Baŵa si Fitu

Moguna fahuwu ita khö Yesu enaʼö tefondrondrongo wangandröda. Lö obönö na tawaʼö wa mangandrö ita ”ba döi Yesu”. Moguna aboto ba dödöda hewisa lala Yehowa ba wangogunaʼö Yesu ba wameʼe fanema li ba wangandröda. Imane Yesu khö ndra sinengenia, ”Fefu hadia niʼandrömi ba döigu hasambalö ufalua.” (Yoh. 14:13) Hewaʼae na Yehowa zamondrondrongo hegöi sameʼe fanema li ba wangandröda, no ibeʼe khö Yesu halöwö ba wamalua angetulania. Andrö, fatua lö ibeʼe wanema li ba wangandröda Yehowa, ifaigi ua hadia no tafalua mene-mene nibeʼe Yesu. Duma-dumania, imane Yesu, ”Na miʼefaʼö zala niha böʼö, iʼefaʼö göi zalami Amami si so ba zorugo. Ba na lö miʼefaʼö zala niha böʼö, ba lö göi iʼefaʼö zalami Amami.” (Mat. 6:14, 15) Andrö, moguna taforomaʼö waʼasökhi dödö ba niha böʼö, simane nifalua Yehowa hegöi Yesu khöda! w20.04 21 ¶6

Iforege zinenge sotöi Faulo ba wangalui hadia zadöni dödö niha nifalukhaisinia, ba ifaudugö ba daʼö lalania wamörögö fahuhuosa. Duma-dumania, me manuriaigö Waulo ba Lisitera, ambö aboto ba dödöra nösi Zura Niʼamoniʼö. Börö daʼö, ha si no aboto ba dödöra nitutunö Waulo, duma-dumania sanandrösa ba mbaŵa wamasi mazui ba wangokhögö faʼomuso dödö ba waʼauri. Iʼogunaʼö wehede hegöi duma-duma salio aboto ba dödö zamondrongo. Forege ba wangiʼila hadia zadöni dödö niha si so ba nahiamö wanuriagö, ba faudugö duho nitutunömö. Hewisa lalamö enaʼö tola öʼila hadia zadöni dödö zi samösa niha me öʼondrasi ia mazui me möiʼö ba nomonia? Moguna önehegö ngawalö zi so ba zi fasuimö. Me tohare ndraʼugö, tola manö mohalöwö ia ba wondrorogö sinanönia, ibaso-baso mbuku, ihaogö moto mazui hondrania si no tekiko, mazui ba wamalua halöwö tanö böʼö. Na tefaudu, tola öbörögö wahuhuosa khönia sanandrösa ba halöwö nifaluania ba ginötö daʼö. (Yoh. 4:7) Moroi ba lala wonukha zi samösa niha, tola taʼila hezo moroi mbanuania, hadia halöwönia, mazui tim olahraga somasi ia. w20.04 11 ¶11-12

Börö waʼaombö dödö sabölö-bölö, so ösa ndra talifusöda sanizi-nizi ba lö khöra faʼabarani na falukha ira ba niha ba waʼaurira si ero maʼökhö. Tola manö lö ohahau dödöra na so ira ba gotalua niha sato. Hewaʼae simanö, lö laröi weʼamöi ba gangowuloa hegöi ba kebaktian. Mazui, tola manö abua khöra fahuhuo ba niha si lö laʼila. Hizaʼi, hasambalö manuriaigö ira ba niha. Na alua khöu zimane daʼö, tenga ha yaʼugö zorasoi yaʼia. Ato göi ndra talifusöda zorasoi simane daʼö. Törö tödöu wa omuso dödö Yehowa ba wamorege si no öfalua soroi ba dödö. Irugi iadaʼa, lö faröi ndraʼugö. Daʼö dandra wa ifahowuʼö ndraʼugö Yehowa ba ibeʼe waʼabölö soguna khöu. (Fil. 4:6, 7) Börö daʼö, na lö öböhöli wamosumange Yehowa hewaʼae ötaögö waʼatebai mboto mazui fökhö wangera-ngera, yafaduhu dödöu wa tola ibeʼe khöu waʼomuso dödö Yehowa. Oya ba gotaluada zi tebai boto. Hewaʼae simanö, tola anau gölöda ba wagohisa. (2 Ko. 4:16) Börö wanolo Yehowa, tola fagohi ita irugi gamozua! w20.04 31 ¶20-21

Ifazökhi gulidanö andre Yehowa ba lala sahöli dödöda. Daʼa zangoromaʼö wa atua-tua sibai Lowalangi. (Heb. 3:4) No faböʼö gulidanö andre moroi ba danö böʼö. Hadia mbörö? Börö me ha ba gulidanö andre tola terorogö waʼauri niha. Ulidanö andre, tola mufagölösi ia simane köfa safönu niha si so ba dalu nasi sebolo. Hizaʼi, so ösa waʼafaehu. Khalaigö atö daʼa: Hadia zalua na duma-dumania fefu niha si so yawa ba göfa andrö moguna lafazökhi samösa göra, idanö, hegöi oksigen, ba tebai göi latiboʼö zasao baero ba göfa? Hasambalö mate fefu niha si so ba yawa göfa daʼö. Hizaʼi, tenga simane köfa daʼö gulidanö si toröi yaʼita. Ulidanö andre tola iʼasogö zoguna ba waʼauri niha si miliaran faʼato. Tola iʼasogö oksigen, ö, hegöi idanö si tola taʼogunaʼö, ba lö irai ahori fefu daʼö. Sasao si so ba gulidanö andre, lö latiboʼö baero ba luar angkasa. Hewaʼae simanö, lö tebulö wa no nahia waʼatoröi si sökhi gulidanö andre. Hadia mbörö? Börö me no itatugöi Yehowa enaʼö tola alua siklus daur ulang ba gulidanö andre. w20.05 20 ¶3-4

