Yaʼami si Bohou Ebua Hewisa Enaʼö Tola Öhalö Gangetula ba Wamayagö Idanö?
”Foloʼö somasi ndraʼugö, yaʼugö Lowalangigu, ba no faʼomasigu.”—ZIN. 40:9.
1, 2. (a) Tutunö hadia mbörö wa tenga si famai-mai wamayagö idanö. (b) Hadia zinangea iʼila si samösa niha fatua lö tebayagö ia idanö, ba hadia mbörö?
HADIA yaʼugö si bohou ebua somasi tebayagö idanö? Na yaʼia, no sambua töi sebua na öfalua daʼö. Simane zi no tafatunö ba migu silalö, tenga si famai-mai wangai angetula famayagö idanö. Daʼa zangoromaʼö föna niha sato wa no ölulu waʼauriu khö Yehowa, öfabuʼu wa öhalö halöwönia sagötö faʼara ba öʼofönaiʼö wamalua somasi ia ba waʼauriu. Fatua lö tebayagö ndraʼugö idanö, moguna so khöu waʼatua wangera-ngera ba wamati, aboto ba dödöu geluaha folulu faʼauri, ba soroi ba dödöu wa edöna mubayagö idanö, börö me tenga si famai-mai na fawuʼu li khö Lowalangi.
2 Tola manö lö nasa edöna ndraʼugö mubayagö idanö. Mazui, ömane tödöu no tola tebayagö ndraʼo idanö, hizaʼi imane satuau wa moguna öbaloi irege atua wangera-ngerau ba moguna ödouʼö waʼaboto ba dödöu. Hadia zinangea öfalua? Böi ide-ide dödöu. Ogunaʼö ginötö si so ba wamaʼanö yaʼugö irege tola tebayagö ndraʼugö idanö ba waʼalio. Börö daʼö, moguna öhalo gangetula enaʼö: (1) öʼaroʼö waʼafaduhu dödöu, (2) haogö mbua-buau, ba (3) douʼö wangandröu saohagölö.
FAʼAFADUHU DÖDÖU
3, 4. Hadia wamahaʼö si tola lahalö iraono si bohou ebua moroi ba duma-duma Dimoteo?
3 Angeraigö hadia wanema li ba wanofu-nofu andre: Hana wa faduhu dödögu wa so Lowalangi? Hana wa faduhu dödögu wa moroi khö Lowalangi Zura Niʼamoniʼö? Hana wa oroisa Lowalangi niʼoʼögu, tenga ba woloʼö niha gulidanö? Na öʼila hadia wanema linia, tola ’ötimba tödöu hadia nilau dödö Lowalangi, hadia zi sökhi, hadia waʼomasinia ba hadia zoʼahonoa’. (Rom. 12:2) Hana wa moguna öfalua daʼö?
4 Tola itolo ndraʼugö duma-duma moroi khö Dimoteo. So khönia waʼaboto ba dödö sanandrösa ba Daromali Lowalangi börö me no ifahaʼö ia inania hegöi nenenia. Hizaʼi, imane Faulo khönia, ”Ba yaʼugö andrö, ba böi böhöli zi no örongo, awö zi no faduhu dödöu.” (II Tim. 3:14, 15) Ngawua wehede ”faduhu dödö” eluahania ”sindruhu-ndruhu faduhu dödö wa atulö zi no mufaduhusi tödö andrö”. Faduhu dödö Dimoteo wa no isöndra zindruhu ba Daromali Lowalangi. Ifahaʼö ia ba zindruhu tenga börö niʼoʼou ninania hegöi nenenia. Tobali, no irasoi samösa hadia zi no ifahaʼö yaʼia sindruhu-ndruhu atulö ba faduhu göi dödönia.—Baso I Tesalonika 5:21.
5, 6. Hana wa moguna öfahaʼö ndraʼugö ba ’wotandra fefu, hadia ia’ iʼotarai iadaʼa?
5 Hewisa ndraʼugö samösa? Te iʼotarai ba waʼide-ide no öʼila zindruhu. Börö daʼö, angeraigö iʼotarai iadaʼa hadia mbörö wa faduhu dödöu wa no öfahaʼö ndraʼugö ba zindruhu. Tola möi fangaro wamatiu daʼa ba tola öhalö gangetula tenga börö nifarou ndra awöu, ulidanö daʼa, hegöi tödöu samösa.
