Baŵa si Siwa

Iʼogunaʼö maʼifu ngawua wehede si faböʼö Fetero me itötöi sanandrösa ba wamaʼeleʼö si so ba mbuku Yoeli. (Hal. 2:16, 17) Ba wamobörö wehedenia, lö iʼogunaʼö Fetero ngawua wehede ”aefa daʼö”. Iwaʼö Fetero wa ”ba ngaluo safuria”, ifaduwa gehehania niʼamoniʼö ”ba ngawalö niha fefu”. Eluaha ngaluo safuria niwaʼö Wetero, yaʼia daʼö ngaluo fatua lö mududugö Yeruzalema hegöi osalinia. Daʼa zangoromaʼö wa awena alua wamaʼeleʼö Yoeli andrö me no ara numalö ginötö. Me no ifaduwa Lowalangi gehehania niʼamoniʼö ba niha Keriso me abad siföföna, labörögö wamalua halöwö fanuriaigö misa ba zi sagörö ulidanö. Me isura zurania Faulo khö ndra niha Kolose, te me döfi 61 M, tola iwaʼö wa no teturiaigö duria somuso dödö ”ba gotalua niwöwöi Lowalangi ba gulidanö”. (Kol. 1:23) Ba götö Waulo, ”niwöwöi” yaʼia daʼö fefu niha si so ba ngawalö nahia ba gulidanö, si tola iʼondrasi Faulo hegöi niha Keriso tanö böʼö. Börö wanolo geheha niʼamoniʼö moroi khö Yehowa, itugu tedou wamalua halöwö fanuriaigö ba götöda andre, ”irugi ba wondrege danö misa”.—Hal. 13:47. w20.04 6 ¶15-16

Iʼomasiʼö fefu nono mbanuania Yehowa, tefarahu ba daʼö mbiri-biri si no elungu. (Mat. 18:12-14) Ifabuʼu Yehowa wa hasambalö iʼalui mbiri-birinia si no taya ba itolo ira enaʼö tola ifuli laʼokhögö wahuwusa si sökhi khönia. Itutunö göi hadia manö nifaluania ba wangorifi yaʼira, ba tefaudu sibai daʼö ba nifalua zi samösa kubalo na so mbiri-birinia si no taya. (Hez. 34:12-16) Si oföna, iʼalui mbiri-birinia si no taya andrö. Te oya ginötö hegöi faʼabölö niʼogunaʼönia ba wamalua daʼö. Aefa daʼö, na no isöndra mbiri-biri si no taya andrö, iʼohe ia mangawuli ba ngawawania. Te lö faʼabölö khö mbiri-biri andrö börö me no mesokho mazui olofo. Si fao faʼasökhi, ibukusi zokhonia andrö kubalo, iluʼi, ba ibeʼe gö. Ira satua sokubaloi, no kubalo ”mbiri-biri Lowalangi”. (1 Fe. 5:2, 3) Daʼö mbörö wa moguna lafalua halöwö simane nifalua zi samösa kubalo, na so niha sangaröuʼö yaʼia moroi ba mbanua niha Keriso. Moguna laʼalui niha andrö, latolo ia enaʼö mangawuli ba ngawawa, ba si fao faʼomasi latolo ia enaʼö ifuli fahuwu khö Yehowa. w20.06 20 ¶10

Me iwaʼö Yesu wa no tola mubasi nowi, hadia daʼö geluahania wa itötöna enaʼö ato niha soloʼö khönia? Tatu manö löʼö. Aboto ba dödö Yesu wa ato niha si lö mamati khönia, börö me no mufaʼeleʼö daʼö. (Yoh. 12:37, 38) Iʼokhögö göi Yesu waʼabölö ba wangiʼila nösi dödö niha. (Mat. 9:4) Hewaʼae simanö, lö mamalö iʼosambuaʼö dödönia ba wanolo niha somasi mamati khönia, ba ilau manuriaigö ba niha fefu, si fao faʼaterou dödö. Tebai taʼila nösi dödö niha. Andrö, lö omasi ita tahuku niha si so ba nahiada wanuriaigö. Hizaʼi, tawaʼö tödöda wa fefu niha no sedöna tobali nifahaʼö Keriso. Törö tödöu wehede Yesu khö ndra nifahaʼönia. Mifaigi, no aʼusö nowi ba tola mubasi. Tola tebulö lala waʼauri zi samösa niha ba tobali nifahaʼö Keriso. Ba wamaigi Yehowa, niha sedöna tobali nifahaʼö Keriso no simane ”gama-gama sebua böli”. (Hag. 2:7) Na taʼokhögö lala wangera-ngera Yehowa hegöi Yesu, tola aboto ba dödöda waö-waö waʼaurira hegöi sadöni dödöra. Enaʼö ba wamaigida, yaʼira andrö tenga niha sawena taʼila, hizaʼi niha sedöna tobali talifusöda. w20.04 13 ¶18-19

Ifahaʼö ita Taromali Lowalangi wa moguna taʼomasiʼö Yesu ba lö mamalö taʼomasiʼö ia enaʼö tola taʼomusoiʼö dödö Yehowa. Sambua lala si tola tafalua enaʼö tobali si fahuwu khö Yesu yaʼia daʼö taʼokhögö waʼaboto ba dödö sanandrösa khönia. Tola tafalua daʼa na tabaso Zura Niʼamoniʼö ba mbuku Mataiʼo, Mareko, Luka ba Yohane. Na taʼangerönusi ayati Zura Niʼamoniʼö sanutunö waö-waö waʼauri Yesu, tola taʼomasiʼö ba taʼameʼegö tödö Yesu börö me no taʼila gamuatania ba niha. Duma-dumania, hewaʼae na yaʼia Zamahaʼö yaʼira, lö iʼosawuyu ndra nifahaʼönia. Hizaʼi, itutunö khöra lala wangera-ngerania hegöi nirasoinia. Fao khöra Yesu ba waʼabu dödö ba fao göi ia khöra ba wege-ege. (Yoh. 11:32-36) Lafaduhuʼö göi ira niha si faʼudu khönia wa fahuwu ia ba niha sanemaʼö turia nifaʼemania. (Mat. 11:19) Na taʼoʼö gamuata Yesu khö ndra nifahaʼönia, tola itugu sökhi gamakhaitada ba niha böʼö, itugu tarasoi waʼomuso dödö, ba itugu taʼomasiʼö ba tafosumange Keriso. w20.04 22 ¶9-10

