö, lö saʼae sangaʼasogö khöu faʼaombö-aombö dödö. (Yes. 65:17) Khalaigö na so dania ndraʼugö ba gulidanö si bohou safönu faʼohahau dödö ba si lö faʼalösökhi. (Mi. 4:4) Tola göi öʼaroʼö waʼafaduhu dödöu ba dötönafö ba zi so miföna, na ötutunö daʼö ba niha böʼö. Börö daʼö, forege wanuriaigö hegöi ba wombaliʼö nifahaʼö. Na öfalua daʼö, tola ’faduhu dödöu wanötöna andrö irugi gamozua’. (Heb. 6:11) Börö me no ahatö gamozua götö danö andre, itugu oya gabula dödö sangaʼasogö khöda faʼaombö-aombö dödö. Tola lö mangiwa ita na alua khöda gabula dödö, börö me taʼodaligö Yehowa, tenga faʼabölöda samösa. Dataforomaʼö moroi ba gamuatada wa mamati ita ba mbuʼusa li Yehowa andre: ”Na lö miböhöli waʼafaduhu dödö ba lö mangiwa dödömi, hasambalö abölö ami.”—Yes. 30:15. w21.01 7 ¶17-18

Itutunö Yakobo 5:11 wa moʼamakhaita waʼomasi Yehowa ba mbua-bua tanö böʼö sangahatöʼö yaʼita khönia, yaʼia daʼö faʼahakhö dödö. (2 Mo. 34:6) Sambua lala Yehowa ba wangoromaʼö faʼahakhö dödönia yaʼia daʼö iʼefaʼö zala si no tafalua. (Si. 51:1) Ba Zura Niʼamoniʼö, faʼahakhö dödö andrö tenga ha fangefaʼö sala. Hizaʼi, moʼamakhaita göi daʼa ba nirasoi zi samösa niha ba ginötö iʼila niha sabu tödö, ba tefarou dödönia ba wanolo niha daʼö. Iwaʼö Yehowa wa faʼedönania ba wanolo yaʼita, abölö ebua moroi ba waʼomasi zi samösa ina khö nononia. (Yes. 49:15) Na göna ita abula dödö, faʼahakhö dödö Yehowa zamarou yaʼia ba wanolo yaʼita. (Si. 37:39; 1 Ko. 10:13) Tola taforomaʼö waʼahakhö dödö khö ndra talifusöda na taʼefaʼö zalara ba lö taʼiröʼö waʼabao dödöda khöra hewaʼae na no laʼafökhöiʼö dödöda. (Ef. 4:32) Hizaʼi, lala sabölö tohude ba wangoromaʼö faʼahakhö dödö khö ndra talifusöda yaʼia daʼö tatolo ira na lataögö gabula dödö. No taʼoʼö duma-duma Yehowa fondrege zebua ba wangoromaʼö faʼomasi.—Ef. 5:1. w21.01 21 ¶5

So zinangea iʼangenanöi ira matua si tobali högö yomo ba nomo. Böi talafo oya iʼogunaʼö ginötönia ba wombönökhi soguna khöra sero maʼökhö, irege lö inötönia ba wombönökhi soguna khöra ba wamati ba lö iforege enaʼö larasoi waʼahono dödö. Moguna ifahaʼö nösi nomonia si fao faʼomasi. Ifahaʼö ba ibeʼe khöda degu-tegu Yehowa börö me omasi ia wanolo yaʼita. (Heb. 12:7-9) Simane Amania, ifahaʼö göi niha si so barö wondröniaʼönia Yesu si fao faʼomasi. (Yoh. 15:14, 15) Hewaʼae na abeʼe mene-mene nibeʼenia, ifaʼema daʼö si fao faʼasökhi dödö. (Mat. 20:24-28) Aboto ba dödönia wa niha si lö moʼahonoa ita ba asese tafalua zala. (Mat. 26:41) Ira matua si tobali högö yomo ba nomo soloʼö duma-duma Yehowa hegöi Yesu, lö olifu ia wa lö moʼahonoa nösi nomonia. Na lafalua zala, lö mofönu ia khöra si fao fehede sabeʼe hegöi bözi-bözi. (Kol. 3:19) Hizaʼi, iʼoʼö goi-goi nisura ba Galatia 6:1, ba ’ihaogö’ wameʼe tegu-tegu ba nösi nomonia börö me iʼila wa niha si lö moʼahonoa göi ia. Simane Yesu, aboto ba dödönia wa lala fondrege zi sökhi ba wamahaʼö, yaʼia daʼö moroi ba duma-duma nibeʼenia. w21.02 6 ¶16-18

