Baŵa si Felezara

Na lö taʼila fefu zalua, tola manö iʼanemaiʼö tahalö gangetula wa tebai mufaduhusi tödö ba faröi Yona. Itema fareta moroi khö Yehowa ba wangombakha turia fanguhuku ba niha Niniwe. Hizaʼi, lö ifalua daʼö Yona. Iforege ’woloi föna Yehowa’. (Yon. 1:1-3) Hadia öfuli öbeʼe ginötö khö Yona ba wamalua halöwö daʼö? Tola manö löʼö. Hizaʼi, iʼila Yehowa wa no sinangea na ifuli tebeʼe ginötö khö Yona. (Yon. 3:1, 2) Na tanehegö wehede Yona me mangandrö ia, tola aboto ba dödöda hewisa zindruhunia ia. (Yon. 2:1, 2, 9) Tatu asese mangandrö Yona khö Yehowa. Fangandrö nifaʼemania me so ia ba dalu giʼa, tola möi fanoloda ba wangila amuata si sökhi niʼokhögö Yona, tenga ha amuatania si fasala. Fehedenia zangoromaʼö wa so khönia wangide-ngideʼö, fangandrö saohagölö, ba no ihalö gangetula ba woloʼö Yehowa. Daʼö mbörö wa lö iʼosambuaʼö dödönia Yehowa ba gamuata Yona si fasala. Ifondrondrongo wangandrö Yona, ba lö mamalö ibeʼe khönia halöwö tobali samaʼeleʼö! Andrö, moguna laforege ira satua sokubaloi enaʼö ’lafondrondrongo’ fefu zalua fatua lö labeʼe mene-mene! w20.04 15 ¶4-6

Latemaʼö wamahaʼö nifaduhusi tödö niha Keriso ira nifahaʼö me abad siföföna ba laʼodaligö geheha niʼamoniʼö ba wanolo yaʼira enaʼö laʼokhögö waʼaboto ba dödö sanandrösa ba Daromali Lowalangi. No lafalua riset irege faduhu dödöra wa teʼodane-dane wamahaʼö andrö ba Zura Niʼamoniʼö. (Hal. 17:11, 12; Heb. 5:14) Lö teʼodane-dane wamatira moloʼö nirasoira, ba lö lafosumange Yehowa ha börö waʼowua-wua dödö nirasoira me fariawö ira khö ndra talifusöra ba wamati. Hizaʼi, teʼodane-dane wamatira ba ”waʼaboto ba dödö si tefaudu sanandrösa khö Lowalangi”. (Kol. 1:9, 10) Lö tebulö zindruhu si so ba Zura Niʼamoniʼö. (Si. 119:160) Duma-dumania, lö tebulö daʼö hewaʼae na so dalifusöda ba wamati sangafökhöiʼö tödöda mazui samalua horö sebua. Ba lö tebulö daʼö hewaʼae na tataögö gabula dödö. Börö daʼö, moguna sindruhu-ndruhu aboto ba dödöda Zura Niʼamoniʼö, ba tafaduhusi tödö wa sindruhu nifahaʼönia khöda. Simane sao niʼogunaʼö enaʼö lö ahani göfa hewaʼae na so mbade, lö awuwu wamatida hewaʼae na tataögö wanandraigö börö me teʼodane-dane daʼö ba zindruhu si so ba Zura Niʼamoniʼö. w20.07 9 ¶6-7

Gofu hadia ia nifaluada ba wotuhini ndra talifusö Yesu si no tebayoini, ba wamaigi Yesu no khönia tafalua daʼö. (Mat. 25:34-40) Lala sabölö tohude ba wotuhini niha nibayoini, yaʼia daʼö na fao ita khöra ba wamalua oroisa Yesu ba wombaliʼö nifahaʼö. (Mat. 28:19, 20) Ha börö wanolo moroi khö ndra ’biri-biri tanö böʼö’ wa tola tefalua halöwö fanuriaigö ba zi sagörö ulidanö. (Yoh. 10:16) Na farahu ndraʼugö ba mbiri-biri tanö böʼö, no öforomaʼö waʼomasimö khö dalifusö Keriso hegöi khö Yesu, na fao ndraʼugö ba wamalua halöwö daʼa. Tola fahuwu ita khö Yehowa hegöi khö Yesu, na taʼogunaʼö gokhötada ba wotuhini halöwö nidöniaʼöra. (Luk. 16:9) Duma-dumania, tola tabeʼe dolo-tolo ba wotuhini halöwö ba zi sagörö ulidanö. Muʼogunaʼö dolo-tolo andre ba wameʼe fanolo ba waʼaniha ba zi göna abula dödö. Tola göi tabeʼe dolo-tolo ba mbanua niha Keriso si farahu yaʼita ba tatolo ndra talifusöda sinangea mutolo.—Amd. 19:17. w20.04 24 ¶12-13

Moloʼö famaʼeleʼö andrö, razo tanö yöu lö ”ifosumange Lowalangi ndra tuania”. Hadia geluahania daʼö? Omasi Uni Soviet ba wanayaigö agama. Daʼö mbörö wa laforege ba wangeheta fefu kuaso niʼokhögö agama-agama si no ara so ba zilalö. Börö daʼö me döfi 1918, itatugöi Uni Soviet enaʼö so wamahaʼö ateisme ba zekola misa. Hewisa razo tanö yöu ’ba wamolakhömi lowalangi nahia nifoʼöli andrö’? Ebua gefe nihorigö Uni Soviet ba wondrouʼö faʼabölö zaradadunia, ba so ngahönö wakake wasuwöta nuklir nifazökhinia. Mofozu razo tanö yöu hegöi razo tanö raya ba wangowuloi fakake wasuwöta soya sibai si tola mamaʼala niha si miliaran faʼato! No ara faʼudu razo tanö yöu hegöi razo tanö raya. Hewaʼae simanö, ituhini razo tanö raya andrö razo tanö yöu ba wamalua zi sambua halöwö si tohude. Fao ira ’ba wamazökhi ngawalö niʼogorofi solohe ba waʼatekiko’ yaʼia daʼö Perserikatan Bangsa-Bangsa.—Dan. 11:31. w20.05 6 ¶16-17