Lö saʼae ibiniʼö Satana ba wamatunö wa si falimo Lowalangi. Daʼö mbörö wa mufotöi ia Afökha, eluahania samöbögö si lö duhu. Telimo Khawa irege faduhu dödönia ba wehede Zatana. (1 Ti. 2:14) Börö me abölö faduhu dödönia khö Zatana moroi khö Yehowa, ihalö gangetula si fasala. Lö iʼoʼö niwaʼö Yehowa, ba iʼa mbua geu si no itatugöi Lowalangi enaʼö böi laʼa. Ba gafuriata, ibeʼe göi mbua geu andrö khö Gadamo. (1 Mo. 3:6) Angeragö hewisa zinangeania Khawa ba wameʼe fanema li khö Zatana. Khalaigö na simane daʼa niwaʼönia, ”Lö uʼila haniha ndraʼugö. Hizaʼi, aboto ba dödögu hewisa zindruhunia Namagu andrö sotöi Yehowa. Uʼomasiʼö ba faduhu dödögu khönia. No ibeʼe khöma fefu hadia ia. Hana wa barani sibai ndraʼugö wangumaʼö simane daʼö! Ofanö!” Na lö faröi Khawa, ba iwaʼö wehede simane daʼö, tatu omuso sibai dödö Yehowa! (Amd. 27:11) Hizaʼi, lö laʼokhögö waʼomasi si lö faröi khö Yehowa ira Adamo hegöi Khawa. Daʼö mbörö wa lö laʼoʼawögö döi Yehowa me iböbögö khönia zi lö duhu Satana. w20.06 4 ¶10-11

No sinangea musuno ndra talifusöda ira alawe ba ngawalö halöwö nifaluara ba wamosumange Yehowa. Duma-dumania, fao ira ba wamasindro hegöi ba wondrorogö tomosa, latuhini kelompok sangogunaʼö li böʼö, ba mangai halöwö ira ba Mbetieli. Fao göi ira ba wanolo ndra talifusöda si göna bencana, falulu fohalöwö ira ba wamoʼeluaha publikasida, ba mangai halöwö ira tobali perintis hegöi utusan injil. Baero daʼö, latolo göi ndra foʼomora ira matua ba wamalua noro dödöra ba mbanua niha Keriso hegöi ba organisasi. Ira talifusöda si no amaedola ”buala ba niha” andre, tebai sindruhu-ndruhu lafalua halöwöra na lö fotuhini moroi khö ndra foʼomora ira alawe. (Ef. 4:8) Aboto ba dödö ndra satua sokubaloi satua-tua wa ”hulö ngawawa zaradadu sebua” ndra talifusöda ira alawe si falulu fohalöwö khöra ba wamalua halöwö ba wamati, ba si toʼölönia, onekhe sibai ira ba wamalua halöwö fanuriaigö. Baero daʼö, aboto göi ba dödö ndra satua sokubaloi wa onekhe sibai ndra talifusöda ira alawe si no alawa döfi ba wanolo ndra talifusöda ira alawe sawuyu-wuyu si göna abula dödö. (Tit. 2:3-5) Sindruhu-ndruhu wa no sinangea taʼomasiʼö ba taʼandrö saohagölö khö ndra talifusöda ira alawe! w20.09 23 ¶13-14

Lö irai iʼolifugö niha si no irai mamosumange yaʼia Yehowa, hewaʼae na ba gafuriata, laböhöli wamalua halöwö ba wamati. Lö göi irai iʼolifugö halöwö ba wamati si no lafalua. (Heb. 6:10) Ibeʼe sambua duma-duma si tofakha ba dödöda sinenge sotöi Yesaya, ba wangoromaʼö hewisa lala Yehowa ba wondrorogö ono mbanuania. Imane Yesaya, ”Ikubaloi rorogöfönia simane kubalo. Iʼowuloi nono mbiri-biri faoma taʼionia, ba isakhei ira ba dötöʼania.” (Yes. 40:11) Börö me Kubalo Sebua ia, hewisa dödö Yehowa na so nono mbiri-birinia si no elungu? Tola taʼila wanema linia ba wehede Yesu khö ndra nifahaʼönia, me imane, ”Hewisa moloʼö yaʼami? Na so zokhö biri-biri si 100 ngaʼeu ba sageu zelungu, hadia lö iröi zi 99 ngaʼeu ba hili ba wangalui si sageu si no elungu andrö? Ba na no isöndra, abölö omuso dödönia wamaigi si sageu andrö moroi ba mbiri-biri si 99 ngaʼeu si lö elungu.”—Mat. 18:12, 13. w20.06 19-20 ¶8-9

Gofu hadia halöwö nifaluada ba wamosumange Yehowa, no töi si sökhi daʼö. (Si. 27:4; 84:10) Na so samösa dalifusöda ira matua sanema halöwö ba organisasi, no si sökhi sibai daʼö. Hewaʼae na no itema halöwö simane daʼö, tenga daʼö geluahania wa abölö tohude ia moroi ba niha böʼö. (Luk. 17:7-10) Moguna ihalö gangetula ba wamalua halöwö soguna ba niha böʼö si fao fangide-ngideʼö. (2 Ko. 12:15) No itutunö Sura Niʼamoniʼö sanandrösa ba niha sangumaʼö tödöra wa abölö tohude ira moroi ba niha böʼö. Duma-dumania, omasi Dioterefe na yaʼia zi ”tobali siföföna” ba mbanua niha Keriso. (3 Yo. 9) Si fao fayawasa, ifalua zi tenga halöwönia Usia. (2 Ng. 26:16-21) Iforege Abisalomi ba wangai tödö ndraono Gizaraʼeli börö me omasi ia tobali razo. (2 Sa. 15:2-6) Ba waö-waö salua nitutunö ba Zura Niʼamoniʼö andre, tola taʼila wa lö omasi Yehowa ba niha sangalui lakhömi ba khönia samösa. (Amd. 25:27) Ba gafuriata, hasambalö alua gabula dödö ba niha si fayawa hegöi ba niha somasi tobali samatörö.—Amd. 16:18. w20.07 4 ¶7-8