Me döfi 1870, abölö oya soi nifatörö Inggris moroi ba nifatörö soi böʼö, ba yaʼira göi wondrege zabölö ba gulidanö sanandrösa ba militer. Ba wamaʼeleʼö Danieli, muʼamaedolagö Inggris simane si sambua tandru sondreha tölu dandru tanö böʼö. Tandru andrö yaʼia daʼö Prancis, Spanyol hegöi Belanda. (Dan. 7:7, 8) No tobali razo tanö raya Inggris irugi waʼalua Wasuwöta Gulidanö I. Ba ginötö si fagölö göi, no tobali soi sabölö kayo ba gulidanö Amerika Serikat, ba ibörögö falulu fohalöwö ira Inggris. Me alua Wasuwöta Gulidanö I, falulu fohalöwö Amerika Serikat hegöi Inggris, ba ebua sibai kuasora. Ba ginötö daʼö, tobali ira Kuaso Gulidanö Inggris-Amerika. Simane nifaʼeleʼö Danieli, laʼokhögö ”zaradadu sato hegöi sabölö fasuwö”. Iʼotarai daʼö, ba sagötö ngaluo safuria, Kuaso Gulidanö Inggris-Amerika zi tobali razo tanö raya. w20.05 4 ¶7-8

Lö baku ba lö ogöʼö nidanö si so ba gulidanö, börö me tefaudu sibai waʼaröu gotalua gulidanö ba luo. Na ahatö sibai gotalua gulidanö ba luo, tola ogöʼö nidanö si so ba gulidanö. Tobali nahia saukhu sibai gulidanö, oköli, ba tebai toröi niha. Hizaʼi, na fandröndröu maʼifu gotalua gulidanö ba luo, hasambalö wa tobali esi fefu nidanö, ba afönu gulidanö andre salju hegöi esi. Andrö wa tefaudu sibai nahia nitatugöi Yehowa ba gulidanö andre, irege tola alua siklus nidanö ba terorogö waʼaurida. Börö waʼaukhu zino, möi miyawa nidanö si so ba nasi hegöi si so ba dete danö, ba tobali lawuo. Ero röfi, oya sibai nidanö si möi miyawa, töra moroi ba waʼoya nidanö si so ba danau ba zi sagörö ulidanö. Aefa daʼö, tetaha nidanö yawa ba atmosfer mato fulu hari, aefa daʼö atoru ia tou tobali teu mazui salju. Ba gafuriata, ifuli numalö nidanö andrö ba nasi mazui ba nungo nidanö, ba ifuli zui alua siklus nidanö. Ifazökhi siklus daʼa Yehowa enaʼö lö irai ahori nidanö ba gulidanö. Daʼa zangoromaʼö wa ebua sibai waʼatua-tua hegöi kuaso niʼokhögö Yehowa.—Yob. 36:27, 28. w20.05 22 ¶6

Iʼamenesi ita Yesu enaʼö lö taböhöli ba wangandrö eheha niʼamoniʼö khö Lowalangi. (Luk. 11:9, 13) Iʼogunaʼö gehehania Yehowa ba wameʼe khöda faʼabölö ”sahöli-höli dödö”. (2 Ko. 4:7) Börö wanolo geheha niʼamoniʼö, tola anau gölöda ba wanaögö abula dödö salua khöda. Itolo göi ita eheha niʼamoniʼö ba wamalua halöwöda ba wamati, ba wondrouʼö faʼatua-tua hegöi nekhe-nekhe danga niʼokhögöda. Börö daʼö, na mofozu ita ba wamalua halöwöda, faduhu dödöda wa tola alua daʼö börö wanolo geheha niʼamoniʼö. Lala ba wangoromaʼö wa taʼameʼegö tödö geheha niʼamoniʼö moroi khö Lowalangi, yaʼia daʼö na taʼandrö wanolo moroi khö Yehowa ba wamareso hadia so khöda gera-era si lö sökhi hegöi isö-isö dödö si fasala. (Si. 139:23, 24) Na taʼandrö daʼö, tola iʼogunaʼö gehehania Yehowa, irege tola taʼila hadia so khöda gera-era mazui isö-isö dödö si fasala. Andrö moguna talau mangandrö enaʼö iʼabölöʼö ita eheha niʼamoniʼö ba wolawa yaʼia. Na tafalua daʼö, no taforomaʼö wa no tahalö gangetula enaʼö lö tafalua gamuata si lö sökhi irege lö saʼae iʼogunaʼö gehehania Yehowa ba wanolo yaʼita.—Ef. 4:30. w20.05 28-29 ¶10-12

Ba ginötö taʼoʼawögö döi Yehowa, no taʼoʼö duma-duma Yesu Keriso. Iforege Yesu enaʼö laʼila niha döi Namania. Hewisa lalania ba wamalua daʼö? Tenga ha iʼogunaʼö döi Yehowa, ifatunö göi ba niha tanö böʼö zindruhu sanandrösa khö Namania. Duma-dumania, iforomaʼö wa fasala wamahaʼö niha Farizaiʼo. Lafahaʼö niha wa Yehowa andrö no Lowalangi samuʼi, si lö faʼahakhö dödö, abua sibai ba wangomusoiʼö tödönia, ba tebai fahuwu ita khönia. Hizaʼi, itolo niha böʼö Yesu enaʼö laʼila wa Amania andrö, no sebolo tödö, sebua faʼomasi, somasi mangefaʼö sala, ba tola taʼomusoiʼö dödönia. Iʼoʼö göi Yesu mbua-bua Namania ba lala waʼaurinia sero maʼökhö. Me ifalua daʼö, itolo niha enaʼö itugu aboto ba dödöra Yehowa. (Yoh. 14:9) Simane Yesu, tola göi tafatunö ba niha sanandrösa khö Yehowa, ba tafahaʼö ira wa Yehowa andrö no Lowalangi si sökhi ba sebua faʼomasi. Na tafalua daʼö, no taforomaʼö wa lö atulö fefu wamobahulu niböbögö khö Yehowa, irege tola aboto ba dödö niha wa teʼamoniʼö sibai döi Yehowa andrö. Moroi ba wehede hegöi amuatada, tola taforomaʼö hewisa zindruhunia Yehowa andrö. No tatolo niha enaʼö teʼefaʼö ira moroi ba wamahaʼö si fasala sanandrösa khö Lowalangi. w20.06 6 ¶17-18

