Mangaʼaroʼö Mangawuli Fahuwusa khö Yehowa

ERO röfi, oya mbiri-biri Yehowa sebua böli nitema mangawuli ba mbanua niha Keriso. Khalaigö atö ’waʼomuso dödö sebua ba zorugo’ me laʼila wa alua daʼö! (Luk. 15:7, 10) Na no latemaʼö ndraʼugö mangawuli, yafaduhu dödöu wa omuso sibai dödö Yesu, ira malaʼika, hegöi Yehowa börö me no ifuli farahu ndraʼugö ba mbanua niha Keriso. Iadaʼa, öforege enaʼö ifuli aro wahuwusau khö Yehowa. Hizaʼi, te so daha-taha nitaögöu. Hadia manö duma-dumania, ba hadia zanolo yaʼugö ba wanaögö daʼö fefu?

HADIA MANÖ DAHA-TAHANIA?

Ato zangawuli ba mbanua niha Keriso sorasoi faʼide-ide dödö. Te aboto ba dödöu hadia zi no irai irasoi Razo Dawido. Hewaʼae na no muʼefaʼö horönia, lö tebulö imane, ”Oya sibai zalagu.” (Si. 40:12; 65:3) Na no mangawuli zi samösa niha khö Yehowa, tola manö itahi-tahigö nasa ia tödönia mazui aila ia ba zi hauga fakhe faʼara. Daʼö zalua khö Isabelle, si no irai muʼefasi moroi ba mbanua niha Keriso ba zi töra 20 fakhe.a Imane, ”Abua khögu wamaduhusi tödö wa no iʼefaʼö zalagu Yehowa.” Sindruhunia, na örasoi waʼide-ide dödö, tola ifuli awuwu ndraʼugö ba wamati. (Amd. 24:10) Börö daʼö, forege enaʼö lö alua khöu zimanö.

So göi zorasoi faʼaombö-aombö dödö, alai na tebai lafalua fefu hadia ia zi tola mangaʼaroʼö mangawuli fahuwusara khö Yehowa. Imane Antoine me no lafuli latemaʼö ia, ”Olifudo saʼae hadia zi no irai ufahaʼö yaʼo mböröta hegöi si no irai ufalua me tobali ndraʼo Samaduhuʼö Yehowa.” Börö me so ösa ndra talifusöda sorasoi simane daʼö, lö laforege ba wameʼe fondrege zi sökhi khö Yehowa.

Angeragö atö duma-duma daʼa: Na no adudu nomo zi samösa niha börö nangi sabölö-bölö, tola manö lö iʼila ikhalaigö fefu zinangea ifalua ba wamazökhi omonia mangawuli. Simane daʼö göi na no tekiko wahuwusau khö Yehowa börö me no öfalua horö sebua. Tola manö aombö dödöu börö me öʼila wa moguna khöu ginötö hegöi famorege ba wangaʼaroʼö mangawuli fahuwusau khö Yehowa. Hewaʼae simanö, itolo ndraʼugö Yehowa.

Ikaoni ita Yehowa, ”Dataʼatulöʼö ita.” (Yes. 1:18) No öforege wamalua daʼö ba iʼandrö sibai khöu saohagölö Yehowa! Börö me no öfuli ndraʼugö khönia, tola ibaliʼö ndraʼugö duma-duma ba wangoromaʼö wa fasala fefu niböbögö Zatana.—Amd. 27:11.

Na öfuliʼö khö Yehowa, eluahania no ahatö ndraʼugö khönia. Ba no ifabuʼu wa hasambalö ihatöʼö ia khöu. (Yak. 4:8) Iadaʼa, sökhi sibai me no laʼila ira talifusöda wa no ifuli farahu ndraʼugö ba mbanua niha Keriso. Hizaʼi, so danö böʼö zinangea öfalua. Böi tebulö öʼaroʼö waʼomasiu khö Yehowa si tobali Ama hegöi Si Fahuwu khöu. Hewisa wamaluau daʼö?

TATUGÖI GOHITÖ DÖDÖ SI TOLA ÖFALUA

Tandraigö tatugöi hadia manö gohitö dödö si tola öfalua. Te lö olifuʼö nasa dane-dane zindruhu si no irai öfahaʼö yaʼugö sanandrösa khö Yehowa hegöi Faradaiso si no ifabuʼu. Hizaʼi, moguna öfuli öforege wamalua halöwö ba wamati iadaʼa. Duma-dumania, öʼaseseʼö weʼamöi manuriaigö, öʼondrasi gangowuloa, ba fariawö ndraʼugö khö ndra talifusöda. Nehegö atö hadia manö gohitö dödö si tola öfalua.

