Faʼomuso Dödö ba Famahaʼö moroi ba Wangai Halöwö khö Yehowa

Me alua Wasuwöta Gulidanö II, laröi soi Estonia ira satuagu ba numalö ira ba Jerman, ba daʼö tumbu ndraʼo. Me no aefa tumbudo, lafaʼanö ira findra ba Kanada. Toröi ndraʼaga ahatö ba mbanua Ottawa, Kanada, yaʼia daʼö ba nahia si no öna-öna ba zinga kandra manu. Sindruhu-ndruhu numana sibai ndraʼaga. Hewaʼae simanö, si löʼö-löʼönia tola maʼa gadulo manu ero sihulö wongi.

Samuza maʼökhö, labaso khö mamagu ira Samaduhuʼö Yehowa Wamaʼeleʼö 21:3, 4. Toröi-röi sibai ba dödönia ayati daʼö irege meʼe ia. Tumbu danömö zindruhu andrö ba dödö mamagu hegöi bapagu, irege lö ara aefa daʼö tebayagö ira idanö.

Hewaʼae na ambö onekhe ndra satuagu ba li Inggris, laʼameʼegö tödö sibai zindruhu. Arakhagö ero ngaluo Satu, hewaʼae na no erege dödö bapagu wohalöwö sara wongi ba pabrik nikel ba Sudbury, Ontario, iʼohe ndraʼo hegöi akhigu sotöi Sylvia weʼamöi manuriaigö. Ero migu, mafahaʼö ndraʼaga ba majalah Manuriaigö yaʼaga si sambua omo. Laforege sibai ira satuagu ba wanolo yaʼo ba wangomasiʼö Yehowa. Daʼö zamarou tödögu ba wolulu faʼaurigu khö Yehowa me döfi 1956, me fulu fakhe ndröfigu. Börö waʼomasira soroi ba dödö khö Yehowa, andrö wa terou dödögu wangai halöwö khönia.

Me no tama ndraʼo SMA, ibörögö mangoloi dödögu ba wangai halöwö khö Yehowa. Iwaʼö tödögu, na ulau merintis tebai uʼowuloi gefe soya ba wangoʼozui ohitö dödögu weʼamöi manörö ba soi böʼö. Andrö wa mohalöwö ndraʼo ba stasiun radio si so ba mbanuama tobali samuta sinunö, omasido sibai halöwö daʼa. Hizaʼi börö me ero bongi mohalöwödo, lua-luania tebai möido ba gangowuloa ba ibörögö fariawö ndraʼo ba niha si lö mangomasiʼö Lowalangi. Ba gafuriata, ifarou ndraʼo tödögu side-ide si no tefahaʼö ba Zura Niʼamoniʼö ba wamalua fombulöʼö.

Findra ndraʼo ba Oshawa, Ontario. Ba daʼö falukhado khö Ray Norman, akhinia sotöi Lesli, ba so ndra perintis tanö böʼö. Omuso dödöra wanemaʼö yaʼo. Faʼomuso dödöra andrö zamarou tödögu ba woʼangeragö mangawuli hadia gohitö dödögu ba waʼauri. Lafarou ndraʼo tobali perintis, ba ufalua daʼö me baŵa si Siwa 1966. Omuso sibai dödögu. Hewaʼae simanö, so ösa waʼatebulö salua ba waʼaurigu ba zi lö udöna-döna.

NA IʼANDRÖ KHÖU YEHOWA WAMALUA HADIA IA, FALUA DAʼÖ

Me SMA ndraʼo, ufasuraʼö döigu wohalöwö ba Mbetieli Toronto, Kanada. Aefa daʼö, me merintis ndraʼo lakaonido wohalöwö ba Mbetieli ba zi öfa fakhe waʼara. Me luo daʼö, no omasido sibai khö Lesli, ba so khögu waʼataʼu alai dania na lö falukhaga na utema halöwö daʼö. Me no uhaogö ututunö ba wangandrö, uhalö gangetula ba wangai halöwö ba Mbetieli hewaʼae na abua khögu fabali khö Lesli.

