Baŵa si Felendrua

Na itugu numalö ginötö, tola manö so niwaʼö Zura Niʼamoniʼö sambö aboto ba dödöda. Mazui, lö tefaudu ba nitötönada wameʼe Yehowa fanema li ba wangandröda. Tola manö daʼö zangaʼasogö khöda faʼaombö dödö. Na lö taforege ba wanayaigö faʼaombö-aombö dödöda andrö, tola manö awuwu wamatida ba ifakiko wahuwusada khö Yehowa. (Yak. 1:7, 8) Baero daʼö, tola itayaigö dötönaföda sanandrösa ba zi so miföna. Iwaʼö sinenge sotöi Faulo wa tötönaföda sanandrösa ba zi so miföna, tola muʼamaedolagö simane sao. (Heb. 6:19) Na alua mbade, tola muʼogunaʼö zao ba wanaha köfa enaʼö lö iʼoloiʼö ia bade ba lö itandru gara sebua. Hizaʼi, awena tola muʼogunaʼö zao andrö na lö saetu rate samakhai yaʼia ba göfa. Simane howu si tola mamakiko rate zao, tola awuwu wamatida na so khöda waʼaombö dödö. Aefa daʼö, na alua khöda gabula dödö, tola taya wamatida khö Yehowa wa hasambalö ifalua zi no ifabuʼu. Na taya wamatida, taya göi dötönaföda. Si toʼölönia, lö faʼomuso dödö ba niha simane daʼö! w21.02 30 ¶14-15

Te töra 70 fakhe ndröfi Gaberahamo me iʼohe nösi nomonia ba wondröi banua Guri. (1 Mo. 11:31–12:4) Ba te mato otu fakhe waʼara, toröi ia ba tendra ba asese findra ia ba woʼanöröi danö Ganaʼana. Mate ia me 175 fakhe ndröfinia. (1 Mo. 25:7) Hizaʼi, lö fakhamö iʼila hewisa wamalua Yehowa mbuʼusa linia ba wameʼe danö Ganaʼana ba ngaʼötönia. Lö göi fakhamö iʼila waʼamosindro Wamatörö Lowalangi. Hewaʼae simanö, iwaʼö Sura Niʼamoniʼö wa no ”atua ba ahono dödönia” me mate ia. (1 Mo. 25:8) Hewaʼae na oya gabula dödö nitaögö Gaberahamo, lö mamalö aro wamatinia, ba anau gölönia ba wanötöna khö Yehowa. Hana wa tola anau gölö Gaberahamo sandrohu faʼaurinia? Börö me lö mamalö ilumöʼö ia Yehowa ba fahuwu ia khönia. (1 Mo. 15:1; Yes. 41:8; Yak. 2:22) Simane Aberahamo, tadöna-döna göi mbanua saro dane-dane. (Heb. 11:10) Hizaʼi, tenga faʼamosindronia nidöna-dönada. No tefasindro Wamatörö Lowalangi iʼotarai me döfi 1914, ba no mamatörö ia ba zorugo. (Fam. 12:7-10) Iadaʼa, tadöna-döna wa mamatörö ia ba gulidanö. w20.08 4-5 ¶11-12

Enaʼö tola tahaogö ba wamondrondrongo niha böʼö, moguna so khöda wangide-ngideʼö hegöi faʼebolo dödö. Sindruhu sa, moguna so khöda wamorege ba wamalua yaʼia. Hizaʼi, na tafalua daʼö, so tölu mbua nitemada. Si oföna, lö alio tahalö gangetula si fasala sanandrösa ba niha böʼö. Si dua, tola itugu aboto ba dödöda hadia nirasoi ndra talifusöda hegöi ohitö dödöra. Tola möi fanoloda daʼö ba wangoromaʼö faʼahakhö dödö. Si tölu, tola manö möi fanolo daʼö khö ndra talifusöda enaʼö itugu aboto ba dödönia hewisa ia zindruhunia. Itaria, awena tola aboto ba dödö zi samösa niha sanandrösa ba nirasoinia, na no itutunö daʼö. So ösa ndra talifusöda zorasoi wa abua sibai khöra ba wanutunö ösi dödöra börö waö-waö waʼaurira, si toʼölö lafalua ba mbanuara, mazui amuatara. Tola manö awena omasi ndra talifusöda ba wanutunö khöda ösi dödöra, na no ara numalö ginötö. Andrö, na omasi taʼila hadia zindruhunia nösi dödöra, moguna taforomaʼö waʼebolo dödö simane Yehowa. Na tafalua daʼö, tola faduhu dödöra khöda. Baero daʼö, moguna göi tahaogö tafondrondrongo na latutunö hadia nirasoira. w20.04 15-16 ¶6-7

Si toʼölönia, tesöndra giʼa soya ba nahia soya ö hegöi ba nidanö si tefaudu. Moguna göi aboto ba dödöra hezo ginötö si tefaudu weʼamöi fagai. So samösa Zamaduhuʼö Yehowa ba Kepulauan Pasifik si no irai mangumaʼö khö zi samösa dalifusöda utusan injil enaʼö fao ira weʼamöi fagai. Imane khönia utusan injil andrö, ”Falukha ita mahemolu bözi siwa sihulö wongi.” Imane khönia talifusöda andrö, ”Tebai brur. Moguna fagai ita ba ginötö si tefaudu ba giʼa ba wodou gai, tenga ba ginötö si tefaudu khöda.” Simanö göi, möi ndra samaʼuʼu niha me götö föna ba nahia sato niha. Laʼalui göi ginötö si tefaudu ba wamalukhaisi yaʼira. Duma-dumania, manuriaigö ndra nifahaʼö Yesu ba gosali, ba nahia waʼowulo, ba fasa, hegöi ba nomo-omo. (Hal. 5:42; 17:17; 18:4) Simane yaʼira, moguna göi aboto ba dödöda hewisa lala waʼauri niha si so ba nahia wanuriaigöda. Enaʼö abölö oya niha nifalukhaisida, moguna tafaudugö ginötö hegöi nahiada wanuriaigö.—1 Ko. 9:19-23. w20.09 4 ¶8-9