So ösa nösi nomo niha Keriso si findra ba soi böʼö ba wangalui halöwö mazui börö me alua gabula dödö ba soira. Ba zekola ndraonora si bohou, tola manö mufahaʼö ira ba li niʼogunaʼö ba soi daʼö. Moguna göi laforege ira satua ba wamahaʼö yaʼira ba li niʼogunaʼö ba daʼö enaʼö tola lasöndra halöwöra. Hizaʼi, hadia zinangea lafalua na so sambua mbanua niha Keriso mazui kelompok sangogunaʼö li niʼogunaʼö ba soira si oföna? Hezo mbanua niha Keriso sinangea farahu yaʼira? Hadia lafili wefao ba mbanua niha Keriso sangogunaʼö li niʼogunaʼö ba soira si bohou, mazui farahu ira ba mbanua niha Keriso sangogunaʼö li niʼogunaʼö ba soira si oföna? Moguna itatugöi högö yomo ba nomo hezo mbanua niha Keriso sinangea farahu nösi nomonia. Moguna iʼangeragö hadia gangetula sabölö sökhi ba nösi nomonia. Börö me högö yomo ba nomo zinangea motatugöi daʼö, moguna taʼosinangegö gangetula nihalönia. Gofu hadia gangetula nihalönia, moguna tatuhini daʼö, ba tatemaʼö ia hegöi ösi nomonia si fao faʼomasi.—Rom. 15:7. w20.08 30 ¶17-18

Na omasi tatema waʼabölö moroi khö Yehowa, böi so ba gera-erada wa faʼabölö mbotoda, faʼalawa zekolada, si toʼölö mufalua ba mbanuada, mazui faʼakayo niʼokhögöda, zotatugöi hawaʼebua mbölida ba wamaigi Lowalangi. Tenga daʼö mbörö wa moguna ita khö Yehowa. Sindruhunia, ba gotalua nono mbanua Lowalangi, ”lö ato zatua-tua moloʼö famaigi niha, lö ato zebua kuaso ba lö ato zi otarai ba nösi nomo si tehöngö”. (1 Ko. 1:26) Börö daʼö, böi tehegö fefu daʼö tobali taha-tahamö ba wamosumange Yehowa. Hizaʼi, moguna öʼokhögö lala wangera-ngera si tefaudu, wa daʼö zameʼe khöu inötö ba wangiʼila hewisa wameʼe Yehowa khöu faʼabölö. Duma-dumania, na ataʼu ndraʼugö ba niha sangobousi famatimö, angandrö khö Yehowa enaʼö ibeʼe khöu waʼabarani ba wanutunö zi no öfaduhusi tödö. (Ef. 6:19, 20) Ba ginötö ötaögö wökhö sabölö-bölö, andrö khö Yehowa ba wameʼe khöu faʼabölö enaʼö lö aetu owölö-ölö ndraʼugö ba wamalua halöwö ba wamati. Ero na öʼila wa itolo ndraʼugö Yehowa, itugu tedou wamatimö ba itugu abölö ndraʼugö. w20.07 16 ¶9

Na omasi ita taʼofönaiʼö Wamatörö Lowalangi ba waʼaurida, moguna taʼoʼö duma-duma Gaberahamo, saoha ölö ba wanehegö hadia zi no iʼokhögö enaʼö tola iʼomusoiʼö dödö Yehowa. (Mrk. 10:28-30; Heb. 11:8-10) Böi tötöna wa lö alua gabula dödö ba waʼaurimö. Hasambalö göna abula dödö zi samösa niha hewaʼae na no ifosumange Yehowa sandrohu faʼaurinia. (Yak. 1:2; 1 Fe. 5:9) Iadaʼa, moguna itugu taʼosambuaʼö dödöda ba dötönafö ba zi so miföna. Hadia mbörö? Fefu zalua ba gulidanö andre zangoromaʼö wa no so ita ba gangohorita ngaluo safuria. Oya dania howu-howu nitemada barö Wamatörö Lowalangi. Sambua ba gotaluania yaʼia daʼö tola falukha ita ba niha niʼomasiʼöda si no mate. Ba ginötö daʼö, börö me mamati Gaberahamo ba iforomaʼö waʼebolo dödö ba wombaloi nifabuʼu Yehowa, hasambalö isusugi ia Yehowa awö nösi nomonia, ba latema waʼauri si lö aetu ba gulidanö. Na omasiʼö so ndraʼugö dania ba daʼö ba wamaondragö yaʼira, hadia zinangea öfalua? Moguna öʼoʼö duma-duma Gaberahamo. Böi mamalö foromaʼö waʼaoha gölö ba wotuhini Famatörö Lowalangi, böi aetu okhögö wamati hewaʼae na ötaögö gabula dödö, ba döna-döna Yehowa si fao faʼebolo dödö.—Mi. 7:7. w20.08 5-6 ¶13-14; 7 ¶17

Aboto ba dödöda wa tola isusugi ita Yehowa hewaʼae na labunu ita ira ududa. Faduhu dödöda wa tebai lafabali ita khö Yehowa, gofu hadia ia nifaluara khöda. (Rom. 8:35-39) Buania, tola tafosumange Yehowa si fao faʼabarani ba lö faröi ita khönia. Börö dötönafö ba wanusugi moroi khö Yehowa, lö eluaha fakake niʼogunaʼö Zatana ba wametaʼu yaʼita. Dötönafö andre zangoromaʼö wa atua-tua sibai Yehowa. Na lawaʼö ira ududa wa labunu ita, hadia mamati ita wa hasambalö isusugi ita Yehowa? Enaʼö tola taʼila wanema linia, moguna taʼangeragö wanofu-nofu daʼa: ’Ba gangetula si gide-ide nihalögu ero maʼökhö, hadia tola oroma wa mamati ndraʼo khö Yehowa? Moroi ba lala waʼaurigu, hadia tola oroma wa mamati ndraʼo ba mbuʼusa li Yehowa wa hasambalö ibeʼe zoguna khögu na uʼofönaiʼö Wamatörönia?’ (Luk. 16:10; Mat. 6:31-33) Na fanema li nibeʼemö ba wanofu si dombua andrö yaʼia daʼö tola, no tefaʼanö ndraʼugö ba wanaögö fanandraigö salua ba zi so miföna.—Amd. 3:5, 6. w20.08 17-18 ¶15-16