Mohalöwödo ba Mbetieli ba bagian laundry, ba gafuriata tobalido sekretaris. Na Lesli andrö, tobali ia perintis istimewa ba Gatineau, Quebec. Asese uʼangeragö Lesli, ba manofu-nofu ndraʼo hadia daʼa gangetula si tefaudu nihalögu. Samuza inötö, so zahöli-höli dödö si lö udöna-döna salua ba waʼaurigu. Lakaoni göi ba Mbetieli gaʼa Lesli sotöi Ray, ba sambua mbateʼe ndraʼaga! Andrö wa tola ifuli fahuhuo ndraʼo khö Lesli. Mangowalu ndraʼaga ba ngaluo safuria wohalöwögu ba zi öfa fakhe waʼara, yaʼia daʼö me 27 mbaŵa si Dua 1971.

Lafatenge ndraʼaga wangai halöwö ba mbanua niha Keriso sangogunaʼö li Prancis ba provinsi Quebec. Mato hauga fakhe aefa daʼö, tokea ndraʼo me lakaonido wangai halöwö tobali satua samasui me 28 fakhe ndröfigu. Iwaʼö tödögu, wa lö ibönö ndröfigu ba tenga sinangea ndraʼo wangai halöwö daʼö. Hizaʼi, möi fangabölögu Yeremia 1:7, 8. Hewaʼae simanö, so nasa daha-taha tanö böʼö. No hauga kali fatandru moto Lesli ba asese lö iʼila mörö. Andrö manofu-nofu ndraʼaga, hadia tola dania mafalua halöwö famasui andre. Hizaʼi, imane khögu Lesli, ”Na iʼandrö khöda Yehowa wamalua hadia ia, moguna tafalua daʼö.” Andrö wa matemaʼö halöwö daʼö, ba omuso dödöma wamalua halöwö famasui ba zi 17 fakhe faʼara.

Börö me satua samasui ndraʼo, oya sibai halöwögu, irege lö oya ginötögu wefao khö Lesli. Samuza inötö, usöndra wamahaʼö si sökhi. Me luo daʼö, ngaluo Sinaya sihulö wongi, moli bel mbawandruhö nomoma hizaʼi lö niha baero. So sambua raga-raga ösinia nukha, bua zinanö, keju, roti, sambua boto-boto agu, mato hauga ngawua galasi, ba so garate si no musura, ösinia: ”Ohe manörö woʼomou.” Me luo daʼö sökhi sibai haga luo. Hewaʼae simanö, umane khö Lesli wa lö inötögu weʼamöi manörö, börö me ufaʼanö huhuo sebua. Aboto ba dödö Lesli daʼö, hizaʼi oroma göi wa abu dödönia. Me ulau modadao ba wamaʼanö huhuo sebua, ibörögö itegu-tegu ndraʼo tödögu side-ide. Itörö tödögu Efeso 5:25, 28. Urasoi wa no sambua lala daʼa niʼogunaʼö Yehowa ba wamasugi ba dödögu wa moguna nasa uʼameʼegö tödö nirasoi woʼomogu. Me no aefa ulau mangandrö, umane khö Lesli, ”Aine, möi ita manörö.” Omuso sibai dödönia. Möiga ba zi sambua nahia si sökhi sahatö ba nungo nidanö, ba daʼö malau manörö. Omuso sibai dödöma me luo daʼö. Ba sindruhunia sa, fakhamö nasa ufaʼanö huhuo sebua.

Oya wilayah si möi ndraʼaga, iʼotarai ba British Columbia ofeta ba Newfoundland, ba marasoi waʼomuso dödö. Sindruhu-ndruhu alua gohitö dödögu me ide-idedo yaʼia daʼö ba wangondrasi ngawalö nahia. Fakhamö tumbu ba wangera-ngeragu wefao ba Sekolah Gilead, hizaʼi sindruhunia lö omasido tobali utusan injil. Ba wamaigigu niha si tobali utusan injil yaʼia daʼö niha si tohude, ba ufaigi tödögu tenga sinangea ndraʼo. Baero daʼö, aombö dödögu alai na lafatenge ndraʼaga ba zi sambua soi ba Afrika sasese alua wasuwöta mazui fökhö waba. No omuso dödögu iadaʼa wangai halöwö ba Kanada, ba wamaigigu no obönö daʼö.

