Howu-Howu ba Niha Soloʼö khö Lowalangi

Ifatunö samaʼeleʼö sotöi Moze, na taʼoʼö goroisa Lowalangi, hasambalö ifahowuʼö ita. (5 Moze 10:13; 11:27) Hewaʼae simanö, lö omasi ita ba woloʼö oroisa Lowalangi ha enaʼö lö ihuku ita. Oya mbua-bua si sökhi niʼokhögö Lowalangi irege adöni dödöda ba wangomasiʼö hegöi ba woloʼö yaʼia. Lö omasi ita na afatö dödönia. Iwaʼö ba Zura Niʼamoniʼö, ”Daʼa dandra wa taʼomasiʼö Lowalangi na taʼoʼö goroisania.”​—1 Yohane 5:3.

Hizaʼi, hewisa foloʼö khö Lowalangi tola iʼasogö howu-howu? Datanehegö zi dombua ngawalö andre.

1. TOLA ATUA-TUA ITA NA TAʼOʼÖ LOWALANGI

”Yaʼo, Yehowa, Lowalangiu zamahaʼö yaʼugö ba zoguna khöu, samasao yaʼugö ba lala nitöröu.”​—YESAYA 48:17.

Lowalangi Yehowa, Somböi yaʼita, aboto sibai ba dödönia ita ba ibeʼe khöda wanuturu lala soguna ba waʼaurida. Na taʼoʼö wanuturu lala nibeʼenia si so ba Zura Niʼamoniʼö, tola tahalö gangetula si fao faʼatua-tua. Börö daʼö, moguna taʼalui hadia wamahaʼö nibeʼenia, aefa daʼö tafalua hadia zi no tafahaʼö yaʼita.

2. OWUA-WUA DÖDÖDA NA TAʼOʼÖ LOWALANGI

”Nifahowuʼö yaʼia daʼö, samondrongo ba samalua taromali Lowalangi!”​—LUKA 11:28.

Zuta niha iadaʼa zorasoi faʼowua-wua dödö börö me laʼoʼö Daromali Lowalangi. Nehegö duma-duma samösa ndra matua moroi ba Spanyol. Böröta, niha salio mofönu ia ba lö sökhi lagunia ba niha böʼö hegöi khö woʼomonia. Samuza maʼökhö, ibaso sambua waö-waö waʼauri nisura samaʼeleʼö sotöi Moze ba Zura Niʼamoniʼö. Itutunö ba daʼö sanandrösa khö Yosefo, ono Yakobo, nifamawa tobali sawuyu ba lakuru ia hewaʼae lö nifaluania sala. Hewaʼae simanö, so khönia waʼebolo dödö, omasi ia iʼefaʼö zala niha, ba lö omasi ia wolau balö. (1 Moze, faza 37-45) Imane ira matua moroi ba Spanyol andre, ”Me no ubaso sanandrösa khö Yosefo, omasido ubulöʼö ndraʼo ba tobalido niha si sökhi sangokhögö faʼebolo dödö ba faʼasökhi dödö. Buania iadaʼa, urasoi waʼowua-wua dödö ba waʼaurigu.”

Ba Zura Niʼamoniʼö, oya wanuturu lala si sökhi nibeʼenia, duma-dumania hewisa laguda ba niha böʼö. Tatutunö daʼö ba artikel aefa daʼa.