Baŵa si Fitu

Fefu niwaʼö hegöi nifalua Yesu, farahu ba daʼö dandra sahöli-höli dödö nifaluania, tola tafahaʼö ita ba lala wangera-ngera hegöi nirasoi Namania. (Yoh. 14:9) Hadia wamahaʼö si tola tahalö moroi ba dandra sahöli-höli dödö nifalua Yesu si möi fangaro wamatida? Iʼomasiʼö ita Yesu hegöi Amania. Börö waʼomasi, ifalua dandra sahöli-höli dödö Yesu ba wangeheta abula dödö niha gulidanö. Samuza inötö, so darua niha sauʼa sangandrö tolo khö Yesu. (Mat. 20:​30-34) ’Ahakhö dödö’ Yesu khöra ba ifadöhö ira. So khönia waʼahakhö dödö simane daʼö börö me iʼomasiʼö ira. Daʼö göi zamarou yaʼia ba wameʼe gö niha sato hegöi ba wamadöhö niha si göna bou auri. (Mat. 15:32; Mrk. 1:41) Tola faduhu dödöda wa Yehowa andrö no Lowalangi sahakhö tödö, ba iʼomasiʼö sibai göi ita Ononia, ba tola irasoi wamakao nitaögöda. (Luk. 1:78; 1 Fe. 5:7) Tatu manö omasi ira na alio laheta fefu gabula dödö salua ba gulidanö andre! w23.04 3 ¶4-5

Ba gulidanö nifatörö Zatana andre, oya lala wangera-ngera niha si lö tefaudu ba Zura Niʼamoniʼö. Enaʼö lö tedönisi lala wangera-ngerada, böi tabaso mazui tafondro-ndrongo daʼö. Hizaʼi databaso ba tafahaʼö ita ba Zura Niʼamoniʼö enaʼö tefaudu lala wangera-ngerada ba gohitö dödö Lowalangi. Tola göi telumöʼö lala wangera-ngerada na lö taböhöli weʼamöi ba gangowuloa hegöi fanuriaigö. Na tafalua daʼö, ifabuʼu khöda Yehowa wa lö ilulu ba wanadraigö si tebai tataha. (1 Ko. 10:​12, 13) Fefu ita, böi taböhöli wangandrö khö Yehowa enaʼö anau gölöda ba ngaluo safuria sabua fanaögö. Omasi Yehowa na ’tafaehagö khönia nösi dödöda’ ba wangandrö. (Si. 62:8) Suno Yehowa, ba andrö saohagölö ba zi no ifalua. Andrö wanolo moroi khönia enaʼö tola manuriaigö ndraʼugö si fao faʼabarani. Andrö khönia wanolo enaʼö anau gölöu ba wanaögö abula dödö ba ötimbagö wondrönisi dödö. Böi tehegö gofu hadia manö zi tola manaisi yaʼugö irege lö saʼae inötöu ba wangandrö khö Yehowa. w23.05 7 ¶17-18

Hana wa taʼondrasi gangowuloa? Dane-dane siföföna yaʼia daʼö börö me omasi ita tasuno Yehowa. (Si. 26:12; 111:1) Taʼondrasi göi gangowuloa enaʼö faoma tafarou dödö nawöda ba ginötö si basaki andre. (1 Te. 5:11) Tafalua zi dombua ngawalö andrö ba ginötö tabeʼe yawa dangada ba tabeʼe mbua gera-erada. Hizaʼi, te so daha-tahada ba ginötö tabeʼe mbua gera-era. Tola manö ataʼu ita ba wamaʼema yaʼia, mazui omasi sibai ita ba wameʼe mbua gera-era, hizaʼi lö asese latuyu ita. Hadia zi möi fanoloda? Iwaʼö Faulo wa moguna taʼosambuaʼö dödöda ’ba wamarou tödö nawöda’. Moguna tatörö tödöda wa tola tefarou dödö ndra talifusöda na taforomaʼö wamatida ba mbua gera-erada, hewaʼae na no öna-öna daʼö. Na tatörö tödöda daʼö, lö talafo ataʼu ita ba wameʼe bua gera-era. Aefa daʼö, hewaʼae na lö asese latuyu ita, omuso dödöda börö me tebeʼe göi ginötö ba niha böʼö ba wamaʼema bua gera-erara.—1 Fe. 3:8. w23.04 20 ¶1-3

No ibeʼe gangombakhata razo! Niha Yahudi si no muʼoloiʼö ba Mbabilona sagötö zi 70 fakhe faʼara, tola lafuli ira ba soira, yaʼia daʼö soi Gizaraʼeli. (Esr. 1:​2-4) Ha Yehowa zi tola mamalua daʼö. Hadia mbörö? Börö me si toʼölönia, Babilona andrö lö irai iʼefaʼö niha niʼoloiʼönia. (Yes. 14:​4, 17) Hizaʼi ba ginötö daʼö, no kala Mbabilona, ba imane samatörö si bohou wa tola laröi daʼö ira niha Yahudi. Ero zamösana niha Yahudi, mendrua manö högö yomo ba nomo, moguna lahalö gangetula hadia mofanö ira moroi ba Mbabilona mazui toröi ira ba daʼö. Tenga angetula saoha daʼa. Niha Yahudi si no alawa döfi te lö sagu khöra wanörö lala saröu, ba ato ba gotaluara zi tumbu ba Mbabilona. Lö irai toröi ira ba mbanua böʼö. Daʼö mbörö wa lawaʼö tödöra wa soi Gizaraʼeli andrö ha soi ndra tuara me föna. Baero daʼö, so ösa niha Yahudi si kayo ba Mbabilona. Laʼokhögö nomo si sökhi ba mofozu lala halöwöra. Andrö wa abua khöra ba wondröi fefu daʼö ba findra ira ba soi si lö irai möi ira. w23.05 14 ¶1-2

