FAʼAURI NIHA KERISO

**Ogunaʼö Publikasi Lala ba Wanöndra Faʼohahau Dödö Sagötö Faʼara! ba Halöwö Fanuriaigö**

Tatu omuso sibai dödöda börö me no tebeʼe khöda brosur hegöi buku si bohou ba wondröniaʼö famahaʼö ba Zura Niʼamoniʼö! Taʼandrö göi khö Yehowa ba wamahowuʼö famorege nifaluada enaʼö itugu ato niha nifahaʼöda. (Mat 28:18-20; 1Ko 3:6-9) Hewisa lalada ba wangogunaʼö publikasi si bohou andre?

Na taʼogunaʼö publikasi Lala ba Wanöndra Faʼohahau Dödö Sagötö Faʼara!, moguna tafaudugö lala wamahaʼöda. Oʼö wanuturu lala andre ba ginötö öfaʼanö ndraʼugö hegöi na ödöniaʼö wamahaʼö ba Zura Niʼamoniʼö.a

Baso wamahaʼönia, ba tutunö wanofu-nofunia
Baso ayati si so ngawua wehede ”baso”, aefa daʼö tolo niha nifahaʼöu enaʼö iʼila hewisa wamaluania ayati andrö
Futa videonia, ba ogunaʼö wanofu-nofu si no mufaʼanö ba wanutunö video andrö
Tandraigö ba wangasiwai si sambua famahaʼö ero sakali mifalua wamahaʼö

Ba wanuriaigö, ofönaiʼö wameʼe brosurnia enaʼö öʼila hadia adöni dödö niha nifalukhaisimö andrö mazui löʼö. (Faigi kotak ”Fameʼe Brosur Lala ba Wanöndra Faʼohahau Dödö Sagötö Faʼara! Na Awena Falukha Ita ba Niha” ba ngaʼörö 16.) Na no awai ötutunö brosur daʼö ba adöni dödönia nasa ba wamahaʼö yaʼia, tola öbeʼe khönia mbuku Lala ba Wanöndra Faʼohahau Dödö Sagötö Faʼara!, ba mibörögö ba wamahaʼö si 04. Na no öʼogunaʼö mbuku Nifahaʼö Khöda mazui Lö Tebulö Iʼomasiʼö Ita Lowalangi ba wondröniaʼö famahaʼö, tola mibörögö miʼogunaʼö mbuku Lala ba Wanöndra Faʼohahau Dödö Sagötö Faʼara!, ba tatugöi hezo miʼotarai wanutunö yaʼia.

Laʼogunaʼö mbuku ”Lala ba Wanöndra Faʼohahau Dödö Sagötö Faʼara!” si sambua fongambatö andrö ba wondröniaʼö famahaʼö ba Zura Niʼamoniʼö khö ndra matua no mege ba nomonia.

FAIGI VIDEO MATEMAʼÖ AMI YAʼAMI NIFAHAʼÖ BA ZURA NIʼAMONIʼÖ, BA BEʼE WANEMA LI BA WANOFU-NOFU DAʼA:

Hadia manö wamahaʼö nitema niha nifahaʼöda moroi ba mbuku si bohou andre?
Hana wa moguna öforomaʼö video daʼa ba niha sawena öfahaʼö ba Zura Niʼamoniʼö?
Moguna öfarou dödö niha nifahaʼöu ba wotatugöi hegöi ba wogamö ngawalö gohitö dödö. Hadia manö gohitö dödö andrö?—Faigi tabel ”Tuho hegöi Ohitö Dödö Ero Sambua Faosatö” ba ngaʼörö 16

a ONÖNÖTA: Sindruhu sa, lö nitatugöi sibai khöda ba wanutunö faosatö ”Alui Nasa Danö Böʼö” na tadöniaʼö wamahaʼö. Hizaʼi, ba ginötö öfaʼanö ndraʼugö, moguna öbaso ba öfaigi fefu zi no mufaʼanö ba faosatö andrö. Na öfalua daʼö, tola aboto ba dödöu hadia manö zabölö adöni dödö niha nifahaʼöu, si tola öʼogunaʼö ba wanolo yaʼia. Ba versi elektronik, no mufaʼanö ba publikasi daʼa link ba wamokai video hegöi tanö böʼönia.

TUHO HEGÖI OHITÖ DÖDÖ ERO SAMBUA FAOSATÖ
	FAMAHAʼÖ	TUHO	OHITÖ DÖDÖ
1	01-12	Angeragö hewisa Zura Niʼamoniʼö wanolonia yaʼugö ba hewisa enaʼö aboto ba dödöu haniha Zamaʼanö yaʼia	Farou dödö niha nifahaʼöu enaʼö ibaso Zura Niʼamoniʼö, ifaʼanö ia fatua lö mifalua wamahaʼö, ba iʼondrasi gangowuloa
2	13-33	Faigi hadia zi no ifalua Lowalangi ba hadia niʼandrönia khöda ba wamosumange yaʼia	Farou dödö niha nifahaʼöu enaʼö itutunö ba niha böʼö hadia zi no ifahaʼö yaʼia ba tobali ia sanuriaigö
3	34-47	Angeragö hadia niʼandrö Lowalangi ba niha samosumange yaʼia	Farou dödö niha nifahaʼöu enaʼö ilulu waʼaurinia khö Yehowa ba tebayagö ia idanö
4	48-60	Fahaʼö ndraʼugö hewisa enaʼö lö tebulö iʼomasiʼö ndraʼugö Lowalangi	Tolo niha nifahaʼöu enaʼö tola ifaehusi hezo zatulö ba hezo zi lö atulö ba itugu aro wahuwusania khö Yehowa