Baŵa si Fulu

Na aboto ba dödöda sanandrösa khö Yesu, taʼoʼö lala wangera-ngerania hegöi amuatania. Ba na itugu tedou waʼaboto ba dödöda ba taʼoʼö lala wangera-ngerania, tola itugu aro wahuwusada khönia. Hewisa lalada ba woloʼö duma-duma Yesu? Angeragö sambua duma-duma. Abölö iʼangeragö Yesu sanandrösa ba wanolo niha böʼö moroi ba wangomusoiʼö tödönia samösa. (Mat. 20:28; Rom. 15:1-3) Börö lala wangera-ngerania andrö, tola iforomaʼö waʼaoha gölö hegöi fangefa sala. Lö alio tetutu dödönia börö wehede niha böʼö sanandrösa khönia. (Yoh. 1:46, 47) Lö itehegö tobali daha-taha irege tebai fahuwu ia ba zi samösa niha ha börö me no ifalua zala ba zilalö. (1 Ti. 1:12-14) Imane Yesu, ”Ba daʼö aboto ba dödö niha fefu wa no nifahaʼögu ami na faoma miʼomasiʼö nawömi.” (Yoh. 13:35) Moguna ösofu khöu samösa, ”Hadia no uʼoʼö duma-duma Yesu ba uforege sibai enaʼö atulö ndraʼo khö ndra talifusögu?” w20.04 24 ¶11

Hewaʼae na no lafasui ndraʼugö niha sangobousi ba sangoʼaya töi Yehowa, tola öfatunö khöra wa Yehowa andrö no Lowalangi sindruhu, niʼamoniʼö, si sökhi, ba sebua faʼomasi. Tola göi ötuhini wamatörö Yehowa. Tola öfatunö ba niha wa ha famatörö Yehowa wondrege zi sökhi ba ha famatörönia andrö zi tola manolo yaʼita ba wangokhögö faʼauri safönu faʼahono dödö hegöi faʼomuso dödö. (Si. 37:9, 37; 146:5, 6, 10) Ba ginötö tafahaʼö zindruhu si so ba Zura Niʼamoniʼö ba niha böʼö, asese tafadunö-dunö sanandrösa ba waʼasinangea Lowalangi ba wamatörö banua si yawa awö danö. Atulö sa wa moguna sibai tafalua daʼö. Hizaʼi, ohitö dödöda si oföna yaʼia daʼö ba wanolo niha nifahaʼöda ba Zura Niʼamoniʼö enaʼö laʼomasiʼö Namada sotöi Yehowa ba lö faröi ira khönia. Andrö, baero ba wanutunö sanandrösa ba goi-goi si no itatugöi Lowalangi, moguna asese tadunö-dunö sanandrösa ba gamuata Yehowa. Omasi ita taforomaʼö hewisa zindruhunia gamuata Lowalangi sotöi Yehowa andrö. (Yes. 63:7) Na tafalua daʼö, tola tumbu ba dödöra waʼomasi khö Yehowa, ba laʼoʼö niwaʼö Yehowa börö me sindruhu-ndruhu omasi ira ba wamalua daʼö. w20.06 6 ¶16; 7 ¶19

Mufazökhi guto niha si fao faʼahöli-höli dödö. Me so ita bakha ba dalu ninada, tedou gutoda simane faʼatedou nitatugöi Yehowa, ba so ngahönö sel si bohou tefazökhi ero menit. Moloʼö niha sagatua-tua, so arakhagö 100 miliar sel si tohude nifotöi neuron ba guto niha si no ebua-bua. Teʼorudugö sel andre tobali utoda, ba faʼabuania te mato 1,5 kilogram. Sambua zi tola ifalua uto niha sahöli-höli dödö famazökhi andre yaʼia daʼö ba ginötö talau fahuhuo. Na tatötöi zi sambua fehede, so mato 100 ndroto-ndroto si so ba lelada, tölö-tölöda, beweda, simbida, hegöi tötöʼada, nifaliwa gutoda. Moguna maliwa fefu ndroto-ndroto andrö ba ginötö si tefaudu enaʼö tola aboto ba dödö niha böʼö ngawua wehede niwaʼöda. Baero daʼö, ato niha sagatua-tua si faduhu tödö wa so waʼatua-tua ba niha iʼotarai me tumbu ba wangiʼila hegöi ba wamahaʼö yaʼira ba li si bohou. So sambua penelitian si no mufaʼanö me döfi 2019. Moloʼö penelitian daʼö, tola laʼila ngawua wehede nirongora iraono sawena tumbu ba aboto ba dödöra daʼö. Daʼa zangoromaʼö wa no buala moroi khö Yehowa me tola fahuhuo ita. w20.05 22-23 ¶8-9

Aoha gölö Gaberahamo ba wondröi faʼaurinia si sökhi ba mbanua Guri. Hadia mbörö? Börö me idöna-döna ”mbanua andrö, saro dane-dane”. (Heb. 11:8-10, 16) Banua nidöna-döna Gaberahamo yaʼia daʼö Famatörö Lowalangi. Yesu zi tobali Razo ba Wamatörö andrö, ba so 144.000 niha nibayoini si fao awönia mamatörö. Ifotöi Wamatörö andrö Faulo, ”banua Lowalangi sauri yaʼia daʼö Yeruzalema si so ba zorugo”. (Heb. 12:22; Fam. 5:8-10; 14:1) Ifahaʼö ndra soloʼö yaʼia Yesu enaʼö laʼangandröi waʼatohare Wamatörö andrö, irege tola alua gohitö dödö Lowalangi ba gulidanö simane ba zorugo. (Mat. 6:10) Hadia no aboto ba dödö Gaberahamo fefu hadia ia zoʼamakhaita ba Wamatörö Lowalangi? Löʼö. No ’si tobini niʼamoniʼö’ daʼö ba zi hauga ngaotu fakhe faʼara. (Ef. 1:8-10; Kol. 1:26, 27) Hizaʼi, aboto ba dödönia wa so ösa dania ngaʼötönia zi tobali razo, börö me daʼö nifabuʼu Yehowa khönia.—1 Mo. 17:1, 2, 6. w20.08 2-3 ¶2-4

