Talifusöma Ono Alawe—Yatobali Ami Niha Keriso Saro ba Wamati

1. Hadia zinangea tafalua enaʼö tobali ita niha Keriso saro ba wamati?

TATU ahöli-höli dödöda me alio sibai waʼatedou ndraono tobali satua. Hulö aoha sibai ba wamaigida waʼatedoura. Hizaʼi, tenga simane daʼö waʼatedou niha Keriso saro ba wamati.b (1 Ko. 13:11; Heb. 6:1) Enaʼö tola takhamö daʼö, moguna taʼaroʼö wahuwusada khö Yehowa. Moguna khöda waʼabölö geheha niʼamoniʼö enaʼö tola taʼokhögö gamuata niha Keriso, tafahaʼö ita ba nekhe-nekhe danga, ba tafaʼanö ita ba wanema halöwö sebua ba zi so miföna.—Amd. 1:5.

2. Hadia wamahaʼö nihalöda moroi ba 1 Moze 1:27, ba hadia nitutunöda ba artikel daʼa?

² Yehowa zomböi ira alawe hegöi ira matua. (Baso 1 Moze 1:27.) Hewaʼae faböʼö mboto ndra matua moroi ba ndra alawe, so nasa gamaehutara tanö böʼö. Duma-dumania, iwöwöi Yehowa ndra matua hegöi ira alawe enaʼö lafalua halöwöra zamösana. Börö daʼö, moguna khöra gamuata hegöi faʼatua-tua ba wamalua halöwö daʼö. (1 Mo. 2:18) Ba artikel daʼa, tatutunö dania hadia zi tola lafalua ira talifusöda ira alawe si bohou ebua enaʼö tobali ira niha Keriso saro ba wamati. Ba artikel aefa daʼa göi, tatutunö dania hadia nifalua ndra talifusöda ira matua si bohou ebua.

OKHÖGÖ GAMUATA NIHA KERISO

3-4. Hezo lasöndra ira talifusöda ono alawe duma-duma si sökhi sinangea laʼoʼö? (Faigi göi gambara.)

³ Ba Zura Niʼamoniʼö, ato ndra alawe si tobali duma-duma ba wangomasiʼö hegöi ba wamosumange Yehowa. (Faigi artikel ba jw.org ”Apa yang Bisa Kita Pelajari dari Para Wanita di Alkitab?”) Yaʼira andrö ira alawe sangokhögö amuata si sökhi simane nitutunö ba duho ayati moroi yawa. Duma-dumania, ’laʼila lafatörö waʼaurira’ ba ”lö faröi ba ngawalö hadia ia”. Ato göi ndra talifusöda ira alawe ba mbanua niha Keriso iadaʼa si tobali duma-duma si sökhi.

⁴ Yaʼami ono alawe si bohou ebua, hadia so niʼilami ndra talifusöda ira alawe saro ba wamati si tola mibaliʼö duma-duma ba wamalua si sökhi? Nehegö gamuatara si sökhi ba angeragö hewisa woloʼömö duma-dumara. Ba ngenoli aefa daʼa, tatutunö dania tölu ngawalö gamuata si sökhi sinangea laʼokhögö ira talifusöda ira alawe saro ba wamati.

5. Hana wa moguna laʼokhögö wangide-ngideʼö ira talifusöda ono alawe saro ba wamati?

⁵ Niha Keriso saro ba wamati moguna laʼokhögö wangide-ngideʼö. Hadia mbörö? Na iʼokhögö wangide-ngideʼö si samösa talifusöda ira alawe, iʼokhögö wahuwusa si sökhi khö Yehowa hegöi ba niha böʼö. (Yak. 4:6) Duma-dumania, samösa dalifusöda ira alawe sangomasiʼö Yehowa, tatu si fao fangide-ngideʼö iʼoʼö gamakhoita si no itatugöi Amania ba zorugo ba 1 Korindro 11:3. Itutunö ba ayati daʼö wa no itatugöi Yehowa haniha zi tobali sondröniaʼö ba mbanua niha Keriso hegöi yomo ba nomo.c

