Yaʼami si Bohou Ebua Hadia No Öhalö Gangetula ba Wamayagö Idanö?

1, 2. (a) Hadia zi möi fangomusoiʼö dödö nono mbanua Lowalangi ba ginötö andre? (b) Hadia nifalua zatua hegöi ira satua sokubaloi ba wanolo iraono si bohou ebua enaʼö aboto ba dödöra geluaha famayagö idanö?

IMANE samösa satua sokubaloi khö Christopher si 12 fakhe ndröfinia, ”Uʼila ndraʼugö iʼotarai me tumbu ba omuso dödögu me urongo wa omasi ndraʼugö tebayagö idanö. Omasido usofu khöu, ’Hana wa omasi ndraʼugö tebayagö idanö?’” Sinangea na manofu zatua sokubaloi andrö. Omuso dödöda na taʼila ero röfi ngahönö zi bohou ebua lahalö gangetula ba wamayagö ira idanö. (Zango. 12:1) Hizaʼi, ira satua hegöi satua sokubaloi, moguna laʼila wa angetula famayagö idanö nihalö zi bohou ebua no angetulara samösa ba laʼila hadia geluaha wamayagö idanö.

² Ba Zura Niʼamoniʼö taʼila, na no aefa fawuʼu li ita khö Yehowa ba tebayagö idanö, ba daʼö saʼae tebörögö waʼauri si bohou tobali niha Keriso. Aefa daʼö oya howu-howu nitemada moroi khö Yehowa, hizaʼi so göi wanandraigö moroi khö Zatana. (Gamd. 10:22; I Fet. 5:8) Andrö moguna labeʼe ginötöra ira satua ba wamahaʼö ndraonora hadia geluahania tobali nifahaʼö Keriso. Na satua ndraono andrö tenga Samaduhuʼö Yehowa, ira satua sokubaloi zanolo iraono andrö. (Baso Luka 14:28-30.) Simane na lafazökhi nomo, moguna lafaʼanö fefu hadia zoguna ba wamazökhi yaʼia. Simanö göi zi bohou ebua, moguna lahaogö laʼera-era ba lafaʼanö ira fatua lö tebayagö ira idanö enaʼö lö faröi ira ba wangai halöwö khö Yehowa ”irugi gamozua”. (Mat. 24:13) Hadia zinangea ifalua si bohou ebua enaʼö ihalö halöwö Yehowa sagötö faʼara? Datafaigi.

3. (a) Moloʼö Mataiʼo 28:19, 20 ba I Fetero 3:21, hana wa moguna wamayagö idanö? (b) Hadia wanofu nifatunöda ba duho daʼa ba hadia mbörö?

³ Na si bohou ebua ndraʼugö, hadia omasiʼö tebayagö idanö? No sambua ohitö dödö sabölö sökhi daʼö! No töi sebua na tobali ndraʼugö Samaduhuʼö Yehowa. Moguna lafalua daʼa niha Keriso enaʼö tola teʼorifi ira na tohare wamakao sabölö-bölö. (Mat. 28:19, 20; I Fet. 3:21) Ba ginötö tebayagö ndraʼugö idanö, no öfabuʼu khö Yehowa wa lö faröi ndraʼugö wangai halöwönia sagötö faʼara. Tatu manö omasi öfalua zi no öfabuʼu andrö. So wanofu-nofu si tola manolo yaʼugö enaʼö tola öhalö gangetula ba wamayagö idanö: (1) Hadia no ufoʼahonoa wangai angetula andre? (2) Hadia omasi ndraʼo tebayagö idanö? (3) Hadia aboto ba dödögu geluaha folulu faʼuri khö Yehowa? Datafaigi hadia wanema li moroi ba zinofu-nofu andre.

HADIA SO KHÖU WAʼATUA WANGERA-NGERA BA WAMATI?

4, 5. (a) Hana wa famayagö idanö tenga dali alawa ndröfi? (b) Hadia geluahania ba niha Keriso waʼatua wangera-ngera ba wamati?