Moguna tatimbagö wamahaʼö moroi ba niha si no mondröi sindruhu. Iʼotarai me tefasindro mbanua niha Keriso, no iforege Afökha enaʼö awuwu wamati niha Keriso. Daʼö mbörö wa moguna aboto ba dödöda hewisa lala ba wamaehusi angombakhata si tefaudu ba zi lö tefaudu. Niha si fatuwu khöda, tola manö laʼogunaʼö Internet mazui media sosial ba wamazaewe falimosa. Omasi ira na lö saʼae tafaduhusi tödö Yehowa ba lö saʼae taʼomasiʼö ndra talifusöda. Hizaʼi, moguna aboto ba dödöda wa moroi khö Zatana fefu walimosa andrö. Daʼö mbörö wa lö moguna tafaduhusi tödö daʼö! (1 Yo. 4:1, 6; Fam. 12:9) Enaʼö lö mofozu Zatana ba wamakiko famatida, moguna taʼaroʼö wamatida khö Yesu. Moguna göi faduhu dödöda wa yaʼia niʼogunaʼö Yehowa ba wamalua ohitö dödönia. Baero daʼö, moguna göi tafaduhusi tödö ndra sawuyu si lö faröi ba satua-tua, wa ha yaʼira niʼogunaʼö Yehowa ba wondröniaʼö organisasinia. (Mat. 24:45-47) Tola taʼaroʼö wamatida na tafahaʼö ita ba Zura Niʼamoniʼö ero maʼökhö. Na tafalua daʼö, tola aro wamatida, simane eu saro waʼa ba narö danö. Iwaʼö göi wehede simane daʼö Faulo me isura ngawua wehede ba ayati maʼökhö andre. w20.07 23-24 ¶11-12

Börö me niha si lö moʼahonoa ita, asese tahuku niha böʼö moloʼö niʼila hörö. (Yoh. 7:24) Hizaʼi sindruhunia, lö oya zi tola aboto ba dödöda na taʼodaligö niʼila hörö. Duma-dumania, hewaʼae na onekhe zi samösa doto mazui no ara ia mohalöwö, lö aboto sibai ba dödönia wökhö zi samösa niha moloʼö niʼila hörönia. Moguna ihaogö ifondrondrongo hadia nitutunö khönia, enaʼö tola aboto ba dödönia hewisa zalua khö zi samösa niha, hewisa dödönia, ba hadia manö nirasoinia. Ba tola manö, ironsen niha sofökhö andrö enaʼö tola iʼila ndroto-ndroto si so bakha ba mbotonia. Na ifalua daʼö, tola itatugöi hadia lala si tefaudu ba wamadöhö fökhö si göna ba niha daʼö. Simanö göi, lö aboto sibai ba dödöda ndra talifusöda na ha moloʼö niʼila hörö. Moguna taforege enaʼö taʼila nösi dödöra ba hewisa ira zindruhunia. Sindruhu sa, tebai tabaso nösi dödö zi samösa niha. Hizaʼi, tola taforege ba woloʼö duma-duma Yehowa. Ifondrondrongo ira. Aboto ba dödönia waö-waö waʼaurira hegöi salua khöra. Ba ihakhösi tödö ira. w20.04 14-15 ¶1-3

Niha sasiliyawa, lö lafaigi ira ”ndrohu-ndrohu zinangeania”. Omasi ira faʼudu ba so khöra mbua-bua fakhögusa. Börö lala wangera-ngerara hegöi amuatara, asese laʼasogö gabula dödö ba waʼaurira samösa hegöi ba niha böʼö. Na lö labulöʼö lala wangera-ngerara, tola manö ifakiko ba ifaelungu ira Satana. (2 Ko. 4:4; 11:3) Niha sangokhögö fangide-ngideʼö, tola lafaigi ira ndrohu-ndrohu zinangeania. Aboto ba dödöra wa abölö oya waʼatohude niha böʼö moroi khöra. (Fil. 2:3) Iwaʼö Sura Niʼamoniʼö wa ”fatuwu khö Lowalangi niha si fayawa ba ibeʼe waʼasökhi dödö sebua ba niha sangide-ngideʼö yaʼia”. (1 Fe. 5:5) Börö daʼö, na lö omasi ita fatuwu khöda Yehowa, moguna taʼokhögö wangide-ngideʼö. Enaʼö lö mamalö taʼokhögö wangide-ngideʼö, moguna taʼoʼö mene-mene Zura Niʼamoniʼö enaʼö ’taheta khöda gamuata si tohöna andrö hegöi si toʼölö tafalua me föna, ba tabohouni gamuatada’. Moguna tafahaʼö ita ba duma-duma Yesu, ba taforege ba woloʼö duma-dumania.—Kol. 3:9, 10; 1 Fe. 2:21. w20.07 7 ¶16-17

Fefu ita, no taʼokhögö döi si sökhi me tola farahu ita ba mbanua niha Keriso khö Yehowa. No farahu ita ba waradaiso ba wamati safönu faʼowua-wua dödö hegöi faʼahono dödö. Hadia halöwö si tohude niʼokhögömö ba mbanua niha Keriso? Ifagölösi mbanua niha Keriso Faulo simane boto niha. Ifagölösi göi niha si so ba mbanua niha Keriso simane ndroto-ndroto si so ba mboto niha. (Rom. 12:4-8; 1 Ko. 12:12-27; Ef. 4:16) Sambua famahaʼö si tola tahalö moroi ba gamaedola nibeʼe Waulo yaʼia daʼö taʼokhögö halöwö si tohude ba nösi nomo Yehowa. Imane Faulo ba wamörögö gamaedolania, ”Ha sambua mbotoda ba oya ndroto-ndrotonia si faböʼö-böʼö halöwö, simanö ita ba khö Keriso, hewaʼae ato, ha sambua boto ita ba no ndroto-ndroto ita zamösana khö nawöda.” (Rom. 12:4, 5) Hadia geluaha wehede Waulo andrö? Hewaʼae na faböʼö-böʼö halöwöda ba mbanua niha Keriso, no sebua böli ita. w20.08 20 ¶1-2, 4

