Yehowa Lowalangi Sebua Faʼomasi
”Faʼomasi Lowalangi.”—I YOH. 4:8, 16.
1. Hadia gamuata Lowalangi fondrege zebua, ba me no öʼila daʼa hewisa dödöu khönia?
IMANE Sura Niʼamoniʼö, ’Lowalangi no faʼomasi.’ (I Yoh. 4:8) Hadia geluahania? Baero faʼomasi so gamuata tanö böʼö niʼokhögö Lowalangi. Hizaʼi, faʼomasi andrö no amuata Lowalangi fondrege zebua. Tenga ha amuata faʼomasi zi so khö Lowalangi. Tobali, yaʼia andrö faʼomasi. Börö waʼomasi andrö wa tola ifalua fefu hadia ia. Taʼandrö saohagölö khö Yehowa börö me faʼomasinia andrö zangoʼou yaʼia ba wamazökhi fefu hadia ia si so ba gulidanö!
2. Hana wa faduhu dödöda wa iʼomasiʼö ita Lowalangi? (Faigi gambara ba ngaʼörö si 18.)
2 Iʼomasiʼö fefu ngawalö nifazökhinia Yehowa. Faʼomasinia ba niha gulidanö zangoromaʼö wa hasambalö alua gohitö dödönia. Niha si lö faröi khö Lowalangi lasöndra waʼohahau dödö. Duma-dumania, börö waʼomasi Yehowa ”iʼötö mbongi, ba nihukunia dania ösi gulidanö, iʼatulöʼö wanguhuku, so zanguhuku, si no ihonogöi”, Yesu Keriso. (Hal.17:31) Faduhu dödöda wa alua wanguhuku andrö. Niha si lö faröi khö Lowalangi lasöndra waʼauri si lö aetu.
HADIA NIʼILADA BA ZI NO ALUA
3. Hadia lua-lua waʼauri niha na lö hadöi faʼomasi moroi khö Lowalangi?
3 Hadia lua-lua waʼauri niha na lö hadöi faʼomasi moroi khö Lowalangi? Laʼasogö niha gulidanö gamakhoitara samösa ba iʼodela ira lowalangi sagötö tanö yaʼia daʼö Afökha. (II Kor. 4:4; I Yoh. 5:19; baso Famaʼeleʼö 12:9, 12.) Lö eluaha waʼauri niha na lö faʼomasi Yehowa!
4. Hana wa itehegö Yehowa khö Gafökha ba wolawa famatörönia?
4 Me ilawa wamatörö Lowalangi Afökha, idönisi dödö Gadamo hegöi Khawa ba wolawa Lowalangi. Itandrawaisi Afökha Wamatörö Lowalangi. Imane Afökha wa abölö sökhi wamatörönia moroi khö Lowalangi. (I Moz. 3:1-5) Itehegö Yehowa ginötö si lö arara khö Gafökha ba wameʼe tandra wa si ndruhu nifaluʼigönia khö Lowalangi. Moroi ba zi no alua, oroma wa lö hadöi si sökhi ba wamatörö niha hegöi Afökha.
5. Hadia niʼilada ba waö-waö zalua ba gulidanö?
5 Ba ginötö andre, itugu lö sökhi gulidanö. Sagötö fasuwöta barö zi 100 fakhe, töra 100 zuta niha si no mate. Itutunö Zura Niʼamoniʼö sanandrösa ba ”götö safuria” yaʼia daʼö, ”Ba ba niha si lö sökhi, samowöhö niha böʼö, ba tedou-dou manö walösökhi.” (II Tim. 3:1, 13) Itutunö nasa Sura Niʼamoniʼö, ”Uʼila, yaʼugö Yehowa, wa tebai ihuku lalania niha, awö wa tebai ifanandrösa mbekania niha sanörö lala.” (Yer. 10:23) Si ndruhu wa itörö wehede daʼa ba zi no alua. Lö iwöwöi niha Yehowa enaʼö lafatörö ira samösa.
