Baŵa si Walu

Nehegö so dombua zi tohude niforomaʼö ba ayati daʼa: (1) Tola manö alua gabula dödö ba niha satulö tödö. (2) Tola iʼefaʼö ita Yehowa moroi ba gabula dödö. Hewisa wamalua Yehowa daʼö? Sambua lalania yaʼia daʼö itolo ita enaʼö taʼokhögö lala wangera-ngera si tefaudu sanandrösa ba waʼaurida ba gulidanö iadaʼa. Sindruhu sa, no ifabuʼu Yehowa wa hasambalö tasöndra waʼomuso dödö na tafosumange ia. Hizaʼi, lö niwaʼönia wa lö alua gabula dödö ba waʼaurida iadaʼa. (Yes. 66:14) No ibeʼe khöda dötönafö enaʼö auri ita sagötö faʼara ba zi so miföna, ba omasi ia na taʼosambuaʼö dödöda ba dötönafö andrö. (2 Ko. 4:​16-18) Hizaʼi, fatua lö alua dötönafö andrö, itolo ita enaʼö lö tebulö anau gölöda ba wamosumange yaʼia ero maʼökhö. (Nge. 3:​22-24) Hadia wamahaʼö si tola tahalö moroi ba zi no irai alua khö genoni Yehowa si lö faröi ba götö Zura Niʼamoniʼö hegöi ba götöda iadaʼa? Tola manö alua khöda gabula dödö si lö tadöna-döna. Hizaʼi, na taʼodaligö Yehowa, hasambalö ituhini ita.—Si. 55:22. w23.04 14-15 ¶3-4

Tola tafahaʼö ita moroi ba duma-duma Yosefo hegöi Maria, soloʼö niwaʼö zamatörö hewaʼae abua. (Luk. 2:​1-6) Me no siwa waŵa dabina Maria, tetandraigö woloʼö Yosefo hegöi Maria. Ibeʼe fareta kaisaro Romawi sotöi Auguso enaʼö lafasuraʼö döira ba zura. Mofanö Yosefo hegöi Maria, latörö lala si numalö ba Mbetilekhema, mato 150 kilometer waʼaröu ba mohili-hili. Tatu manö abua khöra wamalua daʼö, mendrua manö khö Maria. Te aombö dödöra hewisa dania waʼauri Maria hegöi ono si so ba dalunia. Hewisa na tumbu nononia andrö ba dalu lala? Ono si so ba dalunia andrö Mesia si no tefabuʼu. Hadia daʼö zi tobali dane-dane enaʼö lö laʼoʼö li ndra samatörö? Faʼaombö dödö andrö lö tobali taha-taha khö Yosefo hegöi Maria ba wanawö niwaʼö ndra samatörö. Omuso dödö Yehowa me so khöra woloʼö ba ifahowuʼö ira. Ofeta Maria ba Mbetilekhema, lö hadia ia khönia me tumbu nononia, ba farahu ia ba waʼalua nifaʼeleʼö Zura Niʼamoniʼö!—Mi. 5:2. w23.10 8 ¶9; 9 ¶11-12

Hewisa na ataʼu ndraʼugö ba wameʼe mbua gera-erau ba gangowuloa? Tola öʼalui wanuturu lala ba wamaʼanö yaʼugö. (Amd. 21:5) Na sindruhu-ndruhu aboto ba dödöda duho nitutunö, tola aoha khöda ba wameʼe mbua gera-era. Lafarou göi ita enaʼö tabeʼe mbua gera-era sadogo-dogo. (Amd. 15:23; 17:27) Na tafaʼanö mbua gera-era sadogo-dogo, tola manö lö ataʼu ita ba wamaʼema daʼö. Na tabeʼe mbua gera-era sadogo-dogo faoma fehededa samösa, daʼö zangoromaʼö wa no tahaogö tafaʼanö ita ba sindruhu-ndruhu aboto ba dödöda duho nitutunö. Hewisa na no öʼoʼö wanuturu lala andrö, hizaʼi lö tebulö so khöu waʼataʼu ba wameʼe mbua gera-era töra moroi ba zi sakali mazui dua kali? Yafaduhu dödöu wa iʼameʼegö tödö Yehowa wamorege si no öfalua. (Luk. 21:​1-4) Lö irai iʼandrö khöda Yehowa ba wamalua si tebai tafalua. (Fil. 4:5) Börö daʼö, angeragö hadia zi tola öfalua, tatugöi enaʼö öfalua daʼö, ba angandrö enaʼö so khöu waʼahono dödö. Ba wamobörö, tola ötatugöi ba wamaʼema sambua mbua gera-era sadogo-dogo. w23.04 21 ¶6-8

Iʼamaedolagö niha Keriso andrö sinenge Faulo simane saradadu si no mamaʼanö yaʼia ba wasuwöta. Na alua wasuwöta, mutötöna khö zaradadu enaʼö no tefaʼanö ia fasuwö. Simanö göi ita, moguna tefaʼanö ita ba wanaögö ngaluo Yehowa, ba taʼogunaʼö mbaru siʼöli yaʼia daʼö famati ba faʼomasi, simanö daʼö göi dakula ba högö yaʼia daʼö tötönafö ba fangorifi. Simane baru siʼöli, tola möi folumöʼö dödö zi samösa saradadu. Famati hegöi faʼomasi, tola möi folumöʼö dödöda irege lö tebulö tafosumange Lowalangi ba taʼoʼö Yesu. Famati zamaduhuʼö ba dödöda wa hasambalö ifoluo niha sangalui yaʼia soroi ba dödö Yehowa. (Heb. 11:6) Börö wamati, lö faröi ita khö Yesu si tobali sondröniaʼö yaʼita hewaʼae ba ginötö waʼabasaki. Famati saro göi zanolo yaʼita ba wanaögö faʼabasaki. Enaʼö aro wamatida, moguna tafahaʼö ita khö ndra talifusöda si lö faröi hewaʼae göna ira folohi mazui abula dödö ba wangalui soguna. Tola göi tatimbagö wondrönisi dödö ba wangalui harato sebua na taʼoʼö ndra talifusöda soʼöna-önaiʼö faʼaurira börö me laʼofönaiʼö Wamatörö Lowalangi. w23.06 10 ¶8-9

