Omasi Fefu Niha Wanöndra Faʼohahau Dödö ba zi So Miföna
Hewisa zomasiʼö waʼauriu ba zi so miföna? Simane niha sato, tatu omasiʼö na lö mofökhö-fökhö ndraʼugö hegöi ösi nomou ba misöndra waʼomuso dödö ba faʼahono dödö.
Hizaʼi, ato niha saombö tödö hadia simane daʼö waʼaurira dania ba zi so miföna. Hadia mbörö? Börö me oya sibai zalua si lö mudöna-döna, simane fökhö COVID-19. Börö pandemi andre, basaki wangalui soguna, ato niha si tosasa, ba tola manö teʼala waʼaurira. Lua-luania, lö tatu ba dödöra hewisa waʼaurira ba zi so miföna.
Börö daʼö, ato niha samorege ba wangalui lala enaʼö ohahau dödöra ba zi so miföna. So zi faduhu tödö khö ndra samaʼeleʼö mazui faduhu dödöra wa no itatugöi waʼauri niha Lowalangi. Ato göi zangumaʼö wa hasambalö lasöndra waʼohahau dödö na lagohi sekola salawa hegöi kefe. So göi danö böʼö zangumaʼö na lafalua zi sökhi tola ohahau dödöra.
Hadia sindruhu daʼö zangaʼasogö khöu faʼohahau dödö ba zi so miföna? Enaʼö öʼila wanema linia, angeragö wanofu-nofu daʼa:
Hadia zindruhunia zotatugöi faʼauriu ba zi so miföna?
Hadia sindruhu wa abölö sökhi waʼauriu na alawa sekolamö ba ebua gefemö?
Hadia tobönö na asala öfalua zi sökhi?
Hadia zindruhunia zameʼe khöu faʼohahau dödö ba zi so miföna?
Majalah daʼa zameʼe khöda fanema li moroi ba wanofu-nofu andrö.