Moguna onekhe ita ba wangogunaʼö Daromali Lowalangi. Tola tatema wamomaha simane daʼö na möi ita ba gangowuloa. Hizaʼi, na omasi tatolo niha enaʼö faduhu dödöra wa tola möi fanolora Zura Niʼamoniʼö, moguna owölö-ölö ita ba wamalua famahaʼö samösa ba Zura Niʼamoniʼö enaʼö itugu aro wamatida. Börö daʼö, lö obönö na ha asala tabaso manö Zura Niʼamoniʼö. Moguna taʼangerönusi hadia nibasoda ba tafalua riset ba publikasida enaʼö tola aboto ba dödöda ayati Zura Niʼamoniʼö ba taʼila hewisa wanutunö nösinia. (1 Ti. 4:13-15) Na no tafalua daʼö, awena tola taʼogunaʼö Daromali Lowalangi ba wamahaʼö niha böʼö. Sakali tö, lö obönö na ha asala tabaso khöra ayati. Omasi tatolo ira enaʼö aboto ba dödöra ayati andrö hegöi bua nitemara moroi ba daʼö. Na owölö-ölö ita ba wamalua famahaʼö samösa ba Zura Niʼamoniʼö, tola itugu onekhe ita ba wangogunaʼö Daromali Lowalangi ba wamahaʼö niha böʼö.—2 Ti. 3:16, 17. w20.09 28 ¶12

Tola itugu taʼosambuaʼö dödöda ba wamalua halöwö fanuriaigö na taʼangerönusi fefu zi no ifalua khöda Yehowa ba wanolo yaʼita. Duma-dumania, no iʼasogö gö ba wamati soya sibai, ba no mufaʼanö daʼö ba publikasi nicetak hegöi elektronik, rekaman audio ba video, hegöi ba acara JW Broadcasting. Angeragö atö: Ba situs web resmi organisasida, no tehenaigö informasi ba zi töra 1.000 ngawalö li! (Mat. 24:45-47) Lala tanö böʼö si tola tafalua enaʼö lö aetu taʼosambuaʼö dödöda ba wanuriaigö yaʼia daʼö taʼoʼö duma-duma Yesu. Hewaʼae na oya zi tobali famangoloi dödönia, tola iʼosambuaʼö dödönia ba wanuriaigö sindruhu. (Yoh. 18:37) Duma-dumania, lö adöni dödö Yesu me iforomaʼö khönia Satana ”fefu wamatörö ba gulidanö awö lakhöminia”. (Mat. 4:8, 9) Lö göi tedönisi dödö Yesu me ato niha somasi mombaliʼö ia Razo. (Yoh. 6:15) Lö adöni dödö Yesu ba wolohi faʼakayo, ba lö göi ataʼu ia hewaʼae na göna ia folohi. (Luk. 9:58; Yoh. 8:59) Na tatörö tödöda mene-mene Waulo nitutunö ba ayati maʼökhö andre, tola taʼosambuaʼö dödöda ba wanuriaigö hewaʼae na tetandraigö wamatida. w20.09 9-10 ¶6-7

Tatu taʼandrö sibai saohagölö ba wamorege nifalua ndra talifusöda ira alawe ba mbanua niha Keriso! Latuhini waö-waö halöwö nifalua ba gangowuloa, möi ira manuriaigö turia somuso dödö hegöi ba wamahaʼö niha böʼö, ba fao ira ba wondrorogö Nahia Gangowuloa. Baero daʼö, laforomaʼö göi wa laʼameʼegö tödö ndra talifusöra ba wamati. Hizaʼi, göna göi ira abula dödö. So ba gotaluara zondrorogö satuara si no alawa döfi. So ösa zanaögö fanaisi moroi ba nösi nomora, ba so göi zi no tobali lakha mbanua irege moguna laforege samösa ba wangaʼasogö soguna khö ndraonora. Ba gulidanö andre iadaʼa, asese laʼosiwawöi ndra alawe. Daʼö mbörö wa moguna tatuhini ndra talifusöda ira alawe ba mbanua niha Keriso. Baero daʼö, no göi ifarou dödöda Sura Niʼamoniʼö ba wotuhini yaʼira. Duma-dumania, iʼandrö Faulo ba mbanua niha Keriso si so ba Roma enaʼö latemaʼö Woʼibe, ba ’latolo ia ba zoguna khönia’. (Rom. 16:1, 2) Teʼebuaʼö Waulo moroi ba mbanua sangosiwawöi ira alawe. Hizaʼi, börö me no tobali ia niha Keriso, iʼoʼö duma-duma Yesu ba wangosinangegö ira alawe hegöi ba wangoromaʼö khöra faʼasökhi dödö. w20.09 20 ¶1-2

Tolo niha nifahaʼöda ba Zura Niʼamoniʼö enaʼö itugu omasi ia ba wombaliʼö nifahaʼö. Tola tabeʼe wanofu-nofu khönia: ”Hadia mbua si no örasoi börö me no öfalua zi no ifahaʼö Sura Niʼamoniʼö? Hadia moguna göi larongo duria somuso dödö andre ira niha böʼö? Hadia zi tola öfalua ba wanolo yaʼira?” (Amd. 3:27; Mat. 9:37, 38) Törö tödömö wa no ibeʼe khöda halöwö Yesu ba wanolo niha böʼö enaʼö ’laʼoʼö fefu niwaʼönia’. Tefarahu ba daʼö zi dombua oroisa fondrege zebua, yaʼia daʼö ba wangomasiʼö Lowalangi hegöi ba wangomasiʼö niha böʼö. Moʼamakhaita sibai goroisa andre ba halöwö fanuriaigö hegöi ba wombaliʼö nifahaʼö. (Mat. 22:37-39) Dane-dane sabölö tohude wa tafalua wanuriaigö yaʼia daʼö faʼomasi. Aboto ba dödöda wa so ösa niha nifahaʼö ba Zura Niʼamoniʼö sorasoi faʼataʼu ba wamalua halöwö fanuriaigö. Hizaʼi, tola tafaduhuʼö ba dödöra wa hasambalö itolo ira Yehowa ba wolawa faʼataʼura ba niha.—Si. 18:1-3; Amd. 29:25. w20.11 3 ¶6-8