Tola muʼogunaʼö media sosial ba lala si tefaudu. Duma-dumania, tola taʼogunaʼö daʼö ba wariawösa khö ndra awö-awöda hegöi ba nösi nomoda. Hizaʼi na tanehegö, ato niha sangogunaʼö media sosial ba wangalui lakhömira föna niha böʼö. Hulö na lawaʼö ba niha böʼö, ”Mifaigido”. Ba tola manö, so ösa niha sanura fehede si lö sökhi mazui falelesa ba kodara samösa hegöi ba koda niha böʼö. Lö tefaudu na lafalua zimane daʼö ira niha Keriso. No faehu sibai daʼö ba wamarou dödö nibeʼe khöra enaʼö laʼokhögö wangide-ngideʼö ba larasoi hadia nirasoi niha böʼö. (1 Fe. 3:8) Na öʼogunaʼö media sosial, sofu khöu samösa, ’Hadia oroma wa so khögu waʼasiliyawa moroi ba wehede, koda, mazui video nifasagu ba media sosial? Hadia tola iʼasogö waʼafökhö dödö ba niha böʼö?’ Lö hadöi ba dödö niha Keriso wa abölö tohude ira moroi ba niha böʼö ba lö laforege enaʼö lasuno-suno ira niha. Laʼoʼö mene-mene Zura Niʼamoniʼö si so ba ayati maʼökhö andre. Na so khöda wangide-ngideʼö, tola tobali fanoloda daʼö ba wanimbagö amuata niha ba gulidanö andre, sasiliyawa ba somasi tohude moroi ba niha böʼö.—1 Yo. 2:16. w20.07 6-7 ¶14-15

Fatua lö tobali soloʼö Keriso Waulo, yaʼia andrö samösa ira matua sawuyu-wuyu si lö sökhi amuata, ba solohi ndra nifahaʼö Yesu. (Hal. 7:58) Itenawa ia Yesu enaʼö lö saʼae ifakao ndra niha Keriso. Mohede Yesu khö Waulo moroi ba zorugo, ba auʼa ia. Enaʼö tola ifuli iʼila niha, moguna iʼandrö wanolo moroi ba niha si no irai ifakao. Si fao fangide-ngideʼö, itema wanolo moroi khö zi samösa niha Keriso sotöi Anania enaʼö tola ifuli iʼila niha. (Hal. 9:3-9, 17, 18) Ba gafuriata, tobali niha si tehöngö Waulo ba mbanua niha Keriso, hizaʼi lö irai iʼolifugö wamahaʼö nitemania moroi khö Yesu me so ia ba lala si numalö ba Ndramaseko. Lö tebulö iʼokhögö wangide-ngideʼö, ba itemaʼö wanolo moroi khö ndra talifusönia. Ifaduhuʼö wa no tobali ira ’umbu wondrara dödö’ khönia.—Kol. 4:10, 11. w20.07 18-19 ¶16-17

Hewaʼae na Yehowa wondrege zebua kuaso, ibeʼe göi noro dödö ba niwöwöinia. Duma-dumania, ifataro Yesu tobali Razo ba Wamatörönia, ba ibeʼe göi kuaso ba niha si-144.000 si fao mamatörö awö Yesu. Tatu manö, no ifomaha Yesu Yehowa enaʼö tola mofozu ia ba wamalua halöwönia tobali Razo hegöi Ere Sebua. (Heb. 5:8, 9) Ifomaha göi zi-144.000 enaʼö tola lafalua halöwö nibeʼe khöra. Hewaʼae simanö, lö itatugöi sibai hewisa wamaluara halöwö andrö, hizaʼi ifaduhusi tödö wa hasambalö lafalua zomasi ia. (Fam. 5:10) Hewaʼae na lö moguna khönia wanolo, omasi Yehowa ba wameʼe noro dödö ba niwöwöinia. Moguna göi tafalua zimane nifaluania andrö. Duma-dumania, hadia högö yomo ba nomo ndraʼugö, mazui satua sokubaloi ba mbanua niha Keriso? Moguna öʼoʼö duma-duma Yehowa ba wameʼe halöwö ba niha böʼö, ba böi tatugöi sibai hewisa wamaluara halöwö andrö. Na öʼoʼö duma-duma Yehowa, tola teʼasiwai zi sambua halöwö, ba tola göi öfomaha niha böʼö irege lö saʼae khöra faʼaombö dödö ba wamalua halöwö nibeʼe khöra.—Yes. 41:10. w20.08 9 ¶5-6

Hewisa zinangeania ita ba mbiri-biri Lowalangi si no taya? No ibeʼe khöda duma-duma si sökhi Yesu sanandrösa ba daʼö. Aboto ba dödönia wa no sebua böli ba wamaigi Yehowa fefu mbiri-birinia, daʼö mbörö wa iforege ba wanolo ’ndraono Gizaraʼeli si hulö mbiri-biri selungu’ enaʼö lafuli ira khö Yehowa. (Mat. 15:24) Börö me kubalo si sökhi ia, iforege göi Yesu enaʼö lö hadöi si taya ba gotalua mbiri-biri Yehowa. (Yoh. 6:39) Iʼandrö Faulo khö ndra satua sokubaloi ba mbanua niha Keriso si so ba Efeso enaʼö laʼoʼö duma-duma Yesu. Imane, ”Mitolo zambö faʼabölö, ba böi olifu ami wehede Zoʼaya Yesu me iwaʼö, ’Ohahau dödö ba wameʼe moroi ba wanema.’” (Hal. 20:17, 35) Ayati daʼa zangoromaʼö wa laʼokhögö noro dödö si tohude ira satua sokubaloi ba wondrorogö iraono mbanua Yehowa. Imane samösa satua sokubaloi sotöi Salvador si toröi ba Spanyol, ”Faduhu dödögu wa omasi Yehowa na urorogö mbiri-birinia.” w20.06 23 ¶15-16