Fefu ndra sanuriaigö ba mbanua niha Keriso, tefarahu ba daʼö ndra satua sokubaloi, perintis, mazui ösi nomo niha samöhöli halöwö ba wamati, tola fao ira ba wangalui niha si no mondröi banua niha Keriso. Hadia so zi fahuwu khömö mazui ösi nomomö si no mamöhöli halöwö ba wamati? Mazui, hadia no irai falukha ndraʼugö ba niha samöhöli halöwö ba wamati me möiʼö manuriaigö ba nomo-omo misa mazui ba nahia sato niha? Fatunö ba niha daʼö, wa na omasi ia lafalukhaisi, tola öʼombakhaʼö khö ndra satua sokubaloi nahia waʼatoröinia mazui numero HP-nia. Imane samösa satua sokubaloi sotöi Thomas, ”Ba wamobörö, manofu ndraʼo khö ndra talifusöda sangila, hezo nahia waʼatoröi ndra talifusöda si no mamöhöli halöwö ba wamati. Mazui, manofu ndraʼo khö ndra sanuriaigö, hadia lö olifu ira ndra talifusöda si no mamöhöli weʼamöi ba gangowuloa. Aefa daʼö, ba ginötö uʼondrasi ndra talifusöda si no mamöhöli halöwö ba wamati, usofu hewisa duria ndraonora hegöi ösi nomora tanö böʼö. Ba zilalö, te so ösa ba gotaluara sasese molohe iraonora ba gangowuloa. Ba tola manö, so ba gotalua ndraonora andrö zi no tobali sanuriaigö. Tola göi mutolo ira enaʼö mangawuli khö Yehowa.” w20.06 24 ¶1; 25 ¶6-7

Moroi ba gotalua zi so noso si so ba gulidanö, ha niha zangokhögö faʼatua-tua ba wamahaʼö yaʼira ba zi no irai alua khöra. Buania, tola tabulöʼö lala wangera-ngera hegöi faʼaurida, ba tobali ita niha sabölö sökhi. (1 Ko. 6:9-11; Kol. 3:9, 10) Tola göi tafomaha dödöda side-ide enaʼö tola tafaehusi hezo zatulö hegöi si fasala. (Heb. 5:14) Tola tafahaʼö ita ba wangoromaʼö faʼomasi, faʼasökhi dödö, hegöi faʼahakhö dödö. Ba tola taforege ba woloʼö faʼatulö Yehowa. Hadia dandra wa taʼameʼegö tödö waʼatua-tuada ba wanöngöni? Sambua lalania, yaʼia daʼö na tatöngöni fefu zi no irai ifalua khöda Yehowa ba wanolo hegöi ba wangabölöʼö yaʼita. Na tafalua daʼö, tola faduhu dödöda wa lö mamalö itolo ita. (Si 77:12; 78:4, 7) Lala tanö böʼö si tola tafalua yaʼia daʼö tatöngöni zi sökhi nifalua niha böʼö khöda ba taʼandrö khöra saohagölö. Moloʼö penelitian, abölö owua-wua dödö niha sangoromaʼö fangandrö saohagölö. w20.05 23-24 ¶12-13

Khalaigö hadia nirasoi Moze me so ia bakha ba dögi narö hili, ba itema gangilata sanandrösa ba lakhömi Yehowa sanörö fönania. Imane buku Pemahaman Alkitab, ”Te daʼa zalua fondrege zahöli-höli dödö nirasoi zi samösa niha, fatua lö tohare Yesu.” Tola manö fehede zi samösa malaʼika nirongo Moze andre, ”Yehowa, Lowalangi sahakhö tödö Yehowa andrö ba si sökhi böwö, lö alio mofönu ba fahöna waʼomasi si lö faröi ba faʼaduhu, sangoromaʼö faʼomasi si lö faröi ba niha si hauga ribu faʼato. Iʼefaʼö zala, olalöwa, horö.” (2 Mo. 33:17-23; 34:5-7) Na itötöi döi Yehowa Moze, tola manö itörö tödönia gangilata andrö simane nitutunö ba ayati maʼökhö andre. Na taʼogunaʼö döi Yehowa, moguna göi taʼangerönusi hewisa ia zindruhunia. Moguna taʼangeragö sanandrösa ba gamuata Yehowa, simane kuaso, faʼatua-tua, faʼatulö, hegöi faʼomasinia. Na taʼangerönusi fefu daʼö hegöi fefu mbua-buania tanö böʼö, itugu tafosumange Yehowa.—Si. 77:11-15. w20.06 8-9 ¶3-4

Ifatunö Yesu wa faʼomasi zi tobali tandra ndra nifahaʼönia. (Yoh. 13:34, 35) Hizaʼi, enaʼö tola taʼokhögö wamati saro, so ösa nasa zinangea tafalua. Lö obönö na teʼodane-dane wamatida ha ba waʼomasi niforomaʼö nono mbanua Lowalangi. Hadia mbörö? Na ha ba daʼö teʼodane-dane wamatida, tola alio taya daʼö. Duma-dumania, te taböhöli ba wamosumange Yehowa na so samösa dalifusöda ba wamati, te satua sokubaloi mazui perintis, samalua horö sebua. Tola manö göi awuwu ita ba wamati na so dalifusöda sangafökhöiʼö tödöda, mazui so niha sangerogö sindruhu, sangumaʼö wa fasala nifaduhusida tödö. Börö daʼö, enaʼö taʼokhögö wamati saro, moguna teʼodane-dane daʼö ba wahuwusa saro khö Yehowa. Famahaʼönia: Na mamati ndraʼugö khö Lowalangi ha börö nifalua niha böʼö ba tenga börö me öʼokhögö wahuwusa saro khönia, lö tola öʼokhögö wamati saro. Fefu hadia ia nirasoimö sanandrösa khö Yehowa hegöi ba nono mbanuania, tola möi fanolomö daʼö ba wondrouʼö famatimö. Hizaʼi, moguna sibai göi enaʼö öforege ba wamahaʼö yaʼugö ba Zura Niʼamoniʼö, aboto ba dödömö zi no öfahaʼö yaʼugö, ba öfalua riset enaʼö faduhu dödömö wa sindruhu zi no öfahaʼö yaʼugö sanandrösa khö Yehowa. Moguna faduhu dödömö wa tola ösöndra zindruhu sanandrösa khö Yehowa moroi ba Zura Niʼamoniʼö.—Rom. 12:2. w20.07 8 ¶2-3