No itehegö nosonia Yesu tobali höli, ba iʼogunaʼö daʼö Yehowa ba wangöhöli fefu niha si farahu ba mbanua niha Keriso. (Mrk. 10:45; Hal. 20:28; 1 Ko. 15:21, 22) Börö daʼö, tefaudu sibai na Yesu nifataro Yehowa tobali högö mbanua niha Keriso. Daʼö mbörö wa Yesu zinangea mamazökhi amakhoita soguna ba zi samösa niha, ba zi sambua ösi nomo, hegöi ba mbanua niha Keriso maʼafefu. Yaʼia göi zinangea motatugöi enaʼö tafalua gamakhoitania andrö. (Gal. 6:2) Hizaʼi, tenga ha daʼö nifalua Yesu. Irorogö ba iʼomasiʼö ita zamösana. (Ef. 5:29) Sambua lala nifalua ndra talifusöda ira alawe ba wangoromaʼö wa lafosumange Keriso yaʼia daʼö laʼoʼö wanuturu lala nibeʼe ndra matua si no mufataro ba wondrorogö yaʼira. Sambua lala nifalua ndra talifusöda ira matua ba wangoromaʼö wa aboto ba dödöra gamakhoita sanandrösa ba wondröniaʼö, yaʼia daʼö laʼameʼegö tödö ba lafosumange ndra talifusöra ira alawe. Na fefu niha ba mbanua niha Keriso aboto ba dödöra ba laʼameʼegö tödö goi-goi sanandrösa ba wondröniaʼö, tola laʼasogö waʼohahau dödö ba mbanua niha Keriso. Ba sabölö tohudenia, tefolakhömi Namada sebua faʼomasi sotöi Yehowa si so ba zorugo. w21.02 18-19 ¶14-17

Me toröi Dawido hegöi ono buania ba danö Wilisiti ba waminiʼö yaʼia moroi khö Zaulo, laröi nösi nomora ba möi ira fasuwö. Gasa-gasa wofanöra, tohare nudu ba worabu okhötara ba laʼoloiʼö nösi nomora. Börö me no ara tobali saradadu Dawido, tola manö iwaʼö tödönia wa aoha khönia wangalui lala ba wangefaʼö niha niʼoloiʼö andrö. Hizaʼi, iʼandrö wanuturu lala moroi khö Yehowa. Manofu Dawido khö Yehowa, ”Hadia abölö sökhi na ugohi niha sorabu andrö?” Iwaʼö Yehowa khö Dawido wa abölö sökhi na möi ia ba wangefaʼö yaʼira, ba ifaduhuʼö khönia wa hasambalö mofozu ia ba wamalua daʼö. (1 Sa. 30:7-10) Hadia wamahaʼö si tola mihalö moroi ba zalua andre? Miʼandrö mene-mene moroi ba niha böʼö fatua lö mihalö gangetula. Mifatunöisi khö ndra satuami yaʼami si bohou ebua. Tola göi miʼandrö mene-mene si sökhi moroi khö ndra satua sokubaloi si no ara mangai halöwö. Faduhu dödö Yehowa khö ndra matua si no ifataro andre, ba tola göi mifaduhusi tödö ira. No ”buala” moroi khö Yehowa ira ba mbanua niha Keriso. (Ef. 4:8) Oya mbua nitemami na miʼoʼö wamatira ba mifondrondrongo mene-mene si sökhi nibeʼera. w21.03 4-5 ¶10-11

Na lö tafalua zi no tafahaʼö yaʼita, iwaʼö Yesu wa fagölö ita simane ira matua samazökhi omonia ba dete gawu. Iforege wohalöwö, hizaʼi zaya-zaya gölö. Hadia mbörö? Börö me hasambalö adudu nomonia andrö na ilau bade hegöi molö. (Mat. 7:24-27) Simanö göi, na lö tafalua zi no tafahaʼö yaʼita. Lua-luania, awuwu wamatida na göna ita abula dödö mazui famakao. Hizaʼi, na tafalua zi no tafahaʼö yaʼita, tola tahalö gangetula sabölö sökhi, itugu tarasoi waʼahono dödö, ba itugu aro wamatida. (Yes. 48:17, 18) Enaʼö lö faröi ita khö Yehowa na göna ita abula dödö, böi taböhöli wangandrö. Moguna göi owölö-ölö ita ba wamahaʼö yaʼita ba Daromalinia. Ba böi olifu ita wa sabölö tohude sinangea tafalua yaʼia daʼö ba wamolakhömi Yehowa. Tola faduhu dödöda wa lö iröi ita Yehowa, ba samösa lö si tola mamakiko faʼomasinia khöda.—Heb. 13:5, 6. w21.03 15 ¶6; 18 ¶20