Iʼamenesi ita Taromali Lowalangi ba wondrouʼö faʼanau gölö, faʼahakhö dödö, hegöi faʼomasi. Imane ba Luka 21:​19, ”Na anau gölömi, ba teʼorifi ami.” Ba Kolose 3:​12, ’Mifalua waʼahakhö dödö.’ Imane göi ba 1 Tesalonika 4:​9, 10, ”No ifahaʼö ami Lowalangi ba wangomasiʼö. . . . Ba maʼandrö khömi ira talifusö böi miböhöli wamalua daʼö soroi ba dödö.” Musura fefu ayati daʼa khö ndra nifahaʼö Yesu si no mangoromaʼö faʼanau gölö, faʼahakhö dödö, hegöi faʼomasi. Hewaʼae simanö, moguna ladouʼö mbua-bua daʼa. Moguna göi taʼoʼö duma-dumara andrö. Enaʼö tola öfalua daʼö, nehegö hewisa niha Keriso me abad siföföna si no mangoromaʼö bua-bua andrö. Baero daʼö, faigi hewisa woloʼömö duma-dumara enaʼö tola tefaʼanö ndraʼugö ba wanaögö famakao sabölö-bölö. Tola möi fanolou fefu daʼö na ibörögö alua wamakao sabölö-bölö. Ba ginötö daʼö, öhalö gangetula wa lö öböhöli wangoromaʼö faʼanau gölö. w23.07 3 ¶4, 8

Gofu haniha ita, he niha nibayoini mazui ”mbiri-biri tanö böʼö”, moguna böi taböhöli wanörö ”Lala Niʼamoniʼö”. Na tafalua daʼö, tola tarasoi waradaiso ba wamati iadaʼa hegöi howu-howu Wamatörö Lowalangi ba zi so miföna. (Yoh. 10:16) Iʼotarai me döfi 1919, zuta ndra matua, ira alawe, hegöi iraono, si no aheta ba Mbabilona Sebua yaʼia daʼö agama sofaya ba gulidanö andre, ba ibörögö latörö ”Lala Niʼamoniʼö”. Me föna, iheta fefu Yehowa zi tobali daha-taha ba niha Yahudi me laröi ba Mbabilona. (Yes. 57:14) Hewisa ”Lala Niʼamoniʼö” ba götöda iadaʼa? Sagötö ngaotu fakhe fatua lö döfi 1919, iʼogunaʼö niha samosumange yaʼia Yehowa ba wefao wangehenaigö lala ba niha sangawuli moroi ba Mbabilona Sebua. (Fareso göi Yesaya 40:3.) Lafaʼanö lala andrö enaʼö niha satulö tödö tola laröi Mbabilona Sebua ba möi ira ba waradaiso ba wamati. Ba daʼö, niha satulö tödö tola fao ira ba wamalua famosumange satulö si no mubohouni. w23.05 16 ¶8-9

Omasi Yehowa na tafosumange ia soroi ba dödö ba si fao faʼomuso dödö. (2 Ko. 9:7) Börö daʼö, na lö hadöi khöda faʼaterou dödö ba wogamö ohitö dödöda, hadia moguna taforege ba wogamö yaʼia? Moguna. Nehegö duma-duma zinenge sotöi Faulo. Imane, ”Uhuku mbotogu ba uʼosawuyu.” (1 Ko. 9:​25-27, nis.) Iforege Faulo ba wamalua somasi Yehowa, hewaʼae na lö khönia faʼaterou dödö wamalua daʼö. Hadia omuso dödö Yehowa ba wamorege nifalua Waulo? Tatu manö. Ba ifahowuʼö ia Yehowa. (2 Ti. 4:​7, 8) Omuso dödö Yehowa na taforege ba wogamö ohitö dödöda, hewaʼae na ambö terou dödöda wamalua yaʼia. Hadia mbörö? Börö me aboto ba dödönia hewaʼae na ambö omasi ita wamalua daʼö, hizaʼi lö tebulö tafalua daʼö börö me taʼomasiʼö ia. Hulö simane famahowuʼö Yehowa Waulo, simane daʼö göi wamahowuʼönia yaʼita. (Si. 126:5) Na tarasoi howu-howu Yehowa, itugu so khöda waʼaterou dödö wamalua ohitö dödöda. w23.05 29 ¶9-10

Ifagölösi Faulo niha si lö teʼorifi ba ngaluo Yehowa andrö simane niha si mörö. Hewaʼae oya zalua ba zi fasuira ba numalö manö ginötö, hizaʼi lö aboto ba dödöra daʼö. Lö laʼila na so zi tohude salua, ba no lalau manö zahono. Ato niha iadaʼa zi mörö ba wamati. (Rom. 11:8) Lö laʼameʼegö tödö hewaʼae so dandra-tandra sangoromaʼö wa no so ita ba ”ngaluo safuria” ba lö ara tö alua wamakao sabölö-bölö. (2 Fe. 3:​3, 4) Hewaʼae simanö, aboto ba dödöda wa moguna sibai maoso ita ba wamati börö me taʼila wa no itugu ahatö ngaluo Yehowa. (1 Te. 5:6) Börö daʼö moguna taʼokhögö lala wangera-ngera si sökhi. Hadia mbörö? Na taʼokhögö wangera-ngera si sökhi, lö farahu ita ba gabula dödö soʼamakhaita ba politik hegöi sosial si so iadaʼa. Börö me no ahatö ngaluo Yehowa, itugu abölö wondrönisi dödö enaʼö farahu ita ba gabula dödö simane daʼö. Hizaʼi, lö moguna aombö dödöda. Itolo ita eheha niʼamoniʼö moroi khö Lowalangi enaʼö lö tebulö taʼokhögö waʼahono dödö ba fangera-ngera si sökhi irege tola tahalö gangetula si fao faʼatua-tua.—Luk. 12:​11, 12. w23.06 10 ¶6-7