Yaʼami ira satua, hewisa woloʼömi duma-duma wangide-ngideʼö Yehowa? Na so halöwö nibeʼemi khö ndraonomi, tola miʼandrö mbua gera-erara sanandrösa ba wangasiwai halöwö daʼö. Ba na tefaudu, tola mifalua mbua gera-era nifaʼemara. Oroma göi wa so khö Yehowa waʼebolo dödö. Duma-dumania, me iwaʼö Aberahamo wa tola manö lö tefaudu gangetula Yehowa ba wanudugö banua Zodoma hegöi Gomora, ifondrondrongo ia Yehowa si fao faʼebolo dödö. (1 Mo. 18:22-33) Törö tödöu göi gamuata Yehowa khö woʼomo Gaberahamo sotöi Sara. Maʼiki Zara me irongo mbuʼusa li Yehowa wa hasambalö manabina ia hewaʼae na no alawa ndröfinia. Hewaʼae simanö, lö abao dödö Yehowa mazui mofönu ia. (1 Mo. 18:10-14) Hizaʼi, iforomaʼö Yehowa wa iʼosinangegö sibai Zara. Yaʼami ira satua hegöi ira satua sokubaloi, hadia wamahaʼö si tola mihalö moroi ba duma-duma Yehowa? Hadia nifaluami na so ndraonomi mazui ira talifusöda ba mbanua niha Keriso si lö fao tödö ba gangetula nihalömi? Hadia iʼanemaiʼö miwaʼö wa fasala nifaluara andrö? Mazui hadia miforege enaʼö aboto ba dödömi lala wangera-ngerara? Na laʼoʼö duma-duma Yehowa ira satua hegöi ira satua sokubaloi, oya mbua nitema nösi nomora hegöi banua niha Keriso. w20.08 10 ¶7-9

Hadia wamahaʼö si tola tahalö moroi khö Waulo? Me awena sibai tafahaʼö ita ba zindruhu, te omasi ita na latolo ita niha böʼö, börö me taʼila wa oya nasa zinangea tafahaʼö yaʼita. (1 Ko. 3:1, 2) Hizaʼi, hewisa ita iadaʼa? Na no tafosumange Yehowa ba zi hauga fakhe faʼara ba no oya zi no irai tatörö, tola manö ambö omasi ita ba wanemaʼö fanolo, mendrua manö na abölö ara ita ba zindruhu moroi ba niha daʼö. Hizaʼi, asese iʼogunaʼö ndra talifusöda Yehowa ba wangabölöʼö yaʼita. (Rom. 1:11, 12) Börö daʼö, na omasi ita tatema waʼabölö moroi khö Yehowa, moguna tatema wanolo moroi khö ndra talifusöda. Mofozu waʼauri zi samösa niha, lö teʼodaligö daʼö moloʼö faʼabölö mbotonia, faʼalawa zekola, faʼakayo, hegöi si toʼölö mufalua ba zi sambua banua, hizaʼi moloʼö fangide-ngideʼö hegöi fangodaligönia Yehowa. Dataforege (1) ba wangodaligö Yehowa, (2) ba wangai famahaʼö moroi ba duma-duma si so ba Zura Niʼamoniʼö, hegöi (3) ba wanemaʼö fanolo moroi khö ndra talifusöda ba wamati. Na tafalua daʼö, hasambalö iʼabölöʼö ita Yehowa ba ginötö tarasoi wa lö faʼabölöda! w20.07 14 ¶2; 19 ¶18-19

Tola manö itaria abua khöda ba wangoromaʼö faʼebolo dödö na manuriaigö ita ba nösi nomoda si tenga si sara lala ba wamati. Tola tafahaʼö ita ba goi-goi si so ba Zangombakha 3:1, 7. Imane ayati andrö, ”So ginötö . . . wa lö hede-hede ba inötö wahuhuosa.” Itaria, hewaʼae na lö hadöi hede-hededa, tola adöni dödö nösi nomoda ba duria somuso dödö na laʼila gamuatada si sökhi. (1 Fe. 3:1, 2) Hizaʼi, moguna göi no tefaʼanö ita ba wamaʼema khöra zi no aboto ba dödöda. Sagötö wamaluada halöwö fanuriaigö hegöi famahaʼö si fao faʼowölö-ölö, moguna taforomaʼö waʼebolo dödö ba niha fefu, tefarahu ba daʼö nösi nomoda. Tola göi tafahaʼö ita sanandrösa ba waʼebolo dödö moroi ba duma-duma ndraono mbanua Yehowa si lö faröi ba götö Zura Niʼamoniʼö hegöi ba götöda iadaʼa. Duma-dumania, hewaʼae omasi Habakuki na tehori waʼalösökhi, lö aetu iʼokhögö waʼebolo dödö ba imane, ”Lö tebulö mozizio ndraʼo ba naha wanaro.” (Hab. 2:1) Duma-duma tanö böʼö yaʼia daʼö Faulo. No irai iwaʼö wa omasi sibai ia ’ba wangasiwai’ halöwönia ba gulidanö. Hewaʼae simanö, lö aetu iʼokhögö waʼebolo dödö ba lö iböhöli ba ’wamaduhuʼö turia somuso dödö’.—Hal. 20:24. w20.09 11-12 ¶12-14

Hewaʼae na sebua kuaso numero dua Yesu ba mbanua si yawa awö danö, lö irai so ba dödönia wa abölö tohude ia moroi ba zindruhunia. Na taʼokhögö wangide-ngideʼö, itugu taforomaʼö waʼomasi ba niha böʼö. Ba iwaʼö Yesu wa faʼomasi zi tobali tandra nono mbanua Lowalangi sindruhu. (Luk. 9:48; Yoh. 13:35) Hewisa na so gabula dödö ba mbanua niha Keriso, ba öwaʼö tödömö wa lö tefaudu lala niʼogunaʼö ndra satua sokubaloi ba wangasiwai yaʼia? Moroi na mukökö-kökö ndraʼugö, tola öforomaʼö wangide-ngideʼö na ötuhini ndra talifusöda si tobali sondröniaʼö ba mbanua niha Keriso. (Heb. 13:17) Angerönusi wanofu-nofu andre si tobali fanolomö ba wangokhögö fangide-ngideʼö: ’Hadia ebua sibai gabula dödö andrö irege moguna muʼasiwai? Hadia daʼa ginötö si tefaudu ba wangasiwai yaʼia? Hadia no tebeʼe khögu noro dödö ba wangasiwai abula dödö andrö? Hadia sindruhu-ndruhu uforege ba wangaʼasogö fahasara dödö ba mbanua niha Keriso, mazui uforege enaʼö abölö tohude ndraʼo?’ Ba wamaigi Yehowa, abölö tohude wangide-ngideʼö moroi ba ngawalö nekhe-nekhe danga niʼokhögöda. Tohude sibai göi ba wamaiginia fahasara dödö ba gotalua nono mbanuania moroi ba wangasiwai abula dödö ba lala salio hegöi si tefaudu. Börö daʼö, moguna taforege ba wamosumange Yehowa si fao fangide-ngideʼö. Na tafalua daʼö, tola fao ita ba wangaʼasogö fahasara dödö ba mbanua niha Keriso.—Ef. 4:2, 3. w20.07 4-5 ¶9-11