Tola itolo ita eheha niʼamoniʼö ba wondrouʼö bua-bua samarou yaʼita ba wogamö ohitö dödöda, mendrua manö na abua khöda wamalua daʼö mazui lö khöda faʼaterou dödö. Börö daʼö, andrö khö Yehowa enaʼö ibeʼe khöu gehehania irege tola ödouʼö mbua-bua sanolo yaʼugö ba wogamö ohitö dödöu. (Luk. 11:13; Gal. 5:​22, 23) Böi baloi ginötö si sökhi. Ba gulidanö andre, lö irai moʼahonoa zalua khöda. Na tabase-baseʼö manö, tola manö lö takhamö gohitö dödöda. Tola manö lö hadöi khöda faʼaterou dödö börö me tarasoi wa gohitö dödöda andrö abua ba wogamö yaʼia. Börö daʼö, tandraigö börögö moroi ba ngawalö zide-ide. Duma-dumania, na so mbua-bua somasiʼö ödouʼö, tandraigö foromaʼö daʼö ba wondrege zide-ide. Mazui na omasiʼö enaʼö ahori öbaso Zura Niʼamoniʼö, tatugöi enaʼö adogo-dogo ginötömö wombaso yaʼia. w23.05 29 ¶11-13

Sagötö ngaluo safuria andre, iʼogunaʼö organisasinia Yehowa ba wohenaigö gö ba wamati enaʼö fefu ita lö tebulö tatörö ”Lala Niʼamoniʼö”. (Yes. 35:8; 48:17; 60:17) Ero na so samösa niha somasi mamahaʼö yaʼia ba Zura Niʼamoniʼö, sindruhunia no ibörögö wanörö ”Lala Niʼamoniʼö.” So ösa niha, lö ara itörö lala andrö ba iröi. Ba niha tanö böʼönia, lahalö gangetula enaʼö lö laböhöli wanörö lala daʼö irugi gamozua. Hizaʼi, hezo so lua-lua lala andrö? Lua-lua ”Lala Niʼamoniʼö” ba niha sanötöna faʼauri ba zorugo, yaʼia daʼö ba ”waradaiso Lowalangi” ba zorugo. (Fam. 2:7) Niha sanötöna auri ba gulidanö, lua-lua lala andrö yaʼia daʼö ba wamoʼahonoa ba gangohorita wamatörö Keriso si saribu fakhe. Na no so ndraʼugö ba lala daʼö iadaʼa, böi faigi furi. Böi röi lala daʼö irugi ofeta ndraʼugö ba gulidanö si bohou! w23.05 17 ¶15; 19 ¶16-18

Ba ginötö öʼangerönusi fefu zi no ifalua khöu Yehowa, tatu tefarou dödöu ba wolulu faʼaurimö khönia. (Si. 116:​12-14) Imane Sura Niʼamoniʼö wa moroi khö Yehowa ”fefu mbuala si sökhi ba soʼahonoa”. (Yak. 1:17) Buala fondrege zebua nibeʼenia yaʼia me ibeʼe Nononia sotöi Yesu tobali höli. Börö me so höli, andrö wa tola fahuwu ndraʼugö khö Yehowa! Baero daʼö, ibeʼe khöu Yehowa dötönafö enaʼö tola auri ndraʼugö sagötö faʼara. (1 Yo. 4:​9, 10) No iforomaʼö waʼomasinia Yehowa ba lala sabölö tohude, ba no oya howu-howu nibeʼenia khöu. Börö daʼö, no sinangea na öʼandrö saohagölö khönia ba terou dödöu ba wolulu faʼauriu khönia.—5 Mo. 16:17; 2 Ko. 5:15. w24.03 5 ¶8

Me taʼila wa itugu lö sökhi goi-goi gulidanö andre sanandrösa ba gamuata, tarasoi simane nirasoi Loti. ’Tefakao ia börö me iʼila gamuata si lö faʼaila nifalua niha si lö sökhi’, börö me aboto ba dödönia wa fatuwu khö Yehowa gamuata simane daʼö. (2 Fe. 2:​7, 8) Iʼataʼufi ba iʼomasiʼö Lowalangi Loti. Börö daʼö, lö iʼoʼö gamuata niha si so ba zi fasuinia. Iadaʼa, niha si so ba zi fasuida göi laʼosilöʼögö goi-goi Yehowa sanandrösa ba gamuata. Hewaʼae simanö, lö tebulö sökhi gamuatada na taforege ba wangomasiʼö Lowalangi ba tafosumange ia. Ibeʼe khöda Yehowa mene-menenia si fao faʼomasi ba mbuku Gamaedola ba wanolo yaʼita. Fefu niha Keriso, he ira matua mazui ira alawe, si bohou ebua mazui si no alawa döfi, tola latema mbua na laʼangeragö mene-mene nibeʼenia andrö. Na taʼataʼufi Yehowa, moguna mangelama ita enaʼö böi fariawö ba niha si lö sökhi amuata. w23.06 20 ¶1-2; 21 ¶5