⁴ Lö niwaʼö Zura Niʼamoniʼö wa ha si no alawa döfi zi tola mubayagö idanö mazui lö nitatugöinia hawaʼalawa ndröfi awena tola mubayagö idanö. Imane ba Gamaedola 20:11, ”Suʼa nono matua [mazui, ”iraono” New World Translation of the Holy Scriptures, 2013] saʼae, ba oroma ba mbua-buania, na sohau-hau ba na sadölö dödö.” Tobali, iraono manö aboto ba dödöra hadia geluaha wamalua satulö hegöi folulu faʼauri khö Zomböi yaʼia. Famayagö idanö no angetula si sökhi ba zi bohou ebua ba wangoromaʼö wa so khöra waʼatua wangera-ngera ba wamati hegöi ba wolulu faʼaurira khö Yehowa.​—Gamd. 20:7.

⁵ Hadia geluaha atua wangera-ngera ba wamati? Satua fangera-ngera ba wamati tenga dali alawa ndröfi mazui ebua mbotonia. Imane Sura Niʼamoniʼö wa niha satua fangera-ngera ba wamati ”no toʼölö tödö, ba wamaehusi hadia zatulö hadia zi lö atulö”. (Heb. 5:14) Niha satua fangera-ngera ba wamati, iʼila hezo zatulö ba ihalö gangetula enaʼö lö iböhöli wamalua yaʼia. Lö alio adöni dödönia ba wamalua si lö atulö. Ba lö göi itötöna niha böʼö ba wangombakha khönia ba wamalua satulö. Iraono si bohou ebua si no mubayagö idanö no sinangea ifalua hadia zatulö hewaʼae lö hadöi satuania mazui salawa döfi ba ngania.​—Fatimbaisi Filifi 2:12.

6, 7. (a) Tutunö wanandraigö salua khö Danieli me so ia ba Mbabilona. (b) Hadia dandra wa so khö Danieli waʼatua wangera-ngera ba wamati?

⁶ Hadia tola iʼoromaʼö iraono si bohou ebua wa so khönia waʼatua wangera-ngera ba wamati? Faigi duma-duma Danieli. Te ono matua ia me laʼohe ba Mbabilona. Lö hadöi satuania ba ngainia. So ia bo gotalua niha si lö faʼaboto ba dödö khö Lowalangi. Me so ia ba Mbabilona tohude ia moroi ba niha böʼö. Moroi ba gotalua ndraono si bohou ebua tanö böʼö yaʼia zi no tefili ösa ba wangai halöwö khö razo. (Dan. 1:3-5, 13) Halöwö simane daʼa te lö isöndra ba Gizaraʼeli.

⁷ Hadia nifalua Danieli? Hadia adöni dödönia? Hadia tola awuwu ia ba wamati labeʼe ira niha Mbabilona? Löʼö! Imane Sura Niʼamoniʼö me so ia ba Mbabilona, ”iwaʼö sibai tödönia Danieli, lö ihalö salakha khönia” ba iʼaröuʼö ia moroi ba ngawalö zoʼamakhaita ba agama faya. (Dan. 1:8) Daʼö dandra waʼatua wangera-ngera Danieli ba wamati!

8. Hadia wamahaʼö si tola öhalö moroi ba duma-duma Danieli?

⁸ Hadia wamahaʼö si tola öhalö moroi ba duma-duma khö Danieli? Niha satua fangera-ngera ba wamati lö tebulö waʼafaduhu dödönia hewaʼae so gabula dödö salua khönia. Tenga simane loa ia, ifaböʼöni laʼa-laʼa gulinia moloʼö hezo iʼiʼagö. Eluahania, lö iʼosifahuwu khö Lowalangi na ba Balai Kerajaan so ia, hiza sa na ba zekola tobali ia si fahuwu ba niha gulidanö. Satulönia, lö faröi ia hewaʼae göna ia fanandraigö.​—Baso Efeso 4:14, 15.

9, 10. (a) Hadia gunania na laʼangeraigö ira si bohou ebua me tetandraigö wamatira barö-barö daʼa? (b) Hadia geluaha wamayagö idanö?

⁹ Samösa lö niha soʼahonoa. Niha salawa döfi manö fataria lafalua zala. (Zango. 7:20) Na omasiʼö tebayagö idanö, moguna öfareso hezo ndrege no öʼoʼö goroisa Yehowa. Sofu khöu samösa, ʼHadia no ara uʼoʼö goroisa Yehowa?’ Angeraigö atö hewisa ndraʼugö me tetandraigö wamatiu barö-barö daʼa. Hadia tola ötatugöi hadia zinangea öfalua? Simane Danieli, hadia so niha samarou yaʼugö ba wangogunaʼö faʼatua-tuau ba gulidanö nifatörö Zatana andre? Na edöna adöni dödöu, hadia aboto ba dödöu zomasi Yehowa?​—Ef. 5:17.