Iʼandrö sibai saohagölö Yesu khö ndra alawe si lö faröi börö me ”laʼogunaʼö fefu gokhötara” ba wanolo yaʼia. (Luk. 8:1-3) Ifahaʼö göi ira ba zindruhu sanandrösa ba gohitö dödö Lowalangi. Duma-dumania, iʼombakhaʼö khöra wa hasambalö mate ia ba ifuli tesusugi. (Luk. 24:5-8) Simane nifaluania khö ndra sinengenia, ifaʼanö göi ira ba wanaögö fanandraigö salua khöra ba zi so miföna. (Mrk. 9:30-32; 10:32-34) Ba gafuriata, hewaʼae na moloi ndra sinenge Yesu me laraʼu ia, so ösa ndra alawe si lö faröi ba wotuhini yaʼia me itaögö waʼafökhö fatua lö mate ia ba döla geu famakao. (Mat. 26:56; Mrk. 15:40, 41) Ira alawe zi oföna sibai falukha khönia me no aefa tesusugi ia. Iʼandrö göi khöra ba wamatunö khö ndra sinengenia wa no tesusugi ia moroi ba waʼamate. (Mat. 28:5, 9, 10) Baero daʼö, me Fendrakose 33 M, te so ösa ndra alawe nibayoini faoma eheha niʼamoniʼö, ba fefu ira si so ba daʼö latema waʼonekhe sahöli-höli dödö irege tola fahuhuo ira ba li böʼö ba latutunö ba niha böʼö sanandrösa ”ba zahöli-höli dödö nifalua Lowalangi”.—Hal. 1:14; 2:2-4, 11. w20.09 23 ¶11-12

Halöwö fombaliʼö nifahaʼö nifaluada, tola möi fangorifi niha böʼö! Hana wa tola tawaʼö zimanö? Me ibeʼe Yesu fareta nisura ba Mataiʼo 28:19, 20, imane wangumaʼö, ”Miʼae mibaliʼö nifahaʼögu fefu niha . . . , mibayagö ira idanö.” Tohude sibai wamayagö idanö börö me moguna ifalua daʼö si samösa niha enaʼö tola teʼorifi ia ba iʼokhögö waʼauri si lö aetu. Moguna mamati niha somasi tebayagö idanö wa tola iʼokhögö dötönafö faʼauri si lö aetu börö me no mate Yesu salahida, ba no göi tesusugi ia moroi ba waʼamate. Daʼö mbörö wa imane sinenge sotöi Fetero ba niha Keriso, ’Fombayagö idanö zangorifi yaʼami iadaʼa börö wemaoso Yesu Keriso.’ (1 Fe. 3:21) Börö daʼö, na tebayagö idanö zi samösa niha, no tebeʼe khönia ginötö ba wangokhögö faʼauri si lö aetu. Enaʼö tola mofozu ita ba wombaliʼö nifahaʼö, moguna taforege ba wondrouʼö ’faʼatua-tuada’ ba wamahaʼö. (2 Ti. 4:1, 2) Hadia mbörö? Börö me no ifaretakö ita Yesu, imane, ”Miʼae mibaliʼö nifahaʼögu fefu niha . . . . Mifahaʼö ira.” Ifahaʼö ita sinenge sotöi Faulo wa tola ’teʼorifi ita awö zamondrongo yaʼita’ na lö taböhöli ba wamahaʼö niha böʼö. w20.10 14 ¶1-2

Omasi Wetero ba wamalua halöwönia tobali samaʼuʼu niha. Börö wanolo moroi khö Yehowa, itugu tedou waʼonekhe Wetero ba wamalua halöwö andrö. (Hal. 2:14, 41) Terou dödöda ba wamalua halöwö fanuriaigö börö me taʼomasiʼö Yehowa. Hewaʼae na itaria tarasoi wa ambö onekhe ita ba wamalua yaʼia, lö tobali daha-tahada daʼö börö me taʼomasiʼö ia. Me ikaoni Wetero Yesu enaʼö tobali ia samaʼuʼu niha, imane khönia, ”Böi ataʼufi.” (Luk. 5:8-11) So waʼataʼu khö Wetero, tenga börö me ikhalaigö hadia zalua khönia na no tobali ia soloʼö Yesu. Hizaʼi, me iʼila dandra sahöli-höli dödö nifalua Yesu irege tola lasöndra giʼa soya sibai, ibörögö so khönia waʼaombö dödö hadia sinangea falulu fohalöwö ia khö Yesu. Simane Fetero, te örasoi göi waʼataʼu. Te so khöu waʼaombö dödö me ökhalaigö hadia manö zinangea öfalua enaʼö tola tobali ndraʼugö nifahaʼö Keriso. Na daʼö nirasoimö, aroʼö waʼomasimö khö Yehowa, Yesu, hegöi niha böʼö. Na öfalua daʼö, tola terou dödömö ba wanemaʼö fogaoni nibeʼe Yesu enaʼö tola tobali ndraʼugö samaʼuʼu niha.—Mat. 22:37, 39; Yoh. 14:15. w20.09 3 ¶4-5