Aboto ba dödö Yehowa wa awena sindruhu-ndruhu moʼahonoa dania ita ba gangohorita Wamatörö si Saribu Fakhe. Fatua lö daʼö, lö mamalö iforomaʼö waʼebolo dödö Yehowa ba aoha gölönia ba wangefaʼö horö nifaluada. Börö daʼö, moguna göi taʼosambuaʼö dödöda ba mbua-bua si sökhi niʼokhögö niha böʼö, ba lö mamalö taforomaʼö khöra waʼebolo dödö simane nifalua Yehowa. Me tewöwöi gulidanö, omuso sibai dödö Yesu hegöi ira malaʼika. Tobali, itugu omuso dödöra na laʼila dania wa no afönu gulidanö andre niha soʼahonoa, sangomasiʼö ba samosumange Yehowa. Khalaigö göi waʼomuso dödö nirasoi niha si fao awö Keriso mamatörö ba zorugo, me laʼila dania mbua si sökhi niʼasogöra ba niha gulidanö. (Fam. 4:4, 9-11; 5:9, 10) Khalaigö waʼaurida dania na lö hadöi saʼae fökhö, faʼabu dödö, hegöi faʼamate. Ba ginötö daʼö, ha tawa hörö waʼomuso dödö dania zalua ba gulidanö. Sagötö wombaloida waʼaluania, datahalö gangetula ba woloʼö faʼomasi, faʼatua-tua, hegöi faʼebolo dödö niforomaʼö Namada. Na tafalua daʼö, lö mamalö tarasoi waʼomuso dödö gofu hadia ia gabula dödö salua khöda. (Yak. 1:2-4) Taʼandrö sibai saohagölö ba mbuʼusa li Yehowa wa ”so wanusugi ba niha si no mate” ba zi so miföna!—Hal. 24:15. w20.08 19 ¶18-19

So ösa ndra matua niʼogunaʼö Yehowa ba wanura Sura Niʼamoniʼö börö me iʼomasiʼö sibai ita. Iʼogunaʼö Zura Niʼamoniʼö, ba wameʼe khöda fanema li ba wanofu-nofu sabölö tohude simane: Hezo moroi niha gulidanö? Hadia lua-lua waʼauri andre? Ba hewisa waʼaurida ba zi so miföna? Omasi Yehowa na fefu ita taʼila wanema linia. Andrö, so ösa niha niʼogunaʼönia ba wamoʼeluaha Sura Niʼamoniʼö ba li si faböʼö-böʼö. Iadaʼa, no mufoʼeluaha Zura Niʼamoniʼö he si no awai tefazökhi mazui si lö awai nasa, ba zi töra 3.000 ngawalö li! Sagötö sejarah, Sura Niʼamoniʼö no buku sabölö oya mufoʼeluaha hegöi mufazaewe. Tola taʼoromaʼö wa taʼameʼegö tödö Zura Niʼamoniʼö na tabaso ia ero maʼökhö, taʼangerönusi nösinia, ba taforege ba wamalua zi no tafahaʼö yaʼita. Baero daʼö, taforege göi ba wamaʼema turia somuso dödö moroi ba Zura Niʼamoniʼö enaʼö abölö ato niha samondrongo yaʼia. Na tafalua daʼö, no taforomaʼö wangandrö saohagölö khö Lowalangi.—Si. 1:1-3; Mat. 28:19, 20. w20.05 24-25 ¶15-16

Lö omasi niha nifalukhaisi zamaʼeleʼö sotöi Yeremia ba wanemaʼö turia nifaʼemania. No irai ide-ide sibai dödö Yeremia irege arakhagö awuwu ia. Hizaʼi, lö iböhöli wamalua halöwönia, ba itohugö wanuriaigö. Hadia mbörö? Börö me hulö hola-hola galitö ba mbotonia ’Daromali Yehowa’, tebai itaha wamaʼema yaʼia. (Yer. 20:9) Na tafahaʼö ita ba Zura Niʼamoniʼö ba taʼangerönusi nösinia ero maʼökhö, tola tobali ita simane Yeremia. Buania, itugu owua-wua dödöda ba wamalua halöwö fanuriaigö, ba tola itugu ato niha nitoloda ba wangokhögö faʼaboto ba dödö sanandrösa ba zindruhu. (Yer. 15:16) Börö daʼö, andrö wanolo moroi khö Yehowa na örasoi waʼide-ide dödö. Hasambalö itolo ndraʼugö ba wolawa falömoʼahonoamö, mazui ba wanaögö fökhö. Hasambalö itolo ndraʼugö ba wangokhögö lala wangera-ngera si tefaudu sanandrösa ba halöwö nönö-nönö ba organisasinia. Ba hasambalö itolo ndraʼugö enaʼö lö tebulö örasoi waʼomuso dödö ba wamalua halöwö fanuriaigö. Tola göi ötouʼö nösi dödöu khö Namada si so ba zorugo. Börö wanolonia, hasambalö mofozu ndraʼugö ba wolawa faʼide-ide dödö. w20.12 27 ¶20-21