Hadia zi so ba wangera-ngeramö na örongo döi Zimesono? Te ökhalaigö samösa ndra matua sabölö sibai. Atulö daʼö. Hizaʼi, so gangetula si fasala nihalö Zimesono irege alua khönia gabula dödö. Hewaʼae simanö, iʼosambuaʼö dödönia Yehowa ba waʼalöfaröi Zimesono ba wamosumange yaʼia. Isura göi ba Zura Niʼamoniʼö duma-duma Zimesono soguna khöda irugi iadaʼa. Iʼogunaʼö Zimesono andre Yehowa ba wanolo ono mbanuania Izaraʼeli. Ngaotu fakhe me no aefa mate Zimesono, ibeʼe gehehania Yehowa khö zinenge sotöi Faulo ba wanura töi Zimesono ba gotalua döi ndra matua samati tanö böʼö. (Heb. 11:​32-34) Möi famarou dödöda duma-duma Zimesono. Iʼodaligö Yehowa hewaʼae so gabula dödö salua. Tola tafahaʼö ita moroi ba duma-dumania tanö böʼö si möi famarou dödöda. w23.09 2 ¶1-2

Hadia zanolo yaʼita enaʼö lö tebulö anau gölöda? Moguna asese mangandrö ita khö Yehowa ba tatutunö fefu waʼaombö dödö nirasoida. (1 Te. 5:17) Te lö hadöi abula dödömö sebua ba ginötö daʼa. Hizaʼi, ba ginötö örasoi waʼabu dödö mazui lö öʼila hadia zinangea öfalua, hadia ölau mangandrö ba wangalui fanuturu lala moroi khö Yehowa? Na iʼotarai iadaʼa no toʼölö ndraʼugö wangandrö khö Yehowa ba wanaögö abula dödö sero maʼökhö, lö saʼae aombö dödöu ba wangandrö khönia na so gabula dödö sebua ba zi so miföna. Ba ginötö daʼö, faduhu dödömö wa iʼila Yehowa hawaʼara ba hewisa wanolonia yaʼugö. (Si. 27:​1, 3) Tola anau gölöda ba wanaögö famakao sabölö-bölö ba zi so miföna na anau gölöda ba wanaögö famakao iadaʼa. (Rom. 5:3) Hana wa tola tawaʼö zimanö? Ato ndra talifusöda si no morasoi wa ero mofozu ira ba wangoromaʼö faʼanau gölö ba wanaögö fanandraigö wamati, itugu aoha khöra ba wangoromaʼö faʼanau gölö na so wanandraigö tanö böʼö. Hadia mbörö? Ero na mofozu ira wangoromaʼö faʼanau gölö, itugu mamati ira wa hasambalö itolo ira Yehowa.—Yak. 1:​2-4. w23.07 3 ¶7-8

Lö fatandro Yehowa börö me so khönia wangide-ngideʼö ba faʼahakhö dödö. Duma-dumania, oroma wangide-ngideʼö Yehowa me arakhagö ihori niha si lö sökhi ba Zodoma. Iʼogunaʼö malaʼikania Yehowa ba wamarou Loti weʼamöi ba hili, hizaʼi ataʼu ia weʼamöi ba daʼö. Börö daʼö, iʼandrö enaʼö latehegö khönia hegöi ösi nomonia weʼamöi ba Zoara, banua side-ide. Sindruhunia, no mutatugöi wa muhori mbanua andrö. Tola manö ifaso Loti Yehowa ba wamalua si no iwaʼö, hizaʼi ifondrondrongo niwaʼö Loti irege lö aʼozu ihori mbanua daʼö. (1 Mo. 19:​18-22) Ba zi hauga abad aefa daʼö, ifatenge Yona Yehowa weʼamöi ba Niniwe ba wangombakha ba niha si lö sökhi wa tehori ira awö mbanuara. Ahakhö dödö Yehowa khöra ba lö aʼozu ihori mbanua andrö.—Yon. 3:​1, 10; 4:​10, 11. w23.07 21 ¶5

Hadia wamahaʼö nihalöda ba zalua khö Yehoasi? Yehoasi andrö amaedola geu si lö aro waʼa. Tola mosindro geu daʼö börö me ituwuni ia eu tanö böʼö. Me no aefa mate Yehoyada, lö hadöi saʼae sotuwuni Yehoasi. Börö daʼö, me so wondrönisi dödö ba niha si no mondröi sindruhu si no amaedola nangi sabölö-bölö, aekhu göi tou Yehoasi. Moroi ba daʼa tafahaʼö ita wa fangataʼufida Lowalangi tebai teʼodaligö khö ndra talifusöda ba wamati tefarahu ba daʼö nösi nomoda. Enaʼö lö tebulö aro ita ba wamati, moguna taforege ba wangomasiʼö hegöi ba wamosumange Yehowa. Andrö, moguna asese tafahaʼö ita ba Zura Niʼamoniʼö, taʼangerönusi, ba talau mangandrö. (Yer. 17:​7, 8; Kol. 2:​6, 7) Sindruhunia, lö oya niʼandrö Yehowa khöda. Tola taʼila niʼandrönia andrö ba Zangombakha 12:13: ”Ataʼufi Lowalangi sindruhu ba falua goroisania, börö me daʼa zinangea lafalua niha fefu.” Na taʼataʼufi Lowalangi, tola tataögö wanandraigö ba zi so miföna, ba lö faröi ita khönia. Lö hadöi si tola mamakiko fahuwusada khö Yehowa. w23.06 18-19 ¶17-19