6. Hadia wamahaʼö si tola lahalö iraono alawe moroi ba wangide-ngideʼö Rebeka?

⁶ Datanehegö duma-duma Rebeka. Yaʼia andrö ira alawe si lö faʼataʼu ba satua-tua ba wangai angetula. Iʼila hawaʼara ba hadia zinangea ifalua. (1 Mo. 24:58; 27:5-17) Hewaʼae simanö, ifosumange niha böʼö ba so khönia woloʼö. (1 Mo. 24:17, 18, 65) Simane Rebeka, na öʼoʼö si fao fangide-ngideʼö gamakhoita nibeʼe Yehowa, no tobali ndraʼugö duma-duma si sökhi ba mbanua niha Keriso hegöi ba nösi nomomö.

7. Hadia wamahaʼö si tola lahalö iraono alawe moroi khö Gesitera?

⁷ Amuata sinangea laʼokhögö ira talifusöda saro ba wamati yaʼia daʼö laʼila wa so zi tebai lafalua. Ifarou ita Sura Niʼamoniʼö enaʼö taʼokhögö wangide-ngideʼö ba taʼila wa so nola-ola zi tola tafalua. (Amd. 11:2) Duma-dumania Esitera. Yaʼia andrö ira alawe samati ba sangila wa so zi tebai ifalua. Börö daʼö lö khönia faʼasiliyawa hewaʼae no tobali ia ratu. Lö tebulö ifondrondrongo ba iʼoʼö wanuturu lala nibeʼe Morodokhai, gaʼania si fasambua ama. (Est. 2:10, 20, 22) Simane Esitera, tola öforomaʼö wa so nola-ola zi tola öfalua yaʼia na öʼandrö wanuturu lala si sökhi ba niha böʼö ba öfalua daʼö.—Tit. 2:3-5.

8. Moloʼö 1 Timoteo 2:9, 10, hewisa zi samösa talifusöda ira alawe wangai angetula si tefaudu sanandrösa ba lagu wonukha?

⁸ So nasa nifalua Gesitera sangoromaʼö wa iʼokhögö gamuata si sökhi andrö. Hewaʼae ’no baga-baga ia ba adöni dödö niha khönia’, hizaʼi lö iʼalui lala enaʼö abölö tohude ia moroi ba niha böʼö. (Est. 2:7, 15) Hadia wamahaʼö nihalö ndra talifusöda ira alawe moroi ba duma-duma Gesitera? Tola taʼila daʼö ba 1 Timoteo 2:9, 10. (Baso.) Iʼamenesi ndra alawe niha Keriso Faulo enaʼö lahaogö ira faoma nukha soadu ba sinangea. Ngawua wehede Yunani niʼogunaʼönia, daʼö zangoromaʼö wa ira alawe niha Keriso moguna lahaogö enaʼö sökhi lagu wonukhara ba laʼangeragö hewisa dödö niha böʼö. Tasuno sibai ndra talifusöda ira alawe soloʼö mene-mene daʼa!

9. Hadia wamahaʼö si tola tahalö moroi ba duma-duma Abigaila?

⁹ Fefu ndra talifusöda ira alawe saro ba wamati, moguna göi laʼokhögö wangera-ngera si sökhi. Eluahania, laʼokhögö waʼatua-tua ba wangiʼila hezo zatulö ba hezo zi fasala, ba ifili ba wamalua satulö. Nehegö duma-duma Abigaila. So gangetula si lö sökhi nifalua woʼomonia ba ebua sibai lua-lua gangetula daʼö ba nösi nomonia. Iʼanemaiʼö so nifalua Abigaila. Börö me iʼokhögö wangera-ngera si sökhi, ihalö gangetula si tobali fangorifi nösi nomonia. (1 Sa. 25:14-23, 32-35) Faʼatua-tua simane daʼö zanolo yaʼita ba wangiʼila hawaʼara fahuhuo ita ba hawaʼara talau zi lö hede-hede. Daʼö göi zanolo yaʼita ba ginötö fahuhuo ba niha böʼö enaʼö böi tazofu-zofu zi tenga urusada mazui ngawalö zi lö omasi ira latutunö.—1 Te. 4:11.