Oya zi no irai alua sangoromaʼö wa latolo ita ira malaʼika ba wanöndra niha si no mamöhöli halöwö ba wamati somasi mangawuli khö Yehowa. (Fam. 14:6) Nehegö duma-duma salua khö zi samösa dalifusöda moroi Ekuador sotöi Silvio, si no mamöhöli halöwö ba wamati. Iʼandrö wanolo moroi khö Yehowa ba wangandrö enaʼö tola mangawuli ia ba mbanua niha Keriso. Me lö nasa sawai mangandrö ia, so darua zatua sokubaloi si so föna mbawandruhö nomonia. Me tohare ira, omasi ira ba wameʼe fanolo soguna khönia. Ebua sibai waʼomuso dödö nirasoida na tatolo niha si lö aro ba wamati, enaʼö tola mangawuli ira khö Yehowa. Nehegö hadia nitutunö Salvador, samösa perintis samorege ba wanolo niha si no mamöhöli halöwö ba wamati. Imane, ”Asöndru sibai dödögu ero na uʼangeragö niha samöhöli halöwö ba wamati, si no mangawuli khö Yehowa. Omuso dödögu börö me no falulu fohalöwö ndraʼo khö Yehowa ba wanolo ono mbanuania enaʼö tola laheta ira moroi ba gulidanö Zatana ba mangawuli ira khö Yehowa.” Hewaʼae na no öböhöli halöwö ba wamati, moguna faduhu dödömö wa lö tebulö iʼomasiʼö ndraʼugö Yehowa. Itötöna sibai wangawulimö Yehowa, ba hasambalö itemaʼö ndraʼugö si fao faʼomuso dödö na öfuliʼö khönia. w20.06 29 ¶16-18

Yehowa andrö no ’Samahaʼö Fondrege zi Sökhi’, ba no ibeʼe khöda duma-duma ba Daromalinia enaʼö tola tafahaʼö ita moroi ba daʼö. (Yes. 30:21) Moroi ba duma-duma niha nitutunö ba Zura Niʼamoniʼö, tola tafahaʼö ita ba wangokhögö amuata sangomusoiʼö tödö Lowalangi. Tola göi tafahaʼö ita moroi ba zalua ba niha si lö mangokhögö bua-bua andrö. (Si. 37:37; 1 Ko. 10:11) Angeragö zalua khö Razo Saulo. Ba wamobörö, so khönia wangide-ngideʼö. Aboto ba dödönia wa so zi tebai ifalua, ba aombö dödönia ba wanemaʼö halöwö si bohou. (1 Sa. 9:21; 10:20-22) Hizaʼi, lö ara me no tobali ia razo, ibörögö so khönia waʼasiliyawa, ba ifalua zi tenga halöwönia. Ba zi samuza inötö, lö khönia faʼebolo dödö ba wombaloi zamaʼeleʼö sotöi Samueli ba ibeʼe zumange nitunu hewaʼae na tenga sinangea ifalua daʼö. Lua-luania, lö saʼae ifahowuʼö ia Yehowa, ba ifili niha tanö böʼö si tobali razo fangalinia. (1 Sa. 13:8-14) Moguna tafahaʼö ita moroi ba duma-duma andre enaʼö lö tafalua zi tenga halöwöda. w20.08 10 ¶10-11

Iʼogunaʼö Keriso Yehowa ba wameʼe niha si tobali ”buala” ba mbanua niha Keriso. (Ef. 4:8) Si farahu ba ’mbuala’ andrö yaʼia daʼö ira Boto Solohe, asisten ndra Boto Solohe, Panitia Ndraha, satua samasui, samahaʼö ba zekola Zura Niʼamoniʼö, satua sokubaloi, hegöi ira enoni sohalöwö. Eheha niʼamoniʼö zamataro yaʼira ba wondrorogö mbiri-biri Yehowa sebua böli hegöi ba wangaʼaroʼö banua niha Keriso. (1 Fe. 5:2, 3) Ba mbanua niha Keriso, oya sibai noro dödö niʼokhögö ndra talifusöda nifataro geheha niʼamoniʼö. Fefu ndroto-ndroto ba mboto niha, simane tanga hegöi ahe, lafalua ngawalö halöwö soguna ba mboto maʼafefu. Simane daʼö göi, laforege ira talifusöda andre ba wamalua halöwö soguna ba mbanua niha Keriso maʼafefu. Tenga lakhömira samösa niʼaluira. Hizaʼi, laforege ba wangaʼaroʼö ndra talifusöra. (1 Te. 2:6-8) Taʼandrö sibai saohagölö khö Yehowa börö me no ibeʼe khöda ndra talifusöda andrö, sabölö mangofönaiʼö soguna ba niha böʼö moroi ba zoguna khöra samösa! w20.08 21 ¶5-6

