Böi Böhöli Wangandrö Enaʼö Ötema Howu-Howu Lowalangi

Ibeʼe khöda Lowalangi mbuala si tohude yaʼia daʼö fangandrö. Tola fahuhuo ita ba tatutunö nösi dödöda khönia ba wangandrö. Imane samaʼeleʼö sotöi Dawido, ”Samondrondrongo fangandrö ndraʼugö; dozi niha mangondrasi yaʼugö.” (Zinunö 65:3) Hizaʼi, hewisa lala enaʼö tola tefondrondrongo wangandröda ba ifahowuʼö ita Lowalangi?

HAOGÖ WANGANDRÖ BA ENAʼÖ SOROI BA DÖDÖU

Ba ginötö mangandrö ita ’tabokai dödöda khö Lowalangi’. (Zinunö 62:9) Eluahania, tatutunö fefu hadia nösi dödöda khönia. Omasi Lowalangi Wondrege Zalawa ba wamondrondrongo fangandrö nifaʼemada soroi ba dödö.

OGUNAʼÖ DÖI LOWALANGI BA WANGANDRÖ

Oya döi ba faka niʼokhögö Lowalangi, simane Somböi, Sebua Faʼomasi, ba Sebolo Tödö. Hewaʼae simanö, so sambua döinia sindruhu. Iwaʼö, ”Yaʼo Yehowa, daʼö döigu.” (Yesaya 42:8) Tesöndra döi daʼö ba Zura Niʼamoniʼö arakhagö 7.000 kali waʼoya. Ato göi zamaʼeleʼö sangogunaʼö töi Lowalangi ba ginötö lalau mangandrö khönia. Duma-dumania, me lö ono khö Gaberahamo ba iʼandrö khö Lowalangi imane, ”He Soʼaya Yehowa, hadia nibeʼeu khögu? Mowaö-waö manö ndraʼo ba lö onogu . . .” (1 Moze 15:2) Börö zimanö, moguna taʼogunaʼö döi Lowalangi ba ginötö talau mangandrö.

OGUNAʼÖ LI SABOTO BA DÖDÖU NA ÖLAU MANGANDRÖ

Lö moguna talau mangandrö ba li si lö aboto ba dödöda. Tola talau mangandrö ba li si tofakha ba dödöda, börö me gofu hadia li niʼogunaʼöda, iʼila Lowalangi lala wangera-ngerada hegöi ösi dödöda. Imane Taromalinia, ”Lö ifaigi mbawa niha Lowalangi, dozi samalua sindruhu ba sangataʼufi yaʼia moroi ba ngawalö soi, daʼö zomasi ia.”​—Halöwö Zinenge 10:34, 35.

Hizaʼi, enaʼö tola tefahowuʼö ita, lö ibönö na ha fangandrö manö nifaluada. Hadia nasa zinangea tafalua? Itutunö ba artikel aefa daʼa.