Tola manö lasaisi ndraʼugö ira ösi nomomö mazui ötehegö gokhötamö börö me öʼofönaiʼö Wamatörö Lowalangi ba waʼaurimö. (Mat. 6:33) Iʼila Yehowa nifaluamö sangomusoiʼö tödönia. (Heb. 6:10) Tola manö no örasoi samösa wa atulö niwaʼö Yesu andre, ”Haniha zondröi omonia, talifusönia matua, talifusönia alawe, inania, amania, ononia, nowinia na börö ndraʼo hegöi turia somuso dödö andrö, hasambalö isöndra 100 winaeta ba götö daʼa, yaʼia daʼö omo, talifusö matua, talifusö alawe, ina, ono hegöi nowi, si fao fanandraigö. Ba isöndra waʼauri si lö aetu ba götö si so miföna.” (Mrk. 10:​29, 30) Howu-howu si no ötema töra moroi ba ngawalö zi no ötehegö ba wangomusoiʼö tödönia.—Si. 37:4. w24.03 9 ¶5

Me alua lofo sabölö-bölö ba niha Keriso ba Yudea, ira talifusö si so ba mbanua niha Keriso Gandriokhia, ”lahalö gangetula ira nifahaʼö ba wamaʼoheʼö fanolo, ndrohu-ndrohu waʼabölöra zamösana soguna khö ndra talifusö ba Yudea.” (Hal. 11:​27-30) Hewaʼae na ba mbanua saröu toröi ndra talifusö si göna bencana andrö, omasi niha Keriso ba Gandriokhia ba wanolo yaʼira. (1 Yo. 3:​17, 18) Iadaʼa, tola göi taforomaʼö waʼahakhö dödö khö ndra talifusöda si sara lala wamati si göna bencana. Tatu omasi sibai ita na taʼanemaiʼö tabeʼe wanolo. Te manofu ita khö ndra satua sokubaloi hadia tola fao ita ba wanolo halöwö penanggulangan bencana. Baero daʼö, tola tabeʼe dolo-tolo ba wotuhini halöwö ba zi sagörö ulidanö mazui taʼohe ba wangandrö ndra talifusöda si göna bencana. Te moguna göi wanolo khö ndra talifusöda ba wombönökhi soguna sero maʼökhö. Ba ginötö tohare Razoda Yesu Keriso ba wanguhuku niha gulidanö, tatu omasi ita na iʼila wa yaʼita andre niha sahakhö tödö, ba ikaoni ita ba wanema ’ondröita Wamatörö Lowalangi’.—Mat. 25:​34-40. w23.07 4 ¶9-10; 6 ¶12

Iʼoʼö gamuata Yehowa Yesu si lö fatandro. Tefatenge Yesu ba gulidanö weʼamöi manuriaigö ba ”ndraono Gizaraʼeli si hulö mbiri-biri si taya”. Hizaʼi, me so samösa ndra alawe si tenga iraono Gizaraʼeli, iʼandrö khö Yesu ba wamadöhö ononia enaʼö ifofanö ”malaʼika si lö sökhi” si fatewu ba mboto nononia. Ifalua daʼö Yesu si fao faʼahakhö dödö. (Mat. 15:​21-28) Nehegö duma-duma tanö böʼö. Me ibörögö wanuriaigö Yesu imane, ”Dozi sangosilöʼögö yaʼo . . . ba uʼosilöʼögö göi ia.” (Mat. 10:33) Hizaʼi, me tölu kali iʼosilöʼögö Yesu Fetero, hadia itimbagö ia Yesu? Löʼö. Aboto ba dödö Yesu wa tola ifalalini gera-erania Fetero ba so khönia wamati. Me no aefa tesusugi Yesu, möi ia ifalukhaisi Wetero. Ba ginötö daʼö, ifaduhuʼö khönia Yesu wa no iʼefaʼö zala nifalua Wetero ba iʼomasiʼö ia. (Luk. 24:​33, 34) Lö fatandro Lowalangi Yehowa hegöi Yesu Keriso. Hewisa göi ita? Omasi Yehowa enaʼö lö fatandro ita. w23.07 21¶6-7

Hadia nifaluada ba wanolo niha böʼö enaʼö böi aombö dödöra ba mbuʼusa li Lowalangi sanandrösa ba Waradaiso? So mato hauga ngawalö zi tola tafatunö khöra. Si oföna, Yehowa samösa zangumaʼö buʼusa li daʼö. Imane ba mbuku Wamaʼeleʼö, ”Imane si dadao ba dadaoma andrö, ’Hiza! Ubohouni fefu hadia ia.’” Omasi sibai Yehowa ba wamalua buʼusa linia ba iʼokhögö waʼatua-tua hegöi faʼabölö ba wamalua daʼö. Si dua, hasambalö alua zi no ifabuʼu Yehowa irege imane, ”Atulö ba tola mufaduhusi tödö wehede andre. . . . No numalö fefu daʼö!” Si tölu, imane Yehowa, ”Alafa ndraʼo ba Omega.” (Fam. 21:6) Börö daʼö, hadia zi no ibörögö Yehowa, hasambalö wa tola iʼasiwai. Sindruhu, hasambalö ifaduhuʼö dania Yehowa wa Satana andrö si falimo, si tebai manaisi ohitö dödönia. Na lö faduhu dödö zi samösa niha, tola öbaso khönia ayati 5 ba 6, aefa daʼö haogö wanutunö. Foromaʼö hewisa wa no amaedola zi no ibeʼe tandra tangania Yehowa ba wamaduhuʼö wa hasambalö alua mbuʼusa linia.—Yes. 65:16. w23.11 7 ¶18-19

