Falömanörö Sindruhu—Lua-luania Khöu

Hadia fao dödöu ba wehedenia andrö? Fefu ita oi tatörö gabula dödö simane salua khö Samantha. Na adöni dödöda ba wamalua falömanörö sindruhu, daʼö zangoromaʼö haniha ita zindruhunia. Duma-dumania, ha börö me lö omasi ita aila, tola manö lö tatörö zindruhu. Hizaʼi, na no oroma zindruhu, tola manö so lua-luania. Datafaigi atö.

IFAKIKO WAʼAFADUHU DÖDÖ FALÖMANÖRÖ SINDRUHU

So wahuwusa na so waʼafaduhu dödö. Na faoma faduhu dödö zi samösa niha khö nawönia, lö khöra fanahö-nahö dödö. Hizaʼi, lö iʼanemai so waʼafaduhu dödö. Tola itugu aro waʼafaduhu dödö na oya labeʼe ginötöra fariawö, latörö zindruhu na fahuhuo ira, ba lö khöra fakhögusa. Hewaʼae ha sakali lö latörö zindruhu, tola manö tekiko waʼafaduhu dödö. Na no aetu waʼafaduhu dödö abua wangaʼazökhi saʼae.

Hadia no irai ilimo ndraʼugö si fahuwu khöu? Hewisa dödöu? Aboto ba dödöma, te afatö dödöu, mazui ömane dödöu wa no faröi ia khöu. Faduhu dödöda wa tola ifakiko dane-dane wahuwusa si sökhi amuata falömanörö sindruhu.

ITUGU MONÖNÖ WALOMANÖRÖ SINDRUHU

Moloʼö samösa profesor ekonomi ba University of California sotöi Robert Innes, no iʼila wa ”falömanörö sindruhu hulö fökhö salio göna ba niha”. Muʼamaedolagö gamuata falömanörö sindruhu andrö hulö dungö—itugu asese fariawö ndraʼugö ba niha si lö manörö sindruhu, itugu ”adöni dödöu” wamalua amuata simane daʼö.

Hewisa enaʼö lö öfalua gamuata falömanörö sindruhu? Tola itolo ndraʼugö Sura Niʼamoniʼö. Datafaigi goi-goi moroi ba Zura Niʼamoniʼö.