Ba ginötö öfaʼanö ba wamalua sambua famahaʼö ba Zura Niʼamoniʼö, ohe ba wangandrö niha nifahaʼöu hegöi famahaʼö soguna khönia. Andrö wanolo moroi khö Yehowa enaʼö tola öfalua wamahaʼö ba Zura Niʼamoniʼö ba lala salio tofakha ba dödönia. Böi olifuʼö hadia gohitö dödömö, yaʼia daʼö ba wanolo yaʼia enaʼö tedou ba wamati ba tebayagö idanö. So nasa zinangea ifalua ero maʼökhö niha nifahaʼöda. Moguna fahuhuo ia khö Yehowa ero maʼökhö, ba ifondrondrongo wehedenia. Tola ifondrondrongo Yehowa na ibaso Zura Niʼamoniʼö ero maʼökhö. (Yos. 1:8; Si. 1:1-3) Farou dödö niha nifahaʼömö enaʼö ilau mangandrö ero maʼökhö. Moguna mangandrö ami fatua lö mibörögö hegöi na no miʼasiwai wamahaʼö ba Zura Niʼamoniʼö. Faʼema wangandrö soroi ba dödö, ba tötöi döinia ba wangandrö nifaʼemamö. Ba ginötö irongo daʼö, tola iʼila hewisa wamalua fangandrö soroi ba dödö. Aboto göi ba dödönia wa moguna itandrösaigö wangandrönia khö Lowalangi Yehowa, ba ifaʼema daʼö ba döi Yesu Keriso. (Mat. 6:9; Yoh. 15:16) Khalaigö atö, na ero maʼökhö ibaso Zura Niʼamoniʼö niha nifahaʼömö (ifondrondrongo Yehowa) ba ilau mangandrö (fahuhuo khö Yehowa), tatu itugu aro wahuwusania khö Yehowa!—Yak. 4:8. w20.10 8 ¶8; 9 ¶10-11

Lö aetu iforege organisasi Yehowa enaʼö toföfö ba atulö mbanua niha Keriso ba götöda iadaʼa, simane banua niha Keriso me abad siföföna. (Hal. 16:4, 5) Angeragö atö: Na fao ndraʼugö ba Wamahaʼö Manuriaigö nifalua ba mbanua niha Keriso tanö böʼö mazui ba soi tanö böʼö, tatu no öʼila hadia artikel sedöna mututunö ba hewisa lala ba wanutunö yaʼia. Buania, tola iʼanemaiʼö örasoi waʼahono dödö. Tola tarasoi wahasara dödö simane daʼö börö wanolo geheha niʼamoniʼö moroi khö Lowalangi. (Zef. 3:9, nis.) Hadia göi zi tola öfalua? Sofu khöu samösa, ’Hadia uforege ba wangaʼasogö fahasara dödö hegöi faʼatulö ba mbanua niha Keriso? Hadia uʼoʼö niwaʼö ndra talifusöda si tobali sondröniaʼö ba mbanua niha Keriso? Hadia tola mufaduhusi tödö ndraʼo ba wamalua noro dödö si no mubeʼe khögu ba mbanua niha Keriso? Hadia omasido utolo niha böʼö ba ginötö si tefaudu?’ (Yak. 3:17) Na so nasa zinangea öbulöʼö, andrö geheha niʼamoniʼö ba wangandrö. Börö wanolo geheha niʼamoniʼö, tola öbulöʼö waʼaurimö hegöi amuatamö. Na omasi öfalua daʼö, itugu laʼomasiʼö ndraʼugö ira talifusöda, ba laʼameʼegö tödö zi no öfalua ba mbanua niha Keriso. w20.10 23 ¶12-13

Tola tobali sörömi Daromali Lowalangi ba waʼaurida. (Yak. 1:23-25) Ato ba gotaluada zamaigi sörömi ero sihulö wongi fatua lö taröi nomoda. Na tafalua daʼö, tola taʼila hadia so zinangea taʼatulöʼö fatua lö laʼila ita niha böʼö. Simanö göi, na tabaso Zura Niʼamoniʼö ero maʼökhö, tola taʼila hadia manö lala si tola tafalua ba wombulöʼö fangera-ngerada hegöi amuatada. Ato göi zanema bua börö me no labaso ayati Zura Niʼamoniʼö ba zi maʼökhö daʼö, fatua lö laröi nomora ba zihulö wongi. Latehegö ibulöʼö lala wangera-ngerara hadia zi no labaso andrö. Aefa daʼö, lö aetu laʼalui lala ba wamalua mene-mene Daromali Lowalangi andrö ba zi maʼökhö daʼö. Te ha si toʼölö manö daʼö na ba wamaigida, hizaʼi moguna sibai tafalua daʼö enaʼö lö aetu tatörö lala sise-ise saekhu ba waʼauri. Simane fakake niʼogunaʼö ba woronsen, tola iforomaʼö khöda ngawalö zi lö oroma Taromali Lowalangi. Hizaʼi, moguna taʼokhögö wangide-ngideʼö na omasi tatema mbua moroi ba mene-mene nibeʼe Zura Niʼamoniʼö mazui moroi ba niha niʼogunaʼö Lowalangi si tobali salahinia. w20.11 18 ¶3; 20 ¶8