Me fawuʼu li Yehowa khö Gaberahamo, 75 fakhe ndröfi Gaberahamo ba lö na sa soʼono ia. Hadia ahori iʼila Aberahamo waʼalua nifabuʼu andrö? Löʼö. Me no aefa iʼötö Nungo Nidanö Oiferati, ibaloi mato 25 fakhe tö awena tumbu khönia Gizaʼaki, ba 60 fakhe aefa daʼö awena tumbu maʼuwunia sotöi Ezau hegöi Yakobo. (Heb. 6:15) Hizaʼi, lö fakhamö iʼila hewisa me tobali soi sebua ngaʼötönia ba laʼokhögö Danö Amabuʼula. Hewaʼae simanö, lö mamalö waʼomuso dödönia börö me iʼokhögö wahuwusa saro khö Zomböi yaʼia. (Yak. 2:23) Na tesusugi dania Gaberahamo, hawaʼomuso dödönia me iʼila wa fefu soi ba gulidanö andre latema mbua moroi ba wamati hegöi faʼebolo dödönia! (1 Mo. 22:18) Hadia wamahaʼönia khöda? Te lö taʼila fefu waʼalua nifabuʼu Yehowa. Hizaʼi, na so khöda waʼebolo dödö simane Aberahamo, faduhu dödöda wa hasambalö ifahowuʼö ita Yehowa iadaʼa hegöi ba gulidanö si bohou si no ifabuʼu ba zi so miföna.—Mrk. 10:​29, 30. w23.08 24 ¶14

So wangide-ngideʼö khö Usia me awuyu-wuyu ndröfinia. Ifahaʼö ia ”ba wangataʼufi Lowalangi sindruhu”. Auri ia sagötö zi 68 fakhe, ba arakhagö sandrohu faʼaurinia ifahowuʼö ia Yehowa. (2 Ng. 26:​1-4) Ato nudu si no ikalaisi ba iʼaroʼö mbanua Yeruzalema. (2 Ng. 26:​6-15) Sindruhu-ndruhu irasoi waʼomuso dödö Usia börö wanolo nitemania moroi khö Lowalangi. (Sango. 3:​12, 13) No toʼölö Razo Usia ba wangoni mazui ba wofaretakö niha böʼö. Tola manö daʼö mbörö wa so ba dödönia lö moguna saʼae iʼoʼö gamakhoita Lowalangi. Möi ia ba gosali Yehowa ba si fao faʼasiliyawa itunu zumange somuhua ba naha wanunu sumange. Sindruhunia lö latehegö khö razo ba wamalua daʼö. (2 Ng. 26:​16-18) Iʼanemaiʼö itegu ia Ere Sebua Asaria, hizaʼi mofönu sibai Usia. Börö me lö irorogö waʼalöfaröinia Usia, lua-luania ihuku ia Yehowa faoma bou auri. (2 Ng. 26:​19-21) Tatu lö alua khönia daʼö na lö tebulö iʼokhögö wangide-ngideʼö! w23.09 10 ¶9-10

Hewaʼae no tobali niha Keriso nibayoini Wetero, lö nasa iböhöli wamorege ba wolawa falömoʼahonoania. Me döfi 36 M, ifatenge ia Lowalangi ba wamalukhaisi Konelio si tenga niha Yahudi. Aefa daʼö, tebayoini Gonelio faoma eheha niʼamoniʼö si tobali tandra ”wa lö ifaigi mbawa niha Lowalangi”, ba fefu niha moroi ba soi böʼö tola farahu ira ba mbanua niha Keriso. (Hal. 10:​34, 44, 45) Baero daʼö, falulu manga Wetero khöra, hewaʼae lö irai ifalua daʼö ba zilalö. Hizaʼi, so nasa ösa niha Keriso Yahudi sangumaʼö wa tebai falulu manga ira khö ndra niha si tenga Yahudi. Me möi ndra niha Yahudi sangokhögö lala wangera-ngera daʼö ba Gandriokhia, lö fao Wetero wemanga khö ndra niha si tenga Yahudi. Te ataʼu ia na mofönu ndra niha Keriso Yahudi. Börö daʼö, mofönu khönia Waulo ba itegu ia föna niha sato. (Gal. 2:​13, 14) Hewaʼae no ifuli ifalua zala Fetero, hizaʼi anau gölönia. w23.09 22 ¶8

Ba ginötö öhaogö öfareso dödömö, te öʼila göi wa so zinangea öbulöʼö. Hizaʼi, böi ide-ide dödömö. No ’si sökhi tödö Zoʼaya [Yesu]’ ba omasi ia itolo ndraʼugö ba wamalua fombulöʼö. (1 Fe. 2:3) Ifaduhuʼö khöda Fetero, ’Lowalangi andrö hasambalö iʼasiwai wamahaʼö yaʼami, iʼabölöʼö.’ No irai tumbu ba dödö Wetero wa tenga sinangea so ia ba ngai Nono Lowalangi. (Luk. 5:8) Hizaʼi, börö wanolo si fao faʼomasi moroi khö Yehowa hegöi Yesu, tola tobali ia soloʼö khö Keriso si lö faröi. Buania, ’tefaʼamöi ia ba Wamatörö si lö tebulö khö Zoʼaya yaʼita Yesu Keriso ba Sangorifi yaʼita’. (2 Fe. 1:11) No howu-howu sahöli-höli dödö daʼö. Simane Fetero, na lö awuwu ndraʼugö ba ötemaʼö wamomaha moroi khö Yehowa, hasambalö ösöndra waʼauri si lö aetu. ’Famatimö andrö zangorifi yaʼugö.’—1 Fe. 1:9. w23.09 31 ¶16-17