Tatehegö ginötöda, faʼabölöda, hegöi kefeda ba wangalui ”niha si sökhi amuata somasi manöndra faʼauri si lö aetu”. (Hal. 13:48) Na tafalua daʼö, no taʼoʼö duma-duma Yesu me imane, ”Daʼö gögu yaʼia wamalua somasi zamatenge yaʼo hegöi ba wangasiwai halöwö nibeʼenia khögu.” (Yoh. 4:34; 17:4) Edöna sibai göi ita ba wamalua simane daʼö. Omasi ita ba wangasiwai halöwö si no mufaduhusi tödö khöda. (Yoh. 20:21) Ba omasi göi ita na fao khöda niha böʼö ba wamalua halöwö andre si fao faʼanau gölö, tefarahu ba daʼö niha si no mamöhöli halöwö ba wamati. (Mat. 24:13) Sindruhu sa, lö aoha khöda ba wamalua halöwö si no ibeʼe Yesu. Hizaʼi, tenga ha yaʼita zamalua halöwö andre. No ifabuʼu khöda Yesu wa hasambalö fao ia khöda. Na tafalua halöwö fombaliʼö nifahaʼö, no tobali ita ”si falulu fohalöwö . . . ba halöwö Lowalangi” ba ”tobali soloʼö khö Keriso”. Daʼö mbörö wa hasambalö itolo ita Yehowa hegöi Yesu ba wamalua halöwö andre. (1 Ko. 3:9; 2 Ko. 2:17) Börö daʼö, tola mofozu ita ba wamalua yaʼia. No töi si sökhi ba no faʼomuso dödö me tola tafalua halöwö daʼa ba tatolo göi niha böʼö ba wamalua yaʼia!—Fil. 4:13. w20.11 7 ¶19-20

Si toʼölönia, tola molua-lua ba ndraono gangetula nihalö ndra satuara irugi waʼebua-buara. Na lahalö gangetula si lö tefaudu ira satua, tola tobali abula dödö daʼö ba ndraonora. Hizaʼi, na lahalö gangetula si tefaudu, tola larasoi waʼomuso dödö iraonora. Moguna göi lahalö gangetula si tefaudu iraono. Angetula fondrege zi sökhi si tola tahalö yaʼia daʼö ba wamosumange Namada sebua faʼomasi sotöi Yehowa. (Si. 73:28) Omasi ndra satua Yesu sotöi Yosefo hegöi Maria, ba wanolo iraonora enaʼö tobali samosumange Yehowa. Moroi ba gangetula nihalöra, tola oroma wa famosumange Yehowa zabölö tohude ba waʼaurira. (Luk. 2:40, 41, 52) Ihalö göi gangetula si tefaudu Yesu, irege tola ifalua gohitö dödö Yehowa. (Mat. 4:1-10) Tobali Yesu ira matua si sökhi tödö, si lö faröi, ba sangokhögö faʼabarani. Tatu omuso dödö ndra satua sangomasiʼö Yehowa na laʼokhögö ndraono simane Yesu. w20.10 26 ¶1-2

Khalaigö ösa duma-duma andre. Itörö tödö dalifusöda ira alawe si no alawa döfi wa oya zi sökhi salua khönia me awuyu-wuyu nasa ia. Hizaʼi, börö me no alawa ndröfinia iadaʼa, so ösa daha-taha nitaögönia. Hewaʼae simanö, lö aetu ibeʼe wondrege zi sökhi khö Yehowa. (1 Ko. 15:58) Ero maʼökhö, lö aetu ikhalaigö wa toröi ia ba Waradaiso, ba fao göi khönia niha niʼomasiʼönia. Itörö tödö dalifusöda ira alawe tanö böʼö wa no irai iʼafökhöiʼö dödönia si samösa talifusöda. Hizaʼi, lö omasi ia na itörö-törö manö tödönia daʼö. (Kol. 3:13) Itörö tödö dalifusöda ira matua wa no irai ifalua zala ba zilalö. Hewaʼae simanö, lö iʼosambuaʼö dödönia ba zalania andrö. Hizaʼi, iʼangeragö hewisa lala enaʼö lö faröi ia khö Yehowa. (Si. 51:10) Hadia waʼafagölö ndra talifusöda si datölu andrö? Fagölö-gölö latörö tödöra zi no irai alua khöra ba zilalö. Hewaʼae simanö, lö laʼosambuaʼö dödöra ba daʼö. Hizaʼi, ’laʼadölöʼö höröra’ ba zi so miföna. Hana wa moguna ’taʼadölöʼö höröda’ ba zi so miföna? Tebai adölö wofanö zi samösa niha na lö aetu ifaigi zi so furinia. Simanö göi, tebai tabeʼe wondrege zi sökhi khö Yehowa na lö aetu taʼosambuaʼö dödöda ba zi no irai alua khöda mazui si no irai tafalua ba zilalö.—Luk. 9:62. w20.11 24 ¶1-3

No niha si lö faʼabölö Dawido ba wamaigi Goliato, samösa zaradadu sabölö, börö me abölö ebua mbotonia, oya wakake wasuwöta niʼokhögönia, ba no tefomaha ia ba wasuwöta. Ha ono matua side-ide Dawido, lö toʼölö ia fasuwö, ba lö iʼokhögö wakake wasuwöta. Hizaʼi, iʼodaligö waʼabölö moroi khö Yehowa ba ikalaisi nudunia. (1 Sa. 17:41-45, 50) So gabula dödö tanö böʼö nitaögö Dawido, irege irasoi wa hulö zi lö faʼabölönia. Si fao faʼalöfaröi, mangai halöwö Dawido khö Zaulo, samösa niha si no ifili Yehowa tobali razo ndraono Gizaraʼeli. Ba wamobörö, iʼosinangegö Dawido andrö Saulo. Hizaʼi ba gafuriatania, so wayawasa khö Zaulo irege afökhö dödönia khö Dawido. Ifalua zi lö sökhi khö Dawido, ba itandraigö ba wamunu yaʼia. (1 Sa. 18:6-9, 29; 19:9-11) Börö me Yehowa zamataro Saulo tobali razo, lö aetu ifosumange ia Dawido hewaʼae na ifalua khönia zi lö atulö. (1 Sa. 24:6) Hizaʼi, iʼodaligö Yehowa ba wameʼe khönia faʼabölö ba wanaögö fanandraigö andrö.—Si. 18:1, superskripsi. w20.07 17 ¶11-13