Asese tefakao niha Keriso sauri me abad siföföna. Hizaʼi, no irai göi larasoi ginötö waʼahono dödö. Hewisa wangogunaʼöra inötö andrö? Lö laböhöli ira niha Keriso si lö faröi andrö ba wamaʼema turia somuso dödö si fao faʼaterou dödö. Buania, itugu ”monönö waʼatora”. Ba daʼa taʼila wa ifahowuʼö ira Yehowa börö me laforege wanuriaigö ba ginötö waʼahono dödö andrö. (Hal. 9:26-31) Ero na so ginötö, laʼogunaʼö daʼö ira niha Keriso me abad siföföna ba wamalua halöwö fanuriaigö. Duma-dumania, me iʼila sinenge sotöi Faulo wa tola manuriaigö ia ba niha sato si so ba Efeso, ihalö gangetula toröi ba mbanua daʼö enaʼö tola ifalua wanuriaigö. (1 Ko. 16:8, 9) Itugu terou dödö ndra niha Keriso ba wamaʼema ’turia somuso dödö sanandrösa ba daromali Yehowa’. (Hal. 15:30-35) Hadia mbuania? Iʼombakhaʼö khöda ayati maʼökhö andre. w20.09 16 ¶6-8

Me ifalua horö Adamo, iʼasogö waʼamate ba waʼaurinia samösa hegöi ba ngaʼötönia. Irugi iadaʼa, lö aetu tarasoi lua-lua si lö sökhi börö me lö moloʼö Gadamo. Hizaʼi, börö me no mate Yesu ba isusugi ia Lowalangi, tola taʼokhögö dötönafö si sökhi ba zi so miföna. ”Börö zi samösa niha”, yaʼia daʼö Yesu, wa ”tola tesusugi zi no mate”. Itutunö Faulo, ”Börö Gadamo wa mate fefu niha, ba börö Keriso wa tesusugi.” (1 Ko. 15:22) Me iwaʼö Faulo wa ”börö Gadamo wa mate fefu niha”, manandrösa daʼö ba niha gulidanö maʼafefu. Fefu ita, no taʼokhögö horö ondröita hegöi falömoʼahonoa moroi khö Gadamo, irege hasambalö mate ita. (Rom. 5:12) Lö tefarahu Gadamo ba gotalua niha nisusugi. Lö manandrösa khö Gadamo höli nibeʼe Keriso börö me yaʼia andrö niha soʼahonoa sangai angetula ba wanawö oroisa Lowalangi. Fanguhuku nifalua ”Nono niha” khö Gadamo yaʼia daʼö faʼamate irugi zi lö aetu, simane salua ba niha si no amaedola ”nambi” ba zi so miföna.—Mat. 25:31-33, 46; Heb. 5:9. w20.12 5 ¶13-14

Na lö nibeʼe khöda halöwö ba organisasi, angeragö duma-duma ira malaʼika si lö faröi. No irai iʼandrö mbua gera-era ndra malaʼika Yehowa sanandrösa ba wolimo Razo Ahabi si lö sökhi. So ösa ndra malaʼika sameʼe bua gera-erara. Aefa daʼö, ifili Yehowa mbua gera-era nibeʼe zi samösa malaʼika, ba iwaʼö wa hasambalö mofozu mbua gera-era nibeʼenia andrö. (1 Ra. 22:19-22) Hadia ide-ide dödö ndra malaʼika tanö böʼö, ba lawaʼö tödöra, ’Hana wa uhori-horigö ginötögu ba wameʼe bua gera-eragu?’ Tatu manö löʼö. Laʼokhögö wangide-ngideʼö ira malaʼika andrö fefu, ba omasi ira na Yehowa nifosumange. (Sangu. 13:16-18; Fam. 19:10) Törö tödöu wa töi si sökhi fondrege zi tohude niʼokhögöda, yaʼia daʼö tobali Samaduhuʼö Yehowa hegöi ba wanuriaigö turia sanandrösa ba Wamatörö Lowalangi. Törö tödöu wa tenga halöwö ba wamati zotatugöi hawaʼebua waʼomasi Yehowa khöda. Iʼomasiʼö ita Yehowa hegöi ira talifusöda ira matua börö me taʼokhögö wangide-ngideʼö. Börö daʼö, andrö wanolo moroi khö Yehowa enaʼö lö tebulö öʼokhögö wangide-ngideʼö. Angerönusi duma-duma nono mbanua Yehowa sangokhögö fangide-ngideʼö, si no musura ba Zura Niʼamoniʼö. Baero daʼö, forege ba wamalua halöwö soguna khö ndra talifusöda, ba lala si tola öfalua.—1 Fe. 5:5. w20.12 26 ¶16-17

Takula siʼöli fangorifi eluahania tötönafö nibeʼe Yehowa khöda wa hasambalö iʼefaʼö ita moroi ba waʼamate, ba isulöni fefu zi no taforege ba wamalua ohitö dödönia. (1 Te. 5:8; 1 Ti. 4:10; Tit. 1:1, 2) Tola ilumöʼö wangera-ngerada tötönafö fangorifi. Tötönafö andrö zanolo yaʼita ba wangosambuaʼö tödöda ba mbuʼusa li Lowalangi, hegöi ba wangokhögö lala wangera-ngera si tefaudu sanandrösa ba gabula dödö salua khöda. Ba wangogunaʼöda takula andre yaʼia daʼö moguna tafaudugö lala wangera-ngerada ba lala wangera-ngera Lowalangi. Duma-dumania, tenga ba waʼakayo manötöna ita, hizaʼi khö Lowalangi. (Si. 26:2; 104:34; 1 Ti. 6:17) Föda eheha eluahania Taromali Lowalangi, Sura Niʼamoniʼö. Mofaʼabölö wöda andre ba wangombakha sindruhu hegöi ba wangefaʼö niha moroi ba wamahaʼö faya awö gamuata si lö sökhi si toʼölö lafalua. (2 Ko. 10:4, 5; 2 Ti. 3:16, 17; Heb. 4:12) Enaʼö onekhe ita ba wangogunaʼö föda andre, moguna tafalua wamahaʼö samösa ba tatemaʼö wamomaha moroi ba organisasi Lowalangi.—2 Ti. 2:15. w21.03 27 ¶4; 28-29 ¶10-11