Sambua lala enaʼö tola tobali si fahuwu khö Yesu yaʼia daʼö na tatuhini gangetula si no mutatugöi ba mbanua niha Keriso. Enaʼö itugu aro wahuwusada khö Yesu si tobali högö ba mbanua niha Keriso, moguna falulu fohalöwö ita ba niha nituyunia tobali sondrorogö yaʼita. (Ef. 4:16) Duma-dumania, taforege iadaʼa ba wangogunaʼö Nahia Gangowuloa ba lala sabölö tefaudu. Börö daʼö, so ösa mbanua niha Keriso si no muʼosambuaʼö. Börö zi no mutatugöi andre, oya sibai gefe si tola muʼöna-önaiʼö. Hizaʼi börö gangetula daʼa, so ösa ndra sanuriaigö si tebulö lala waʼauri. Ira sanuriaigö si lö faröi andre, te no farahu ira ba zi sambua mbanua niha Keriso ba zi hauga fakhe faʼara, ba no laʼokhögö wahuwusa saro khö ndra talifusö si so ba daʼö. Hizaʼi iadaʼa, muʼandrö khöra enaʼö findra ba mbanua niha Keriso tanö böʼö. Tatu omuso dödö Yesu na laʼoʼö gangetula si no mutatugöi andre ira nifahaʼönia si lö faröi! w20.04 24 ¶14

Faoma fahindri razo tanö yöu hegöi razo tanö raya ba wamadöni haniha zamatörö sabölö tohude ba gulidanö. Duma-dumania, nehegö hadia zalua me no aefa Wasuwöta Gulidanö II, oya soi ba Eropa nifatörö Uni Soviet. Ba wolawa razo tanö yöu, fawuʼu li razo tanö raya ba soi tanö böʼö, ba wangosambuaʼö faʼabölöra. Lahaogö sambua organisasi nifotöi NATO. Fahindri göi ira ba wangowuloi saradadu ba oya lahorigö gefe ba daʼö. Baero daʼö, ilawa razo tanö raya razo tanö yöu, yaʼia me ituhini nudu razo tanö raya ba wasuwöta, ba simane daʼö göi nifalua razo tanö raya. Alua daʼa ba Afrika, Amerika Latin, hegöi Asia. Ba zi hauga fakhe safuria, itugu ebua kuaso Rusia hegöi soi sotuhini yaʼia. Lasuwö göi razo tanö raya ba Internet. Faoma laböbögö zi lö duhu khö nawöra, lawaʼö wa so ba gotaluara zangogunaʼö program komputer ba wamakiko sistem ekonomi hegöi politik ba soi si fatuwu khönia. Ba simane nifaʼeleʼö Danieli, lö aetu isuwö nono mbanua Lowalangi razo tanö yöu.—Dan. 11:41. w20.05 13 ¶5-6

Me götö Yesaya, no irai manofu Yehowa ba nono mbanuania, ”Hadia tola olifu ndra alawe nono nifaenunia?” Aefa daʼö imane Yehowa, ”Hewaʼae na olifu ia, ba lö irai olifudo ndraʼugö.” (Yes. 49:15) Si toʼölönia, lö ifagölösi ia Yehowa khö zi samösa ina. Hizaʼi, daʼö nifaluania ba ginötö daʼö. Iforomaʼö Yehowa wa iʼomasiʼö sibai nono mbanuania, simane samösa ina zangomasiʼö ononia. Ato nina si fao tödö ba wehede nifaʼema dalifusöda Jasmin, me imane, ”Me irorogö nononia si samösa ina, tumbu ba gotaluara zinali waʼomasi si lö taya sandrohu faʼaurira.” Iʼila Yehowa na so nononia si no mamöhöli weʼamöi manuriaigö ba si lö omasi fariawö ba mbanua niha Keriso. Ato ba gotalua ndra talifusöda si no mamöhöli halöwö ba wamati sangawuli ba mbanua niha Keriso. Omuso sibai dödöda ba wanemaʼö yaʼira! Omasi Yehowa na mangawuli ira, ba simane daʼö göi nirasoida.—1 Fe. 2:25. w20.06 18 ¶1-3

Lö fefu harato tola taʼila höröda. Sindruhunia, harato fondrege zebua böli yaʼia daʼö harato si lö oroma. Ba Huhuo ba Hili, ifatunö Yesu sanandrösa ba harato ba zorugo, sabölö ebua böli moroi ba harato si so ba gulidanö. Imane göi Yesu, ”Hezo so haratomö, ba daʼö so dödöu.” (Mat. 6:19-21) Na so zebua boli ba wamaigida, hasambalö taforege ba wangokhögö yaʼia. Tola tahöna khöda ”harato ba zorugo” na taforege ba wangokhögö töi si sökhi föna Lowalangi. Iwaʼö Yesu wa tebai tekiko mazui latagö harato simane daʼö. Iʼamenesi ita sinenge sotöi Faulo enaʼö ’tafaigi zi lö oroma’. (2 Ko. 4:17, 18) Ba harato si lö oroma andre, farahu ba daʼö howu-howu nitemada dania ba gulidanö si bohou si no ifabuʼu Lowalangi. Hewisa wangoromaʼöda wa taʼameʼegö tödö harato andrö? w20.05 26 ¶1-2