LAKAONI WANGAI HALÖWÖ BA ESTONIA HEGÖI BA SOI BALTIK TANÖ BÖʼÖNIA

Me döfi 1992, ibörögö tola mufalua halöwö fanuriaigö ba soi si no irai farahu ba Uni Soviet. Lasofu khöma hadia omasiga mangai halöwö tobali utusan injil ba Estonia. Tokea sibai ndraʼaga, ba maʼohe daʼö ba wangandrö. Hizaʼi, mafuli maʼangeragö, ’Na iʼandrö khöda Yehowa wamalua hadia ia, moguna tafalua daʼö.’ Börö daʼö, matemaʼö wogaoni andrö. Imane tödögu, ’Harazaki wa tenga ba Afrika lafatenge ndraʼaga.’

Maʼanemaiʼö mafahaʼö ndraʼaga ba li Estonia. Hauga waŵa aefa daʼö, laʼandrö khögu tobali satua samasui. Moguna maʼondrasi zi 46 mbanua niha Keriso, ba so ösa kelompok ba Estonia, Latvia, Lituania, hegöi ba Kaliningrad, Rusia. Eluahania, tenga ha ba li Estonia mafahaʼö ndraʼaga, moguna göi mafahaʼö ndraʼaga ba li Latvia, Lituania, hegöi li Rusia. Tenga saoha wamalua daʼö. Hizaʼi, adöni sibai dödö ndra talifusöda ba wamorege nifaluama, ba omasi ira ba wanolo yaʼaga. Me döfi 1999 mufasindro gödo ndraha Estonia. Yaʼo, Toomas Edur, Lembit Reile, hegöi Tommi Kauko, mufataro ndraʼaga tobali Panitia Ndraha.

Yaʼo hegöi Lesli, falukhaga khö ndra talifusöda si no irai mutiboʼö ba Siberia. Hewaʼae fandröndröu ira ba nösi nomora, ba lafalua khöra zi lö sökhi ba gurunga, lö tebulö sökhi gamuatara. So khöra waʼomuso dödö ba mohiʼa dödöra ba wanuriaigö. Moroi ba duma-dumara mafahaʼö ndraʼaga, hewaʼae alua waʼabasaki, tola taʼokhögö waʼomuso dödö ba faʼanau gölö.

Sagötö ba zi hauga fakhe, oya sibai halöwöma irege lö asese so ginötöma wolombase. Ba gafuriata, asese irasoi Lesli wa erege sibai dödönia. Me luo daʼö lö aboto ba dödöma wa nirasoinia andrö börö wökhö fibromialgia. No saʼae maʼera-era ba wondröi halöwöma ba mangawuli ndraʼaga ba Kanada. Me lakaoni ndraʼaga wefao ba sekolah panitia cabang ba Patterson, New York, AS, lö faduhu dödögu wa tola fao ndraʼaga. Hizaʼi, me no aefa maʼohe daʼö ba wangandrö, matemaʼö wogaoni andrö. Ifahowuʼö Yehowa gangetulama. Me so ndraʼaga ba Amerika, itema Lesli lala wamadöhö fökhö soguna khönia. Aefa daʼö, tola mafuli mafalua halöwöma simane si toʼölö.

BENUA TANÖ BÖʼÖNIA

Samuza inötö me döfi 2008, me toröi nasa ndraʼaga ba Estonia, utema telefo moroi ba gödo sebua ba zi bongi. Lasofu khögu hadia omasiga mangai halöwö ba Kongo. Tokea sibai ndraʼo, mendrua manö börö me moguna ubeʼe wanema li mahemolunia. Uhalö gangetula enaʼö lö ufatunö ba mbongi daʼö khö Lesli, börö me uʼila wa lö iʼila mörö dania. Ba gafuriata, yaʼo zi lö mangila mörö. Ba zi bongi daʼö, lö tebulö uʼohe ba wangandrö waʼaombö-aombö dödö nirasoigu börö me mofanö ndraʼaga ba Afrika.