Ba götö föna, so sambua golayama sebolo ba nose Lowalangi si no mufasui öli. Ba daʼa lafalua halöwöra ira ere. Ba golayama daʼa so naha wanunu sumange nifazökhi moroi ba tembaga, so mbaʼa nidanö nifazökhi moroi ba tembaga niʼogunaʼö ndra ere ba wanasai yaʼira fatua lö lafalua halöwö niʼamoniʼö. (2 Mo. 30:​17-20; 40:​6-8) Ba götöda iadaʼa, ira niha nibayoini lö faröi ira ba wamosumange Lowalangi ba gulidanö ba golayama tanö bakha ba gosali wamati andrö. Baʼa nidanö sebua si so ba golayama daʼö, tobali famasugi ba dödöra hegöi ira niha Keriso sato tanö böʼö enaʼö lö taʼunö ira ba gamuata hegöi ba wamati. Hewisa göi ”ngawawa sato” si lö faröi sotuhini ira niha nibayoini talifusö Keriso, hezo so lafosumange Lowalangi? Iʼila ira sinenge sotöi Yohane wa no ”mozizio ira föna dadaoma [Lowalangi] . . . lafalua halöwö niʼamoniʼö khönia bongi maʼökhö”. Lafalua daʼö ba gulidanö ba golayama tanö baero ba gosali wamati andrö. (Fam. 7:​9, 13-15) Tatu taʼandrö sibai saohagölö börö me no tebeʼe khöda ginötö ba wamalua famosumange satulö ba gosali wamati solakhömi khö Yehowa! w23.10 28 ¶15-16

Ibeʼe Yehowa waʼabölö khö ndra satua sokubaloi. (Yes. 32:​1, 2) Börö daʼö, na örasoi waʼaombö dödö, böi lawösi wanutunö daʼö khö ndra satua sokubaloi. Ba na labeʼe khöu wanolo, andrö saohagölö ba temaʼö daʼö. Iʼogunaʼö ira Yehowa ba wangabölöʼö yaʼugö. Baero daʼö, buʼusa li si so ba Zura Niʼamoniʼö yaʼia daʼö faʼauri si lö aetu ba gulidanö Faradaiso mazui ba zorugo, daʼö zameʼe khöda fanötöna ba faʼabölö ba wamosumange Yehowa. (Rom. 4:​3, 18, 19) Tötönafö andrö zameʼe khöda faʼabölö ba wanaögö famakao, ba wanuriaigö turia somuso dödö hegöi ba wamalua ngawalö halöwö ba mbanua niha Keriso. (1 Te. 1:3) Tötönafö daʼö göi zameʼe faʼabölö khö Waulo. Iwaʼö wa ’lafalala wamakao yaʼia, itaria lö iʼila hadia nifaluania, lafatörö khönia wamakao safökhö ba laböbözi ia irege tegaölö tou ba danö’. Itaria arakhagö mate ia. (2 Ko. 4:​8-10) Börö me iʼosambuaʼö dödönia Faulo ba dötönafö, andrö wa anau gölönia. (2 Ko. 4:​16-18) Iʼosambuaʼö dödönia Faulo ba zi so miföna ba dötönafö faʼauri si lö aetu ba zorugo niʼokhögönia. Börö me iʼangerönusi dötönafönia andrö, buania ’ero maʼökhö tebohouni dödö hegöi era-erania’. w23.10 15-16 ¶14-17

Ba ginötö ölau mangandrö, angeragö hadia no irugi inötö khö Yehowa ba wameʼe fanema li ba wangandröu. Te tamane tödöda wa moguna iʼanemaiʼö tatema wanema li moroi ba wangandröda. Hizaʼi, ha Yehowa zabölö mangila hawaʼara ginötö si tefaudu ba wanolo yaʼita. (Heb. 4:16) Na lö iʼanemaiʼö tatema wanema li ba wangandröda, te tawaʼö wa fanema li moroi khö Yehowa yaʼia daʼö ’Lö ubeʼe.’ Hizaʼi, fanema li sindruhunia, ’Lö nasa irugi inötönia’. Duma-dumania, fuli angeragö zalua khö dalifusöda ono matua sangandrö khö Yehowa enaʼö tefadöhö wökhönia. Na ifalua dandra sahöli-höli dödö Yehowa ba wamadöhö yaʼia, tola manö iwaʼö Satana wa lö iböhöli wamosumange Yehowa talifusöda andrö ha börö me no tefadöhö wökhönia. (Yob. 1:​9-11; 2:4) Baero daʼö, no itatugöi ginötö Yehowa, hawaʼara iheta fefu ngawalö wökhö. (Yes. 33:24; Fam. 21:​3, 4) Fatua lö alua daʼö, lö tatötöna ifalua dandra sahöli-höli dödö ba wamadöhö fökhöda. Börö daʼö, tola iʼandrö talifusöda andrö khö Yehowa enaʼö ibeʼe khönia waʼabölö hegöi faʼahono wangera-ngera irege tola itaögö wökhö salua khönia ba lö faröi ia wamosumange Lowalangi. w23.11 23 ¶13