FAHAʼÖ NDRAʼUGÖ BA WAʼONEKHE SI TOLA ÖʼOGUNAʼÖ ERO MAʼÖKHÖ

10-11. Na onekhe ndraʼugö manura hegöi mombaso, hadia mbua nitemamö ba hadia gunania ba niha böʼö? (Faigi göi gambara.)

¹⁰ Ira alawe niha Keriso, moguna lafahaʼö ira ba nekhe-nekhe danga. So ösa nekhe-nekhe danga nifahaʼö iʼotarai ba waʼide-ide, ba moguna daʼö sandrohu faʼaurira. Nehegö duma-dumania.

¹¹ Fahaʼö ndraʼugö enaʼö itugu onekhe ba wombaso hegöi ba wanura. Ba zi hauga soi, lö toʼölö ba ndra alawe na lafahaʼö ira ba wombaso hegöi manura. Hizaʼi sindruhunia, moguna sibai daʼö ba niha Keriso maʼafefu.d (1 Ti. 4:13) Börö daʼö, böi tehegö so zi tobali taha-tahamö ba wamahaʼö yaʼugö ba wombaso hegöi manura. Hadia mbuania na onekhe ndraʼugö wamalua daʼö? Aoha khöu ba wanöndra halöwö, ba sökhi wamaluamö halöwömö. Tola tobali ndraʼugö nifahaʼö ba samahaʼö si sökhi ba Daromali Lowalangi. Ba sabölö tohude, börö me tola öbaso ba öʼangerönusi Daromali Yehowa, tola itugu ahatö ndraʼugö khönia.—Yos. 1:8; 1 Ti. 4:15.

12. Hadia wamahaʼö si tola öhalö moroi ba Gamaedola 31:26?

¹² Fahaʼö ndraʼugö enaʼö itugu sökhi lagu wahuhuosamö. Moguna laforege wamalua daʼö ira niha Keriso. Ibeʼe khöda mene-mene si sökhi Yakobo, ”Dozi niha yamuʼalioʼö wamondrongo, böi yamufahulö wehede.” (Yak. 1:19) Na öhaogö öfondrondrongo ba ginötö fahuhuo niha böʼö, eluahania no öʼameʼegö tödö ira mazui örasoi nirasoira. (1 Fe. 3:8) Na ambö aboto ba dödöu hadia geluaha wehede mazui nirasoi zi samösa niha, haogö wanofu khönia. Aefa daʼö, haogö era-era sabata fatua lö fahuhuo ndraʼugö. (Amd. 15:28, nis.) Sofu khöu samösa, ’Hadia atulö ba möi famarou dödö wehedegu andre? Hadia sökhi ba lö möi fangoʼaya niha böʼö?’ Fahaʼö ndraʼugö moroi khö ndra talifusöda ira alawe sonekhe fahuhuo. (Baso Gamaedola 31:26.) Nehegö na fahuhuo ira. Na lö öböhöli wamahaʼö yaʼugö ba lagu wahuhuosa si sökhi, itugu sökhi gamakhaitamö ba niha böʼö.