Sambua dane-dane wa manuriaigö ita börö me omasi ita tatolo niha ’nifakao ba nitiboʼö’ enaʼö aboto ba dödöra zindruhu sanandrösa ba Wamatörö Lowalangi. (Mat. 9:36) Omasi Yehowa na fefu niha laʼokhögö waʼaboto ba dödö si tefaudu sanandrösa ba zindruhu ba tola teʼorifi ira. (1 Ti. 2:4) Na taʼangeragö wa tola möi fangorifi niha halöwö nifaluada, tola terou dödöda ba wanuriaigö. No tatolo ira enaʼö teʼorifi. (Rom. 10:13-15; 1 Ti. 4:16) Moguna göi taʼokhögö gama-gama si tefaudu ba wamalua fanuriaigö, ba aboto ba dödöda hewisa wangogunaʼö yaʼia. No ifatunö khö ndra nifahaʼönia Yesu hewisa lala wanuriaigö turia somuso dödö. Ifatunö khöra hadia zi tebai laʼohe, hezo nahia sinangea möi ira, ba hadia zinangea lawaʼö. (Mat. 10:5-7; Luk. 10:1-11) Ba götöda andre, oya Fakake Niʼogunaʼöda ba Wamahaʼö si no iʼasogö organisasi Yehowa. No tehenaigö khöda ngawalö video hegöi publikasi si tefaudu ba wamalua fanuriaigö hegöi famahaʼö. Baero daʼö, no göi mufahaʼö ita ba wangogunaʼö yaʼia. Buania, itugu barani ba onekhe ita ba wamalua fanuriaigö hegöi ba wamahaʼö niha böʼö.—2 Ti. 2:15. w20.09 4 ¶6-7, 10

Hadia tola ökhalaigö waʼomuso dödö nirasoi zinenge sotöi Yohane, me irongo wa lö faröi niha nifahaʼönia ba zindruhu ba wamosumange Yehowa? Oya sibai gabula dödö salua khöra, ba iforege sibai Yohane ba wangaroʼö famati ndra niha Keriso andrö, si no amaedola nononia ba wamati. Simanö göi, tatu tarasoi waʼomuso dödö na so ndraonoda solulu faʼaurira khö Yehowa, he iraonoda sindruhu mazui iraonoda ba wamati, ba lö laböhöli ba wamosumange yaʼia. (3 Yo. 3) Me arakhagö döfi 98 M, iʼogunaʼö gehehania niʼamoniʼö Yehowa ba wamarou dödö Yohane ba wanura sura si tölu ngawua. Ohitö dödö wa musura zura andrö yaʼia daʼö ba wamarou dödö niha Keriso si lö faröi enaʼö larorogö wamatira khö Yesu, ba lö laböhöli ba wanörö lala sindruhu. Iʼaombösi tödö mbanua niha Keriso Yohane börö wondrönisi dödö si lö sökhi moroi khö ndra samahaʼö sofaya. (1 Yo. 2:18, 19, 26) Lawaʼö ira niha sondröi sindruhu andrö wa aboto ba dödöra Lowalangi, hizaʼi lö laʼoʼö goroisa Yehowa. w20.07 20 ¶1-3

Börö me mamati ita ba duria nifaʼemada, tola terou dödöda ba wanuriaigö turia somuso dödö ba niha sato. Faduhu dödöda wa hasambalö alua mbuʼusa li Lowalangi si no tesura ba Zura Niʼamoniʼö. (Si. 119:42; Yes. 40:8) No taʼila iadaʼa hewisa waʼalua wamaʼeleʼö si no tesura ba Zura Niʼamoniʼö. Ba no göi taʼila samösa wa tola itugu sökhi waʼauri niha sato börö me laʼoʼö mene-mene Zura Niʼamoniʼö. Daʼa zamarou tödöda enaʼö itugu tahalö gangetula ba wanuriaigö turia somuso dödö ba niha sato. Mamati göi ita khö Yehowa, Umbu duria nifaʼemada, hegöi khö Yesu, si no ifataro tobali Razo ba Wamatörö Lowalangi. Gofu hadia gabula dödö salua khöda, hasambalö ilumöʼö ba iʼabölöʼö ita Yehowa. (Si. 46:1-3) Baero daʼö, faduhu dödöda wa lö iböhöli Yesu ba wangogunaʼö faʼabölö hegöi kuaso nibeʼe Yehowa khönia ba wameʼe fanuturu lala moroi ba zorugo sanandrösa ba halöwö fanuriaigö. (Mat. 28:18-20) Famati göi zanolo yaʼita ba wangokhögö faʼafaduhu dödö wa hasambalö ifahowuʼö wamorege nifaluada Yehowa. w20.09 12 ¶15-17

Itaria, latötöna sibai ira talifusöda ira alawe enaʼö so zanolo yaʼira na alua khöra gabula dödö. (Yes. 1:17) Duma-dumania, na so samösa dalifusöda ira alawe si no tobali lakha mbanua mazui si no fabali auri, tola manö moguna tatolo ia ba wamalua halöwö nifalua woʼomonia me föna. Te moguna göi wanolo khö dalifusöda ira alawe si no alawa döfi enaʼö tola möi ia ba wamalukhaisi ndra doto. Mazui, te so samösa dalifusöda ira alawe si no tobali perintis samalua halöwö tanö böʼö ba organisasi Yehowa. Moguna taʼoʼawögö ia na so zamato-matou yaʼia börö me lö saʼae asese möi ia manuriaigö simane nifalua ndra perintis tanö böʼö. Nehegö duma-duma Yesu. Iʼanemaiʼö iʼoʼawögö ndra talifusönia ira alawe Yesu me so zangokhögö lala wangera-ngera si fasala sanandrösa khöra. Duma-dumania, iʼoʼawögö Maria me isalaikö ia Marata. (Luk. 10:38-42) Aefa daʼö, me so ösa niha sofönu khö Maria börö me lawaʼö wa fasala gangetula nihalönia, ifuli zui iʼoʼawögö ia Yesu. (Mrk. 14:3-9) Aboto ba dödö Yesu gohitö dödö Maria ba isuno ia. Baero daʼö, ifaʼeleʼö göi Yesu, imane, ”Gofu hezo laturiaigö duria somuso dödö ba zi sagörö ulidanö, tedunö-dunö dania nifalua ndra alawe andre.” w20.09 24 ¶15-16