Hewaʼae na labeʼe ia ba gurunga börö me manuriaigö ia sanandrösa khö Yesu, iforomaʼö Yohane wa iʼomasiʼö niha böʼö. Duma-dumania, isura gangilata si no itema, ba ifaʼoheʼö misa ba mbanua niha Keriso enaʼö laʼila hadia ”zi lö ara tö alua”. (Fam. 1:1) Aefa daʼö, te me no aefa muʼefasi ia moroi ba Hulo Fatemo, isura Injilnia Yohane, sanutunö waö-waö waʼauri hegöi halöwö fanuriaigö nifalua Yesu. Isura göi tölu ngawua zura ba wangaʼaroʼö ira talifusönia. Sandrohu faʼaurinia, lö tebulö iʼogunaʼö waʼaurinia Yohane ba wanolo niha böʼö. Tola öʼoʼö duma-dumania ba öforomaʼö wa öʼomasiʼö niha böʼö moroi ba lala waʼauri nifilimö. Omasi gulidanö nifatörö Zatana andre na öhorigö ginötö hegöi faʼabölöu ba zoguna khöu samösa, duma-dumania ba wangalui kefe sebua mazui faʼatehöngö. Hizaʼi, ato niha Keriso ba zi sagörö ulidanö sangogunaʼö inötöra ba wanuriaigö turia somuso dödö hegöi ba wanolo niha böʼö tobali si fahuwu khö Yehowa. w21.01 10 ¶9-10

Sindruhunia, tola manö afökhö dödö Yonata khö Dawido. Börö me ono Razo Saulo ia, no sinangea na yaʼia zi tobali razo fangali namania. (1 Sa. 20:31) Hizaʼi, so khönia wangide-ngideʼö ba lö faröi ia khö Yehowa. Börö daʼö, ituhini gangetula Yehowa ba wamili Dawido tobali razo fangali Zaulo. Lö göi faröi ia khö Dawido, hewaʼae na tobali börö wönu namania daʼö. (1 Sa. 20:32-34) Börö me iʼomasiʼö Dawido, lö fahindri Yonata khönia. Yonata andrö niha sonekhe fafana, ba saradadu si barani. Yaʼia hegöi amania Saulo, no tehöngö wa ”alio ira moroi ba moyo” ba ”abölö moroi ba zingo”. (2 Sa. 1:22, 23) Börö daʼö, tola manö ihöni-höni ia Yonata börö waʼabarani niforomaʼönia. Hewaʼae simanö, lö irai fahindri mazui afökhö dödönia khö Dawido. Iʼomasiʼö sibai Dawido börö me iʼokhögö waʼabarani ba iʼodaligö Yehowa. Duma-dumania, me no aefa ibunu Goliato Dawido, ibörögö iʼomasiʼö ia Yonata simane fangomasiʼönia yaʼia samösa. w21.01 21 ¶6; 22 ¶8-9

Yesu Keriso zi tobali högö niha Keriso maʼafefu, ba no sondröniaʼö soʼahonoa ia. Hizaʼi, na mangowalu zi samösa ira alawe, no so ia barö wondröniaʼö ndra matua si lö moʼahonoa. Tola tobali abula dödö daʼö. Börö daʼö, na no iʼera-era wangowalu khö zi samösa talifusöda ira matua, moguna iʼangeragö wanofu-nofu daʼa: ’Hadia dandra sangoromaʼö wa tola tobali högö si sökhi yomo ba nomo dalifusöda ira matua andrö? Hadia iʼofönaiʼö wamosumange Yehowa ba waʼaurinia? Na löʼö, hewisa wa tola faduhu dödögu wa tola tobali ia högö si sökhi yomo ba nomo na no aefa mangowalu ndraʼaga?’ Tatu manö, moguna göi isofu khönia samösa: ’Hadia mbua-bua si sökhi niʼokhögögu soguna ba wongambatöma? Hadia so khögu waʼebolo dödö hegöi faʼoböwö? Hadia aro wahuwusagu khö Yehowa?’ (Sango. 4:9, 12) Na ihalö gangetula si sökhi si samösa ira alawe fatua lö mangowalu ia, tola möi fanolonia daʼö ba worasoi faʼomuso dödö ba wongambatö. Zuta waʼato ndra talifusöda ira alawe sameʼe duma-duma ba woloʼö li woʼomora. No sinangea musuno ira! w21.02 8 ¶1-2

Barö zi hauga fakhe andre, ato ndra talifusöda samorege ba wamahaʼö yaʼira ba li tanö böʼö enaʼö tola ladouʼö wamalua halöwö fanuriaigö ba findra ira ba mbanua niha Keriso tanö böʼö sabölö oya muʼogunaʼö zanuriaigö. No angetulara samösa daʼö enaʼö tola ladouʼö wamalua halöwö khö Yehowa. Enaʼö tola onekhe ira fahuhuo ba li si bohou, te moguna lafahaʼö ira ba zi hauga fakhe. Hewaʼae simanö, oya nifaluara si tobali fanolo ba mbanua niha Keriso. Tola teʼaroʼö ndra talifusöda ba mbanua niha Keriso börö mbua-buara si sökhi hegöi si no irai alua khöra. Tatu taʼosinangegö sibai ndra talifusöda andrö börö me aoha gölöra ba wanehegö faʼaurira! Hewaʼae na lö onekhe nasa zi samösa dalifusöda ira matua ba li niʼogunaʼö ba mbanua niha Keriso si farahu yaʼia, tola mufataro ia tobali satua sokubaloi mazui enoni sohalöwö. Hadia mbörö? Börö me tenga faʼonekhenia ba li niʼogunaʼö ba daʼö zotatugöi hadia tola mufataro ia mazui löʼö. Latatugöi daʼö ira satua sokubaloi, moloʼö si no mufakhoi ba Zura Niʼamoniʼö.—1 Ti. 3:1-10, 12, 13; Tit. 1:5-9. w20.08 30 ¶15-16