Fefu nifahaʼö Moze andrö, no tobali fangokafu dödöra, simane faʼatoru deu ba ndruʼu. Hewisa wotatugöida enaʼö möi fangokafu dödö niha böʼö lalada ba wamahaʼö? Ba ginötö manuriaigö ita ba nomo-omo mazui ba nahia sato niha, tola taʼogunaʼö Zura Niʼamoniʼö ba wamatunö ba niha sanandrösa ba döi Lowalangi, yaʼia daʼö Yehowa. Tola tabeʼe khöra publikasi mazui taforomaʼö khöra video hegöi tanö böʼönia si so ba situs webda samolakhömi töi Yehowa. Ba nahiada wohalöwö, ba zekola, mazui ba wofanöda tola manö so ginötö khöda ba wamatunö ba niha böʼö sanandrösa khö Lowalangida sebua faʼomasi ba tafatunö khöra hewisa mbua-buania. Tola tatutunö khöra sanandrösa ba gohitö dödö Lowalangi ba niha hegöi ba gulidanö andre, irege aboto ba dödöra wa iʼomasiʼö sibai ira Lowalangi. Ba ginötö tafatunö ba niha böʼö zindruhu sanandrösa khö Namada safönu faʼomasi, no fao ita ba wangamoniʼö töi Lowalangi. Tatolo niha böʼö enaʼö laʼila wa oya sibai walimosa si no larongo sanandrösa khö Lowalangi. No fangokafu dödöra wamahaʼö Zura Niʼamoniʼö nifatunöda khöra.—Yes. 65:13, 14. w20.06 10 ¶8-9

Hadia manö mbua-bua sinangea taʼokhögö enaʼö tola tatolo niha si no mamöhöli halöwö ba wamati ba lafuli ira khö Yehowa? Tola tafahaʼö ita moroi ba gamaedola nibeʼe Yesu sanandrösa khö zi samösa iraono sofanö moroi ba nomo. (Luk. 15:17-24) Ba gafuriata, aboto ba dödö nono daʼö wa fasala nifaluania ba ihalö gangetula enaʼö ifuli ia ba nomo. Fagohi namania ba wanemaʼö ononia andrö ba italagui ia si fao faʼomasi, irege aboto ba dödö nononia wa iʼomasiʼö ia amania. Maniasa sibai dödö nono daʼö ba so ba gera-erania wa tenga sinangea na lafotöi ia ono namania. Me itutunö nösi dödönia, ihaogö ifondrondrongo daʼö amania si fao foʼameʼegö tödö. Aefa daʼö, iʼaroʼö dödö nononia wa mutemaʼö ia ba nomo andrö si tobali ono. Andrö, ifalua sambua gowasa sebua amania andrö, ba ibeʼe mbaru si sökhi khö nononia si no mamalalini era-era. Hulö simane ama nitutunö ba gamaedola andrö Yehowa. Iʼomasiʼö ndra talifusöda si no mamöhöli halöwö ba wamati ba omasi ia na mangawuli ira khönia. Na taʼoʼö duma-duma Yehowa, tola tatolo niha si no mamöhöli halöwö ba wamati enaʼö lafuli ira khö Lowalangi. Ba wanolo yaʼira, moguna taforomaʼö waʼebolo dödö, foʼameʼegö tödö, hegöi faʼomasi. w20.06 25-26 ¶8-9

Iwaʼö Yesu wa so ösa niha sanemaʼö sindruhu ”si fao faʼomuso dödö”, hizaʼi awuwu ira ba wamati me itörö ira famakao. (Mat. 13:3-6, 20, 21) Te lö aboto ba dödöra wa hasambalö alua gabula dödö hegöi famakao ba niha soloʼö Yesu. (Mat. 16:24) Mazui te lawaʼö tödöra wa na no tobali ira niha Keriso, hasambalö ifahowuʼö ira Lowalangi ba iʼaröuʼö khöra gabula dödö. Hizaʼi, ba gulidanö andre iadaʼa, hasambalö tataögö gabula dödö. Tola manö so zi tebulö ba waʼaurida irege taya waʼowua-wua dödöda. (Si. 6:6; Sango. 9:11) Ato ndra talifusöda si no mangoromaʼö faʼafaduhu dödö wa no laʼokhögö zindruhu. Hana wa tola tawaʼö zimane daʼö? Lö mangiwa waʼafaduhu dödöra hewaʼae na so dalifusöra ba wamati sangafökhöiʼö tödöra mazui samalua amuata si lö tefaudu. (Si. 119:165) Na alua khöra wanandraigö, itugu aro wamatira, tenga itugu awuwu. (Yak. 1:2-4) Moguna taʼokhögö wamati saro simane daʼö. w20.07 8 ¶1; 9 ¶4-5

Fatua lö öbaso Zura Niʼamoniʼö, andrö wanolo moroi khö Yehowa enaʼö tola öhalö wamahaʼö moroi ba ayati nibasomö. Duma-dumania, na öʼalui mene-mene ba wangasiwai abula dödö salua khöu, andrö wanolo moroi khö Yehowa enaʼö ösöndra goi-goi Zura Niʼamoniʼö sanolo yaʼugö ba wotatugöi hadia zinangea öfalua. (Fil. 4:6, 7) No ibeʼe khöda Yehowa waʼatua-tua sahöli-höli dödö ba wokhalaigö ngawalö hadia ia. Börö daʼö, na öbaso waö-waö si so ba Zura Niʼamoniʼö, khalaigö hadia zalua ba ginötö daʼö ba hewisa na khöu alua nitutunö ba ayati andrö. Tandraigö faigi hadia niʼila niha nidunö-dunö ba waö-waö andrö, ba rasoi hadia nirasoinia. Na öfalua daʼö, tola itugu oya mbua nitemamö moroi ba waö-waö si so ba Zura Niʼamoniʼö. Aefa daʼö angerönusi. Foʼangerönusi eluahania öhaogö öʼangeragö hadia zi no öbaso ba hewisa wamaluau ösi ayati andrö ba waʼauriu. Daʼö zanolo yaʼugö ba wangiʼila hadia manö gamakhaita nösi ayati andrö, ba itugu aboto ba dödöu waö-waö nidunö-dunö ba daʼö. Na ha asala tabaso Zura Niʼamoniʼö ba lö taʼangerönusi nösinia, fagölö daʼö simane na ha asala tafaigi-faigi gö si lö murino hegöi famasa si so ba dete meza, ba lö tafaruka ba wondrino. Enaʼö tola tarasoi waʼami gö andrö, moguna tafaruka fefu wamasania. Foʼangerönusi tobali fanolo khöda enaʼö tola taʼila rahu-rahu zi no tabaso. w21.03 15 ¶3-5