Ifalua zala sebua Simesono, hizaʼi lö iböhöli wamosumange Yehowa. Lö tebulö iʼalui ginötö ba wamalua ohitö dödö Lowalangi ba wolawa niha Wilisiti. (Sangu. 16:​28-30) Mangandrö Zimesono, ”Tehegö khögu wanulöni niha Wilisiti andre.” Ibeʼe Lowalangi wanema li ba wangandrönia, ba sakali tö ibeʼe waʼabölö sahöli-höli dödö khö Zimesono. Buania, abölö ato nibununia sakali daʼa, moroi ba zi no ibunu ba zilalö. Hewaʼae itaögö Simesono lua-lua si lö sökhi ba gangetula si fasala nihalönia, hizaʼi lö iböhöli wamalua ohitö dödö Yehowa. Hewaʼe no irai göi tafalua zala irege göna ita degu-tegu ba taya noro dödöda ba gangowuloa, böi tabato ba wamosumange Yehowa. Datatörö tödöda wa no ihenaigö ia Yehowa ba wangefaʼö salada. (Si. 103:​8, 9) Gofu hadia zala si no irai tafalua, hasambalö ibeʼe khöda waʼabölö Yehowa ba wamalua somasi ia, simane nifaluania khö Zimesono. w23.09 6 ¶15-16

Tenga daʼö geluahania wa omuso dödö Yehowa na göna ndraʼugö fanandraigö mazui abula dödö. Hizaʼi, omuso dödönia na lö faröi ndraʼugö ba wangoromaʼö faʼanau gölö. Tatu tefarou sibai dödöda börö me taʼila wa tola taʼomusoiʼö dödö Yehowa na anau gölöda! (Si. 5:12) Törö tödöu gabula dödö salua khö Gaberahamo. Börö me anau gölönia, daʼö mbörö wa omuso sibai dödö Yehowa khönia. Tobali ia si fahuwu khö Yehowa ba tefotöi ia niha satulö. (1 Mo. 15:6; Rom. 4:​13, 22) Tola göi tatema howu-howu simane daʼö. Omuso dödö Yehowa, tenga börö me oya halöwö mazui noro dödö nitemada, hizaʼi börö me anau gölöda wanaögö famakao. Tola anau gölöda gofu hawaʼalawa ndröfida, hadia zalua ba waʼaurida mazui hawaʼabölöda. Hadia so gabula dödö nitaögömö iadaʼa ba moguna öforomaʼö waʼanau gölö? Na simanö, törö tödömö wa no öʼomusoiʼö dödö Yehowa. Na öʼangerönusi daʼö, tola itugu aro dötönafömö. w23.12 11 ¶13-14

Moguna ifahaʼö ia talifusöda ira matua enaʼö sökhi lagu wahuhuosania. Moguna göi ifondrondrongo niwaʼö niha böʼö ba iʼameʼegö tödö nirasoira. (Amd. 20:5) Tola ifalua daʼö na ifahaʼö ia ba wombaso note wehede, ngaha-ngaha mboto mazui nidanö mbawa zi samösa niha. Tebai öfalua daʼö na lö asese fariawö ndraʼugö khöra. Na asese öʼogunaʼö alat elektronik ba wahuhuosa ba niha, duma-dumania e-mail mazui SMS, tola manö abua khömö fahuhuo ba niha böʼö na falukha ami. Börö daʼö, na omasiʼö fahuhuo ba zi samösa niha, alui lala hegöi inötö enaʼö falukha ami. (2 Yo. 12) Ira talifusöda ira matua saro ba wamati, moguna laʼalui göi zoguna khöra samösa hegöi ösi nomora. (1 Ti. 5:8) Moguna sibai öfahaʼö ndraʼugö ba nekhe-nekhe danga sanolo yaʼugö ba wanöndra halöwö. (Hal. 18:​2, 3; 20:34; Ef. 4:28) Forege wohalöwö ba asiwai halöwö si no öbörögö irege öʼokhögö döi si sökhi. Na öfalua daʼö, aoha khömö ba wanöndra halöwö ba enaʼö lö ahetaʼö ba halöwömö. w23.12 27 ¶12-13

Ba Zura Niʼamoniʼö, ”ngaluo Yehowa” andrö eluahania inötö khö Yehowa ba wanguhuku udunia ba iʼefaʼö nono mbanuania. Ba götö föna, no hauga kali ifalua wanguhukunia Yehowa. (Yes. 13:​1, 6; Hez. 13:5; Zef. 1:8) Ba götöda iadaʼa, tebörögö ”ngaluo Yehowa” ba ginötö muhori Mbabilona Sebua, ba teʼasiwai ia ba wasuwöta Hamagedo. Enaʼö tola teʼorifi ita, moguna tafaʼanö ita iʼotarai iadaʼa. Ifahaʼö ita Yesu wa tenga ha asala tafaʼanö ita ba wanaögö ’famakao sabölö-bölö’, hizaʼi moguna böi tebulö tefaʼanö ita. (Mat. 24:21; Luk. 12:40) Ba zurania si oföna ba niha Desalonika, itutunö ösa Faulo gamaedola si möi fanolo ba niha Keriso enaʼö lö tebulö tefaʼanö ira ba wanaögö ngaluo wanguhuku khö Yehowa. Aboto ba dödö Waulo wa tenga ba ginötö daʼö tohare ngaluo Yehowa andrö. (2 Te. 2:​1-3) Hizaʼi, lö tebulö iʼamenesi ndra talifusönia Faulo enaʼö lafaʼanö ira, hulö na iʼanemaiʼö tohare ngaluo daʼö. Tola göi taʼoʼö mene-mene daʼö. w23.06 8 ¶1-2