Te lawaʼö tödöra niha wa awena larasoi waʼomuso dödö na lö fökhö-fökhöra, oya gefera, ba so waʼohahau dödö yomo ba nomora. Hizaʼi, faʼomuso dödö nitutunö Yakobo yaʼia daʼö sambua moroi ba gotalua mbua-bua geheha Lowalangi, ba lö teʼodaligö daʼö moloʼö salua khö zi samösa niha. (Gal. 5:22) Irasoi waʼowua-wua dödö mazui faʼomuso dödö sindruhu si samösa niha Keriso, na aboto ba dödönia wa no iʼomusoiʼö dödö Yehowa ba iʼoʼö duma-duma Yesu. (Luk. 6:22, 23; Kol. 1:10, 11) Tola mufagölösi waʼomuso dödöda andrö simane hola-hola galitö si so bakha ba wandru ganefo. Telumöʼö galitö andrö moroi ba nangi mazui teu, irege lö mate hola-holania. Simanö göi, tola tarasoi waʼomuso dödö gofu hadia zalua ba waʼaurida. Lö tebulö tarasoi waʼomuso dödö hewaʼae na mofökhö ita mazui ide-ide gefeda. Ba lö taya daʼö börö wangoʼaya mazui fanaisi moroi ba nösi nomoda hegöi ira niha tanö böʼö. Itugu monönö waʼomuso dödöda ero na so niha sedöna mamakiko faʼomuso dödöda. Na göna ita fanandraigö börö wamatida, daʼö zi tobali tandra wa yaʼita andre sindruhu-ndruhu nifahaʼö Keriso. (Mat. 10:22; 24:9; Yoh. 15:20) Daʼö mbörö wa isura Yakobo simane ba ayati maʼökhö andre. w21.02 27 ¶6

Na ösöndra ayati Zura Niʼamoniʼö sangoromaʼö wa moguna sibai waʼahono dödö hegöi faʼafaduhu dödö khö Yehowa, tandraigö tanö ba dödöu ayati andrö. Enaʼö aoha khöu wamalua yaʼia, ebuaʼö limö ba wombaso ayati daʼö. Mazui, tola ösura ayati andrö ba aseseʼö wombaso yaʼia. Iwaʼö Yehowa khö Yosua enaʼö owölö-ölö ia ba wombaso hegöi ba woʼangerönusi Oroisa Moze, irege isöndra waʼatua-tua. Daʼö göi zanolo yaʼia enaʼö lö khönia faʼataʼu ba ginötö idöniaʼö nono mbanua Lowalangi. (Yos. 1:8, 9) Simanö göi, oya ayati Zura Niʼamoniʼö si tola manolo yaʼugö ba wangokhögö faʼahono dödö, hewaʼae na so zalua sasese mangaʼasogö khöu faʼaombö-aombö dödö mazui faʼataʼu. (Si. 27:1-3; Amd. 3:25, 26) Ba gangowuloa, tola tatema mbua moroi ba huhuo sebua nifaʼema khöda, bua gera-era nifondrondrongoda, hegöi fehede si möi famarou dödö moroi khö ndra talifusöda. (Heb. 10:24, 25) Tola göi teʼabölöʼö ita na tatutunö nösi dödöda khö ndra si fahuwu khöda ba mbanua niha Keriso. Tola alö waʼaombö-aombö dödöda na tarongo ’wehede si sökhi’ moroi khö ndra si fahuwu khöda. w21.01 6 ¶15-16

Me tebayagö ami idanö, no miforomaʼö wa mamati sibai ami khö Yehowa ba mifaduhusi tödö ia. Ba omuso sibai dödö Yehowa ba wanemaʼö yaʼami tobali ösi nomonia si bohou. Na edöna mihalö gangetula sebua, te iʼanemaiʼö miʼandrö wanolo moroi khö Yehowa. Hizaʼi, hewisa na mihalö gangetula tanö böʼö? Moguna mifaduhusi tödö Yehowa ero na mihalö gangetula, tefarahu ba daʼö gangetula sanandrösa ba hiburan, halöwö, hegöi ohitö dödömi. Böi miʼodaligö waʼatua-tuami samösa. Hizaʼi, miʼalui goi-goi Zura Niʼamoniʼö sanolo yaʼami ba wangai angetula, ba miʼoʼö goi-goi andrö. (Amd. 3:5, 6) Na mifalua daʼö, tola miʼomusoiʼö dödö Yehowa ba lafosumange ami ira talifusöda ba mbanua niha Keriso. Fefu ita lö moʼahonoa, ba tola manö tafalua zala. Hizaʼi, böi mibaliʼö taha-tahami daʼö ba wamalua sabölö sökhi ba wamosumange Yehowa. w21.03 6 ¶14-15

Hadia so nösi nomou sanaisi famatiu? Hadia lasaisi mazui lö latehegö halöwö nifalua nono mbanua Yehowa ira samatörö ba soi si so yaʼugö? Na yaʼia, tola manö terou dödöu na öbaso 2 Timoteo 1:12-16 hegöi 4:6-11, 17-22. Ba gurunga so Waulo me isura ayati daʼa. Fatua lö öbaso ayati andrö, tutunö gabula dödömö khö Yehowa. Tutunö göi fefu nirasoimö me alua khöu gabula dödö andrö. Aefa daʼö, andrö wanolo moroi khö Yehowa enaʼö tola ösöndra goi-goi si tefaudu ba zalua khöu moroi ba zi no irai alua khö Waulo. No ifangelama Waulo Yehowa wa hasambalö göna ia folohi börö me no tobali ia niha Keriso. (Hal. 21:11-13) Hadia nifalua Yehowa ba wanolo Faulo? Ibeʼe wanema li ba wangandrö Waulo ba ibeʼe khönia waʼabölö. Ifaduhuʼö ba dödö Waulo wa tenga zaya-zaya gölö fefu waʼerege dödönia ba hasambalö itema mböli gölönia. Ifarou göi dödö ndra si fahuwu khö Waulo si lö faröi enaʼö labeʼe khönia wanolo. w21.03 17-18 ¶14-15, 19