Ba wamaʼeleʼö andrö, so darua razo si faʼudu, yaʼia daʼö razo tanö yöu hegöi razo tanö raya. So ösa zi no alua ba wamaʼeleʼö andrö. Daʼö mbörö wa tola faduhu dödöda wa hasambalö alua göi nifaʼeleʼönia tanö böʼö. Enaʼö aboto ba dödöda wamaʼeleʼö nisura ba Danieli faza 11, so dombua zinangea tatörö tödöda. Si oföna, manandrösa wamaʼeleʼö daʼa ha khö ndra samatörö sangokhögö kuaso si tola molua-lua ba nono mbanua Yehowa. Ba hewaʼae na ha maʼifu nono mbanua Yehowa ba gotalua niha gulidanö andre, asese göna ira folohi moroi khö ndra samatörö. Hadia mbörö? Börö me omasi Zatana hegöi si fao khönia ba wangohori fefu niha samosumange Yehowa. Daʼö gohitö dödöra si oföna. (1 Mo. 3:15; Fam. 11:7; 12:17) Si dua, moguna tatörö tödöda wa hasambalö tefaudu wamaʼeleʼö Danieli andre ba wamaʼeleʼö tanö böʼö si so ba Daromali Lowalangi. Andrö, enaʼö tola sindruhu-ndruhu aboto ba dödöda wamaʼeleʼö Danieli andre, moguna tafaedogö ia ba ayati tanö böʼö si so ba Zura Niʼamoniʼö. w20.05 2 ¶1-2

No faböʼö-böʼö lala wangera-ngera niha sanandrösa ba zalua ba niha si no mate. Hizaʼi, hadia nifahaʼö Zura Niʼamoniʼö? Na mate zi samösa niha, obou mbotonia. Hizaʼi, tola isusugi ia Lowalangi Yehowa samazökhi banua si yawa awö danö, ba ibeʼe khönia mboto si tefaudu ba dötönafönia, he na ba zorugo mazui ba gulidanö. (1 Mo. 1:1; 2:7) Iʼogunaʼö gamaedola sanandrösa ba danömö Faulo, ba wangoromaʼö wa lö moguna isusugi zi samösa niha Lowalangi ba mboto si fagölö. Na mutanö zi sambua hunö, tola tumbu ia tobali tanömö si bohou. Faehu sibai danömö andrö na mufaedogö ia ba hunö side-ide no mege. Iʼogunaʼö gamaehuta andre Faulo ba wangoromaʼö wa tola ibeʼe khöda mboto si tefaudu ba zomasi ia Somböi yaʼita. Iwaʼö göi Faulo wa ”faböʼö mboto si so ba zorugo ba faböʼö mboto si so ba gulidanö”. Hadia geluahania? Fefu zonoso si so ba gulidanö andre, laʼokhögö mboto tanö simane yaʼita. Hizaʼi, fefu zonoso si so ba zorugo simane ira malaʼika, laʼokhögö mboto eheha.—1 Ko. 15:36-41. w20.12 10 ¶7-9

Tatu omasi ita na tarasoi waʼahono dödö ba waʼaurida. Lö hadöi niha somasi morasoi faʼaombö-aombö dödö. Hizaʼi itaria, so manö zangaʼasogö khöda faʼaombö dödö ba samaʼema fanofu simane fanofu Razo Dawido nitutunö ba ayati maʼökhö andre. Oya zangaʼasogö khöda faʼaombö dödö, ba so ösa zi tebai tafatörö. Duma-dumania, tebai tatatugöi mböli gö, böli nukha, hegöi okosi nomo, si tedou ero röfi. Tebai göi tafatörö hawaʼasese ladönisi dödöda ira awöda ba zekola mazui awöda wohalöwö, ba wamalua falimosa mazui amuata wohorö. Tebai göi tabatogö waʼalösökhi salua ba zi fasuida. Alua khöda fefu gabula dödö andrö börö me ato niha ba gulidanö andre si lö mamalua goi-goi Zura Niʼamoniʼö. Baero daʼö, iʼila Satana, samatörö ulidanö andre, wa so niha si lö omasi mangai halöwö khö Yehowa börö ’waʼaombö dödö ba gulidanö ba götö daʼa’. (Mat. 13:22; 1 Yo. 5:19) Börö daʼö, lö tokea ita na oya zangaʼasogö khöda faʼaombö dödö ba gulidanö andre! w21.01 2 ¶1, 3

Iʼamenesi ita zinenge sotöi Yohane enaʼö lö fatuwu ita khö ndra talifusöda. Na lö tafalua mene-menenia andrö, tola idönisi dödöda Satana. (1 Yo. 2:11) So ösa niha sauri ba gangohorita abad siföföna M samalua daʼö. Me luo daʼö, iforege Satana ba wondrönisi tödö nono mbanua Lowalangi enaʼö faoma fatuwu ira khö nawöra zamösana ba aboto wahasara dödöra. Me isura zurania Yohane, so ösa niha soloʼö amuata Zatana si farahu ba mbanua niha Keriso. Duma-dumania, Dioterefe, samoto fahasara dödö ba zi sambua banua niha Keriso. Lö ifosumange ndra satua sokubaloi nifatenge ndra boto solohe ba wangondrasi banua niha Keriso. Börö me lö omasi ia khöra, iforege enaʼö aheta moroi ba mbanua niha Keriso fefu niha sanemaʼö yaʼira. Asiliyawa sibai ia! (3 Yo. 9, 10) Iadaʼa göi, lö tebulö iforege Satana ba wamoto fahasara dödö ba gotalua nono mbanua Lowalangi. Tatu lö omasi ita fatuwu khö ndra talifusöda. Hizaʼi, omasi ita enaʼö lö tebulö tatuhini ira. w21.01 11 ¶14