Lö maniasa sinenge sotöi Faulo me no tobali ia niha Keriso sowölö-ölö, hewaʼae na labeʼe ia ba gurunga börö gangetulania andrö. Lö göi mofönu ia ba niha si toröi ba Provinsi Asia hewaʼae na no laröi ia. Ba lö göi iwaʼö tödönia wa tebai mufaduhusi tödö ndra si fahuwu khönia tanö böʼö. Hizaʼi, faduhu dödö Waulo wa lö faröi khönia ndra si fahuwu khönia ba hasambalö ifahowuʼö ia Yehowa. Hewaʼae na aboto ba dödö Waulo wa hasambalö labunu ia ba zi lö ara tö, lö tebulö itörö tödönia hadia zabölö tohude sinangea ifalua, yaʼia daʼö ba wamolakhömi Yehowa. Lö göi iböhöli woʼangeragö hewisa lala ba wamarou tödö niha böʼö, ba lö tebulö iʼodaligö Yehowa ba wangandrö. Lö iʼera-era manö Faulo niha sondröi yaʼia. Hizaʼi, iʼandrö sibai saohagölö khö ndra si fahuwu khönia, si lö faröi ba wanolo hegöi ba wotuhini yaʼia. Baero daʼö, lö göi mamalö ifahaʼö ia ba Daromali Lowalangi. (2 Ti. 3:16, 17; 4:13) Sabölö tohude, sindruhu-ndruhu faduhu dödönia wa iʼomasiʼö ia Yehowa hegöi Yesu. w21.03 18 ¶17-18

Me abad si-2 M, itugu ato niha Keriso sofaya. Möi ira bakha ba mbanua niha Keriso ba wamazaewe famahaʼö si fasala, ba labiniʼö zindruhu moroi ba Zura Niʼamoniʼö. Iʼotarai daʼö irugi abad si-19, lö hadöi organisasi Lowalangi ba gulidanö. Niha Keriso sofaya andrö, hulö simane oʼo si tumbu ba nowi. Börö daʼö, abua khöda ba wangiʼila haniha zindruhunia zoloʼö khö Keriso. (Mat. 13:36-43) Hana wa moguna aboto ba dödöda daʼa? Börö me daʼa zangoromaʼö wa famaʼeleʼö si so ba Danieli faza 11 sanandrösa khö razo tanö yöu hegöi razo tanö raya andre, lö manandrösa ia khö ndra samatörö me abad si-2 irugi abad si-19 M. Hadia mbörö? Börö me ba ginötö daʼö, lö hadöi ono mbanua Yehowa sinangea lafakao. Hizaʼi, hasambalö ifuli zui so razo tanö yöu hegöi razo tanö raya. w20.05 3 ¶5

Ifaʼeleʼö Yoeli wa so dania ngawawa damo samakiko danö Gizaraʼeli, iʼa fefu hadia ia niʼilara! (Yoe. 1:4) Ba zi hauga fakhe, faduhu dödöda wa famaʼeleʼö andre manandrösa ia ba nono mbanua Yehowa si lö tebulö wamalua halöwö fanuriaigö, hulö simane ngawawa damo si tebai mubatogö. Faduhu dödöda wa halöwö andre zamakiko ’tanö’, yaʼia daʼö niha si so barö wamatörö ndra sondröniaʼö ba agama. Hizaʼi, na tahaogö taʼangeragö fefu nösi wamaʼeleʼö andrö, taʼila wa moguna tabulöʼö waʼaboto ba dödö niʼokhögöda. Nehegö mbuʼusa li Yehowa sanandrösa ba ngawawa damo, ”Uʼaröuʼö khömi niha [ngawawa damo] moroi yöu andrö.” (Yoe. 2:20) Na ngawawa damo andrö yaʼia daʼö ira Samaduhuʼö Yehowa soloʼö oroisa Yesu ba wamalua fanuriaigö hegöi ba wombaliʼö nifahaʼö, hana wa ifabuʼu Yehowa wa itimbagö ira? (Hez. 33:7-9; Mat. 28:19, 20) Sindruhunia, tenga nono mbanuania si lö faröi nitimbagö Yehowa, hizaʼi si fatuwu ba nono mbanuania. w20.04 2-3 ¶3-5

Hadia nifaluada na tarasoi wa lö iʼanemaiʼö ibeʼe wanema li ba wangandröda Yehowa? Imane Yakobo, ”Böi miböhöli wangandrö khö Lowalangi.” Lö aföli mazui mofönu Yehowa hewaʼae na no hauga kali taʼandrö khönia waʼatua-tua. Na taʼandrö waʼatua-tua ba wanaögö fanandraigö salua khöda, hasambalö ”fahöna wameʼe” Namada si so ba zorugo. (Si. 25:12, 13) Iʼila gabula dödö salua khöda, abu dödönia na tefakao waʼaurida, ba omasi sibai ia wanolo yaʼita. Daʼö mbörö wa omuso sibai dödöda! Hizaʼi, hewisa wameʼe Yehowa khöda faʼatua-tua? Iʼogunaʼö Daromalinia. (Amd. 2:6) Enaʼö tasöndra waʼatua-tua andrö, moguna tafahaʼö ita ba Daromali Lowalangi hegöi ba publikasi si teʼodane-dane ba Zura Niʼamoniʼö. Hizaʼi, lö obönö na ha asala tafahaʼö ita. Moguna tafalua niʼandrö Lowalangi khöda. Imane Yakobo, ”Mifalua daromali, tenga ha asala mifondrondrongo manö.” (Yak. 1:22) Na tafalua mene-mene Lowalangi, tola tobali ita niha somasi faʼatulö, lö fatandro, ba safönu faʼahakhö dödö. (Yak. 3:17) Bua-bua andrö zanolo yaʼita enaʼö lö taya waʼomuso dödöda hewaʼae tataögö wanandraigö. w21.02 28-29 ¶10-11