Kubalo si sökhi, aboto ba dödönia wa itaria tola elungu zi sageu mbiri-biri. Börö daʼö, lö ifalua zi lö sökhi ba mbiri-biri sangaröuʼö yaʼia moroi ba ngawawa. Ba götö Zura Niʼamoniʼö, so ösa nono mbanua Yehowa si no irai mangaröuʼö yaʼira khönia. Me ifaretakö Yona Yehowa ba weʼamöi ba Niniwe, lö iʼoʼö daʼö Yona. Hewaʼae simanö, lö iʼanemaiʼö itimbagö Yona Yehowa. Simane samösa kubalo si sökhi, iʼorifi Yona Yehowa ba itolo ia ba wamalua halöwö nibeʼe khönia. (Yon. 2:7; 3:1, 2) Ba gafuriata, iʼogunaʼö zinanö labu Yehowa ba wanolo Yona enaʼö aboto ba dödönia wa no sebua böli waʼauri niha. (Yon. 4:10, 11) Hadia wamahaʼönia khöda? Moguna lö alio awuwu zatua sokubaloi ba wanolo niha si no mamöhöli halöwö ba wamati. Hizaʼi, moguna laforege enaʼö aboto ba dödöra hadia mbörö wa iʼaröuʼö ia si samösa niha moroi ba ngawawa. Ba na no mangawuli niha daʼö khö Yehowa, lö laböhöli ira satua sokubaloi ba wangomasiʼö hegöi ba woʼameʼegö tödö yaʼia. w20.06 20-21 ¶10-12

Me no mufakiko Uni Soviet me döfi 1991, ”ha maʼifu latema wanolo” ono mbanua Lowalangi si no irai so barö wamatörönia. Eluahania, laʼokhögö wangefa ba ginötö si lö arara, ba lö taha-tahara ba wamalua halöwö fanuriaigö. Buania, lö ara aefa daʼö, tedou waʼato zanuriaigö irugi ngaotu ribu ba soi si no irai so barö wamatörö Uni Soviet. Hizaʼi ba gafuriata, ifuli so razo tanö yöu si bohou, yaʼia daʼö Rusia hegöi soi sotuhini yaʼia. Famatörö si no tobali razo tanö yöu hegöi razo tanö raya, lafalua zi tölu ngawalö andre: (1) lafakao nono mbanua Lowalangi, (2) moroi ba gamuatara laforomaʼö wa fatuwu ira khö Yehowa hegöi ba nono mbanuania, ba (3) faʼudu ira khö nawöra. Rusia hegöi soi sotuhini yaʼia, lasuwö nono mbanua Lowalangi, yaʼia me lö latehegö wamalua halöwö fanuriaigö ba lafakao ndra talifusöda si ngaotu ribu faʼato. Bua-buara andrö zangoromaʼö wa fatuwu ira khö Yehowa hegöi ba nono mbanuania. Ba laforege enaʼö abölö ebua kuasora moroi ba razo tanö raya, yaʼia daʼö Kuaso Gulidanö Inggris-Amerika. w20.05 12 ¶3-4

Börö me moʼamakhaita sibai halöwö fombaliʼö nifahaʼö hegöi famahaʼö, moguna sibai onekhe ita ba wamaʼema famahaʼö Sura Niʼamoniʼö. Ba zi sagörö ulidanö, so zuta waʼato niha nifahaʼöda ba Zura Niʼamoniʼö. Börö me taʼomasiʼö sibai Daromali Lowalangi nifatunöda ba niha böʼö, tola manö omasi tadunö-dunö fefu zi no taʼila sanandrösa ba daʼö. Hizaʼi, lö moguna taʼoyaʼö wehededa na tadöniaʼö Wamahaʼö Manuriaigö, Famahaʼö Zura Niʼamoniʼö ba Gangowuloa, mazui famahaʼö Zura Niʼamoniʼö nifalua ba nomo. Moguna sibai tahaogö wangogunaʼö Sura Niʼamoniʼö ba wamahaʼö niha böʼö. Börö daʼö, moguna tataha dödöda enaʼö lö tatutunö khönia fefu zi no taʼila sanandrösa ba zi sambua ayati Zura Niʼamoniʼö. (Yoh. 16:12) Angeragö atö: Me awena öfahaʼö ndraʼugö ba Zura Niʼamoniʼö, ha maʼifu waʼaboto ba dödö niʼokhögömö, tenga simane iadaʼa. Ba ginötö daʼö, tola manö ha dane-dane zindruhu zi no aboto ba dödömö. (Heb. 6:1) Moguna öfahaʼö ndraʼugö ba zi hauga fakhe faʼara irege tola öʼokhögö waʼaboto ba dödö si no öʼila iadaʼa. Börö daʼö, böi samuzaigö wamaʼema famahaʼö ba niha nifahaʼömö ba Zura Niʼamoniʼö. w20.10 14-15 ¶2-4

No ifili Yehowa zatua si sökhi sibai khö Yesu. (Mat. 1:18-23; Luk. 1:26-38) Ebua sibai waʼomasi Maria khö Yehowa hegöi Taromalinia. Tola oroma daʼö, moroi ba wehede nifaʼemania soroi ba dödö, si no tesura ba Zura Niʼamoniʼö. (Luk. 1:46-55) Hewisa göi sanandrösa khö Yosefo? Me irongo wanuturu lala moroi khö Yehowa, iʼanemaiʼö ifalua daʼö. Daʼa zangoromaʼö wa iʼomasiʼö Yehowa ba omasi ia ba wangomusoiʼö tödö Lowalangi. (Mat. 1:24) Tenga niha si kayo nifili Yehowa si tobali satua Yesu. Me no aefa tumbu Yesu, ha fofo nibeʼe Yosefo hegöi Maria si tobali sumange. Daʼa zangoromaʼö wa yaʼira andrö ösi nomo si numana. (Luk. 2:24) Yosefo andrö samösa tuka geu, ba tola manö no ifazökhi nahiania wohalöwö side-ide ba zi tambai nomora si so ba Nazareta. Tatu no öna-öna sibai waʼaurira, mendrua manö me so mato dafitu ndraonora. (Mat. 13:55, 56) Sindruhu sa, ibeʼe Yehowa wolumöʼö khö Yesu me so ösa deʼala sedöna alua khönia. Hizaʼi, tenga daʼö geluahania wa itimbagö fefu gabula dödö salua khö Nononia andrö. (Mat. 2:13-15) Duma-dumania, so ösa nösi nomo Yesu si lö faduhu tödö ba wamobörö wa yaʼia andrö Mesia. Tatu afatö sibai dödö Yesu ba nifaluara andrö. (Mrk. 3:21; Yoh. 7:5) Baero daʼö, te mate namania sotöi Yosefo me awuyu-wuyu nasa Yesu. w20.10 26-27 ¶4-6