So ösa ndra talifusöda ira alawe sorasoi, wa ha na mufalua gangowuloa tola fariawö ira khö ndra talifusöra ba wamati. Börö daʼö, na falukha ita khöra ba gangowuloa, moguna tatemaʼö ira, fahuhuo ita khöra, ba taforomaʼö wa taʼameʼegö tödö ira. Simane Yesu, moguna göi taforege ba wameʼe inötöda fariawö khö ndra talifusöda ira alawe. (Luk. 10:38-42) Tola takaoni ira weʼamöi manga ba nomoda mazui ba wamalua rekreasi. Na tafalua daʼö, moguna taforege enaʼö möi famarou dödöra wehededa. (Rom. 1:11, 12) Baero daʼö, moguna göi laforege ira satua sokubaloi ba woloʼö amuata Yesu. Aboto ba dödö Yesu wa tola manö abu dödö zi samösa niha na lö sangowalu ia. Hizaʼi, iforomaʼö wa tenga fangowalu mazui fangokhögö iraono zangaʼasogö faʼowua-wua dödö sindruhu. (Luk. 11:27, 28) Tobali, hasambalö taʼokhögö waʼowua-wua dödö sindruhu na taʼofönaiʼö wamalua somasi Yehowa ba waʼaurida. (Mat. 19:12) Moguna so ba wangera-ngera ndra satua sokubaloi wa no talifusöra ba wamati mazui inara ba wamati fefu ndra alawe si so ba mbanua niha Keriso. Moguna labeʼe ginötöra fahuhuo khö ndra talifusöra ira alawe fatua lö tebörögö mazui na no awai gangowuloa. w20.09 21-22 ¶7-9

Ba Gizaraʼeli, itanö danömö sohalöwö ba danö na tebörögö mbaŵa deu, yaʼia daʼö ba dalu mbaŵa si Fulu. Awena ibasi dania danömö andrö na no aefa mbaŵa deu, yaʼia daʼö ba dalu mbaŵa si Öfa. (Mrk. 4:28) Moguna göi khöda waʼebolo dödö simane sohalöwö ba danö andrö. Hizaʼi, tola manö lö aoha wamalua daʼö. Börö me niha si lö moʼahonoa ita, si toʼölönia omasi ita na ba waʼalio tatema mbua ba halöwö si no tafalua. Hizaʼi, na omasi ita tedou ba mowua zinanöda, moguna tarorogö daʼö si fao faʼebolo dödö. Moguna takhao danö, tatanö zinanö andrö, tahawui, ba tadöni ndruʼu si so ba zi fasuinia. Moguna göi lö aetu taforomaʼö waʼebolo dödö ba ginötö tafalua halöwö ba wombaliʼö nifahaʼö. Na so khöda waʼebolo dödö, lö ide-ide dödöda na latimbagö ita niha. Baero daʼö, moguna göi taforomaʼö waʼebolo dödö hewaʼae na adöni dödö zi samösa niha ba omasi ia lafahaʼö. Hadia mbörö? Börö me tebai tafaso niha nifahaʼöda ba Zura Niʼamoniʼö enaʼö iʼanemaiʼö tedou ia ba wamati. Me föna, itaria göi lö iʼanemaiʼö aboto ba dödö ndra nifahaʼö Yesu wamahaʼö nifaʼemania khöra. (Yoh. 14:9) Törö tödöu wa halöwöda ha fananö hegöi fowuwui danömö zindruhu, hizaʼi Lowalangi Yehowa zamanöi yaʼia.—1 Ko. 3:6. w20.09 10-11 ¶10-11

Omasi ita fefu na tedou ba wamati niha nifahaʼöda ba tebayagö idanö. Börö daʼö, moguna sibai tafarou dödönia weʼamöi ba gangowuloa. Sasesenia, abölö alio tedou ba wamati niha nifahaʼö ba Zura Niʼamoniʼö, na iʼanemaiʼö möi ia ba gangowuloa. So ösa zamahaʼö sanutunö ba niha nifahaʼöra wa oya wamahaʼö si tola itema ba gangowuloa, si lö isöndra ba wamahaʼö Zura Niʼamoniʼö nifalua ba nomo. Baso Heberaiʼo 10:24, 25 ba niha nifahaʼöu ba Zura Niʼamoniʼö, ba tutunö khönia hadia manö mbua si tola itema na möi ia ba gangowuloa. Foromaʼö hadia manö nitutunö ba gangowuloa andrö dania, ba sofu khönia hadia faosatö sabölö adöni dödönia. Tatu ahöli dödönia na awena iʼondrasi gangowuloa. Abölö sökhi niʼilania mazui nirongonia ba gangowuloada moroi ba gangowuloa tanö böʼö si no irai iʼondrasi. (1 Ko. 14:24, 25) Hasambalö falukha ia ba niha si tola tobali duma-duma khönia, hegöi sanolo yaʼia enaʼö tedou ba wamati ba tebayagö idanö. w20.10 10-11 ¶14-15

Hasambalö itolo ndraʼugö eheha niʼamoniʼö moroi khö Lowalangi ba woʼaurifagö hadia zi no öbaso hegöi si no öfahaʼö yaʼugö ba Daromali Lowalangi. Angandrö simane sanura sinunö, sangumaʼö, ”He Yehowa, fahaʼö ndraʼo ba lalamö andrö. Utörö lala sindruhu andrö khöu. Osambuaʼö dödögu ba wangataʼufi töimö.” (Si. 86:11) Börö daʼö, böi böhöli ba wombaso hegöi ba wamahaʼö yaʼugö ba Zura Niʼamoniʼö awö publikasi tanö böʼö, si no ihenaigö Yehowa ba organisasinia. Tatu manö, tenga ha ba wondrouʼö faʼaboto ba dödöu wa öfalua daʼö. Hizaʼi, omasiʼö na tofakha ba dödöu zindruhu andrö ba öfalua daʼö ba waʼauriu. Tola itolo ndraʼugö eheha niʼamoniʼö moroi khö Yehowa ba wamalua daʼö. Baero daʼö, omasiʼö göi öfarou dödö ndra talifusöda. (Heb. 10:24, 25) Hadia mbörö? Börö me ösi nomou ba wamati ira. Andrö geheha niʼamoniʼö moroi khö Lowalangi ba wanolo yaʼugö enaʼö tola öbeʼe mbua gera-era si möi fondrara dödö niha böʼö, hegöi ba wamalua zabölö sökhi na so halöwö nibeʼe khöu ba gangowuloa. Na öfalua daʼö, no öforomaʼö khö Yehowa hegöi Yesu wa öʼomasiʼö ’mbiri-birira’ sebua böli. (Yoh. 21:15-17) Börö daʼö, fondrondrongo Zamahaʼö Fondrege Zalawa na öfahaʼö ndraʼugö ba ngawalö waʼaboto ba dödö si no ihenaigö. w20.10 24-25 ¶15-17