6 Na öfahaʼö ndraʼugö ba ’wotandra fefu, hadia ia’ iʼotarai iadaʼa, tola öbeʼe wanema li ba wanofu-nofu moroi khö ndra awöu, simane: ’Hana wa faduhu dödöu wa so Lowalangi? Na iʼomasiʼö niha gulidanö Lowalangi, hana wa itehegö alua zi lö sökhi? Haniha zamazökhi Lowalangi?’ Na no öfaʼanö ndraʼugö, lö khöu faʼaombö-aombö dödö ba wameʼe fanema li moroi ba wanofu-nofu andrö. Tola itugu owölö-ölö öfahaʼö ndraʼugö ba Zura Niʼamoniʼö.
7-9. Tutunö hadia mbörö wa tola aro waʼafaduhu dödöu na öʼogunaʼö panduan belajar ”Apa yang Sebenarnya Alkitab Ajarkan?”.
7 Na öhaogö öʼosisiʼö Zura Niʼamoniʼö, tola öbeʼe wanema li, ba lö khöu faʼaombö-aombö dödö saʼae, ba aro waʼafaduhu dödöu. (Hal. 17:11) Oya mbuku si tola manolo yaʼugö. Duma-dumania Asal Mula Kehidupan—Lima Pertanyaan yang Patut Direnungkan hegöi buku Apakah Ada Pencipta yang Mempedulikan Anda? Ato zi bohou ebua si no tetolo börö duho ”Apa yang Sebenarnya Alkitab Ajarkan?” ba jw.org. Tola öʼalui ba faosatö AJARAN ALKITAB. So panduan belajar ba duho andrö si möi fanolo khöu enaʼö itugu aro wamatiu sanandrösa ba Zura Niʼamoniʼö.
8 Na asese öfahaʼö ndraʼugö ba Zura Niʼamoniʼö, te no öʼila saʼae hadia wanema li ba wanofu si so ba panduan belajar andrö. Hizaʼi, hadia faduhu dödöu wa sindruhu ia andrö? Moroi ba panduan belajar andrö tola öʼangerönusi ngawalö ayati ba ösura hadia mbörö wa faduhu dödöu ba zi sambua tuho andrö. Na öfalua daʼö, tola ötutunö zi no öfaduhusi tödö ba niha böʼö. Na öʼila öbokai internet ba öfaigi duho ”Apa yang Sebenarnya Alkitab Ajarkan?”, tola öʼogunaʼö ia ba wamahaʼö yaʼugö samösa ba Zura Niʼamoniʼö.
9 Yaʼugö zotatugöi samösa wa daʼa zindruhu enaʼö tola tebayagö ndraʼugö idanö. Imane samösa dalifusöda ira alawe si bohou ebua, ”Fatua lö uhalö gangetula ba wamayagö idanö, ufahaʼö ndraʼo ba Zura Niʼamoniʼö. Faduhu dödögu wa daʼa agama sindruhu. Ero maʼökhö, itugu faduhu dödögu.”
BUA-BUAU
10. Hana wa moguna tefaudu gamuata niha Keriso si no tebayagö idanö ba zi no ifaduhusi tödö?
10 Imane Sura Niʼamoniʼö, ”Simanö göi wamati andrö, na lö bua-bua; no amaedola zi lö noso.” (Yak. 2:17) Tola oroma ba mbua-buau na faduhu dödöu ba zindruhu. Öforege ”wanörö lala satulö andrö, awö wangataʼufi Lowalangi”.—Baso II Fetero 3:11.
11. Tutunö hadia geluahania ”wanörö lala satulö andrö”.
11 Hadia geluahania ”wanörö lala satulö andrö”? Eluahania moguna sökhi mbua-buau. Tandraigö angerönusi: Me so zondrönisi dödöu ba wamalua si lö atulö barö zi önö waŵa silalö, hadia aboto ba dödöu hadia zinangea öfalua? (Heb. 5:14) Hadia lö olifuʼö zi no öfalua barö-barö daʼa me so wondrönisi dödö moroi khö ndra awöu ba wamalua sala? Hadia no tobali duma-duma si sökhi amuata ndraʼugö ba zekola? Hadia lö aetu-aetu öforomaʼö wa lö faröi ndraʼugö khö Yehowa, mazui hadia no irai öfagölösiʼö khö ndra awöu sekola enaʼö lö laʼoʼayaʼö? (I Fet. 4:3, 4) Tatu manö samösa lö niha soʼahonoa. Itaria, niha si no ara mangai halöwö khö Yehowa, tola manö aila ba abua khöra wamuʼa na so zanandraigö famatira. Hizaʼi, niha si no molulu faʼauri khö Lowalangi, so khönia waʼomuso dödö me no tobali Samaduhuʼö Yehowa, ba iforomaʼö daʼa ba mbua-buania.