Tohude sibai wamaduhuʼö si so ba ayati 5, börö me ba mbuku Wamaʼeleʼö ha 3 kali fahuhuo Yehowa, ba sambua daʼa ba gotaluania. Nehegö ngawua wehede ba wamobörö ayati daʼö, ”Imane si dadao ba dadaoma andrö.” (Fam. 21:5a) Tobali, famaduhuʼö daʼö tenga moroi khö zi samösa malaʼika sabölö, tenga göi moroi khö Yesu si no mususugi. Hizaʼi, fehede Yehowa samösa. Ba böi olifu ita wa Yehowa andrö ”tebai falimo”. (Tit. 1:2) Börö daʼö, tohu-tohu wehedenia ba Wamaʼeleʼö 21:​5, 6 hasambalö tola mufaduhusi tödö. Nehegö me imane Yehowa ”Hiza!” Ba li Yunani, ngawua wehede ”Hiza!”, asese mutötöi ia ba mbuku Wamaʼeleʼö. Na simanö, hadia niwaʼö Lowalangi aefa daʼö? Imane, ”Ubohouni fefu hadia ia.” Sindruhu sa, famohouni nifabuʼu Yehowa andrö alua ia dania ba zi so miföna. Hizaʼi, börö me hasambalö alua mbuʼusa linia, andrö wa hulö zi no alua mbuʼusa li daʼö me fahuhuo ia.—Yes. 46:10. w23.11 3-4 ¶7-8

Lö iböhöli nasa ba wolawa falömoʼahonoania sinenge sotöi Fetero. Duma-dumania, me itutunö Yesu hewisa dania na tefakao ia ba mate simane si no tefaʼeleʼö ba Zura Niʼamoniʼö, iwaʼö Fetero wa lö alua daʼö khö Yesu. (Mrk. 8:​31-33) Asese sibai fabuʼa-buʼa Wetero hegöi ira nifahaʼö tanö böʼö ba wamadöni haniha zabölö ebua ba gotaluara. (Mrk. 9:​33, 34) Ba mbongi fatua lö mate Yesu, itaba dalinga zi samösa niha. (Yoh. 18:10) Ba mbongi daʼö göi ataʼu Wetero irege tölu kali iʼosilöʼögö Yesu. (Mrk. 14:​66-72) Daʼö mbörö wa iduhugö wege-ege. Lö faröi Yesu khö zinengenia safatö tödö andre. Me no aefa tesusugi ia, ibeʼe ginötö khö Wetero ba wangoromaʼö faʼomasinia. Iʼandrö khö Wetero ba wokubaloi biri-birinia si fao fangide-ngideʼö. (Yoh. 21:​15-17) Itemaʼö halöwö daʼö Fetero. Me so Wetero ba Yeruzalema me ngaluo Wendrakose, farahu ia ba gotalua niha siföföna nibayoini eheha niʼamoniʼö. w23.09 22 ¶6-7

Ibeʼe mene-mene Fetero khö ndra awönia satua sokubaloi, ”Mikubaloi mbiri-biri Lowalangi.” (1 Fe. 5:​1-4) Na satua sokubaloi ndraʼugö, tatu öʼomasiʼö sibai ndra talifusö si sara lala wamati ba omasiʼö ökubaloi ira. Hizaʼi, itaria örasoi wa talafo oya halöwömö mazui marase sibai ndraʼugö irege tebai öfalua halöwö andrö. Hadia zanolo yaʼugö? Tutunö nirasoimö khö Yehowa. Imane Fetero, ”Na mitolo niha böʼö, miʼodaligö waʼabölö Lowalangi.” (1 Fe. 4:11) Te so ösa gabula dödö nitaögö ndra talifusömö si sara lala wamati si tebai muʼasiwai fatua lö tohare gulidanö si bohou. Börö daʼö, te ömane tödöu wa lö oya zi tola öfalua ba wanolo yaʼira. Hizaʼi, törö tödöu wa ”kubalo sebua” yaʼia daʼö Yesu Keriso, tola itolo ira iadaʼa hegöi ba gulidanö si bohou dania. Niʼandrö Yehowa khömi yaʼami ira satua sokubaloi yaʼia daʼö enaʼö miʼomasiʼö ira, mikubaloi ba tobali ami duma-duma khöra. w23.09 29-30 ¶13-14

Moguna tatimbagö lala wangera-ngera niha gulidanö. Na taʼogunaʼö lala wangera-ngera niha, tola taʼosiwawöi Yehowa hegöi goi-goinia. (1 Ko. 3:19) ”Faʼatua-tua niha gulidanö andre” asese idönisi ita ba wamalua sala. Me föna, so ösa niha ba mbanua niha Keriso Feregamo hegöi Tiatira, tedönisi dödöra ba niha si so ba zi fasuira samalua amuata wohorö hegöi fanömba adu. Ibeʼe mene-mene sabeʼe Yesu ba zi dombua banua Niha Keriso andrö börö me fatema ba dödöra wamalua amuata wohorö. (Fam. 2:​14, 20) Iadaʼa göi, ladönisi dödöda ba woloʼö lala wangera-ngera si fasala. Tola manö lawaʼö khöda ösi nomoda hegöi si fahuwu khöda wa talafo abeʼe goroisa Yehowa ba lö moguna muʼoʼö daʼö. Duma-dumania, te lamane wangumaʼö, ’Na daʼö zomasiʼö, falua manö’, mazui lawaʼö ’Lö moguna taʼoʼö goi-goi Zura Niʼamoniʼö si no atua andrö’. Te itaria so ba wangera-ngerada wa ambö aboto ba dödöda wanuturu lala nibeʼe Yehowa. Te aolo dödöda ba ’wosawö si no tesura’.—1 Ko. 4:6. w23.07 16 ¶10-11