¹⁰ Hana wa moguna öʼila wanema li moroi ba wanofu-nofu simanö? Börö me daʼö zanolo yaʼugö enaʼö öʼila wa tenga si famai-mai nifotöi famayagö idanö. Na tebayagö ndraʼugö idanö laʼila niha sato wa no fawuʼu li ndraʼugö khö Yehowa. Öfabuʼu wa öʼomasiʼö ia ba öfosumange ia soroi ba dödö. (Mrk. 12:30) Fefu zi no mubayagö idanö moguna ifalua hadia zi no ifabuʼu khö Yehowa.​—Baso Zangombakha 5:3, 4.

HADIA DAʼÖ NO ANGETULAU SAMÖSA?

11, 12. (a) Na omasi ndraʼugö tebayagö idanö, hadia zinangea öʼangeraigö? (b) Hadia zi tola manolo yaʼugö enaʼö öʼila hadia geluaha wamayagö idanö simane wamaigi Yehowa?

¹¹ Imane Sura Niʼamoniʼö wa fefu nono mbanua Yehowa hegöi si bohou ebua moguna lafosumange ia ”moroi siʼaikö ba dödö”. (Zin. 110:3) Tobali, niha somasi mubayagö idanö moguna ihaogö iʼangeraigö wa daʼa no ohitö dödönia samösa. Moguna öfareso nösi dödöu, mendrua manö na iʼotarai ba wa ide-ide no öʼila zindruhu.

¹² Te no asese öʼila niha si no tebayagö idanö, simane si fahuwu khöu mazui ira talifusöu ba waʼaniha. Hizaʼi, moguna mangelama ndraʼugö, böi ha börö me no abönö ndröfimö mazui me no mubayagö idanö niha böʼö ba ömane tödöu no tola saʼae mubayagö ndraʼo idanö. Hewisa wa tola faduhu dödöu wa sindruhu-ndruhu öʼila geluaha wamayagö idanö? Angeraigö hadia mbörö wa moguna sibai wamayagö idanö. Tola öʼila dania wanema li ba daʼa hegöi ba duho aefa daʼa.

13. Hezo manö öʼila wa ohitö dödöu samösa wamayagö idanö andre?

¹³ Sambua lala enaʼö öʼila wa angetula soroi ba dödöu wamayagö idanö yaʼia daʼö na öfareso wangandröu. Hadia asese mangandrö ndraʼugö khö Yehowa? Hadia ha simane-mane daʼö manö wangandröu? Fanema li moroi ba wanofu andre zangoromaʼö hewisa waʼahatöu khö Yehowa. (Zin. 25:4) No ihenaigö wanema li wangandröda Yehowa ba Zura Niʼamoniʼö. Lala tanö böʼö na omasi ndraʼugö itugu ahatö khö Yehowa ba öfosumange ia soroi ba dödö yaʼia daʼö fareso ginötö wamahaʼöu yaʼugö. (Yos. 1:8) Tandraigö angerönusi daʼa, ’Hadia lö aetu-aetu ufahaʼö ndraʼo ba Zura Niʼamoniʼö? Hadia fao ndraʼo ba mbongi wamahaʼö ba nomo?’ Fanema li moroi ba wanofu andre tola möi fanolou ba wamaigi hadia ohitö dödöu samösa wamayagö idanö andrö.

HADIA GELUAHA FOLULU FAʼAURI ANDRÖ?

14. Tutunö hadia gamaehutania folulu faʼauri ba famayagö idanö?

¹⁴ Ato ndraono si bohou ebua si lö mangila hadia gamaehuta wolulu faʼauri ba famayagö idanö. So zangumaʼö wa no lalulu waʼaurira khö Yehowa, hizaʼi lö edöna ira nasa tebayagö idanö. Hadia fao dödöu ba daʼö? Folulu faʼauri yaʼia daʼö mangandrö ndraʼugö khö Yehowa, öfabuʼu wa öfosumange ia sagötö faʼara. Na tebayagö ndraʼugö idanö, no öforomaʼö ba niha sato wa no ölulu waʼauriu khö Yehowa. Börö daʼö, fatua lö tebayagö ndraʼugö idanö, moguna öʼila hadia geluahania wolulu faʼauri khö Lowalangi.