Ba gangohorita ndröfi 1970-an, so sambua domosa salawa, faʼalawania 60 tingkat nifazökhi ba Tokyo, Jepang. Asese alua ndruru danö ba mbanua andrö. Hizaʼi, hana wa lö adudu domosa andrö? Börö me sökhi ba aro wamazökhi yaʼia, irege lö adudu na ilau ndruru danö. Moguna simane tomosa andrö niha Keriso. Hadia geluahania? Moguna aro ba lö fatandro niha Keriso. Aro ba lö mangiwa ita ba woloʼö oroisa Yehowa hegöi goi-goinia. Moguna göi lö tebulö moloʼö ita. Baero daʼö, na tola ”lö fatandro” ita ba ginötö moguna. (Yak. 3:17) Na taʼokhögö lala wangera-ngera si tefaudu, lö talafo fatandro ita mazui tawaʼö tola-tola manö gofu hadia ia. w23.07 14 ¶1-2

Me no satua Yesu, moguna itimbagö wanandraigö moroi khö Gafökha Satana sondrönisi tödönia ba wamalua horö hegöi ba wondröi Lowalangi. (Mat. 4:​1-11) Iforege Satana enaʼö ifalua horö Yesu irege tebai ibuʼa höli. Sagötö ifalua halöwö fanuriaigö ba gulidanö, so wanandraigö tanö böʼö nitaögö Yesu. Lafakao ia si faʼudu khönia ba latandraigö ba wamunu yaʼia. (Luk. 4:​28, 29; 13:31) Iforege göi wanaögö falömoʼahonoa ndra nifahaʼönia. (Mrk. 9:​33, 34) Me laʼetuʼö hukumania, lafakao ba laʼoʼaya ia. Aefa daʼö, labunu ia simane na labunu niha si lö sökhi ba sindruhu-ndruhu laʼalaisi ia. (Heb. 12:​1-3) Ba döla geu famakao, iforege enaʼö anau gölönia ba wanaögö faʼafökhö sabölö-bölö ba lö ilumöʼö ia Yehowa. (Mat. 27:46) Aboto ba dödöda wa sindruhu-ndruhu oya zinangea itehegö Yesu ba wameʼe höli. Ba ginötö taʼangerönusi höli nibeʼenia khöda, tatu itugu taʼomasiʼö ia. w24.01 10-11 ¶7-9

Möi fanoloda waʼebolo dödö ba wangokhögö fahuwusa si sökhi ba niha böʼö. Daʼö zanolo yaʼita enaʼö tahaogö wamondrondrongo ba ginötö fahuhuo niha böʼö. (Yak. 1:19) Faʼebolo dödö göi zanolo yaʼita ba wondrorogö faʼatulö. Daʼö zolumöʼö yaʼita enaʼö lö tafalua mazui tawaʼö wehede si lö fakhamö taʼangeragö ba ginötö fawuka wangera-ngerada. Na so khöda waʼebolo dödö, lö alio mofönu ita na so zangafökhöiʼö tödöda. Moroi na tasulöni, abölö sökhi na ’lö tebulö khöda waʼebolo dödö zamösana ba faoma taʼefaʼö zala nawöda soroi ba dödö’. (Kol. 3: 12, 13) Tola itolo ita faʼebolo dödö ba wangai angetula sabölö sökhi. Moroi na aösö-aösö ita ba wangai angetula, tahaogö woʼangeragö hadia gangetula nihalöda ba tafili hezo gangetula sabölö sökhi. Duma-dumania, na taʼalui halöwö, tola manö aoha khöda ba wanemaʼö halöwö sawena tasöndra. Hizaʼi, na so khöda wombaloi si fao faʼebolo dödö, tahaogö taʼangeragö ua sakali hawaʼaröu nahia wohalöwö andrö, hawaʼoya ginötöda ba wohalöwö, ba hadia lua-luania ba nösi nomoda hegöi ba gamakhaitada khö Yehowa. Na so khöda waʼebolo dödö, lö tahalö gangetula si lö tefaudu. w23.08 22 ¶8-9

Na örasoi waʼide-ide dödö börö me lö tebulö ölawa gisö-isö dödö si fasala, öʼangeragö mbuʼusa limö me ölulu waʼaurimö khö Yehowa, daʼö zangabölöʼö yaʼugö ba wolawa fondrönisi dödö. Hadia mbörö? Me ölulu waʼaurimö khö Yehowa, no öʼosilöʼögö ndraʼugö. Eluahania, no öfili ba wotimbagö isö-isö dödömö hegöi ohitö dödömö si lö tefaudu ba zomasi Yehowa. (Mat. 16:24) No öhalö gangetula ba wangomusoiʼö tödö Yehowa. Tobali, na alua wanandraigö, lö moguna aombö dödöu hadia zinangea öfalua börö me no öhalö gangetula fatua lö daʼö ba wondrorogö faʼalöfaröimö khö Yehowa. Tola simane Yobi ndraʼugö. Hewaʼae itaögö gabula dödö sabölö-bölö, ihalö gangetula wa ’lö iböhöli waʼalöfaröinia’.—Yob. 27:5. w24.03 9 ¶6-7

