So Gunania Na Tatörö Zindruhu

Ba Zura Niʼamoniʼö, ngawua wehede ’manörö sindruhu’ ba li ndrawa Heleni eluahania ”amuata si sökhi sibai”. Tola göi daʼö geluahania bua-bua si sökhi niʼokhögö zi samösa niha.

Moguna laʼangeraigö niha Keriso hadia niwaʼö Waulo me imane, ”Si sökhi manö zedöna matörö, fefu, hadia ia.” Hadia geluahania?

FOREGE BA WANÖRÖ SINDRUHU

Ato niha samaigi yaʼira ba zörömi ero sihulö wongi fatua lö möi ira ba gotalua niha sato. Hadia mbörö? Börö me omasi ira na sökhi zikhalara na lafaigi ira niha. Hizaʼi, so zabölö moguna moroi ba fotonga mbu mazui lagu wonukha. Sindruhunia, daʼö zangoromaʼö na sökhi zikhalada mazui löʼö yaʼia daʼö tödöda.

Itutunö khöda Taromali Lowalangi wa asese aolo dödöda ba wamalua si lö sökhi. Imane I Moze 8:21, ”Si lö sökhi gera-era dödönia, iʼotarai iraono ia.” Enaʼö tola tatörö zindruhu, moguna talawa horö ondröita andrö si fao khöda iʼotarai me ba dalu ninada so ita. Itutunö khöda Faulo me iforege ba wolawa horö andrö, imane, ”Omasido sa goroisa Lowalangi, na balazi dödögu bakha, ba uʼila goroisa böʼö ba ndroto-ndrotogu, si fasöndra ba goroisa andrö, si so ba dödögu, ba samöbö yaʼo, sawuyu goroisa horö andrö, si so ba ndroto-ndrotogu.”​—Roma 7:22, 23.

Duma-dumania, ba ginotö iʼoʼou ita tödöda ba wamalua si lö sökhi ba adöni dödöda wamalua amuata falömanörö sindruhu, böi tatehegö iʼosawuyu ita gera-era dödöda andrö. Tola tatatugöi hadia zabölö sökhi. Na tatimbagö gera-era si lö sökhi andrö, tola tatörö zindruhu hewaʼae so ita ba gotalua niha si lö manörö sindruhu.

TOLA MÖNA ITA

Enaʼö tola tatörö zindruhu moguna taʼokhögö gamuata si sökhi. Alimagö sibai me abölö laʼodödögö niha wamaigi ’lagu wonukhara’ moroi na laʼodödögö wamalua amuata si sökhi. Lua-luania, lö fasala wangumaʼöra na lö latörö zindruhu, asala tefaudu ba ginötönia. Imane buku The (Honest) Truth About Dishonesty, ”Si toʼölönia, asese lö tatörö zindruhu enaʼö faduhu dödö niha khöda.” Na simanö, hadia so goi-goi zi tola manolo yaʼita ba wangai angetula sanandrösa ba gamuata falömanörö sindruhu si fatema ba dödöda? So.

So mato hauga zuta niha ba gulidanö andre zi no mangila wa moguna sibai Zura Niʼamoniʼö ba waʼaurira. So goi-goi ba Zura Niʼamoniʼö si lö tesöndra ba mbuku tanö böʼö. (Zinunö 19:8) Ibeʼe wanuturu lala sanandrösa ba wongambatö, ba halöwö, ba gamuata si sökhi, hegöi sanandrösa ba wamati. No muʼogunaʼö goroisa hegöi goi-goinia iʼotarai meföna, gofu hadia ia soi niha, banua, hegöi mado. Na taʼodaligö Zura Niʼamoniʼö, taʼangerönusi zi no tabaso, ba tafalua ia ba waʼaurida, tola tefahaʼö ita ba wanörö sindruhu.

Ba wanörö sindruhu, lö abönö na ha tafahaʼö ita ba Zura Niʼamoniʼö. Börö me no so ita ba gulidanö safönu amuata si lö sökhi, samaso yaʼita enaʼö fao dödöda ba gamuatania si lö atulö. Andrö, moguna mangandrö ita khö Lowalangi enaʼö ibeʼe khöda wanolo. (Filifi 4:6, 7, 13) Na tafalua daʼö, lö khöda faʼataʼu ba wanörö sindruhu.