Hadia nifalua Yesu me larasoi waʼide-ide dödö ira sinengenia? Lö ara me no aefa tesusugi ia, imane Yesu khö ndra alawe si no tobali soloʼö khönia, ”Böi miʼataʼufi! Miʼae mifatunö khö ndra talifusögu [wa no tesusugi ndraʼo].” (Mat. 28:10a) Lö iröi ndra sinengenia Yesu. Hewaʼae no laröi ia ira sinengenia, lö aetu ikaoni khöra ”talifusögu”. Simane Yehowa, iʼokhögö waʼahakhö dödö Yesu ba omasi ia ba wangefaʼö sala. (2 Ra. 13:23) Simanö göi, taʼameʼegö tödö sibai niha si no mamöhöli halöwö ba wamati. Yaʼira andrö talifusöda, ba taʼomasiʼö sibai ira! Tatu itörö nasa tödöda halöwö si no lafalua ira talifusöda andrö ba zilalö, ba te no lafalua daʼö ba zi ngafulu fakhe faʼara. (Heb. 6:10) Tatu taʼamalösi sibai ira! (Luk. 15:4-7) Si fao faʼasökhi, kaoni ira weʼamöi ba gangowuloa. Ba ginötö so niha si no mamöhöli halöwö ba wamati zangondrasi Nahia Gangowuloa, moguna tafalukhaisi ba tatemaʼö ia si fao faʼafahuwu. w20.11 6 ¶14-17

Samuza inötö, laʼondrasi Yesu ira Yakobo, Yohane, hegöi inara, ba laʼandrö khönia enaʼö ibeʼe khöra dadaoma si tohude ba Wamatörö Lowalangi. Omasi ira na tebeʼe khöra dadaoma ba gambölö hegöi ba gabera Yesu, ba daʼö göi zomasi ninara. Hadia nifalua Yesu? Iʼanemaiʼö iʼombakhaʼö khöra wa ha Amania si so ba zorugo zinangea motatugöi haniha zi dadao ba gambölö hegöi ba gaberania. (Mat. 20:20-23) Aboto ba dödö Yesu wa so zi tebai ifalua. Lö irai ifalua zi tenga halöwönia, ba ha si no ifaretakö Yehowa nifaluania. (Yoh. 12:49) Hewisa woloʼöda duma-duma si sökhi nibeʼe Yesu andre? Tola taʼoʼö duma-duma wangide-ngideʼö niforomaʼö Yesu na tafalua mene-mene nisura ba ayati maʼökhö andre. Börö daʼö, na so niha sangandrö khöda mene-mene, böi taʼodaligö waʼatua-tuada samösa mazui ha asala noa manö wameʼeda mene-mene. Hizaʼi, moguna tabeʼe khöra mene-mene si so ba Zura Niʼamoniʼö hegöi ba publikasida. Na tafalua daʼö, no tafaduhuʼö wa lö ahori taʼila fefu hadia ia. Si fao fangide-ngideʼö, taforomaʼö wa abölö tohude mene-mene moroi khö Yehowa moroi ba mene-mene nibeʼeda.—Fam. 15:3, 4. w20.08 11-12 ¶14-15

Na öwaʼö tödöu wa moguna öbeʼe mene-mene khö zi samösa talifusöda, hadia zinangea ötörö tödöu? Fatua lö fahuhuo ndraʼugö khönia, sofu khöu samösa, ’Hadia talafo atulö ndraʼodo?’ Na talafo atulö zi samösa niha, ihuku niha böʼö moloʼö goi-goinia samösa, tenga moloʼö goi-goi Yehowa. Baero daʼö, tola manö göi ambö khönia faʼahakhö dödö. Na no aefa öfareso ndraʼugö samösa, hizaʼi lö nasa tebulö öwaʼö tödömö wa moguna öbeʼe khönia mene-mene, haogö wanutunö khönia, ba ogunaʼö wanofu si tola manolo yaʼia ba wangiʼila hadia zala si no ifalua. Tatugöi enaʼö teʼodane-dane wehedemö ba Zura Niʼamoniʼö, ba törö tödömö wa noro dödö nibeʼe khömö tenga ba wohuku niha böʼö, hizaʼi ba wanolo yaʼia enaʼö iʼila hewisa dödö Yehowa ba nifaluania andrö. (Rom. 14:10) Ogunaʼö waʼatua-tua si so ba Daromali Lowalangi, ba oʼö waʼahakhö dödö niforomaʼö Yesu na öʼamenesi zi samösa niha. (Amd. 3:5; Mat. 12:20) Hadia mbörö? Börö me hasambalö isulöni khöda Yehowa hadia nifaluada ba niha böʼö.—Yak. 2:13. w20.11 21 ¶13

Hadia omasiʼö na ihuku ndraʼugö niha böʼö moloʼö laʼa-laʼa gulimö, sikhalamö, mazui faʼebua mbotomö? Tatu manö löʼö. Taʼandrö saohagölö börö me lö ifaigi ita Yehowa moloʼö niʼila hörö! Duma-dumania, me ifaigi ndraono Gizaʼi Samueli, lö ifaigi ira simane famaigi Yehowa. Iʼombakhaʼö Yehowa khö Zamueli wa so samösa ba gotalua nono Gizaʼi si tobali razo ndraono Gizaraʼeli. Haniha daʼö? Me iʼila nono Gizaʼi siaʼa sotöi Eliabi, imane Samueli, ”Hasambalö daʼa niha nibayoini Yehowa.” Moloʼö sikhala hegöi boto Geliabi, tefaudu na tobali ia razo. Hizaʼi, ”Imane Yehowa khö Zamueli, ’Böi faigi mbotonia ba faʼalawania, börö me tenga yaʼia nifiligu.’” Hadia wamahaʼönia? Imane Yehowa, ”Ha soroma ba hörö niʼila niha, hizaʼi tödö nifaigi Yehowa.” (1 Sa. 16:1, 6, 7) Tola tafalua daʼö na tafahaʼö göi ita ba woloʼö duma-duma Yehowa ba tafalua zimane daʼö khö ndra talifusöda. w20.04 14 ¶1; 15 ¶3