Lö tebulö fao khöda Yehowa, ”Lowalangi safönu faʼomasi”. (2 Ko. 13:11) Iʼameʼegö tödö ita ero zamösana. Faduhu dödöda wa ’ifasui ita faʼomasi si lö faröi andrö khönia’. (Si. 32:10) Na itugu taʼangerönusi waʼomasi Yehowa, itugu faduhu dödöda wa iʼameʼegö tödö ita ba itugu ahatö ita khönia. Lö si tobali taha-tahada na mangandrö ita khönia ba tafatunö wa moguna sibai khöda waʼomasinia. Tola tatutunö khönia fefu waʼaombö-aombö dödöda, börö me faduhu dödöda wa aboto ba dödönia zalua khöda ba omasi ia wanolo yaʼita. (Si. 145:19) Simane faʼaukhu na taleu ita ba zinga galitö, simane daʼö göi worasoida faʼomasi Yehowa ba ginötö alua khöda gabula dödö. Hewaʼae mofaʼabölö waʼomasi Yehowa, hizaʼi afönu faʼasökhi dödö. Börö daʼö, omusoiʼö dödöu börö me iʼomasiʼö ndraʼugö Yehowa. Yalötebulö tatemaʼö waʼomasinia andrö ba tamane, ”Uʼomasiʼö Yehowa”!—Si. 116:1. w24.01 31 ¶19-20

Tenga asala ifatunö ba niha Yesu wa töi Lowalangi andrö Yehowa. No laʼila daʼö ira niha Yahudi nifahaʼö Yesu. Hizaʼi, ihaogö wamatunö Yesu enaʼö abölö aboto ba dödö niha böʼö sanandrösa khö Namania. (Yoh. 1:​17, 18) Duma-dumania, ba Mbuku Niʼamoniʼö Heberaiʼo oroma wa Yehowa andrö sahakhö tödö ba si sökhi böwö. (2 Mo. 34:​5-7) Ifuli itandrösaigö daʼö Yesu yaʼia me itutunö gamaedola sanandrösa ba nono si taya. Me ifalalini gera-erania ono daʼö ba ifuli ia khö namania, ”iʼila ia amania moroi ba zaröu” ba ilau fagohi ba wamalukhaisi ononia andrö. Italagui ia amania ba iʼefaʼö zala nononia. Moroi ba duma-duma daʼa, tola taʼila waʼahakhö dödö hegöi faʼasökhi dödö niforomaʼö Yehowa.—Luk. 15:​11-32. w24.02 10 ¶9

Iʼokafui ba ibeʼe wondrara dödö ba niha si göna abula dödö Yehowa. Hewisa woloʼöda duma-duma waʼahakhö dödö Yehowa ba tabeʼe wondrara dödö ba niha böʼö? Sambua lala si tola tafalua yaʼia daʼö taʼokhögö gamuata si sökhi, sanolo yaʼita ba wangoromaʼö faʼahakhö dödö ba tabeʼe wondrara dödö ba niha böʼö. Hadia manö gamuata si sökhi andrö? Hadia zanolo yaʼita enaʼö lö tebulö taʼokhögö waʼomasi irege ’lö taböhöli ba wondrara tödö nawöda’ ero maʼökhö? (1 Te. 4:18) Moguna tedou ita ba wangokhögö amuata si sökhi, simane tarasoi zafökhö khö nawöda, taʼomasiʼö ndra talifusöda, ba faʼasökhi dödö. (Kol. 3:12; 1 Fe. 3:8) Na so khöda waʼahakhö dödö khö ndra talifusöda ba taʼameʼegö tödö zalua khöra, so khöda waʼaterou dödö ba wameʼe fondrara dödö ba ginötö göna ira fanandraigö. Iwaʼö Yesu, ”Hadia zi no fahöna ba dödö, daʼö zalua ba mbewe. Niha si sökhi iwaʼö zi sökhi börö me afönu ba dödönia ngawalö zi sökhi.” (Mat. 12:​34, 35) Na tabeʼe wondrara dödö khö ndra talifusöda, daʼö zangoromaʼö wa taʼomasiʼö ira. w23.11 10 ¶10-11

Moguna khöda wanolo na omasi ita taʼila wamaʼeleʼö si so ba Zura Niʼamoniʼö. Angeragö duma-duma andre. Khalaigö atö, möiʼö ba mbanua si lö irai öʼila, hizaʼi fao khöu nawöu sangila banua andrö. Aboto ba dödönia hezo nahia si so yaʼami ba hezo lala nitörömi. Tatu öʼandrö sibai saohagölö khönia börö me omasi fao ia khöu weʼamöi ba mbanua daʼö! Simanö göi Yehowa, omasi ia ba wanolo si fahuwu khönia. Sindruhu-ndruhu aboto ba dödönia hewisa waʼaurida andre ba zi so miföna. Börö daʼö, si fao fangide-ngideʼö taʼandrö wanolo moroi khö Yehowa enaʼö tola aboto ba dödöda wamaʼeleʼö si so ba Zura Niʼamoniʼö. (Dan. 2:28; 2 Fe. 1:​19, 20) Simane satua si sökhi, omasi Yehowa na taʼokhögö dötönafö si sökhi ba zi so miföna. Hizaʼi, tenga simane satua si so ba gulidanö, tola ifatunö khöda Yehowa hadia zalua ba zi so miföna, ba hasambalö itörö niwaʼönia andrö. So hadauga ndra matua nifili Yehowa ba wanura famaʼeleʼö ba Daromalinia irege tola taʼila hadia zalua sahöli-höli dödö hewaʼae lö salua ia nasa.—Yes. 46:10. w23.08 8-9 ¶3-4