Mahemolunia, uʼombakhaʼö khö Lesli sanandrösa ba daʼö. Aefa daʼö mamane wangumaʼö, ’Iadaʼa no ikaoni ita Yehowa weʼamöi ba Afrika. Na lö tatandraigö tafalua, lö taʼila hadia tola mangai halöwö ita ba daʼö ba tarasoi waʼomuso dödö.’ Me no 16 fakhe mangai halöwö ndraʼaga ba Estonia, findra ndraʼaga ba Kinshasa, Kongo. So taman si sökhi famaigi ba gödo ndraha andrö. Gama-gama si oföna sibai nibeʼe Lesli ba mbateʼema yaʼia daʼö sagörö karate si no iʼiröʼö me maröi Kanada. Ba garate andrö so ngawua wehede: ”Böi tebulö mobowo ndraʼugö, gofu hezo mutanö.” Me no falukha ndraʼaga ndra talifusöda, fao ba wondröniaʼö famahaʼö ba Zura Niʼamoniʼö, ba no göi marasoi howu-howu tobali utusan injil, itugu marasoi waʼomuso dödö ba halöwöma. Ba gafuriata, mubeʼe halöwöma ba wangondrasi gödo ndraha ba zi 13 soi ba Afrika. Tola maʼila wa oya zadöni dödöda ba niha si toröi ba soi si faböʼö-böʼö andrö. Sindruhunia, hadia niʼaombösima tödö ba wamobörö sanandrösa ba Afrika lö alua daʼö. Maʼandrö saohagölö khö Yehowa me no ifatenge ndraʼaga ba wangai halöwö ba Afrika.

Ba Kongo, asese maʼila ngawalö gö si tebai muʼa ba wamaigima ba wamobörö, duma-dumania serangga. Hizaʼi me maʼila wa laʼa daʼö ira talifusöda, adöni dödöma ba matandraigö maʼa. Sindruhunia sa ami sibai.

Ba mbanua tanö ba gatumbukha Kongo, so ösa ngawawa niha si lö sökhi sanuwö banua sigide-ide, ba lafakao ndra alawe hegöi iraono. Tebeʼe khöma ginötö ba wangabölöʼö ira talifusöda ba daʼö, ba maʼohe wanolo soguna ba waʼaniha. Ato ba gotaluara zinumana sibai. Hizaʼi, tefarou dödöma börö me mamati ira ba dötönafö fanusugi, laʼomasiʼö Yehowa ba lö faröi ira ba organisasinia. Ba duma-dumara andrö, ifuli maʼangeragö hadia mbörö wa mafosumange Yehowa, ba omasiga maʼaroʼö wamatima khönia. So ösa nomo hegöi bua nowi ndra talifusöda nifakiko. Daʼö zamasugi ba dödögu wa tola iʼanemaiʼö taya harato si so ba gulidanö, hizaʼi harato sabölö ebua böli khöda yaʼia daʼö fahuwusada khö Yehowa. Hewaʼae oya waʼabasaki nitaögö ndra talifusöda andrö, lö irai mukökö-kökö ira. Lala wangera-ngerara zanolo yaʼaga enaʼö lö tebulö maʼokhögö waʼahono dödö hewaʼae mataögö waʼabasaki hegöi ngawalö wökhö.

MANGAI HALÖWÖ BA ASIA

So danö böʼö zalua khöma. Laʼandrö khöma enaʼö findra ba gödo ndraha Hong Kong. Lö irai makhalaigö wa toröi ndraʼaga ba benua Asia. Hizaʼi, börö me lö tebulö marasoi wanolo Yehowa ba ngawalö halöwöma, matemaʼö wogaoni andrö. Me 2013, mowöi dawa höröma, börö me maröi zi fahuwu khöma ba benua Afrika si sökhi famaigi, ba lö maʼila hadia zalua khöma ba zi so miföna.