Hadia no irai örasoi wa ha yaʼu-yaʼugö ba lö hadöi niha sanolo yaʼugö ba wanaögö fanandraigö salua khömö? Ato zorasoi simane daʼö, tefarahu ba daʼö nono mbanua Yehowa si lö faröi. (1 Ra. 19:14) Na no irai alua khöu zimane daʼö, törö tödöu mbuʼusa li Yehowa me imane, ”Lö manö uröi ndraʼugö ba lö uʼositengagö ndraʼugö.” Börö daʼö, si fao faʼafaduhu dödö, tola tamane wangumaʼö, ”Yehowa zanolo yaʼo; lö ataʼu ndraʼo.” (Heb. 13:5, 6) Isura wehede andre Faulo khö ndra talifusönia si so ba Yudea, te me döfi 61 M. Fehedenia andre zamasugi ba dödöda ngawua wehede si no tesura ba Zinunö 118:5-7. Simane sanura sinunö andrö, aboto göi ba dödö Waulo wa Yehowa Zanolo yaʼia börö me no asese itolo ia ba zilalö. Töra dua fakhe fatua lö isura zurania ba niha Heberaiʼo, telumöʼö waʼauri Waulo me alua mbade sabölö-bölö ba nasi nitörönia. (Hal. 27:4, 15, 20) Sagötö wamaluania fofanö andrö, hegöi ba zi hauga fakhe fatua lö daʼö, no itolo Waulo Yehowa ba lala si faböʼö-böʼö. w20.11 12 ¶1-2

Hana wa tebai tawaʼö tödöda wa abölö sökhi zalua khöda ba zilalö? Na lö aetu taʼokhögö lala wangera-ngera simane daʼö, ha si sökhi manö nitöngönida, ba taʼolifugö gabula dödö si no irai tataögö. Duma-dumania, nehegö zalua ba ndraono Gizaraʼeli me götö föna. Me no laröi danö Miserai, iʼanemaiʼö laʼolifugö fefu waʼafökhö nirasoira me toröi ira ba daʼö. Lamane wangumaʼö, ”Me so ndraʼaga ba Miserai mböröta, toʼölö ndraʼaga wemanga iʼa ba lö mabuʼa mböli, simanö göi laʼizu, kamandriki, baŵa perei, baŵa soyo hegöi baŵa safusi!” (4 Mo. 11:5) Hizaʼi, hadia ’lö labuʼa mböli’ fefu gö niʼara andrö? Tenga. Sindruhunia, tenga saoha wanöndrara fefu daʼö. Me luo daʼö, lataögö wamakao börö me laʼosawuyu ira ba danö Miserai. (2 Mo. 1:13, 14; 3:6-9) Hizaʼi ba gafuriata, laʼolifugö fefu waʼafökhö nitaögöra, ba omasi ira na ifuli larasoi waʼauri simane ba zilalö. Ha si sökhi ba zilalö niʼera-erara, ba laʼolifugö fefu zi sökhi sawena ifalua khöra Yehowa. Fatuwu sibai Yehowa ba gamuatara andrö.—4 Mo. 11:10. w20.11 25 ¶5-6

Itaria, tola manö taʼangeragö sanandrösa ba waʼaurida ba gulidanö andre si lö arara ba ”afönu fangarö-ngarö”. (Yob. 14:1) Daʼö mbörö wa no si toʼölö na tarasoi waʼide-ide dödö. Ato nono mbanua Lowalangi ba götö föna sorasoi simane daʼö, irege so ösa zomasi mate. (1 Ra. 19:2-4; Yob. 3:1-3, 11; 7:15, 16) Hizaʼi, lö aetu irara dödöra Yehowa ba iʼabölöʼö ira. Musura waö-waö waʼaurira ba Zura Niʼamoniʼö enaʼö terara dödöda ba tola tafahaʼö ita ba daʼö. (Rom. 15:4) Nehegö Yosefo ono Yakobo, ba zi lö arara tebulö zalua ba waʼauri Yosefo. Ba zilalö, toröi ia ba ngai namania sangomasiʼö yaʼia. Hizaʼi iadaʼa, tobali ia sawuyu ba danö Miserai ba mohalöwö ia ba niha si lö mamosumange Yehowa. (1 Mo. 37:3, 4, 21- 28; 39:1) Me ifobahulu ia foʼomo Wotifa, ba iwaʼö wa iforege Yosefo ba wohoröni yaʼia. Me irongo daʼö Fotifa, lö iforege ba wangalui hewisa zindruhunia zalua. Hizaʼi, iʼanemaiʼö ifakuruʼö Yosefo, ba laböbö ia ba daʼö faoma rate siʼöli. (1 Mo. 39:14-20; Si. 105:17, 18) Tatu irasoi waʼide-ide dödö Yosefo me alua khönia fefu daʼö! w20.12 16-17 ¶1-4

Daʼa ngawua wehede sabölö iʼofönaiʼö Yesu ba wangandrönia. Hadia geluaha wehede Yesu andrö? Fangamoniʼö, yaʼia daʼö famorege nifalua enaʼö lö taʼunö mazui lö raʼiö zi sambua ngawalö. Hizaʼi, te so ösa niha sangumaʼö, ”No teʼamoniʼö döi Yehowa, lö taʼunö, ba lö raʼiö. Na simanö, hana wa moguna muʼamoniʼö nasa döinia?” Ba wameʼe fanema li ba wanofu andrö, moguna aboto ba dödöda hadia manö zi farahu ba döi niʼokhögöda. Tohude sibai döi niʼokhögöda. Tenga ha ngawua wehede nisura mazui nitötöi daʼö. Nehegö hadia niwaʼö Zura Niʼamoniʼö, ”Abölö sökhi döi si sökhi moroi ba harato sebua.” (Amd. 22:1; Sango. 7:1) Hana wa tohude sibai döi si sökhi andrö? Börö me moʼamakhaita daʼö ba lala wangera-ngera niha sanandrösa khö zi samösa niha. Börö daʼö, tenga lala wanura mazui fanötöi yaʼia zabölö tohude, hizaʼi hadia niʼangeragö niha na labaso mazui na larongo döi daʼö. Ato niha samorege ba wamakiko töi si sökhi niʼokhögö Yehowa. Börö daʼö, oya walimosa nifazaewera sanandrösa khö Yehowa enaʼö lö sökhi lala wangera-ngera niha sanandrösa khö Lowalangi. w20.06 2-3 ¶5-7