Me alua wasuwöta gulidanö si oföna, lahalö gangetula ira samatörö ba Jerman hegöi Inggris ba wolohi nono mbanua Lowalangi si lö omasi tobali saradadu. Baero daʼö, lahalö gangetula ira samatörö Amerika Serikat ba wameʼe ba gurunga ndra talifusöda ira matua sondröniaʼö halöwö fanuriaigö. Fefu wolohi andre, no tefaʼeleʼö ba Wamaʼeleʼö 11:7-10. Ba gafuriata, me döfi 1930-an ba mendrua manö me alua wasuwöta gulidanö si dua, isuwö nono mbanua Yehowa razo tanö yöu si fao faʼalösökhi. Lö itehegö Hitler hegöi ira soloʼö khönia na lafalua halöwö fanuriaigö iraono mbanua Lowalangi. So mato 1.500 nono mbanua Yehowa nibunu razo tanö yöu, ba so ngahönö nikuru ba kamp konsentrasi. Börö me lasaisi halöwö nifalua nono mbanua Lowalangi, no ’itaʼunöisi naha niʼamoniʼö’ ba ’itenawa zumange’ razo tanö yöu andrö. (Dan. 11:30b, 31a) No irai fahölu zondröniaʼö yaʼira sotöi Hitler, wa hasambalö ihori nono mbanua Yehowa moroi ba Jerman. w20.05 5-6 ¶12-13

Na faoma taʼomasiʼö niha böʼö simane fangomasiʼöda ösi nomoda, no tarorogö enaʼö lö fahindrisa ba mbanua niha Keriso. Törö tödöu wa lö fahindri Yonata khö Dawido, ba lö ifadöni dadaoma waʼarazo. (1 Sa. 20:42) Fefu ita tola taʼoʼö duma-duma Yonata. Böi afökhö dödöda khö ndra talifusöda börö waʼonekhera. Hizaʼi, moguna ’taʼide-ideʼö ita, enaʼö alawa niha böʼö tawaʼö tödöda’. (Fil. 2:3) Törö tödöu wa fefu ita so zi tola tafalua ba mbanua niha Keriso. Na so khöda wangide-ngideʼö, tola taʼila mbua-bua si sökhi niʼokhögö ndra talifusöda ba tatema mbua moroi ba waʼalöfaröi niforomaʼöra. (1 Ko. 12:21-25) Ba ginötö taʼomasiʼö niha böʼö simane fangomasiʼöda ösi nomoda, tola taʼaroʼö wahasara dödö ba gotalua nono mbanua Lowalangi. Taforomaʼö göi wa yaʼita andre nifahaʼö Yesu, irege adöni dödö niha satulö tödö ba wamosumange Yehowa. Sabölö tohudenia, no tafolakhömi Yehowa, ”Ama safönu faʼahakhö dödö, ba Lowalangi wondrara dödö”.—2 Ko. 1:3. w21.01 24 ¶14; 25 ¶16

Ba götöda iadaʼa, so ösa niha si lö mangosinangegö ba sangoʼaya ndra Samaduhuʼö Yehowa, börö me lawaʼö tödöra wa no niha si lö faʼatua-tua ita ba lö khöda faʼabölö. Hadia mbörö? Börö me faehu gamuatada ba gamuata niha si so ba zi fasuida. Niha ba gulidanö andre laʼokhögö mbua-bua fayawasa, faʼamuʼi, hegöi famadaö. Hizaʼi, taforege ba wangoromaʼö fangide-ngideʼö, falöʼalio mofönu, hegöi foloʼö. Baero daʼö, lö fao ita ba politik, ba lö omasi ita tobali saradadu. Börö me faehu ita moroi ba niha gulidanö, andrö wa lö laʼosinangegö ita. (Rom. 12:2) Hewaʼae na lö faʼabölöda ba wamaigi niha gulidanö, iʼogunaʼö ita Yehowa ba wamalua ngawalö zahöli-höli dödö. Iʼogunaʼö ita ba wamalua halöwö fanuriaigö sabölö ebua sagötö waö-waö waʼauri niha. Niha samosumange yaʼia ba götö iadaʼa, lafazökhi majalah sabölö oya mufoʼeluaha ba mufazaewe ba zi sagörö ulidanö. Laʼogunaʼö goi Zura Niʼamoniʼö ba wanolo niha si zuta faʼato enaʼö itugu sökhi waʼaurira. Yehowa zinangea musuno ba ngawalö zahöli-höli dödö si no mukhamö andre. w20.07 15 ¶5-6

Iʼoʼö li Yehowa Yesu. Hizaʼi, tenga daʼö geluahania wa lö khönia faʼatua-tua mazui faʼonekhe. Tola oroma waʼatua-tuania moroi ba lala wamahaʼönia salio muʼila eluaha. (Yoh. 7:45, 46) Aboto ba dödö Yehowa wa oya zi tola ifalua Yesu. Daʼö mbörö wa itehegö khö Yesu falulu fohalöwö khönia ba wamazökhi banua si yawa awö danö. (Amd. 8:30; Heb. 1:2-4) Iʼotarai me tesusugi Yesu, no ifaduhusi tödö khönia Yehowa ”fefu waʼabölö ba zorugo hegöi ba gulidanö”. (Mat. 28:18) Hewaʼae na oya zi tola ifalua Yesu, lö tebulö iʼalui wanuturu lala moroi khö Yehowa. Hadia mbörö? Börö me iʼomasiʼö Namania. Moguna itöngöni woʼomo ira matua wa sindruhu sa, no iʼandrö Yehowa khö ndra foʼomo ira alawe enaʼö laʼoʼö li woʼomora. Hizaʼi, tenga daʼö geluahania wa abölö tohude ndra matua moroi khö ndra alawe. Oroma daʼö me ifili Yehowa ndra alawe hegöi ira matua tobali samatörö awö Yesu. (Gal. 3:26-29) No iforomaʼö Yehowa wa ifaduhusi tödö Nononia me ibeʼe khönia noro dödö. Simanö göi, foʼomo ira matua sangokhögö faʼatua-tua, ifaduhusi tödö woʼomonia ba wamalua ngawalö noro dödö. w21.02 11 ¶13-14