6. Hana wa itehegö Lowalangi alua zi lö sökhi?
6 Börö me itehegö alua zi lö sökhi ba gulidanö andre Yehowa, daʼa zangoromaʼö wa ha famatörönia zabölö sökhi. Ba zi so föna, ihori fefu ngawalö zi lö sökhi Lowalangi. Aefa daʼö, ihuku Gafökha hegöi niha si no manandrawaisi famatörönia. Fefu zi lö sökhi ba gulidanö andre zi tobali dane-dane khö Yehowa ba wangohori niha si lö sökhi. Lö saʼae faʼalösökhi ba gulidanö andre dania.
HEWISA LOWALANGI WANGOROMAʼÖ FAʼOMASINIA?
7, 8. Hewisa Yehowa wangoromaʼönia faʼomasi?
7 Oya lala nifalua Yehowa ba wangoromaʼö faʼomasinia. Angeraigö atö waʼasökhi fefu niwöwöinia. Iwöwöi mbanua siawa hegöi ulidanö. Ero sambua galaksi tefaʼanö miliaran ndröfi ba planet. So luo ba gotalua ndröfi si so ba galaksida, Bima Sakti. Na lö hadöi luo, lö faʼauri ba gulidanö. Moroi ba zi no ifazökhi andre, daʼö zangoromaʼö wa Yehowa Zamazökhi fefu hadia ia, so khönia waʼabölö, faʼatua-tua, ba faʼomasi. Si ndruhu sa wa ”laʼila sa tödöra, ba nifazökhinia, zi lö oroma andrö, amuatania, iʼotarai wamazökhi danöʼa, faʼabölönia andrö, si lö aetu ba faʼalowalanginia fa lö famuʼa khöra”.—Rom. 1:20.
8 Ifazökhi Yehowa gulidanö enaʼö so waʼauri. Fefu zi so ba gulidanö moguna ba niha hegöi ba ngawalö gurifö. Ifazökhi Lowalangi kabu si sökhi enaʼö tola auri niha. Ibeʼe khöra waʼauri soʼahonoa enaʼö auri ira sagötö faʼara. (Baso Famaʼeleʼö 4:11.) Baero daʼö, ’Yaʼia zameʼe gö nösi gulidanö fefu, me no si lö aetu waʼebua dödönia andrö!’—Zin. 136:25.
9. Hewaʼae Yehowa andrö si so faʼomasi, hadia zi fatuwu ia?
9 Yehowa sebua faʼomasi, fatuwu ia zi lö sökhi. Duma-dumania, ba Zinunö 5:5-7 itutunö khöda sanandrösa khö Yehowa, ”Tenga sa Lowalangi somasi si lö sökhi ndraʼugö . . . No faʼudu ndraʼugö ba zamazökhi si lö sökhi.” Ba fatuwu ia ”zangeʼe-ngeʼe ba si falimo-limo”.
LÖ ARATÖ TEHORI ZI LÖ SÖKHI
10, 11. (a) Hadia zalua ba niha si lö sökhi? (b) Hadia howu-howu nibeʼe Yehowa ba niha si lö faröi khönia?
10 No itatugöi ginötö Yehowa wa ihori zi lö sökhi, börö me yaʼia Lowalangi sebua faʼomasi ba fatuwu ia zi lö sökhi. No ifabuʼu khöda Sura Niʼamoniʼö, ”Nihori sa dania zanao horö, ba sanötöna khö Yehowa andrö zokhö tanö dania. Hatö maʼifutö, ba löʼö saʼae sebua horö andrö, ba na öfaigi nahania ba lö yaʼia saʼae.” Nudu Yehowa ”ariri, taya, hulö zimbo”.—Zin. 37:9, 10, 20.