Tola manö talafo taʼaombösi tödö gabula dödö salua khöda, irege ha ba daʼö manö taʼosambuaʼö dödöda ba lö taʼangeragö danö böʼönia. Duma-dumania, tola manö aombö dödöda wa lö ibönö gefeda ba wowöli soguna khöda. Mazui, te aombö dödöda, alai na göna ita fökhö irege lö taʼila mohalöwö mazui laheta ita moroi ba halöwöda. Aombö göi dödöda, alai na faröi ita na ladönisi dödöda ba wanawö oroisa Lowalangi. Ba zi lö ara tö, hasambalö idönisi dödö niha sato si so barö wamatörönia Satana, ba wanuwö ono mbanua Lowalangi. Börö daʼö, te aombö dödöda hadia nifaluada dania na lasuwö ita. Tola manö manofu-nofu dödöda, ’Hadia fasala na uʼaombösi tödö fefu daʼö?’ Imane Yesu khö ndra soloʼö khönia, ”Böi mibusi tödö.” (Mat. 6:25) Hadia daʼö geluahania wa maʼifu tebai taʼaombösi tödö hadia ia? Tenga. Törö tödöu wa so ösa nono mbanua Yehowa si lö faröi me götö föna si no irai morasoi faʼaombö-aombö dödö. Hewaʼae simanö, lö tebulö iʼomasiʼö ira Yehowa. (1 Ra. 19:4) Sindruhunia, omasi Yesu ba wamaduhuʼö ba dödöda wa lö moguna talafo aombö dödöda. Lö omasi ia na lö saʼae taʼofönaiʼö wangai halöwö khö Yehowa börö me talafo taʼaombösi tödö zoguna ba waʼaurida. w21.01 3 ¶4-5

Tezofu-zofu dania khö ndra foʼomo ira matua hewisa lalara ba wondröniaʼö ösi nomora, ba laʼonorogö tödö daʼö föna Yehowa hegöi Yesu. (1 Fe. 3:7) Börö me Yehowa zi tobali Högö ba nösi nomonia si so ba zorugo hegöi ba gulidanö, iʼokhögö kuaso ba wamazökhi amakhoita soguna khö ndraononia, ba no sinangea na iʼandrö khöra enaʼö laʼoʼö fefu gamakhoitania andrö. (Yes. 33:22) Börö me Yesu zi tobali högö ba mbanua niha Keriso, no sinangea na ifazökhi gamakhoita ba iʼandrö khöda ba woloʼö daʼö. (Gal. 6:2; Kol. 1:18-20) Simane Yehowa hegöi Yesu, no sinangea na lafazökhi gamakhoita soguna ba nösi nomora ira niha Keriso si tobali högö yomo ba nomo. (Rom. 7:2; Ef. 6:4) Hizaʼi, so nola-ola kuaso niʼokhögöra. Duma-dumania, moguna teʼodane-dane ba goi-goi si so ba Daromali Lowalangi fefu gamakhoita nifazökhira. (Amd. 3:5, 6) Ba lö göi khöra kuaso ba wamazökhi amakhoita soguna ba niha si tenga ösi nomora. (Rom. 14:4) Baero daʼö, na no ebua-bua ndraonora ba lö saʼae toröi ira ba nomo, lö tebulö lafosumange ira iraonora, hizaʼi tenga saʼae yaʼira zi tobali sondröniaʼö ba ndraonora andrö.—Mat. 19:5. w21.02 2-3 ¶3-5

Sambua lala si tohude si tola ifalua satua si tobali högö yomo ba nomo ba wangoromaʼö wa iʼomasiʼö nösi nomonia, yaʼia daʼö na ibönökhi zoguna khöra sero maʼökhö. Hizaʼi, moguna itörö tödönia wa lö tola löʼö ibönökhi zoguna khöra sabölö tohude, yaʼia daʼö soguna ba wamati. (Mat. 5:3) Me arakhagö mate Yesu ba döla geu famakao, iʼangeragö enaʼö tebönökhi zoguna khö Maria sero maʼökhö. Hewaʼae ba waʼafökhö so ia, iʼandrö khö Yohane ba wondrorogö Maria. (Yoh. 19:26, 27) Te oya noro dödö si tohude niʼokhögö zi samösa satua si tobali högö yomo ba nomo. Moguna owölö-ölö ia wohalöwö. Tola tefolakhömi döi Yehowa ba gamuatania si sökhi andrö. (Ef. 6:5, 6; Tit. 2:9, 10) Te so göi noro dödönia ba mbanua niha Keriso, simane fokubaloi ira talifusöda hegöi ba wondröniaʼö yaʼira ba wanuriaigö. Baero daʼö, moguna göi ifaogö woʼomonia hegöi iraononia ba wamalua famahaʼö ba Zura Niʼamoniʼö ero migu. Tatu mangandrö sibai saohagölö woʼomonia hegöi iraononia börö me lö tebulö iforege ba wombönökhi soguna khöra, irege lö mofökhö ira, larasoi waʼomuso dödö, ba aro ira ba wamati.—Ef. 5:28, 29; 6:4. w21.01 12 ¶15, 17