Moguna wamarou dödö khö Maria ina Yesu. Lö sangowalu ia, hizaʼi iwaʼö khönia malaʼika Gaberieli wa manabina ia. Lö irai irorogö nono sawuyu ba zilalö, hizaʼi iadaʼa moguna irorogö nono matua si tobali Mesia dania. Börö me lö irai orudu ia ba ndra matua, hewisa wanutunönia daʼa fefu khö matuania sotöi Yosefo? (Luk. 1:​26-33) Hezo moroi waʼabölö nitema Maria? Iʼandrö wanolo moroi ba niha böʼö. Duma-dumania, iʼandrö khö malaʼika Gaberieli ba wamatunö khönia hewisa wamaluania halöwö andrö. (Luk. 1:34) Lö ara aefa daʼö, möi ia ba ”mbanua si no ifasui hili” ba Yehuda ba wamalukhaisi si fahatö khönia sotöi Elizabe. Hadia mbua nitemania weʼamöi ba daʼö? Isuno ia Elizabe, ba börö wanolo moroi ba geheha Yehowa tola ifaʼema Elizabe wamaʼeleʼö si möi famarou dödö sanandrösa khö nono si so ba dalu Maria. (Luk. 1:​39-45) Iwaʼö Maria wa no ”iforomaʼö [Yehowa] waʼabölö faoma taʼionia”. (Luk. 1:​46-51) Iʼodela Gaberieli hegöi Elizabe Yehowa ba wameʼe famarou dödö khö Maria. w23.10 14-15 ¶10-12

Ba gotalua nifahaʼö Keriso, so 144.000 niha nibayoini faoma eheha ba laʼokhögö gamakhaita si tohude khö Yehowa. Mangai halöwö dania ira tobali ere fao khö Yesu ba zorugo. (Fam. 14:1) Naha Niʼamoniʼö eluahania faʼauri ndra niha Keriso nibayoini si no ifili Lowalangi tobali ononia sagötö feʼasora ba gulidanö. (Rom. 8:​15-17) Nahia Wondrege Niʼamoniʼö eluahania sorugo, nahia si toröi Yehowa. ”Nukha baʼa-baʼa” si tobali oto-oto Naha Niʼamoniʼö faoma Nahia Wondrege Niʼamoniʼö, eluahania boto Yesu ba waʼaniha. Sagötö feʼaso Yesu ba mboto waʼaniha, tebai möi ia ba zorugo ba mangai halöwö ia tobali Ere Sebua solakhömi ba gosali wamati. Hizaʼi, me no itehegö mbotonia tobali höli ba niha sato, daʼö zamokai lala ba niha Keriso nibayoini enaʼö tola lasöndra waʼauri ba zorugo. Lö tola löʼö laröi göi mbotora ba waʼaniha enaʼö tola latema luora ba zorugo.—Heb. 10:​19, 20; 1 Ko. 15:50. w23.10 28 ¶13

Lö ilau mofönu Gideono me laʼamenesi ia niha Geferai. (Sangu. 8:​1-3) Lö mofönu ia wanema lira. Iforomaʼö wangide-ngideʼö me ihaogö ifondrondrongo niwaʼöra ba ihaogö wahuhuosa khöra. Buania, lö mofönu niha Geferai andrö. Simane Gideono, ira satua sokubaloi satua-tua moguna lahaogö lafondrondrongo ba ginötö laʼamenesi ira ba labeʼe wanema li si fao faʼasökhi. (Yak. 3:13) Na lafalua daʼö, no larorogö waʼatulö ba mbanua niha Keriso. Me lasuno Gideono börö me no mofozu ia ba wokalaisi niha Midiano, ibeʼe wanuno andrö khö Yehowa. (Sangu. 8:​22, 23) Hewisa ndra satua sokubaloi ba woloʼö duma-duma Gideono? Tola laforomaʼö wa börö Yehowa wa tola mofozu ira. (1 Ko. 4:​6, 7) Duma-dumania, na so ndra talifusöda zanuno zi samösa satua sokubaloi börö me onekhe ia wamahaʼö, tola imane wangumaʼö wa börö wamomaha moroi ba organisasi Yehowa wa tola ifalua daʼö. Mazui, tola itolo niha böʼö ba wangosambuaʼö dödöra ba dane-dane wamahaʼö nifaʼemania yaʼia daʼö Taromali Lowalangi. Moguna laʼangeragö ira satua sokubaloi, hadia lalara ba wamahaʼö andrö tedönisi wangera-ngera niha ba khöra samösa mazui löʼö. w23.06 4 ¶7-8