13. Hewisa enaʼö toʼölö ndraʼugö ba wombambaya halöwö yomo ba nomo? (Faigi göi gambara.)

¹³ Fahaʼö ndraʼugö ba halöwö yomo ba nomo. Ba zi hawaʼoya soi, ira alawe zabölö mangonorogö tödö halöwö yomo ba nomo. Te no ifahaʼö ndraʼugö inamö mazui ira talifusömö alawe tanö böʼö ba wombambaya halöwö yomo ba nomo. Imane si samösa talifusöda ira alawe sotöi Cindy, ”Sambua mbuala sebua böli nibeʼe ninagu yaʼia daʼö ifahaʼö ndraʼo wa tola usöndra waʼomuso dödö na no uforege wohalöwö. Börö me ufahaʼö ndraʼo ba wondrino, ba wamöföʼö omo, managu nukha, hegöi ba wowöli soguna, daʼö zanolo yaʼo ba wombambaya gofu hadia halöwö ba oya zi tola ufalua ba wangai halöwö khö Yehowa. Ifahaʼö göi ndraʼo inagu enaʼö oböwö ndraʼo ba niha, irege tola fariawö ndraʼo khö ndra talifusöda tanö böʼö si tola ubaliʼö duma-duma.” (Amd. 31:15, 21, 22) Ira alawe sowölö-ölö, soböwö, ba si no toʼölö mombambaya halöwö yomo ba nomo, no tobali ira buala si sökhi ba nösi nomo hegöi ba mbanua niha Keriso.—Amd. 31:13, 17, 27; Hal. 16:15.

14. Hadia wamahaʼö nihalömö moroi ba zalua khö Crystal, ba hezo zinangeania öʼosambuaʼö dödömö?

¹⁴ Fahaʼö ndraʼugö ba wombönökhi soguna khöu. Moguna sibai lafalua daʼa ira niha Keriso saro ba wamati. (Fil. 4:11) Imane talifusöda sotöi Crystal, ”Lafarou ndraʼo ira satuagu enaʼö ufahaʼö ndraʼo ba nekhe-nekhe danga ba zekola. Iwaʼö bapagu enaʼö uhalö jurusan Akutansi, sanolo yaʼo ba wanöndra halöwö.” Lö ibönö na ha tafahaʼö ita ba wangalui kefe, hizaʼi enaʼö atua-tua ba wangogunaʼö yaʼia, irege lö ebua gefe niʼogunaʼöda moroi ba zinöndrada. (Amd. 31:16, 18) Na ahono dödöu ba zi no so ba lö öʼöli-öli manö fefu niʼila höröu, daʼö zanolo yaʼugö ba wogamö ohitö dödö ba wamati.—1 Ti. 6:8.

FAʼANÖ NDRAʼUGÖ WAMALUA HALÖWÖ NITEMAMÖ BA ZI SO MIFÖNA

15-16. Hana wa tobali howu-howu sebua böli ndra talifusöda ira alawe si lö sangowalu? (Mareko 10:29, 30)

¹⁵ Na öʼokhögö mbua-bua si sökhi hegöi nekhe-nekhe danga, daʼö zanolo yaʼugö ba wamalua halöwö nitemau ba zi so miföna. Datatutunö hadia manö duma-dumania.

¹⁶ Böi aösö-aösö ae nihalö. Simane niwaʼö Yesu, so ösa nono alawe sangai angetula wa lö omasi ira möi nihalö, hewaʼae lö toʼölö daʼö ba mbanua si toröi yaʼira. (Mat. 19:10-12) So göi danö böʼö zi lö mangowalu börö zalua ba waʼaurira. Yafaduhu dödöu wa lö tebulö ebua mbölimö föna Yehowa hegöi Yesu hewaʼae lö sangowalu ndraʼugö. Ba zi sagörö ulidanö, ira talifusöda si lö sangowalu no tobali ira duma-duma si sökhi ba mbanua niha Keriso. Börö me laʼomasiʼö ba laʼameʼegö tödö niha böʼö, daʼö mbörö wa tobali ira talifusö ira alawe hegöi ina ba wamati khö ndra talifusö sato.—Baso Mareko 10:29, 30; 1 Ti. 5:2.