Tola manö tedou ba wamati niha nifahaʼöda ba Zura Niʼamoniʼö irege tebayagö ia idanö, na latolo ia ira talifusöda ba mbanua niha Keriso. Tola fao fefu zanuriaigö ba wanolo niha nifahaʼö enaʼö faböbö ira ba mbanua niha Keriso. Imane samösa perintis, ”So sambua gamaedola sangumaʼö, ’Moguna fao fefu niha ba zi sambua banua ba wangebuaʼö si samösa iraono.’” Eluahania, fao ndra satua, si fahatö khöra, si fahuwu khöra, hegöi ira samahaʼö ba zekola, ba wanolo si samösa iraono irege tobali ia niha satua-tua fangera-ngera. No lafalua daʼö na labeʼe khönia wamarou dödö hegöi famahaʼö si tohude. Imane nasa, ”Moloʼö yaʼo, tefaudu göi gamaedola daʼö ba wombaliʼö nifahaʼö. Moguna fao fefu niha si so ba mbanua niha Keriso ba wanolo si samösa niha enaʼö faböbö ia ba zindruhu.” Hadia zi tola lafalua ira sanuriaigö? Tola labeʼe mene-mene, famarou dödö, hegöi duma-duma si sökhi khö zi samösa niha nifahaʼö, ba latolo ia enaʼö tedou ba wamati irege tebayagö ia idanö. (Amd. 15:22) Hana wa omuso dödö zondröniaʼö famahaʼö ba Zura Niʼamoniʼö na latolo niha nifahaʼönia ira sanuriaigö tanö böʼö? Börö me ato si fao ba wanolo niha nifahaʼö enaʼö tedou ba wamati. w21.03 8 ¶1-3

Fefu niha Keriso, si no atua mazui si bohou ebua, moguna mangelama ira enaʼö lö khöra famini tödö. Iwaʼö sinenge sotöi Yohane wa tebai tatörö lala sindruhu na lö taböhöli wamalua horö. (1 Yo. 1:6) Na omasi ita tatema howu-howu moroi khö Yehowa, iadaʼa hegöi ba zi so miföna, moguna böi aetu tatörö tödöda wa lö irai tobini ba hörö Yehowa fefu nifaluada. Börö daʼö, hewaʼae na lö hadöi niha böʼö sangila hadia nifaluada ba zi ha yaʼi-yaʼita, tola iʼila daʼö Yehowa. (Heb. 4:13) Moguna tatimbagö lala wangera-ngera gulidanö andre sanandrösa ba wamalua horö. Ba götö Yohane, lawaʼö ira niha si no mondröi sindruhu wa tola fahuwu khö Lowalangi zi samösa niha hewaʼae na lö iböhöli wamalua horö. Iadaʼa, so göi lala wangera-ngera simane daʼö ba niha si so ba zi fasuida. Lawaʼö wa faduhu dödöra khö Lowalangi, hizaʼi lö fao dödöra ba lala wangera-ngera Yehowa sanandrösa ba horö, mendrua manö sanandrösa ba wamalua faʼorudu. Lawaʼö tödöra wa lö fasala na lafalua horö, börö me yaʼira samösa zinangea mangai angetula. w20.07 22 ¶7-8

Hadia öʼoʼawögö ndra talifusöu ira alawe si sara lala ba wamati na inötö moguna? Nehegö atö duma-duma daʼa. So samösa dalifusöda ira alawe zangokhögö foʼomo si tenga Samaduhuʼö Yehowa. Laʼila ira talifusöda wa asese ahou ia weʼamöi ba gangowuloa ba agalio göi mangawuli ia na no teʼasiwai. Baero daʼö, lö asese iʼohe ndraononia weʼamöi ba gangowuloa. Börö daʼö, ibörögö lasalaikö ia ira talifusöda, ba so ba wangera-ngerara wa lö niforegenia ba wangandrö khö woʼomonia ira matua enaʼö tola möi ia ba gangowuloa ba iʼohe ndraononia. Sindruhunia sa, no iforege talifusöda andrö ba wamalua zabölö sökhi. Tenga yaʼia zotatugöi hadia manö nifaluania ba zi maʼö-maʼökhö daʼö, ba tenga göi yaʼia zangai angetula khö ndraononia. Tola ösuno wamorege si no ifalua, ba ötutunö göi ba niha böʼö wa no iforege talifusöda andrö ba wamalua zabölö sökhi. Na öfalua daʼö, tola manö laböhöli ba wosalaikö yaʼia. Aboto ba dödö ndra satua sokubaloi wa omasi Yehowa na terorogö waʼauri ndra talifusöda ira alawe andrö. (Yak. 1:27) Börö daʼö, moguna laʼoʼö duma-duma Yesu ba laforomaʼö waʼahakhö dödö. Na tefaudu, te abölö sökhi na laforomaʼö waʼasökhi dödö hegöi famatimbaisi, moroi na lafazökhi gamakhoita sabeʼe. (Mat. 15:22-28) Na laforege ira satua sokubaloi ba wameʼe fanolo, no latolo ndra talifusöda ira alawe ba worasoi faʼomasi Yehowa hegöi organisasinia. w20.09 24-25 ¶17-19

Lö aetu iforomaʼö wangide-ngideʼö samaʼeleʼö sotöi Danieli, ba lö mamalö iʼalui wanuturu lala moroi khö Yehowa. Duma-dumania, me iʼogunaʼö ia Yehowa ba wanutunö eluaha wangifi Nebukanesa, lö iwaʼö Danieli wa börö waʼabölönia samösa wa tola ifalua daʼö. Hizaʼi, si fao fangide-ngideʼö, ifatunö Danieli wa Yehowa zanolo yaʼia irege tola iʼila geluaha wangifi Nebukanesa. (Dan. 2:26-28) Hadia wamahaʼönia khöda? Na lasuno ita ira talifusöda börö me omasi ira ba huhuo nifaʼemada mazui börö me oya zi no takhamö ba wanuriaigö, moguna tafaduhuʼö khöra wa börö wanolo moroi khö Yehowa wa tola tafalua fefu daʼö. (Fil. 4:13) Na taforomaʼö mbua-bua fangide-ngideʼö simane daʼö, no göi taʼoʼö duma-duma Yesu. Lö aetu iʼodaligö Yehowa. (Yoh. 5:19, 30) Lö irai tumbu ba dödönia ba wamadöni kuaso Namania si so ba zorugo. Ifatunö khöda Filifi 2:6 wa ”lö irai so ba wangera-ngerania ba wamadöni dadaoma Lowalangi mazui ifagölösi ia khö Lowalangi”. Aboto ba dödö Yesu wa so zi tebai ifalua ba iʼosinangegö kuaso niʼokhögö Namania. w20.08 11 ¶12-13