11 Ifabuʼu nasa khöda Sura Niʼamoniʼö, ”Satulö tödö zokhö tanö dania, yaʼira zowanua ba danö, si lö mamalö-malö.” (Zin. 37:29) Niha si lö faröi ”owua-wua dödöra ba waʼafahöna”. (Zin. 37:11) Hadia mbörö? Börö me Lowalangi sebua faʼomasi ibeʼe zi sökhi ba niha si lö faröi khönia. Imane Sura Niʼamoniʼö, ”Iʼosi dania daŵa hörö fefu, ba höröra, ba lö faʼamate saʼae, ba lö faʼabu dödö, ba lö fege-ege, ba lö faʼafökhö saʼae, me no numalö zi föföna andrö.” (Fam. 21:4) Daʼa sambua faʼomuso dödö ba niha sangandrö saohagölö ba waʼomasi Lowalangi!
12. Haniha niha ’sadölö tödö’?
12 Imane Sura Niʼamoniʼö khöda, ”Töngöni zi lö sala ba faigi zadölö tödö andrö, wa momaʼuwu niha somasi faʼatulö. Solalö, ba tehori fefu; ngaʼötö zebua horö ba niʼetuʼö.” (Zin. 37:37, 38) Niha ’sadölö tödö’ yaʼia daʼö si so faʼaboto ba dödö sanandrösa khö Yehowa hegöi khö Nononia ba laʼoʼö zomasi ia. (Baso Yohane 17:3.) Faduhu dödöra wa ”si taya nösi gulidanö, awö waʼomasinia andrö, ba soloʼö somasi Lowalangi, ba lö tebulö, irugi zi lö aetu”. (I Yoh. 2:17) Börö me no ahatö waʼatua danö, ”döna-döna khö Yehowa ba törö lala andrö khönia”.—Zin. 37:34.
FAʼOMASI SEBUA NIBEʼE LOWALANGI
13. Hadia waʼomasi sebua nibeʼe Lowalangi khöda?
13 Hewaʼae lö moʼahona ita, tola taʼoʼö zomasi Lowalangi. Tola so khöda wahuwusa si sökhi khö Yehowa börö me no ibeʼe khöda höli. Daʼa faʼomasi sebua nibeʼe Yehowa. Börö me no ibeʼe höli, niha si lö faröi khö Yehowa tola teʼefaʼö ira ba horö hegöi faʼamate. (Baso Roma 5:12; 6:23.) Me so Yesu ba zorugo lö si faröi ia khö Namania, daʼö wa faduhu dödö Yehowa khönia me so ia ba gulidanö. Börö me Ama sebua faʼomasi Yehowa, afökhö sibai dödönia me iʼila tefakao Nononia. Lö si faröi Yesu ba falulu fohalöwö ia ba wamatörö Lowalangi. Daʼa zangoromaʼö wa niha soʼahonoa tola lö faröi khö Lowalangi hewaʼae göna famakao.
14, 15. Hadia guna waʼamate Yesu ba niha?
14 Hewaʼae itörö wamakao sabölö-bölö Yesu, lö faröi ia ba wotuhini halöwö famatörö Yehowa. Taʼandrö saohagölö ba höli nibeʼe Yesu börö me no tetehegö ba niha gulidanö lasöndra waʼauri si lö aetu! Itutunö Faulo wa faʼomasi Yehowa hegöi Yesu oroma moroi ba höli. Imane, ”Noa sa mate Keriso, me luo lö abeʼe ita na, salahi zi no mangerogö Lowalangi. Ba si lö lokha lö mate niha salahi zatulö, ba zi sökhi sa, ba ma taʼila tola mate ia. Ba iʼoromaʼö waʼomasinia ita Lowalangi, me no mate salahida Keriso, me samazökhi horö ita na.” (Rom. 5:6-8) Imane göi Yohane, ”Ba daʼö no oroma waʼomasi Lowalangi andrö, ba khöda, me no ifatenge ba gulidanö Nononia Lowalangi, Ononia si hasambua andrö, enaʼö auri ita balazi ia. Ba daʼö so waʼomasi andrö, tenga wa no taʼomasiʼö Lowalangi, no wa no iʼomasiʼö ita, awö wa no ifatenge Nononia, höli, ba horöda.”—I Yoh. 4:9, 10.