12. Hadia duma-dumania halöwö ba ”wangataʼufi Lowalangi”, ba hewisa dödöu ba daʼö?
12 Hadia geluahania ”wangataʼufi Lowalangi”? Yaʼia daʼö halöwö soʼamakhaita ba mbanua niha Keriso, simane feʼamöi ba gangowuloa hegöi fanuriaigö. Baero daʼö, eluahania göi halöwö si lö iʼila hörö niha, simane fangandrö ba famahaʼö samösa ba Zura Niʼamoniʼö. Niha si no molulu faʼauri khö Yehowa, lö imane tödönia wa abua wamalua halöwö daʼö. Fao dödönia ba niwaʼö Razo Dawido me imane, ”Foloʼö somasi ndraʼugö, yaʼugö Lowalangigu, ba no faʼomasigu; ba oroisamö, ba no so ba dödögu bakha.”—Zin. 40:9.
13, 14. Hadia zi tola manolo yaʼugö enaʼö öhalö halöwö ba ”wangataʼufi Lowalangi”? Hadia mbuania ba zi bohou ebua ba zi no muhenaigö andre?
13 Enaʼö tetolo ndraʼugö ba wotatugöi gohitö dödöu, faigi lembar kerja ba mbuku Pertanyaan Kaum Muda—Jawaban yang Praktis, Jilid 2, ngaʼörö 308 ba 309. Ba lembar kerja andrö, tola ösura wanema li moroi ba wanofu-nofu simane, ”Hadia no öhaogö öfatunö nösi dödöu ba wangandrö, ba hadia zoroma moroi ba wangandröu sanandrösa ba waʼomasiu khö Yehowa?” ”Hadia manö niʼogunaʼöu ba wamahaʼö yaʼugö samösa?” ”Hadia möi ndraʼugö manuriaigö hewaʼae lö möi ndra satuau?” Tola göi ösura hadia manö zinangea ödouʼö ba wangandröu, famahaʼö yaʼugö samösa, ba fanuriaigöu.
14 Ato ndraono si bohou ebua sedöna mubayagö idanö, larasoi samösa wa moguna lembar kerja andrö. Imane samösa dalifusöda ira alawe sotöi Tilda, ”Me mböröta, uʼogunaʼö lembar kerja andrö ba wanura hadia manö gohitö dödögu. Uzara-zara wogamö yaʼia, ba tola tebayagö ndraʼo idanö döfi aefa daʼö.” Simanö göi niwaʼö dalifusöda si bohou ebua sotöi Patrick. Imane, ”No uʼila hadia gohitö dödögu sinangea ukhamö. Hizaʼi, börö me no usura ia, tola uʼodödögö ba wogamö yaʼia.”
Hadia hasambalö öhalö halöwö khö Yehowa hewaʼae laböhöli ira satuau ba wamalua yaʼia? (Faigi ngenoli si 15)
15. Tutunö hadia mbörö wa moguna yaʼugö samösa zangai angetula ba wolulu faʼauriu khö Lowalangi.
15 Sambua wanofu moroi ba lembar kerja andrö yaʼia daʼö, ”Hadia hasambalö öhalö halöwö Yehowa hewaʼae labato ira satuau mazui ira awö-awöu?” Na no ölulu waʼauriu khö Yehowa ba tebayagö ndraʼugö idanö, tola aro wahuwusami. Börö daʼö, tebai öʼodaligö ndra satuau mazui niha böʼö ba wangai halöwönia. Na ötörö lala satulö andrö ba öʼataʼufi Lowalangi, daʼö dandra wa faduhu dödöu wa daʼa zindruhu ba omasi ndraʼugö woloʼö oroisa Lowalangi. Tola saʼae tebayagö ndraʼugö idanö.
FANGANDRÖU SAOHAGÖLÖ
16, 17. (a) Hadia zinangea mangoʼou yaʼita tobali niha Keriso? (b) Beʼe duma-duma hewisa wangandröu saohagölö ba höli si no mubeʼe.