So daha-taha tanö böʼö salua khö ndra talifusöda si fagohi ba lala sofeta ba waʼauri. Laʼokhögö gabula dödö si lö laʼila niha böʼö. Tola manö ötaögö gabula dödö si tola manaisi yaʼugö ba wamosumange Yehowa. Tola manö örasoi wa lö tefaudu lala wangera-ngera niha böʼö ba wamaigi salua khöu. Na daʼö zalua, tola möi fangabölöʼömö duma-duma Mefibose. (2 Sa. 4:4) Moguna iforege ba wolawa faʼatebai mbotonia, ba lö atulö nifalua Razo Dawido khönia. Hewaʼae simanö, ifaigi zalua khönia andrö si fao fangera-ngera si sökhi. Iʼameʼegö tödö ngawalö zi sökhi si no itema. Iʼandrö saohagölö me no iforomaʼö khönia Dawido waʼasökhi dödö. (2 Sa. 9:6-10) Andrö, me lö tefaudu lala wangera-ngera Dawido khö Mefibose irege ifalua khönia zi lö atulö, itandraigö Mefibose ba wangokhögö faʼaboto ba dödö sanandrösa ba zalua khönia. Lö abao dödönia ba zala nifalua Dawido. Lö itahigö Yehowa ba ngawalö nifalua Dawido khönia. Iʼosambuaʼö dödönia ba zi tola ifalua ba wotuhini razo si no ituyu Yehowa. (2 Sa. 16:1-4; 19:24-30) Itatugöi Yehowa enaʼö musura ba Zura Niʼamoniʼö duma-duma Mefibose irege tola tafahaʼö ita khönia.—Rom. 15:4. w20.04 26 ¶3; 30 ¶18-19

Ba mbanua niha Keriso, so göi ndra talifusöda sangai halöwö tobali utusan injil, perintis istimewa, mazui perintis biasa. Lahalö gangetula ba wangai halöwö safönu inötö khö Yehowa. Si toʼölönia, lö oya gokhöta niʼokhögö ndra sanuriaigö safönu inötö. Hewaʼae simanö, oya sibai howu-howu nitemara moroi khö Yehowa. (Mrk. 10:29, 30) Tatu taʼomasiʼö sibai ira, ba taʼandrö saohagölö börö me no farahu ira ba mbanua niha Keriso si so yaʼita! Hadia ha ira talifusöda si tobali sondröniaʼö hegöi sanuriaigö safönu inötö, zangokhögö halöwö ba mbanua niha Keriso? Löʼö. No sebua böli fefu zanuriaigö turia somuso dödö ba wamaigi Yehowa hegöi ba wamaigi ndra talifusöda. (Rom. 10:15; 1 Ko. 3:6-8) Hadia mbörö? Börö me ohitö dödö si oföna niʼokhögö niha Keriso yaʼia daʼö ba wombaliʼö niha tobali nifahaʼö Zoʼaya yaʼita, Yesu Keriso. (Mat. 28:19, 20; 1 Ti. 2:4) Fefu zanuriaigö ba mbanua niha Keriso, he si no tebayagö idanö hegöi si löʼö, moguna laforege ba wangofönaiʼö halöwö daʼa ba waʼaurira.—Mat. 24:14. w20.08 21 ¶7-8

Simane niwaʼö ba ayati maʼökhö andre, ba ginötö tataögö wanandraigö, hasambalö ituhini ita Yesu. Tola möi famarou dödöda wehede Yesu andre. Hadia mbörö? Börö me itaria tataögö gabula dödö sabua ba waʼaurida. Duma-dumania, na mate niha niʼomasiʼöda, tenga ha ba zi hauga hari tarasoi waʼafökhö. Hizaʼi, tola manö tarasoi daʼö ba zi hauga fakhe faʼara. So göi ösa zanaögö inötö si basaki börö me no agalawa ndröfira iadaʼa. Baero daʼö, so göi ösa zorasoi faʼafawuka wangera-ngera. Hewaʼae simanö, tola taʼokhögö waʼabölö ba wanaögö daʼö börö me faduhu dödöda wa fao khöda Yesu ”ero maʼökhö”, sagötö waʼalua gabula dödö fondrege zebua ba waʼaurida. (Mat. 11:28-30) Ifaduhuʼö khöda Taromali Lowalangi wa hasambalö iʼogunaʼö ndra malaʼikania Yehowa ba wanolo yaʼita. (Heb. 1:7, 14) Duma-dumania, latuhini ita ira malaʼika ba labeʼe khöda wanuturu lala ba wanuriaigö ’Famatörö Lowalangi andrö, turia somuso dödö’ ba niha moroi ”ba ngawalö soi, ba ngawalö mado, banua, hegöi li”.—Mat. 24:13, 14; Fam. 14:6. w20.11 13-14 ¶6-7

Omasi ita na aboto ba dödö niha nifahaʼöda wa moroi khö Yehowa wamahaʼö nitemania andrö. (1 Te. 2:13) Hadia nifaluada enaʼö tola aboto ba dödönia daʼö? Farou ia ba wanutunö hadia manö zi no ifahaʼö yaʼia. Tola öʼandrö khönia fasakali ba wanutunö geluaha ayati nibasomi. Tolo ia enaʼö aboto ba dödönia wa moguna khönia mene-mene Zura Niʼamoniʼö andrö. Anofu khönia enaʼö tola itutunö hewisa dödönia ba ayati si no ibaso. (Luk. 10:25-28) Duma-dumania, tola ösofu khönia, ”Moroi ba ayati daʼa, hadia mbua-bua Yehowa si tola öfahaʼö yaʼugö?” ”Moloʼö yaʼugö, hadia mbua nitemamö na öʼoʼö mene-mene nisura ba ayati daʼa?” ”Hewisa dödömö ba wamahaʼö sawena tatutunö andre?” Törö tödömö wa ohitö dödöda ba wamahaʼö si samösa niha ba Zura Niʼamoniʼö, tenga enaʼö itugu oya waʼaboto ba dödönia. Ohitö dödöda sabölö tohude yaʼia daʼö enaʼö adöni dödönia ba wamahaʼö nitemania, ba ifalua daʼö ba waʼaurinia. Ogunaʼö Zura Niʼamoniʼö ba wamahaʼö. Na omasiʼö tobali samahaʼö sonekhe, moguna öʼokhögö wangide-ngideʼö. w20.10 15 ¶5-6