15 Imane Yesu, ”Simanö sa waʼomasi Lowalangi nösi gulidanö, no ibeʼe Nononia andrö, si ha sambua, enaʼö lö tekiko dozi samati khönia, enaʼö so khöra waʼauri si lö aetu.” (Yoh. 3:16) Ibeʼe Nononia Yehowa si tobali höli, hewaʼae afökhö khönia. Daʼa waʼomasinia sabölö ebua ba niha. Faʼomasinia andre sagötö faʼara. Imane Faulo, ”Noa sa faduhu dödögu, he faʼamate, ba he faʼauri, he malaʼika, ba he samatörö, he si so iadaʼe, ba he si so dania, he sabölö, ba he faʼalawa ba he faʼabakha, ba he hadia ia mböʼönia nifazökhi Lowalangi, ba lö iʼila ifabali ita ba waʼomasi Lowalangi andrö ita, ba khö Keriso Yesu, Soʼaya yaʼita.”—Rom. 8:38, 39.
NO MAMATÖRÖ LOWALANGI IADAʼA
16. Hadia wamatörö Mesia andrö, ba haniha nitatugöi Yehowa zi tobali Razo?
16 Famatörö Mesia andrö no sambua faʼomasi Yehowa ba niha gulidanö. Hana wa tola? No itatugöi Yehowa haniha zi tobali Razo yaʼia daʼö, Yesu Keriso. (Gamd. 8:31) Baero daʼö, no tefili ba gotalua niha gulidanö si 144.000 si fao awö Yesu wamatörö ba zorugo. Na tesusugi ira, lö olifu ira hadia zalua khöra me so ira ba gulidanö. (Fam. 14:1) Tuho wamahaʼö Yesu me so ia ba gulidanö yaʼia daʼö, wangombakha Mbanua Lowalangi, ifahaʼö ndra nifahaʼönia ba wangandrö, ”He Ama khöma si so ba zorugo! Ya teʼamoniʼö döiu. Ya tobali Banuau fefu niha. Ya itörö zomasi ndraʼugö, hulö ba zorugo, ya simanö göi ba gulidanö.” (Mat. 6:9, 10) Alua fefu wangandrö daʼa ba zi so föna na mamatörö Mbanua Lowalangi!
17. Tutunö hadia gamaehutania wamatörö Yesu ba famatörö niha gulidanö.
17 Faböʼö sibai wamatörö Yesu moroi ba wamatörö niha gulidanö. Famatörö niha gulidanö iʼasogö wasuwöta irege ato niha si mate. Yesu Zamatörö yaʼita, si ndruhu-ndruhu wa ifalua gamuata Namania yaʼia daʼö faʼomasi. (Fam. 7:10, 16, 17) Imane Yesu, ”Miʼaine khögu, dozi serege tödö, awö zonoro, ba ufolombase ami. Mihareʼö khömi kalo mbagi andrö khögu ba mitöngöni khögu, me no sebolo tödö ndraʼo ba si lö fayaŵa tödö, ba falukha ami wolombase dödömi. Moguna sa kalo mbagi andrö khögu, ba no aoha noro andrö khögu.” (Mat. 11:28-30) Daʼa sambua faʼomasi si no ifabuʼu!
18. (a) Hadia zalua me döfi 1914? (b) Hadia nifatunöda ba duho aefa daʼa?
18 Sura Niʼamoniʼö zangombakha khöda wa no mamatörö Mbanua Lowalangi ba zorugo me döfi 1914. Iʼotarai daʼö, tefili nawö Yesu safuria si möi ba zorugo. Simanö göi niha ”sato sibai”, teʼowuloi ira enaʼö aefa moroi ba wamakao sabölö-bölö ba lakhamö waʼauri si lö aetu. (Fam. 7:9, 13, 14) Hawaʼato ira? Hadia gohitö dödö Lowalangi khöra? Tasöndra wanema linia ba duho aefa daʼa.