Na lö nitemada fanema li ba wangandröda, datasofu khöda wanofu andre, ’Hadia no tefaudu wangandrögu?’ Sasesenia tawaʼö tödöda wa taʼila hadia zabölö sökhi ba waʼaurida. Hizaʼi, tola manö tenga daʼö zabölö sökhi khöda ba zi so miföna. Na so gabula dödö salua khöda, te tatutunö hadia lala somasi ita ifalua Yehowa. Hizaʼi, tola manö so lala sabölö sökhi moroi ba niʼandröda. Ba tola manö so ösa niʼandröda si lö tefaudu ba gohitö dödö Yehowa. (1 Yo. 5:14) Duma-dumania, nehegö zatua sangandrö khö Yehowa enaʼö irorogö ndraonora ba lö tebulö ira ba zindruhu. Lö fasala wangandrö simane daʼö. Hizaʼi, lö ifaso niha Yehowa ba wamosumange yaʼia. Omasi ia na fefu ita, simanö göi ndraonoda lafili samösa ba wamosumange yaʼia. (5 Mo. 10:​12, 13; 30:​19, 20) Börö daʼö, satua si so iraono moguna laʼandrö khö Yehowa ba wanolo yaʼira enaʼö tola latanögö zindruhu andrö ba dödö ndraonora irege tefarou dödöra ba wangomasiʼö Yehowa ba tobali ira si fahuwu khönia.—Amd. 22:6; Ef. 6:4. w23.11 21 ¶5; 23 ¶12

Hana wa lafotöi faʼomasi na tabeʼe wondrara dödö ba niha böʼö? Moloʼö sambua karya referensi Zura Niʼamoniʼö, ngawua wehede ”wondrara tödö” eluahania ”mozizio ita ba zinga zi samösa niha ba wangabölöʼö yaʼia na göna ia fanandraigö sabua”. Na tabeʼe wondrara dödö, no tatolo ndra talifusöda si sara lala wamati sanaögö abula dödö enaʼö ifuli abölö ira ba anau gölöra ba wogamö faʼauri. Ero na tabeʼe wondrara dödö khö ndra talifusöda, no taforomaʼö wa taʼomasiʼö ira. (2 Ko. 7:​6, 7, 13) So gamakhaitania waʼahakhö dödö faoma mameʼe fondrara dödö. Hana wa tawaʼö zimanö? Na ahakhö dödö zi samösa niha ba niha si göna fanandraigö ba omasi ia wameʼe fondrara dödö, so zinangea ifalua ba wanolo niha daʼö. Na so khöda waʼahakhö dödö ba niha, daʼö zamarou yaʼita ba wameʼe fondrara dödö khöra. Nehegö hewisa Waulo wangoromaʼönia hadia gamakhaita waʼahakhö dödö Yehowa faoma fondrara dödö nibeʼenia ba niha. Iwaʼö Faulo wa Yehowa andrö ”Ama safönu faʼahakhö dödö ba Lowalangi wondrara dödö”.—2 Ko. 1:3. w23.11 9-10 ¶8-10

Fefu nifahaʼö Keriso hasambalö lataögö wamakao. Duma-dumania, imane Faulo ba niha Desalonika, ”Sagötö wefaoma khömi, asese maʼombakhaʼö wa hasambalö tatörö wamakao ba miʼila samösa wa daʼö zalua.” (1 Te. 3:4) Imane göi khö ndra niha Gorindro, ”Yaʼami ira talifusö, omasiga enaʼö miʼila wamakao nitöröma . . . irege mawaʼö tödöma wa si mate saʼae ndraʼaga.” (2 Ko. 1:8; 11:​23-27) Oya gabula dödö salua khö ndra niha Keriso ba ginötö andre. (2 Ti. 3:12) Börö me mamatiʼö khö Yesu mazui me no tobali ndraʼugö soloʼö khönia, tola manö lafalua khömö zi lö sökhi ira si fahuwu khömö mazui ösi nomomö. Hadia göna ndraʼugö abula dödö ba nahamö wohalöwö börö me ötörö zindruhu ba ngawalö hadia ia? (Heb. 13:18) Hadia göna ndraʼugö folohi moroi khö ndra samatörö börö halöwö fanuriaigö? Gofu hadia gabula dödö salua khöda, iwaʼö Faulo wa hasambalö taʼokhögö waʼomuso dödö. w23.12 10-11 ¶9-10

Alua gabula dödö soya khö Yakobo. Darua nono Yakobo sotöi Simeoni ba Lewi, lafalua horö sebua irege teʼobousi döi nösi nomora hegöi töi Yehowa. Baero daʼö, mate woʼomonia niʼomasiʼönia sotöi Rakhela me moʼono ia numero dua. Ba göna ira lofo sabölö-bölö irege möi Yakobo ba danö Miserai hewaʼae no atua ia. (1 Mo. 35:​16-19; 37:28; 45:​9-11, 28) Hewaʼae na alua gabula dödö khö Yakobo, lö tebulö mamati ia khö Yehowa hegöi ba mbuʼusa linia. Ba iforomaʼö göi Yehowa wa iʼomasiʼö Yakobo. Duma-dumania, lö tebulö ifahowuʼö gokhöta Yakobo Yehowa. Ba khalaigö hadia nirasoi Yakobo me ifuli falukha ia khö Yosefo si no mate ba wamaiginia! Tatu iʼandrö sibai saohagölö Yakobo khö Yehowa. Tola anau gölö Yakobo ba wanaögö abula dödö salua khönia börö me fahuwu ia khö Yehowa. (1 Mo. 30:43; 32:​9, 10; 46:​28-30) Na fahuwu göi ita khö Yehowa, tola anau gölöda ba wanaögö abula dödö salua si lö mudöna-döna. w23.04 15 ¶6-7