16 Samuza inötö, so niha sonekhe ba Goroisa Moze sanofu khö Yesu, ”Hezo zebua goroisa ba zura goroisa andrö?” Imane Yesu, ”Omasiʼö Zoʼaya yaʼugö, Lowalangiu andrö, moroi siʼaikö ba dödöu, nosou maʼasambua zangomasiʼö yaʼia. Ba öhorigö gera-erau, wangomasiʼö yaʼia.” (Mat. 22:35-37) Moloʼö Yesu, faʼomasi khö Yehowa daʼö zi tobali dane-dane ba wombayagö idanö ba tobali niha Keriso. Sambua lala enaʼö tola tedou waʼomasiu khö Yehowa yaʼia daʼö na öʼangerönusi höli hegöi buala sebua moroi khö Lowalangi ba niha gulidanö. (Baso II Korindro 5:14, 15; I Yohane 4:9, 19.) Na öfalua daʼö, tefarou ndraʼugö ba wangandrö saohagölö ba mbuala sebua andrö.
17 Fangandröu saohagölö ba mbuala andrö tola muʼamaedolagö ia simane daʼa: Khalaigö na so niha sanolo yaʼugö me arakhagö alömö ndraʼugö. Hadia iʼanemaiʼö mangawuliʼö ba nomo ba olifuʼö hadia zi no ifalua niha andrö khöu? Löʼö! Tatu manö moʼömö ndraʼugö khönia börö me no itoloʼö! Simanö göi, sinangea taʼandrö saohagölö ba höli si no ibeʼe Yehowa hegöi Yesu. Moʼömö faʼauri ita khöra! No laʼefaʼö ita moroi ba horö ba faʼamate. Börö waʼomasira wa tola so dötönaföda auri ba Waradaiso sagötö faʼara!
18, 19. (a) Hadia mbörö wa lö moguna ataʼu ndraʼugö tobali tana khö Yehowa? (b) Hana wa itugu sökhi waʼauriu na öhalö halöwö khö Yehowa?
18 Hadia öʼandrö saohagölö ba zi no ifalua Yehowa khöu? Na noa, no inötönia khöu wolulu faʼauri ba tebayagö idanö. Folulu faʼauri andrö eluahania öfabuʼu khö Lowalangi wa omasi ndraʼugö öfalua zomasi ia sagötö faʼara. Hadia moguna ataʼu ndraʼugö fawuʼu li? Löʼö! Si sökhi zomasi ibeʼe khöu Yehowa, ba ifahowuʼö niha samalua ohitö dödönia. (Heb. 11:6) Na ölulu waʼauriu ba tebayagö ndraʼugö idanö, itugu sökhi waʼauriu, tenga itugu lö sökhi! So samösa dalifusöda si 24 fakhe ndröfinia, tebayagö ia idanö me iraono ia. Imane, ”Na awena tebayagö ndraʼo idanö me no alawa ndröfigu, tola manö oya monönö waʼaboto ba dödögu. Hizaʼi, börö me no ululu waʼaurigu khö Yehowa iʼotarai me ide-ide, tola telumöʼö ndraʼo börö me lö ugohi gisö-isö gulidanö.”
19 Omasi Yehowa na ösöndra zabölö sökhi. Tobali na Satana, ha tana khönia niʼera-erania ba lö ba dödönia ndraʼugö. Na öʼoʼö ia, lö iʼila ibeʼe khöu waʼohahau dödö. Hewisa wa tola ibeʼe manö khöu zi lö niʼokhögönia? Lö khönia turia somuso dödö, ba lö khönia fanötöna. Awai zi tola ibeʼe khöu ha faʼauri si lö fanötöna, börö me daʼö zalua khönia ba zi so föna!—Fam. 20:10.
20. Hadia zi tola ifalua si bohou ebua enaʼö tola ihalö gangetula ba wolulu faʼaurinia ba tebayagö idanö? (Faigi göi kotak ”Fanolo Enaʼö Tedou ba Wamati”.)
20 No angetula si sökhi na ölulu waʼauriu khö Yehowa. Hadia no tola öhalö gangetula? Na simanö, böi ataʼu ndraʼugö fawuʼu li. Hizaʼi, na lö nasa sedöna ndraʼugö, ogunaʼö wanuturu lala si so ba duho daʼa enaʼö tola öhalö gangetula. Ifarou Faulo ndra talifusö si so ba mbanua Wilifi enaʼö ladouʼö ira ba wamati. (Fil. 3:16) Na öʼoʼö daʼö, ba zi lö aratö, tola öhalö gangetula ba wolulu faʼauriu khö Yehowa ba tebayagö ndraʼugö idanö.