Aseseʼö angandrö khö Yehowa. Aboto ba dödö Yehowa wa tola manö abua khöu wangandrö khönia börö me lö tebulö itahi-tahigö ndraʼugö tödöu. (Rom. 8:26) Hewaʼae simanö, ’böi öfamalö-malö wangandrö’. Tutunö khö Yehowa wa omasiʼö sibai na ifuli fahuwu ndraʼugö khönia. (Rom. 12:12) Itörö tödö Andrej, ”Me luo daʼö, itahi-tahigö ndraʼo tödögu ba aila sibai ndraʼo. Hizaʼi, itugu alö worasoigu daʼö ero na mangandrö ndraʼo. Urasoi waʼahono dödö.” Na lö öʼila hadia zinangea öwaʼö ba wangandrö, nehegö wangandrö Razo Dawido me no ifalalini gera-erania, nisura ba Zinunö 51 hegöi 65.

Aseseʼö wamahaʼö yaʼugö ba Zura Niʼamoniʼö. Daʼa zanolo yaʼugö enaʼö itugu aro wamatiu hegöi faʼomasiu khö Yehowa. (Si. 19:7-11) Imane Felipe, ”Me mböröta, börö me lö asese ubaso ba ufahaʼö ndraʼo ba Zura Niʼamoniʼö, awuwu wamatigu ba uʼafökhöiʼö dödö Yehowa ba gafuriata. Börö daʼö, lö omasido ufuli uʼafökhöiʼö dödö Yehowa. Iadaʼa, owölö-ölö ndraʼo ba wamalua famahaʼö samösa.” Tola göi öfalua zimane daʼö. Na lö öʼila hadia duho sinangea öfahaʼö yaʼugö, tola öʼandrö wanolo khö dalifusöda saro ba wamati.

Aroʼö wahuwusau khö ndra talifusöda. Te aombö dödö niha sangawuli ba mbanua niha Keriso, alai na so zangokhögö lala wangera-ngera si lö tefaudu sanandrösa khöra. Ifaduhuʼö Larissa, ”Aila sibai ndraʼo. Urasoi wa no uʼafökhöiʼö dödö ndra talifusöda ba afatö dödöra khögu. Lö tebulö so khögu gera-era simane daʼö ba abua khögu wanayaigö yaʼia.” Na daʼö nirasoimö, yafaduhu dödöu wa omasi sibai ndra satua sokubaloi hegöi ira talifusöda tanö böʼö ba wanolo yaʼugö enaʼö ifuli fahuwu ndraʼugö khö Yehowa. (Faigi kotak ”Hadia zi Tola Lafalua Ira Satua Sokubaloi?”) Omuso dödöra me no mangawuli ndraʼugö ba mbanua niha Keriso ba omasi ira na ohahau dödöu!—Amd. 17:17.

Hewisa enaʼö tola fahuwu ndraʼugö khö ndra talifusöda? Ondrasi fefu gangowuloa si no mufaʼanö ba yaʼowölö-ölö ndraʼugö wefao khö ndra talifusöda ba weʼamöi manuriaigö. Hadia mbuania na öfalua daʼö? Imane Felix, ”Latötöna sibai ira talifusöda enaʼö ufulido ba mbanua niha Keriso. Urasoi wa laʼomasiʼö sibai ndraʼo. Latolodo enaʼö sindruhu-ndruhu urasoi wa no ifuli tobali ösi mbanua niha Keriso ndraʼo. Latolo göi ndraʼo enaʼö faduhu dödögu wa no iʼefaʼö zalagu Yehowa ba enaʼö lö tebulö ufosumange ia.”—Faigi kotak ”Hadia zi Tola Öfalua?”

BÖI AWUWU!

Lö iböhöli Satana wangaʼasogö khöu ”bade sabölö-bölö” enaʼö tekiko wahuwusau khö Yehowa. (Luk. 4:13) Faʼanö ndraʼugö enaʼö tola ölawa Zatana. Börö daʼö, iʼotarai iadaʼa aroʼö wahuwusau khö Yehowa.

No ifabuʼu Yehowa sanandrösa ba mbiri-birinia, ”Uʼalui zi taya, uʼohe mangawuli zi no elungu, ubalugö zokho, ba uʼabölöʼö zi tebai.” (Hez. 34:16) No ato niha nitolo Yehowa enaʼö ifuli fahuwu khönia. Börö daʼö, yafaduhu dödöu wa hasambalö itolo ndraʼugö ba wangaʼaroʼö fahuwusau khönia.