Hana wa tola faduhu dödöda wa hasambalö teʼasiwai halöwö fanuriaigö ba ginötö si no itatugöi Yehowa? Nehegö hadia zalua ba götö Noakhi. No itatugöi Yehowa hawaʼara alua waʼanönö danö idanö, mato 120 fakhe fatua lö alua ia. Ngafulu fakhe aefa daʼö, ifaretakö Noakhi Yehowa ba wamazökhi owo. Mato 40 fakhe mazui 50 fakhe fatua lö anönö danö idanö, lö iböhöli Noakhi ba wamalua halöwönia. Hewaʼae na lö lafondrondrongo ia niha, lö iböhöli ba wameʼe khöra famangelama. Ifalua daʼö Noakhi irege ifaretakö ia Yehowa möi bakha ba nowo. Aefa daʼö, ba ginötö si no itatugöi, ”iduhö mbawandruhö nowo Yehowa”. (1 Mo. 6:3; 7:1, 2, 16) Ba zi lö ara tö, ibatogö halöwö fanuriaigö andre Yehowa. Aefa daʼö, tehori gulidanö nifatörö Zatana irege hatö niha sangataʼufi Lowalangi zi toröi ba gulidanö. Gasa-gasa wombaloida daʼö, datahalö gangetula enaʼö lö mamalö taʼoʼö duma-duma Noakhi, hegöi ono mbanua Lowalangi tanö böʼö, si lö mamöda tangara. Yalömamalö taʼosambuaʼö dödöda ba wanuriaigö, taʼokhögö waʼebolo dödö, ba mamati ita khö Yehowa hegöi buʼusa linia. w20.09 13 ¶18-19

Na lö ihaogö itatugöi Yehowa haniha zi tobali sondröniaʼö, tola manö fawuka nösi nomonia ba lö khöra faʼomuso dödö. Duma-dumania, lö taʼila haniha zinangea mangai angetula mazui haniha zameʼe fanuturu lala ba wamalua angetula si no muhalö. Na sökhi atö gamakhoita Lowalangi ba wamataro ira matua tobali högö yomo ba nomo, hana wa ato ndra alawe ba götöda andre nifakao? Börö me ato ndra matua sangosiwawöi goi-goi Yehowa sanandrösa ba nösi nomo, ba abölö omasi ira woloʼö si toʼölö mufalua ba mbanuara. Mazui, tola manö göi lafakao woʼomora ira alawe enaʼö larasoi waʼomuso dödö. Duma-dumania, te ifakao woʼomonia si samösa ira matua ba wangoromaʼö wa abölö tohude ia, mazui enaʼö laʼila niha tanö böʼö wa ”sindruhu-ndruhu ira matua” ia. Tola manö iwaʼö wa lö iʼila ifaso woʼomonia ba wangomasiʼö yaʼia, hizaʼi tola iʼalui lala enaʼö iʼataʼufi ia foʼomonia. Ba na ataʼu khönia woʼomonia, iʼogunaʼö daʼö ba wamatörö yaʼia. Ira matua sangokhögö lala wangera-ngera hegöi samalua amuata simane daʼö, lö lafosumange ndra alawe hewaʼae na sinangea latema menaʼö daʼö. Sindruhu-ndruhu wa lö tefaudu nifaluara andrö ba zomasi Yehowa.—Ef. 5:25, 28. w21.02 3 ¶6-7

Na aombö dödömö, angandrö khö Yehowa enaʼö itolo ndraʼugö. Si tobali fanema li ba wangandrömö, ibeʼe khöu waʼohahau dödö andrö Lowalangi, ”sabölö moroi ba gera-era niha fefu”. (Fil. 4:6, 7) Iʼogunaʼö gehehania niʼamoniʼö Yehowa ba wameʼe khöu faʼahono dödö. (Gal. 5:22) Na mangandrö ndraʼugö khö Yehowa, tutunö fefu nösi dödöu khönia. Zara-zara wanutunö abula dödö salua khöu. Na tola atö muʼasiwai gabula dödö daʼö, andrö khönia waʼatua-tua enaʼö öʼila hadia zinangea öfalua, ba andrö khönia waʼabölö ba wamalua daʼö. Hizaʼi, na tebai atö muʼasiwai, andrö wanolo moroi khö Yehowa enaʼö lö talafo öʼaombösi tödö daʼö. Na öhaogö özara-zara wanutunö abula dödömö andrö khö Yehowa, tola öʼila samösa hewisa wameʼe Yehowa fanema li ba wangandrömö. Tola manö, lö iʼanemaiʼö ibeʼe wanema li. Hizaʼi, böi böhöli wangandrö. Sindruhu sa, omasi Yehowa na özara-zara wanutunö abula dödömö ba wangandrö. Hizaʼi, abölö omasi ia nasa na lö öböhöli wangandrö.—Luk. 11:8-10. w21.01 3 ¶6-7