BUA NITEMA BA WANÖRÖ SINDRUHU

Hitoshi, si no mututunö ba duho si oföna, itema mbua börö me no itörö zindruhu ba wohalöwönia. Iadaʼa, mohalöwö ia ba perusahaan sangosinangegö amuatania si lö falimo. Imane, ”Uʼandrö sibai saohagölö me no usöndra halöwö si lö sinegu dödögu.”

Simanö göi nirasoi niha tanö böʼö. Datafaigi atö duma-duma niha si no manema mbua börö me no laʼoʼö goi-goi Zura Niʼamoniʼö ba wanörö sindruhu, ’wamalua si sökhi, fefu hadia ia’.

• Tödö Side-ide si Lö Sinegu

  

  ”Ubato zekola me 13 fakhe ndröfigu börö me fao ndraʼo ba zanagö-nagö. Lua-luania, 95 persen moroi ba zinöndragu teʼasogö ia ba halöwö falömanörö sindruhu. Aefa daʼö, mangowalu ndraʼo. Daruaga foʼomogu, mafahaʼö ndraʼaga ba Zura Niʼamoniʼö khö ndra Samaduhuʼö Yehowa. Maʼila wa ogoro Lowalangi Yehowaa na lö tatörö zindruhu. Börö daʼö mahalö gangetula, mafaböʼöni lala waʼaurima. Malulu waʼaurima khö Yehowa me döfi 1990 ba tebayagö ndraʼaga idanö tobali Samaduhuʼö Yehowa.”​—Gamaedola 6:16-19.

  ”Ba zilalö, afönu nomogu gama-gama si no utagö. Iadaʼa, lö hadöi saʼae gama-gama daʼö, ba lö hadöi itegudo tödögu. Itaria itörö tödögu zi no ufalua ba zilalö. Hizaʼi, uʼandrö sibai saohagölö khö Yehowa börö meʼebua waʼomasinia khögu. Ahono dödögu wemörö ero bongi börö me uʼila wa omasi Yehowa ba gamuata nifaluagu iadaʼa.”​—Cheryl, Irlandia.

  

  ”Me iʼila gafalogu wa lö utema gefe sölö-sölö moroi ba niha sasese mowöli, imane khögu, ’Lowalangi nifosumangemö daʼö zameʼe yaʼugö tobali niha nifaduhusi tödö! No sambua howu-howu me mohalöwöʼö ba daʼa.’ Börö me utörö zindruhu, lö itegudo tödögu side-ide föna Yehowa Lowalangi. Tola göi utolo nösi nomogu hegöi niha tanö böʼö enaʼö lafalua zimane daʼö.”​—Sonny, Hong Kong.

• Faʼohahau Dödö

  

  ”Mohalöwö ndraʼo tobali asisten eksekutif ba bank internasional. Ba halöwö daʼa, asese laʼolifugö wanörö sindruhu enaʼö tola monönö waʼakayora. Ato zangumaʼö, ’Lö fasala na fasakali lö tatörö zindruhu enaʼö monönö waʼakayoda ba lö tosasa wangalui soguna khöda.’ Hizaʼi, börö me utörö zindruhu so khögu waʼohahau dödö. Lö tebulö utörö zindruhu gofu hadia ia zalua. Laʼila ira gafalogu wa lö ulimo ira.”​—Tom, Amerika Serikat.

• Famosumange

  

  ”Ifarou ndraʼo gafalogu enaʼö ulau falimo sanandrösa ba gama-gama si so ba nahia wohalöwögu. Hizaʼi, lö uʼoʼö niwaʼönia. Me oroma haniha zanagö gama-gama andrö, iʼandrö saohagölö gafalogu börö me lö fao ndraʼo wanagö. Moguna waʼabarani ba gulidanö si lö atulö andre ba wanörö sindruhu. Hewaʼae simanö, ba gafuriatania lafosumange ba lafarisayoi ita niha.”​—Kaori, Jepang.

Na tatörö zindruhu tola taʼokhögö dödö side-ide si lö sinegu, so khöda waʼohahau dödö, ba lafosumange ita niha. Hadia fao dödöu?