Hadia zi Tola Lafalua Ira Satua Sokubaloi?

No tebeʼe noro dödö si tohude khö ndra satua sokubaloi ba wanolo niha sangawuli ba mbanua niha Keriso enaʼö tola ifuli fahuwu ira khö Yehowa. Nehegö atö hadia manö zi tola lafalua ira satua sokubaloi.

Rara dödöra. Aboto ba dödö zinenge sotöi Faulo wa ’tola awuwu ba waʼabu dödö’ niha si no mangawuli khö Yehowa. (2 Ko. 2:7) Te asese itahi-tahigö ia tödönia ba irasoi waʼide-ide dödö. Börö daʼö, ibeʼe mene-mene Faulo ba mbanua niha Keriso, ”Mibologö dödömi khönia ba mirara dödönia.” Moguna mufaduhuʼö ba dödö niha sangawuli ba mbanua niha Keriso wa iʼomasiʼö sibai ira Yehowa hegöi ira talifusöda. Böi olifu ndra satua sokubaloi wa moguna asese lasuno ba latolo niha sangawuli andrö. Daʼö zanolo yaʼira enaʼö lö larasoi waʼide-ide dödö.

Mifao ba wangandrö. ”Mofaʼabölö wangandrö niha satulö”. (Yak. 5:16) Imane Larissa, si no mutötöi moroi yawa, ”Ututunö khö ndra satua sokubaloi fefu waʼaombö-aombö dödögu. Aefa daʼö, mangandrö ira salahigu. Aboto ba dödögu wa lö mofönu ira khögu. Latolo ndraʼo enaʼö ifuli aro wahuwusagu khö Yehowa.” Imane göi Theo, ”Fangandrö nifaʼema ndra satua sokubaloi zamaduhuʼö ba dödögu wa iʼomasiʼö sibai ndraʼo Yehowa. Hewaʼae na anehe ia zala nifaluagu, lö tebulö ifaigi zi sökhi ba waʼaurigu.”

Mifahuwu khöra. Latötöna ira niha si no mangawuli ba mbanua niha Keriso enaʼö so zi fahuwu khöra. Imane si samösa satua sokubaloi sotöi Justin, ”Miʼaseseʼö wefao khöra ba wanuriaigö ba miʼanörö ba nomora. Moguna tobali ita si fahuwu khöra.” Imane satua sokubaloi tanö böʼö sotöi Henry, ”Na laʼila ira talifusöda ba mbanua niha Keriso wa fahuwu ndra satua sokubaloi ba niha si no mutemaʼö mangawuli, hasambalö laforege göi wamalua simane daʼö.”

Tolo ira ba wamalua famahaʼö samösa. Tola itolo niha sangawuli ba mbanua niha Keriso si samösa talifusöda saro ba wamati enaʼö owölö-ölö ia wamalua famahaʼö samösa. Imane satua sokubaloi sotöi Darko, ”Asese ufatunö girö-girö ba wamati nisöndragu me ufalua wamahaʼö samösa, ba uforomaʼö wa omuso dödögu wamalua famahaʼö ba Zura Niʼamoniʼö. Ukaoni göi ira enaʼö faoma mafahaʼö ndraʼaga ba artikel si möi famarou dödöma.” Imane göi satua sokubaloi tanö böʼö sotöi Clayton, ”Ufarou dödöra enaʼö lafahaʼö ira sanandrösa ba niha nidunö-dunö ba Zura Niʼamoniʼö si no irai manaögö abula dödö simane nitaögöra.”

Kubaloi ira. No laʼila ira niha sangawuli ba mbanua niha Keriso hewisa me tobali sangetuʼö huku ndra satua sokubaloi. Iadaʼa, moguna göi laʼila wa sokubaloi yaʼira ndra talifusöda andrö. (Yer. 23:4) Börö daʼö, yaʼami ira satua sokubaloi, miʼalioʼö wamondrongo yaʼira ba misuno ira. Miʼaseseʼö fahuhuo khöra. Nehegö hadia nifalua zatua sokubaloi sotöi Marcus me ifalua halöwö fokubaloi: ”Matutunö mato hauga ngawua ayati Zura Niʼamoniʼö ba masuno ira. Mafaduhuʼö khöra wa omuso sibai dödöma khöra ba hasambalö omuso göi dödö Yehowa börö me no laforege enaʼö mangawuli ira ba mbanua niha Keriso. Fatua lö maʼasiwai halöwö fokubaloi, iʼanemaiʼö matatugöi khöra hawaʼara ifuli makubaloi ira.”

a So ösa zi no mufaböʼöni töi ba artikel daʼa.