Dawido zanura Sinunö 23 andre. Ba zinunö andrö, itutunö waʼafaduhu dödönia wa iʼomasiʼö ba lö tebulö irorogö ia Yehowa. Itutunö göi hewisa waʼaro gamakhaitania khö Gubalonia yaʼia daʼö Yehowa. Sindruhu-ndruhu iʼodaligö Yehowa soroi ba dödö. Aboto ba dödönia wa iʼohe ia Yehowa ba nahia si lö ametaʼuö. Iʼila wa lö tebulö waʼomasi Yehowa khönia sandrohu faʼaurinia. Hadia mbörö wa faduhu sibai dödönia? Irasoi Dawido wa irorogö ia Yehowa börö me teʼasogö fefu zoguna khönia. Iʼokhögö göi wahuwusa saro khö Yehowa ba iʼila wa iʼomasiʼö ia Yehowa. Daʼö mbörö wa faduhu sibai dödönia wa hasambalö ibönökhi zoguna khönia Yehowa gofu hadia zalua. Faʼafaduhu dödönia andrö mbörö wa lö khönia faʼaombö dödö, ahono dödönia, ba irasoi waʼomuso dödö.—Si. 16:11. w24.01 29 ¶12-13

Iʼotarai Wasuwöta Gulidanö II, lö taha-taha nono mbanua Yehowa weʼamöi manuriaigö ba soi böʼö misa, ba sökhi sibai mbua nitemara. Iadaʼa, ira Boto Solohe lö tebulö laʼalui wanuturu lala moroi khö Keriso. Omasi ira enaʼö fanuturu lala nibeʼera tefaudu daʼö ba lala wangera-ngera Lowalangi hegöi Keriso. Ira satua sokubaloi si no tebayoini hegöi si löʼö, so ira ba ’gambölö’ Keriso. (Fam. 2:1) Tatu manö lö moʼahonoa ndra satua sokubaloi andre ba itaria lafalua zala, hulö simane Moze, Yosua, hegöi ira sinenge ba götö föna. (4 Mo. 20:12; Yos. 9:​14, 15; Rom. 3:23) Hizaʼi, taʼila wa sindruhu-ndruhu Keriso zameʼe fanuturu lala khö ndra sawuyu si lö faröi hegöi ira satua sokubaloi si no mufataro, ba lö tebulö ifalua daʼö ”irugi gamozua götö daʼa”. Börö daʼö, aro waʼafaduhu dödöda ba wanuturu lala nibeʼe Keriso ba niha nifataronia tobali sondröniaʼö. w24.02 23-24 ¶13-14

Sambua lala si tola tafalua ba wangomusoiʼö tödö Yehowa yaʼia daʼö na tafadunö-dunö sanandrösa khönia. Moroi ba wehededa oroma wa taʼomasiʼö ba taʼandrö saohagölö khönia. Ba wanuriaigö, moguna tatörö tödöda wa ohitö dödöda siföföna yaʼia daʼö tatolo niha böʼö enaʼö ahatö ira khö Namada safönu faʼomasi ba laʼokhögö waʼaboto ba dödö simane yaʼita. (Yak. 4:8) Omasi ita taforomaʼö khöra hadia niwaʼö Zura Niʼamoniʼö sanandrösa khö Yehowa hegöi bua-buania si sökhi. Duma-dumania, yaʼia andrö Lowalangi safönu faʼomasi, faʼatulö, faʼatua-tua ba safönu faʼabölö. Tola göi tafosumange Yehowa ba taʼomusoiʼö dödönia na taforege woloʼö nifaluania. Daʼö gamaehutada ba gulidanö si lö sökhi andre. Tola manö lanehe-nehegö ita ba omasi ira laʼila hadia mbörö wa faehu ita. (Mat. 5:​14-16) Ba ginötö fahuhuo ita, tola tatutunö khöra wanema linia. Buania, tola adöni dödö niha satulö tödö ba wangokhögö faʼaboto ba dödö sanandrösa khö Lowalangida. Tobali, na tasuno Yehowa ba lala daʼa, no taʼomusoiʼö dödönia.—1 Ti. 2:​3, 4. w24.02 10 ¶7

Enaʼö tobali ndraʼugö niha Keriso saro ba wamati, moguna öfahaʼö ndraʼugö ba waʼonekhe si tola öʼogunaʼö ero maʼökhö. Daʼa zanolo yaʼugö ba wamalua noro dödö ba mbanua niha Keriso, ba wanöndra halöwö si tola mangaʼasogö soguna khöu hegöi ösi nomomö, mazui enaʼö tola öʼokhögö wahuwusa si sökhi ba niha böʼö. Duma-dumania, fahaʼö ndraʼugö enaʼö itugu onekhe ba wombaso hegöi ba wanura. Itutunö Sura Niʼamoniʼö wa niha somuso tödö hegöi sofozu ba waʼauri yaʼia daʼö niha sangogunaʼö inötönia ba wombaso hegöi ba woʼangerönusi Taromali Lowalangi ero maʼökhö. (Si. 1:​1-3) Na ibaso Zura Niʼamoniʼö ero maʼökhö, itugu aboto ba dödö zi samösa niha lala wangera-ngera Yehowa, sanolo yaʼia ba wangokhögö faʼaboto ba dödö hegöi fangera-ngera si sökhi. (Amd. 1:​3, 4) Ira talifusöda ba gangowuloa, moguna khöra wanolo moroi khö dalifusöda ira matua si tola mamahaʼö ba sameʼe khöra mene-mene moroi ba Zura Niʼamoniʼö. Na onekhe ndraʼugö wombaso hegöi manura, daʼö zanolo yaʼugö ba wamaʼanö huhuo hegöi bua gera-era si tola mangaʼaroʼö famati niha böʼö. Daʼö göi zanolo yaʼugö ba wanura hadia zadöni dödömö ba wangaʼaroʼö famatimö hegöi ba wamarou tödö niha böʼö. w23.12 26-27 ¶9-11