No itutunö Sura Niʼamoniʼö hadia manö zi tola ifalua foʼomo ira alawe. Duma-dumania, ifaigi-faigi wamalua halöwö yomo ba nomo, tola iʼöli ba ifamawa danö, ba mangalui kefe göi ia. (Amd. 31:15, 16, 18) Yaʼia andrö tenga sawuyu si tebai mamaʼema bua gera-erania. Hizaʼi, ifaduhusi tödö ia foʼomonia ira matua ba ifondrondrongo mbua gera-erania. (Amd. 31:11, 26) Na iforomaʼö foʼomo ira matua wa iʼameʼegö tödö woʼomonia, tola iʼoʼö linia foʼomonia si fao faʼomuso dödö. Hewaʼae na oya zahöli-höli dödö si no ifalua Yesu, lö iwaʼö tödönia wa no fangaila na iʼoʼö li Yehowa. (1 Ko. 15:28; Fil. 2:5, 6) Simanö göi, ira alawe satua-tua soloʼö duma-duma Yesu, lö iwaʼö tödönia wa no fangaila na iʼoʼö li woʼomonia. Ituhini woʼomonia tenga ha börö waʼomasinia khö woʼomonia, hizaʼi sabölö tohudenia börö me iʼomasiʼö ba ifosumange Yehowa. Moguna iʼoʼö li woʼomonia si samösa niha Keriso si no tobali foʼomo ira alawe. Hewaʼae simanö, lö iʼoʼö li woʼomonia na iʼandrö khönia ba wanawö huku mazui goi-goi Zura Niʼamoniʼö. w21.02 11 ¶14-15; 12 ¶19

Faʼomasi khö Lowalangi zanolo ono mbanua Yehowa ba wanaögö folohi. Duma-dumania, me lafaso ndra sinenge ira sangetuʼö huku ba niha Yahudi enaʼö laböhöli wanuriaigö, faʼomasi khö Yehowa zanolo yaʼira ba ’woloʼö khö Lowalangi me yaʼia zamatörö yaʼira moroi ba woloʼö ba niha’. (Hal. 5:29; 1 Yo. 5:3) Faʼomasi saro simane daʼö göi zanolo ira talifusöda ba ginötö andre ba wanaögö folohi moroi khö ndra samatörö safaito ba sebua kuaso. Lö ide-ide dödöda na fatiu dödö niha gulidanö khöda, hizaʼi so khöda waʼomuso dödö. (Hal. 5:41; Rom. 5:4, 5) Na lasaisi ita ira ösi nomoda, tola tobali fanandraigö sabölö ebua daʼö. Me ibörögö adöni dödöda ba zindruhu, te so ösa nösi nomoda sangumaʼö wa no ifaelungu ita famahaʼö sofaya. Mazui, te lawalinga no owöhö ita. (Fareso göi Mareko 3:21.) Tola manö lö faʼahakhö dödöra ba wamakao yaʼita. Hizaʼi, lö tokea ita na alua khöda zimane daʼö. Imane Yesu, ”Si faʼudu ba niha dania zoroi yomonia.”—Mat. 10:36. w21.03 21 ¶6-7

Na fao ndraʼugö khö zi samösa sanuriaigö ba wondröniaʼö famahaʼö ba Zura Niʼamoniʼö. Na öfalua daʼö, tola tefaʼanö ndraʼugö ba wanolo yaʼia na inötö moguna. Fatua lö fahuhuo ndraʼugö, angeragö ua sakali. Duma-dumania, böi taba dalu huhuo zondröniaʼö famahaʼö, böi tutunö duho tanö böʼö, ba böi talafo anau gonönöta nibeʼemö. Tola itugu aboto ba dödö niha nifahaʼö andrö duho nitutunömi na öbeʼe gonönöta, duma-duma, mazui fanofu sadogo-dogo. Itaria, tola manö örasoi wa lö oya gonönöta si tola öbeʼe. Hizaʼi, na ösuno niha nifahaʼö andrö ba öforomaʼö wa öʼameʼegö tödö ia, tola tobali fanolonia daʼö enaʼö itugu tedou ia ba wamati. Na tefaudu, tola öʼadogoiʼö wanutunö si no irai alua khöu ba niha nifahaʼö ba Zura Niʼamoniʼö. Duma-dumania, tutunö khönia hewisa me awena öfahaʼö ndraʼugö ba zindruhu, hewisa wanaögöu abula dödö, mazui hewisa wanolo Yehowa ndraʼugö. (Si. 78:4, 7) Tola manö tefaudu zi no irai alua khöu andrö ba zalua khönia. Na ötutunö khönia daʼö, te itugu aro wamatinia, terou dödönia ba wondrouʼö yaʼia ba wamati irege tebayagö idanö. w21.03 10 ¶9-10

Haniha mbörö wa tola mofozu ita ba wamalua halöwö fanuriaigö? Ibeʼe wanema li Faulo sanandrösa ba wanofu andrö me isura zura ba mbanua niha Keriso ba Gorindro. Imane, ”Yaʼodo zananö, Afolo zombuwui ba Lowalangi zamanöi. Tobali, faya zananö ba faya zombuwui na tenga Lowalangi zamanöi.” (1 Ko. 3:6, 7) Simane Faulo, moguna tatörö tödöda wa Yehowa mbörö wa tola mofozu halöwö nifaluada ba wombaliʼö nifahaʼö. Hewisa wangoromaʼöda wa taʼameʼegö tödö döi si sökhi niʼokhögöda me tola falulu fohalöwö ita khö Lowalangi, Keriso hegöi khö ndra malaʼika? (2 Ko. 6:1) Tola tafalua daʼö na taforege ba wamaʼema turia somuso dödö ba niha böʼö. Halöwöda tenga ha ba wananö tanömö zindruhu, hizaʼi tawuwui göi ia. Andrö, na adöni dödö zi samösa niha, moguna taforege enaʼö tafuli tafalukhaisi ia. Ohitö dödöda ba wamalukhaisi yaʼia mangawuli, yaʼia daʼö ba wamörögö famahaʼö ba Zura Niʼamoniʼö. Ba na no ibörögö ifahaʼö ia ba Zura Niʼamoniʼö, tola taʼila hewisa Yehowa ba wanolo yaʼia irege tebulö dödönia hegöi fangera-ngerania. Tatu omuso sibai dödöda na simane daʼö zalua. w20.05 30 ¶14, 16-18