Me ifalua Yesu wofanö, itörö gotalua nowi safönu tanömö barli sawena tumbu. (Yoh. 4:3-6) Te awena tola mubasi danömö andrö ba zi öfa waŵa tö. Andrö wa tola manö ambö aboto ba dödö niha geluaha wehede Yesu, me imane, ”Mifaigi no aʼusö nowi ba tola mubasi.” (Yoh. 4:35, 36) Hadia geluaha wehedenia andrö? Sindruhunia, famasi nitutunö Yesu manandrösa ia ba wamati, yaʼia daʼö ba wangowuloi niha enaʼö tobali nifahaʼönia. Angeragö hadia zalua fatua lö iwaʼö wehede daʼö Yesu. Awena sibai manuriaigö Yesu khö ndra alawe Zamaria, hewaʼae na si toʼölönia lö fariawö niha Yahudi ba niha Zamaria. Hizaʼi, omasi ndra alawe andrö ba wamondrondrongo Yesu! Sindruhunia, me fahuhuo Yesu sanandrösa ba nowi si no ’aʼusö ba tola mubasi’, ato niha Samaria zangondrasi Yesu ba lafahaʼö ira khönia, börö me no larongo sanandrösa khö Yesu moroi khö ndra alawe andrö. (Yoh. 4:9, 39-42) Imane sambua referensi Zura Niʼamoniʼö, ”Iʼanemaiʼö tohare ira ba wamalukhaisi Yesu ba lafondrondrongo ia. Daʼa zangoromaʼö wa yaʼira andrö hulö zinanö si no tola mubasi.” w20.04 8 ¶1-2

So wanolo nitemada ba gangowuloa, yaʼia daʼö mufahaʼö ita tobali sanuriaigö ba samahaʼö sabölö sökhi. Duma-dumania, tafahaʼö ita wangogunaʼö Fakake Niʼogunaʼöda ba Wamahaʼö ba lala si tefaudu. Börö daʼö, fatua lö öʼondrasi gangowuloa, haogö wamaʼanö yaʼugö. Sagötö mufalua gangowuloa, haogö wamondrondrongo. Ba na no aefa mufalua gangowuloa, oʼö fefu wamahaʼö nitemamö. Na öfalua fefu daʼö, tola tobali ndraʼugö ”saradadu si sökhi khö Keriso Yesu”. (2 Ti. 2:3) Tatema göi wanolo moroi khö ndra malaʼika sagabölö si hauga zuta faʼato. Angeragö atö hadia zi tola ifalua si samösa malaʼika. (Yes. 37:36) Iadaʼa, khalaigö atö hadia zi tola lafalua ira ngawawa malaʼika sagabölö! Samösa lö niha mazui malaʼika si lö sökhi si tola mokalaisi ira saradadu sagabölö khö Yehowa. No fondrege zabölö Yehowa. Börö daʼö, na fao ia khöda, abölö ita moroi khö ndra ududa gofu hawaʼato ira. (Sangu. 6:16) Tola tafaduhusi tödö daʼö! Böi olifu ndraʼugö wa tenga ha yaʼugö zi fasuwö. Hasambalö ibeʼe khöu wanuturu lala Yehowa. Törö tödöu daʼö na so nawöu wohalöwö, awöu sekola, mazui ösi nomou si tenga samosumange Yehowa, sametaʼu yaʼugö moroi ba wehedera mazui ba nifaluara. w21.03 29 ¶13-14

Tola manö fehede si so ba Yesaya 22:13 nitötöi Waulo andre. Itutunö ayati andrö sanandrösa ba mbua-bua niforomaʼö ndraono Gizaraʼeli. Lö laforege ba wangahatöʼö yaʼira khö Lowalangi, hizaʼi lagohi waʼasana dödö ba waʼaurira. Börö me lawaʼö tödöra wa tola manö mate ira ba zi lö ladöna-döna, laforege sibai ba wamalua fefu zomasi-masi dödöra. Faduhu dödöda wa hasambalö isusugi niha si no mate Yehowa. Börö daʼö, moguna molua-lua waʼafaduhu dödöda andrö ba gangetulada sanandrösa ba wamili si fahuwu khöda. Moguna mangelama ndra niha Keriso si so ba Gorindro enaʼö lö fariawö ira ba niha si lö faduhu tödö ba wanusugi. Hadia wamahaʼönia khöda? Na tahorigö ginötöda fariawö khö ndra awöda si lö moʼameʼegö tödö salua ba zi so miföna ba solohi faʼasana dödö, tola iʼasogö khöda lua-lua si lö sökhi. Na fariawö ita ba niha simane daʼö, tola lafakiko mbua-bua hegöi amuata si sökhi si toʼölö tafalua. Baero daʼö, tola ladönisi dödöda ba wamalua amuata si fatuwu khö Lowalangi. Daʼö mbörö wa iʼamenesi ita Faulo imane, ”Böi miförö ba mifalua zatulö, böi mitohugö wamalua horö.”—1 Ko. 15:33, 34. w20.12 9 ¶3, 5-6