Hong Kong, no banua sebua ba ato niha moroi ba ngawalö soi si toröi ba daʼö, andrö wa faböʼö sibai ia ba Afrika. Tenga saoha wamahaʼö yaʼaga ba li Kanton. Hewaʼae simanö, si fao faʼomasi latemaʼö ndraʼaga ira talifusöda, ba omasiga göi gö si so ba daʼö. Tedou sibai halöwö fanuriaigö ba Hong Kong. Hizaʼi, tebai muʼebuaʼö gödo ndraha börö me itugu tedou mböli danö hegöi tomosa. Börö daʼö, lahalö gangetula ira Boto Solohe ba wamawa ösa danö hegöi tomosa niʼokhögö gödo ndraha. Lö ara aefa daʼö, me döfi 2015, mufataro ndraʼaga ba Korea Selatan irugi iadaʼa. Abua sibai khöma wamahaʼö yaʼaga ba li Korea. Irugi iadaʼa, lö onekhe sibai ndraʼaga ba li daʼö. Hewaʼae simanö, lö tebulö lafarou dödöma ira talifusöda ba lawaʼö khöma no itugu sökhi lalama fahuhuo ba li Korea.

OYA WAMAHAʼÖ SEBUA BÖLI NITEMAMA

Tenga saoha ba wangalui si fahuwu. Hizaʼi mafahaʼö ndraʼaga wa na takaoni niha böʼö ba wariawösa khöda, itugu aboto ba dödöda sanandrösa khöra. Me no aefa fariawö ndraʼaga khö ndra talifusöda, marasoi wa abölö oya waʼafagölö ba gotaluama moroi ba waʼafaehu. Baero daʼö, marasoi göi wa no ibeʼe khöda Yehowa waʼabölö sahöli-höli dödö enaʼö tola tabokai dödöda ba taʼomasiʼö niha sato.—2 Ko. 6:11.

Aboto göi ba dödöma wa moguna maʼokhögö lala wangera-ngera Yehowa sanandrösa ba niha böʼö. Ba moguna maʼalui dandra-tandra sangoromaʼö wa iʼomasiʼö ndraʼaga Yehowa ba ibeʼe khöma wanuturu lala. Ero marasoi waʼide-ide dödö mazui na manofu-nofu dödöma hadia latemaʼöga ira talifusöda, mafuli zui mabaso kartu mazui sura si möi fangabölö moroi khö zi fahuwu khöma. No marasoi samösa wa ibeʼe wanema li ba wangandröma Yehowa, ifaduhuʼö khöma wa iʼomasiʼö ndraʼaga, ba iʼabölöʼö enaʼö anau gölöma.

Sagötö ba zi hauga fakhe me no mangowalu ndraʼaga, mafahaʼöga wa moguna sibai mabeʼe ginötöma khö nawöma zamösana, gofu hawaʼoya halöwöma. Maʼila wa moguna göi malau maʼiki na so zala nifaluama, mendrua manö ba ginötö mafahaʼö ndraʼaga ba li si bohou. Ero bongi, matandraigö maʼangeragö sambua howu-howu Yehowa niʼandröma saohagölö.

Sindruhunia, lö irai ukhalaigö wa tobali ndraʼo utusan injil mazui toröi ba soi böʼö. Hizaʼi, no urasoi samösa wa börö wanolo moroi khö Yehowa lö hadöi si tebai alua. Itörö tödögu wehede zamaʼeleʼö sotöi Yeremia wa hulö ’no ilimo ia Yehowa’. (Yer. 20:7) Oya zahöli-höli dödö hegöi howu-howu nibeʼe Yehowa khöma si lö irai makhalaigö ba zilalö. Itehegö khögu ba wanörö köfa sihombo weʼamöi ba soi böʼö. No maʼondrasi ösa gödo ndraha ba ngawalö soi ba zi lima benua. Lö irai ukhalaigö me ide-idedo wa tola utöröi fefu mbanua daʼö. Aoha gölö Lesli ba wotuhini yaʼo ba lala halöwögu, ba uʼandrö sibai saohagölö.

Maforege enaʼö lö olifuga wa mafalua fefu daʼa börö me maʼomasiʼö Yehowa. Howu-howu nitemama iadaʼa ha khala-khala moroi ba waʼauri si lö aetu ba zi so miföna. Ba ginötö daʼö, ’ibokai dangania Yehowa ba iʼabusoiʼö fefu zauri somasi dödöra’.—Si. 145:16.