15. Hadia geluahania folulu faʼauri?

¹⁵ Me ölulu waʼaurimö khö Yehowa, ömane khönia wa faʼaurimu no tana khönia. Öfabuʼu khönia wa sabölö moguna ba waʼauriu yaʼia daʼö wangai halöwö khönia. (Mat. 16:24) Tenga si famai-mai na fawuʼu li khö Lowalangi! (Mat. 5:33) Tobali, hewisa wangoromaʼöu wa tenga tana khöu ndraʼugö saʼae hizaʼi no tana khö Yehowa?​—Rom. 14:8.

16, 17. (a) Beʼe duma-duma hadia geluahania faʼauriu tenga khöu samösa. (b) Hadia niwaʼönia khö Yehowa ba ginötö ilulu waʼaurinia?

¹⁶ Datafaigi duma-dumania. Khalaigö atö ibeʼe khöu mbuala samösa zi fahuwu khöu yaʼia daʼö moto. Ibeʼe khöu fefu zura-sura moto andrö ba imane, ”Khöu saʼae moto andre.” Hizaʼi imane khöu aefa daʼö, ”Yaʼo zololohe onokusi he. Tebai yaʼugö zolohe moto. Dayaʼo zolohe.” Hewisa dödöu ba mbuala andrö? Hewisa dödöu ba zi fahuwu khöu andrö?

¹⁷ Na so niha solulu faʼaurinia khö Yehowa, imane wangumaʼö khö Lowalangi, ”Ululu waʼaurigu khöu. Tana khöu ndraʼo.” Sinangea idöna-döna Yehowa khönia wa ifalua zi no ifabuʼu. Tobali hewisa na so zamosumange Yehowa ibiniʼö ia fakawa ba niha si tenga samosumange Lowalangi? Mazui hewisa na itema halöwö si möi daha-tahania weʼamöi manuriaigö hegöi ba gangowuloa niha Keriso? Niha samalua simane daʼö lö ifalua zi no ifabuʼu khö Yehowa. Fagölö ia simane niha si lö mameʼe onokusi moto. Na talulu waʼaurida khö Yehowa tamane khönia, ”Tana khöu waʼaurigu tenga tana khögu.” Tafalua zomasi Yehowa hewaʼae lö tefaudu ba zomasi dödöda. Oʼö nifalua Yesu me imane, ”Tenga ba wolau somasi ndraʼo möido tou moroi ba zorugo, ba wolau somasi samatenge yaʼo möido tou.”​—Yoh. 6:38.

18, 19. (a) Hadia wamahaʼö si tola tahalö moroi khö Rose hegöi Christopher? (b) Hewisa dödöu sanandrösa ba wamayagö idanö?

¹⁸ Famayagö idanö tenga angetula si famai-mai. No sambua töi sebua ba wolulu faʼauri hegöi famayagö idanö khö Yehowa. Iraono si bohou ebua sangomasiʼö Yehowa ba si no mangila eluaha folulu faʼauri, lö aombö dödöra wolulu faʼauri hegöi ba wamayagö ira idanö. Lö maniasa ira ba gangetula si no lahalö. Samösa zi bohou ebua si no mubayagö idanö sotöi Rose imane, ”Uʼomasiʼö Yehowa, ba lö si tola mangomusoiʼö tödögu baero wangai halöwö khönia. Lö khögu faʼaombö dödö me uhalö gangetula wamayagö idanö.”

¹⁹ Hadia göi niwaʼö Christopher nitutunö ba wamobörö duho daʼa? Hewisa dödönia me no tebayagö ia idanö me 12 fakhe ndröfinia? Imane wa omuso sibai dödönia. Ibörögö ihalö halöwö safönu inötö tobali perintis biasa me 17 fakhe ndröfinia, ba 18 fakhe ndröfinia tobali ia enoni. Iadaʼa mohalöwö ia ba Mbetieli. Imane, ”Famayagö idanö andrö angetula si sökhi. Omuso sibai dödögu wangai halöwö khö Yehowa hegöi ba gangowuloania.” Na omasi ndraʼugö tebayagö idanö, hewisa wamaʼanöu yaʼugö? So wanema li ba duho aefa daʼa.