Hulö zörömi Daromali Lowalangi. Daʼö zanolo yaʼita ba wangiʼila hadia zinangea taʼatulöʼö ba hewisa wamaluada daʼö. (Yak. 1:23-25) Duma-dumania, me no aefa tafahaʼö ita ba Daromali Lowalangi, te aboto ba dödöda wa moguna so khöda wanaha tödö. Börö wanolo moroi khö Yehowa, tola tafahaʼö ita hewisa lala enaʼö lö alio mofönu ita na so niha sangandrö fönuda mazui alua khöda gabula dödö tanö böʼö. Iadaʼa taʼokhögö lala wangera-ngera sohau-hau, ba tola tahalö gangetula sabölö sökhi. (Yak. 3:13) Sindruhu-ndruhu wa moguna sibai taʼokhögö waʼaboto ba dödö si tefaudu sanandrösa ba Zura Niʼamoniʼö! Itaria, awena taʼila hadia zinangea tatimbagö na no aefa tafalua zala. Hizaʼi, tenga lala si sökhi daʼö ba wamahaʼö yaʼita. Lala sabölö sökhi ba wanöndra faʼatua-tua yaʼia daʼö tafahaʼö ita ba waʼamofozu hegöi ba zala nifalua niha tanö böʼö. Daʼö mbörö wa ifarou ita Yakobo ba wangosisiʼö duma-duma si so ba Zura Niʼamoniʼö, simane Aberahamo, Rakhaba, Yobi, hegöi Elia. (Yak. 2:21-26; 5:10, 11, 17, 18) Mofozu nono mbanua Yehowa si lö faröi andrö ba wanaögö fanandraigö si tola manayaigö faʼomuso dödöra. Duma-duma waʼanau gölöra andrö zangoromaʼö wa tola göi anau gölöda börö wanolo moroi khö Yehowa. w21.02 29-30 ¶12-13

Na mufalua wamahaʼö ba Zura Niʼamoniʼö, sondröniaʼö famahaʼö zangokhögö noro dödö sabölö ebua ba wanolo niha nifahaʼönia ba wangokhögö faʼaboto ba dödö sanandrösa ba Daromali Lowalangi. Na so dalifusöda sangumaʼö khöu wefao awönia ba wondröniaʼö famahaʼö ba Zura Niʼamoniʼö, moguna ötuhini ia. (Sango. 4:9, 10) Hadia manö zinangea öfalua ba wotuhini famahaʼö nidöniaʼönia? Henaigö faʼanö ndraʼugö. Si oföna, andrö khö zondröniaʼö famahaʼö ba Zura Niʼamoniʼö enaʼö itutunö sanandrösa ba niha nifahaʼönia. Hewisa waö-waö waʼauri niha nifahaʼönia andrö? Hadia duho nitutunöda khönia? Hadia wamahaʼö sinangea mutandrösaigö? Sagötö mufalua wamahaʼö, hadia so zinangea ufalua mazui uwaʼö? Hadia so göi zi tebai ufalua mazui uwaʼö? Hewisa wameʼegu khönia famarou dödö enaʼö idouʼö ia ba wamati? Tatu lö iʼombakhaʼö khöu sondröniaʼö famahaʼö andrö zi tebai muʼombakhaʼö ba niha böʼö. Hizaʼi, tola möi fanolomö fefu niʼombakhaʼönia. Imane talifusöda ira alawe sotöi Joy, sangai halöwö tobali utusan injil, ”Me no ututunö daʼö, terou dödö dalifusöda si fao khögu ba wanolo niha nifahaʼögu ba Zura Niʼamoniʼö. Daʼö göi zanolo yaʼia ba wotatugöi hadia manö zinangea iwaʼö sagötö mufalua wamahaʼö.” w21.03 9 ¶5-6

Itaria fatiu dödö niha gulidanö khöda börö me tafalua goi-goi Lowalangi ba waʼaurida. Faböʼö sibai goi-goinia andre ba gamakhoita niha gulidanö sanandrösa ba zatulö hegöi si lö atulö. Duma-dumania, ato niha sangumaʼö wa lö fasala na mufalua gamuata wohorö si fakhili ba gamuata niha nihori Lowalangi ba Zodoma hegöi Gomora. (Yud. 7) Börö me taʼoʼö goi-goi Zura Niʼamoniʼö sanandrösa ba gamuata simane daʼö, ato niha sangoʼaya yaʼita ba lawaʼö wa niha si fatandro ita! (1 Fe. 4:3, 4) Hadia zanolo yaʼita enaʼö anau gölöda na fatiu dödö niha böʼö khöda ba laʼoʼaya ita? Moguna aro wamatida wa hasambalö itolo ita Yehowa. Famatida andrö simane baluse, tola ’itaha nono wana soʼalitö andrö khö Zatana’. (Ef. 6:16) Hizaʼi, lö obönö na ha famati niʼokhögöda. Moguna göi taʼokhögö waʼomasi. Hadia mbörö? Börö me faʼomasi andrö ”lö alio mofönu”. Itaögö fefu hadia ia zagafökhö si fao faʼanau gölö. (1 Ko. 13:4-7, 13) Tola möi fanoloda waʼomasi khö Yehowa, faʼomasi khö ndra talifusöda, hegöi faʼomasi ba niha si faʼudu khöda, enaʼö anau gölöda hewaʼae na fatiu dödö niha gulidanö khöda. w21.03 21 ¶3-4

Itaria, tola taforomaʼö wa taʼomasiʼö ndra talifusöda moroi ba gamuata si lö tafalua. Duma-dumania, lö alio abao dödöda ba wehedera. Angeragö hadia zalua khö Yesu me so ia ba gulidanö. Ifatunö khö ndra nifahaʼönia wa moguna laʼa nagolenia ba labadu ndronia, ba wanöndra faʼauri si lö aetu. (Yoh. 6:53-57) Me larongo daʼö, ato ndra nifahaʼö Yesu si tokea irege laböhöli woloʼö yaʼia. Hizaʼi, lö laröi ia ira sindruhu si fahuwu khönia, tefarahu ba daʼö Yohane. Lö aboto ba dödöra geluaha wehede Yesu, ba tola manö göi tokea ira. Hewaʼae simanö, lö iʼanemaiʼö lahalö gangetula wa fasala wehede Yesu andrö, ba lö göi abao dödöra khönia. Lö tebulö faduhu dödöra khö Yesu börö me laʼila wa sindruhu niwaʼönia. (Yoh. 6:60, 66-69) Böi göi alio abao dödöda ba wehede zi fahuwu khöda! Moguna tabeʼe khöra ginötö ba wanutunö eluaha wehedera.—Amd. 18:13. w21.01 11 ¶13