Ba mbanua niha Keriso, ato ndra talifusöda si no mongambatö hegöi si no mangokhögö iraono. Hizaʼi, so göi ösa ndra talifusöda si lö sangowalu. Hewisa zinangeania lala wangera-ngerada sanandrösa khöra? Angeragö hewisa lala wangera-ngera Yesu. Me so Yesu ba gulidanö, lö mangowalu ia. Iʼogunaʼö fefu ginötö hegöi fangera-ngerania ba wamalua halöwö ba wamati. Sindruhu sa, no irai ifatunö khöda Yesu wa so ösa niha Keriso sangai angetula enaʼö lö mangowalu. (Faigi keterangan tambahan untuk Matius 19:12.) Hizaʼi, lö nifarou Yesu ita enaʼö mangowalu mazui böi mangowalu. Iʼosinangegö niha si lö sangowalu Yesu. Lö iwaʼö Yesu wa abölö tohude niha si no mongambatö, ba lö göi iwaʼö wa moʼamböta waʼauri niha si lö sangowalu. Simane Yesu, lö göi mangowalu Waulo sagötö wamaluania halöwö fanuriaigö. Lö irai ifahaʼö ita Faulo wa fasala na mangowalu niha Keriso. Aboto ba dödönia wa yaʼita samösa zangai angetula sanandrösa ba daʼö. w20.08 27-28 ¶7-8

Anau sibai noso Yohane, ba oya zahöli-höli dödö salua ba waʼaurinia. Oya göi gabula dödö salua khönia si tola möi fangawuwu wamatinia. Hizaʼi, lö tebulö iforege ba woloʼö fefu oroisa Yesu, tefarahu ba daʼö goroisa ba wangomasiʼö ira talifusönia. Börö daʼö, tola faduhu dödö Yohane wa iʼomasiʼö ia Yehowa hegöi Yesu, ba labeʼe khönia waʼabölö ba wanaögö abula dödö. (Yoh. 14:15-17; 15:10) Gofu hadia nifalua Zatana hegöi ulidanö nifatörönia, tebai lasaisi Yohane ba wangomasiʼö ira talifusönia. Lö tebulö iforomaʼö waʼomasinia Yohane, ba wehede hegöi ba nifaluania. Simane Yohane, so ita ba gulidanö nifatörö Zatana. Yaʼia andrö samatörö si lö sökhi ba lö khönia faʼomasi. (1 Yo. 3:1, 10) Iforege Satana ba wondrönisi tödöda enaʼö lö saʼae taʼomasiʼö ndra talifusöda. Hizaʼi, na lö taböhöli ba wolawa fondrönisi dödö andrö, lö mofozu nifalua Zatana. Datahalö gangetula enaʼö lö tebulö taʼomasiʼö ndra talifusöda, ba taforomaʼö daʼö ba wehededa hegöi ba nifaluada. Na tafalua daʼö, tola tarasoi waʼomuso dödö me tola farahu ita ba nösi nomo Yehowa, ba sindruhu-ndruhu moʼeluaha waʼaurida.—1 Yo. 4:7. w21.01 13 ¶18-19

Börö me Satana zamatörö ulidanö si so yaʼita iadaʼa, asese göna ita abula dödö, ba itaria lö taʼila hadia zinangea tafalua. (2 Ti. 3:1) Hizaʼi, lö moguna ataʼu ita mazui aombö dödöda. Iʼila Yehowa fefu gabula dödö salua khöda. Na moguna khöda wanolo, no ifabuʼu wa hasambalö igogohe dangada faoma tangania kambölö safönu faʼabölö. (Yes. 41:10, 13) Faduhu dödöda wa hasambalö itolo ita Yehowa, ba tola tasöndra waʼabölö moroi ba Zura Niʼamoniʼö ba wanaögö ngawalö gabula dödö. Tola öfahaʼö ndraʼugö moroi ba video, drama audio, hegöi buku Miʼohiaʼö Wamatira. No muhaogö mufalua riset ba wamaʼanö fefu wakake andrö enaʼö tola ökhalaigö waö-waö salua nitutunö ba Zura Niʼamoniʼö. Fatua lö öfaigi, öfondrondrongo, mazui öbaso waö-waö andrö, angandrö khö Yehowa enaʼö ösöndra wamahaʼö si tola öfalua. Khalaigö na khöu alua nitutunö ba waö-waö daʼö. Angerönusi hadia nifalua nono mbanua Yehowa si lö faröi andrö ba hewisa wanolo Yehowa ira ba wanaögö abula dödöra. Aefa daʼö, falua zi no öfahaʼö yaʼugö. Andrö saohagölö khö Yehowa ba wanolo si no ibeʼe khöu, ba tola öforomaʼö daʼö na öʼalui lala ba wanolo hegöi ba wangabölöʼö niha böʼö. w21.03 19 ¶22-23

Na no mongambatö ndraʼugö ba edöna öʼokhögö ndraono, sofu khöu samösa, ’Hadia so khöma wangide-ngideʼö, ba maʼomasiʼö Yehowa hegöi Taromalinia? Hadia no sinangea ndraʼaga föna Yehowa ba wondrorogö iraono, si tobali buala sebua böli moroi khönia?’ (Si. 127:4) Na no so ndraonomö, sofu khöu samösa, ’Hadia no ufahaʼö ndraonogu enaʼö laʼila hawaʼamoguna wamorege fohalöwö?’ (Sango. 3:12, 13) ’Hadia no uforege ba wamalua sabölö sökhi ba wolumöʼö yaʼira?’ (Amd. 22:3) Sindruhu sa, tebai ötimbagö fefu gabula dödö ndraonou. Hizaʼi, tola lö öböhöli ba wamahaʼö yaʼira si fao faʼomasi irege aboto ba dödöra hewisa lala ba wangalui mene-mene ba Zura Niʼamoniʼö. Na öfalua daʼö, no öfaʼanö ira ba wanaögö abula dödö si tola alua khöra. (Amd. 2:1-6) Duma-dumania, na so nösi nomou si faröi khö Yehowa, ogunaʼö Daromali Lowalangi ba wanolo iraonomö enaʼö aboto ba dödöra hadia mbörö wa moguna lö faröi ita khö Yehowa. (Si. 31:23) Mazui, na no mate niha niʼomasiʼömi, foromaʼö khö ndraonou ayati si tola möi fondrara dödöra ba sangabölöʼö yaʼira.—2 Ko. 1:3, 4; 2 Ti. 3:16. w20.10 27 ¶7