Ogunaʼö Mbuku Lala ba Wanöndra Faʼohahau Dödö Sagötö Faʼara! ba Wangotomosi Famati Niha Nifahaʼömö

Enaʼö tola iʼomusoiʼö dödö Lowalangi niha nifahaʼöda, moguna iʼokhögö wamati saro. (Heb 11:6) Tola taʼogunaʼö mbuku Lala ba Wanöndra Faʼohahau Dödö Sagötö Faʼara! ba wanolo yaʼira. Ba mbuku daʼa so ayati si tohude, famahaʼö si no muhaogö wanutunö, fanofu si tefaudu, video si möi famarou dödö hegöi gambara si sökhi. No amaedola tafazökhi domosa si lö akhozi ba galitö, na tatolo niha nifahaʼöda enaʼö iʼokhögö mbua-bua niha Keriso ba iʼaroʼö wahuwusania khö Lowalangi.—1Ko 3:12-15.

So ösa niha, abua khöra fahuwu khö Lowalangi börö me lö laʼila höröra ia. Börö daʼö, moguna tatolo ira enaʼö laʼokhögö waʼaboto ba dödö sanandrösa khö Yehowa ba lafaduhusi tödö ia.

FAIGI VIDEO OGUNAʼÖ MBUKU ”LALA BA WANÖNDRA FAʼOHAHAU DÖDÖ SAGÖTÖ FAʼARA!” BA WANGOTOMOSI FAMATI KHÖ YEHOWA, BA BEʼE WANEMA LI BA WANOFU-NOFU DAʼA:

• Hezo tola taʼila wa no ihaogö ifaʼanö ia talifusöda ira alawe andrö fatua lö ifalua wamahaʼö?

• Hewisa wangogunaʼönia fanofu onönöta ba wanolo niha nifahaʼönia enaʼö ifaehagö nösi dödönia ba nisura Yesaya 41:10, 13?

• Hadia lua-luania video hegöi ayati Zura Niʼamoniʼö ba niha nifahaʼö?

Ato niha si lö faʼaboto ba dödö sanandrösa ba höli. So göi zangumaʼö wa tenga khöra samösa manandrösa mbuala nibeʼe Lowalangi andrö. (Gal 2:20) Börö daʼö, moguna tatolo ira ba wangotomosi famatira ba höli nibeʼe Yesu.

FAIGI VIDEO OGUNAʼÖ MBUKU ”LALA BA WANÖNDRA FAʼOHAHAU DÖDÖ SAGÖTÖ FAʼARA!” BA WANGOTOMOSI FAMATI KHÖ YESU, BA BEʼE WANEMA LI BA WANOFU-NOFU DAʼA:

• Hezo tola taʼila wa no ihaogö ifaʼanö ia talifusöda ira matua andrö fatua lö ifalua wamahaʼö?

• Hewisa wangogunaʼönia faosatö ”Alui Nasa Danö Böʼö” ba wanolo niha nifahaʼönia?

• Hana wa moguna sibai wangandrö ba niha nifahaʼö?