Ba ginötö örasoi waʼataʼu, angerönusi hadia dania nifalua Yehowa ba zi so miföna na no muhori Zatana. So sambua wamadumaisi ba gangowuloa sebua ba zi sambua regional me 2014, sangoromaʼö so samösa nama sanutunö ba nösi nomonia hewisa na ngawua wehede nisura ba 2 Timoteo 3:​1-5, sangoromaʼö hewisa waʼauri ba gulidanö Faradaiso. Imane, ”So dania mbaŵa si sökhi ba gulidanö si bohou. Amuata niha ba daʼö tenga ha tana khöra laʼalui, laʼomasiʼö zindruhu, lö lasuno ira samösa, lö mangosebua, sanuno Lowalangi, samondrondrongo li zatua, sangila mangandrö saohagölö, si lö faröi, sangomasiʼö awöra, sondrorogö fahasara dödö, lö laböbögö khö nawöra zi lö duhu, so wanaha tödö, si sökhi amuata, sangomasiʼö si sökhi, tola mufaduhusi tödö, moloʼö-loʼö, lö fayawa, sangomasiʼö Lowalangi moroi ba gisö-isö dödöra, soloʼö khö Lowalangi soroi ba dödö. Hatöʼögö ba niha simane daʼö.” Hadia mifadunö-dunö ba nösi nomomi mazui khö ndra talifusö ba wamati hewisa dania waʼauri nitötönami ba gulidanö si bohou? w24.01 6 ¶13-14

Tatu omuso sibai dödöda börö me imane Sura Niʼamoniʼö, ”Omuso dödö Yehowa ba nono mbanuania.” (Si. 149:4) Hizaʼi, itaria so ösa zaombö tödö ba lamane, ’Hadia omuso dödö Yehowa khögu?’ Ato ndra samosumange Yehowa si lö faröi ba götö Zura Niʼamoniʼö si no irai morasoi faʼaombö dödö simane daʼö. (1 Sa. 1:​6-10; Yob. 29:​2, 4; Si. 51:11) Itutunö khöda Sura Niʼamoniʼö wa niha si lö moʼahonoa tola laʼomusoiʼö dödö Yehowa. Hewisa lalania? Moguna taforomaʼö wa mamati ita khö Yesu Keriso ba tebayagö idanö. (Yoh. 3:16) Daʼö zangoromaʼö föna niha sato wa no tafalalini gera-erada moroi ba horö si no tafalua ba tafabuʼu ba wamalua somasi Lowalangi. (Hal. 2:38; 3:19) Omuso dödö Yehowa na tafalua daʼö ba wangoromaʼö wa omasi ita tobali si fahuwu khönia. Na tafalua wondrege zi sökhi ba wondrorogö buʼusa lida ba wamosumange yaʼia, no taʼomusoiʼö dödö Yehowa ba omasi ia tobali si fahuwu khöda.—Si. 25:14. w24.03 26 ¶1-2

Tola taʼoʼö duma-duma ndra nifahaʼö me abad siföföna enaʼö lö aetu tafalua halöwö fanuriaigö hewaʼae lasaisi ita. Tola faduhu dödöda wa hasambalö itolo ita Yehowa enaʼö lö taböhöli wanuriaigö. Börö daʼö, moguna taʼandrö waʼabarani hegöi faʼatua-tua khö Yehowa enaʼö itolo ita ba wanaögö abula dödö. Ato ba gotaluada zamorege ba wanaögö ngawalö gabula dödö, simane fökhö, faʼalio mofönu, mate niha niʼomasiʼöda, abula dödö yomo ba nomo, folohi, hegöi tanö böʼönia. Baero daʼö, itugu abua gabula dödö andrö börö pandemi hegöi fasuwöta. Hadia zi tola öfalua? Faehagö nösi dödömö khö Yehowa. Tutunö khönia zalua khömö andrö simane na fahuhuoʼö khö zi fahuwu khöu. Ba yafaduhu dödömö wa Yehowa ”zamaigi lala khöu”. (Si. 37:​3, 5) Tola ’anau gölöda ba wanaögö famakao’ na lö taböhöli wangandrö. (Rom. 12:12) Iʼila Yehowa hadia zalua khö genoninia, ba ”ifondrondrongo na muʼao ira wangandrö fanolo”.—Si. 145:​18, 19. w23.05 5-6 ¶12-15

Ba ginötö tahalö gangetula si tohude, moguna taʼalui ”hadia zomasi Yehowa” ba tafaudugö gangetulada ba daʼö. (Ef. 5:17) Na taʼalui goi-goi Zura Niʼamoniʼö si tefaudu ba zalua khöda, sindruhunia no taʼalui lala wangera-ngera Lowalangi sanandrösa ba daʼö. Na tafalua goi-goi daʼö, tola tahalö gangetula si sökhi. Ududa Satana, omasi ia na arörö ita ba ngawalö zi so ba gulidanö daʼa irege lö inötöda ba wamosumange Lowalangi. (1 Yo. 5:19) Tola manö ibörögö iʼosambuaʼö dödönia si samösa niha Keriso ba wolohi kefe, sekola salawa mazui halöwö, irege lö inötönia ba wamosumange Yehowa. Na ifalua daʼö, no iforomaʼö wa ibörögö iʼokhögö lala wangera-ngera gulidanö daʼa. Tatu manö lö fasala daʼö fefu, hizaʼi böi taʼofönaiʼö ia ba waʼaurida. w24.03 24 ¶16-17