Itutunö ayati daʼa gamakhoita sanandrösa ba wondröniaʼö. Iʼogunaʼö gamakhoita andre Yehowa ba wamöföʼö ösi nomonia si so ba zorugo hegöi ba gulidanö. Börö me sondröniaʼö fondrege zalawa Yehowa, iʼokhögö kuaso sabölö ebua. Ibeʼe göi kuaso khö ndraononia, yaʼia daʼö ira malaʼika hegöi niha gulidanö. Tezofu-zofu dania khöra hewisa wangogunaʼöra kuasora, ba laʼonorogö tödö daʼö föna Yehowa. (Rom. 14:10; Ef. 3:14, 15) No ibeʼe Yehowa kuaso khö Yesu ba wondröniaʼö banua niha Keriso. Hizaʼi, tezofu-zofu dania khö Yesu hewisa lalania ba wondröniaʼö yaʼita. (1 Ko. 15:27) Ibeʼe göi kuaso Yehowa khö ndra foʼomo ira matua ba wondröniaʼö foʼomora hegöi iraonora. Hewisa lala enaʼö tola tobali högö si sökhi yomo ba nomo zi samösa ira matua? Enaʼö tola tobali högö si sökhi yomo ba nomo zi samösa ira matua, moguna aboto ba dödönia hadia nitötöna Yehowa khö ndra matua si tobali högö yomo ba nomo. Moguna göi iʼila hadia mbörö wa itatugöi Yehowa noro dödö simane daʼö, ba hewisa woloʼönia duma-duma Yehowa hegöi Yesu. Hana wa moguna fefu daʼö? Börö me so ösa kuaso si no ibeʼe Yehowa khö ndra matua si tobali högö yomo ba nomo, ba omasi ia na sökhi wangogunaʼöra kuasora andrö.—Luk. 12:48b. w21.02 2 ¶1-3

Moguna taʼoʼö Yehowa si lö irai manöngöni sala si no irai tafalua. Hewaʼae na moʼahonoa ia ba wanöngöni, omasi iʼefaʼö ba iʼolifugö zala nifaluada na sindruhu-ndruhu tabulöʼö gera-erada. (Si. 25:7; 130:3, 4) Omasi göi ia na tafalua zimane daʼö na so niha zangandrö faʼebolo dödö börö me no iʼafökhöiʼö dödöda. (Mat. 6:14; Luk. 17:3, 4) Utoda andre, no buala sahöli-höli dödö moroi khö Yehowa. Tola taforomaʼö wa taʼameʼegö tödö mbuala andrö na taʼogunaʼö ia ba wamolakhömi Yehowa. So niha sangogunaʼö utora ba wotatugöi samösa hezo zi sökhi hegöi si lö sökhi. Hizaʼi, börö me Yehowa zomböi yaʼita, abölö alawa nasa goi-goinia moroi ba goi-goi nitatugöida samösa. (Rom. 12:1, 2) Na taʼoʼö goi-goi Yehowa, itugu tarasoi waʼahono dödö ba waʼauri. (Yes. 48:18) Baero daʼö, taʼokhögö gohitö dödö ba waʼauri si no tatu, yaʼia daʼö ba wangomusoiʼö dödö Yehowa ba tafolakhömi ia börö me yaʼia Zomböi ba Amada.—Amd. 27:11. w20.05 24 ¶13-14

Hewisa enaʼö taʼomasiʼö ndra talifusöda iadaʼa simane fangomasiʼöda ösi nomoda? Na itugu ahatö ita khö ndra talifusöda ba wamati, tola manö itugu aoha khöda ba wangiʼila hewisa ira zindruhunia, ba taʼomasiʼö ira simane fangomasiʼöda ösi nomoda. Tola fahuwu ita khöra hewaʼae na faböʼö ndröfi hegöi lala waʼaurida ba zilalö. Törö tödömö wa te mato 30 fakhe abölö atua Yonata moroi khö Dawido, hizaʼi tola aro wahuwusara. Hadia so zi tola öbaliʼö si fahuwu khöu ba mbanua niha Keriso, hewaʼae na abölö awuyu-wuyu mazui abölö atua ia moroi khöu? Na öfalua daʼö, no öforomaʼö wa ’öʼomasiʼö dalifusöu ba wamati’. (1 Fe. 2:17) Na taʼomasiʼö ndra talifusöda simane fangomasiʼöda ösi nomoda, hadia daʼö geluahania wa tabaliʼö si fahuwu khöda fefu niha si so ba mbanua niha Keriso? Tenga. Tebai tafalua daʼö. Lö fasala na so ösa dalifusöda sabölö ahatö khöda börö me fagölö zomasi-masi ita. Duma-dumania, abölö ahatö Yesu khö Yohane, hewaʼae na ifotöi fefu ndra sinengenia ”si fahuwu” khönia. (Yoh. 13:23; 15:15; 20:2) Hizaʼi, lö abölö tohude nifalua Yesu khö Yohane moroi khö ndra sinenge tanö böʼö.—Mrk. 10:35-40. w21.01 23 ¶12-13

Me manuriaigö sinengö sotöi Faulo ba Niha Baero si so ba Atena, lö iʼogunaʼö lala si fagölö simane me manuriaigö ia ba niha Yahudi. Inehegö ngawalö zi so ba zi fasuinia hegöi lala wamosumange nifalua niha si so ba daʼö. (Hal. 17:23) Aefa daʼö, iforege ba wangalui hadia manö nifaduhusira tödö si fagölö ba zindruhu si so ba Zura Niʼamoniʼö. Iforege sibai Faulo enaʼö tefaudu lalania ba wamörögö fahuhuosa. Ifatunö ba niha Atena wa turia nifaʼemania andrö moroi khö ’Lowalangi si Lö Laʼila’, si no lafosumange iʼotarai mböröta. Hewaʼae na lö aboto ba dödöra nösi Zura Niʼamoniʼö, lö iwaʼö Faulo wa tebai tobali ira niha Keriso. Hizaʼi, ba wamaiginia yaʼira andrö hulö zinanö si no tola mubasi, ba ifaudugö lalania wamörögö fahuhuosa me manuriaigö ia khöra. Simane Faulo, moguna önehegö hadia manö zi tola manolo yaʼugö enaʼö aboto ba dödömö hadia nifaduhusi tödö niha si so ba nahiamö wanuriaigö. Duma-dumania, tola önehegö hadia manö gama-gama si so ba nomora. Baero daʼö, tola öʼila hadia agama zi samösa niha moroi ba döinia, lala wonukhania, sikhala hegöi lagu wahuhuosania. w20.04 9-10 ¶7-8