17. Hewisa ndra talifusöda ono alawe iadaʼa ba wamaʼanöra yaʼira ba wangai halöwö safönu inötö?

¹⁷ Tola öhalö halöwö safönu inötö. Oya zi tola lafalua ira talifusöda ira alawe ba halöwö fanuriaigö ba zi sagörö ulidanö. (Si. 68:11) Hadia no öʼera-era iʼotarai iadaʼa ba wangai halöwö safönu inötö? Tola tobali ndraʼugö perintis, sohalöwö ba konstruksi mazui ba Mbetieli. Ohe ba wangandrö gohitö dödö somasiʼö. Tutunö daʼö ba niha si no mogamö ohitö dödöra ba wamati ba alui lala hadia zinangea öfalua ba wogamö ohitö dödöu. Tatugöi hadia zinangea öfalua ba wogamö yaʼia. Na tobali ndraʼugö sangai halöwö safönu inötö, oya zi tola öfalua ba wangai halöwö khö Yehowa.

18. Hana wa moguna sibai ihaogö talifusöda ono alawe ba wamili niha si tobali ngambatönia? (Faigi göi gambara.)

¹⁸ Tola ötatugöi hawaʼara möiʼö nihalö. Amuata hegöi ngawalö waʼonekhe nitutunöda moroi yawa, möi fanolomö daʼö enaʼö tobali ndraʼugö foʼomo ira alawe si sökhi. Hewaʼae simanö, moguna sibai öhaogö ba wamili haniha zi tobali ngambatömö dania. Daʼa sambua gangetula sebua nihalömö ba waʼauri. Böi olifu ndraʼugö wa lö tola löʼö moguna öʼoʼö hadia niwaʼö woʼomomö ira matua. (Rom. 7:2; Ef. 5:23, 33) Börö daʼö, sofu khöu samösa, ’Hadia niha saro ba wamati ndra matua nifiligu? Hadia iʼofönaiʼö Yehowa ba waʼaurinia? Hadia atua-tua ia ba wangai angetula? Hadia ifaduhuʼö na fasala ia? Hadia ifosumange ndra alawe? Hadia tola itolo ndraʼo ba wangaʼaroʼö fahuwusagu khö Yehowa, ibönökhi zoguna khöma yomo ba nomo, ba tobali ia si fahuwu si sökhi? Hadia tola iʼonorogö tödö halöwö nitemania? Duma-dumania, hadia halöwö nitemania ba mbanua niha Keriso ba hewisa wamaluania daʼö?’ (Luk. 16:10; 1 Ti. 5:8) Tatu manö, na omasi ndraʼugö ösöndra woʼomo si sökhi, moguna göi öfaʼanö ndraʼugö tobali foʼomo ira alawe si sökhi.

19. Me mubeʼe noro dödö khö woʼomo ira alawe tobali ”sanolo”, hana wa tohude sibai daʼö?

¹⁹ Itutunö Sura Niʼamoniʼö wa foʼomo ira alawe si sökhi, tobali ia ’fanolo’ khö woʼomonia ira matua. (1 Mo. 2:18) Hadia daʼö geluahania wa ambö tohude woʼomo ira alawe? Tenga! No sambua töi si sökhi khö woʼomo ira alawe me mubeʼe khönia halöwö tobali ”sanolo”. Törö tödöu wa asese iwaʼö Sura Niʼamoniʼö, Yehowa andrö ’sanolo’. (Si. 54:4; Heb. 13:6) Tola tobali sanolo si sökhi zi samösa foʼomo ira alawe na ituhini woʼomonia ira matua. Duma-dumania, ba ginötö ihalö gangetula foʼomo ira matua soguna ba nösi nomonia, ituhini daʼö enaʼö mofozu. Börö me iʼomasiʼö göi Yehowa, itolo woʼomonia ba wangokhögö töi si sökhi. (Amd. 31:11, 12; 1 Ti. 3:11) Tola öfaʼanö ndraʼugö iadaʼa enaʼö tobali foʼomo si sökhi yaʼia na ödouʼö waʼomasimö khö Yehowa ba ötolo nösi nomou hegöi ira talifusö ba mbanua niha Keriso.

20. Hadia zi sökhi nifalua zi samösa ina ba nösi nomonia?

²⁰ Tola tobali ndraʼugö si samösa ina. Me no aefa mangowalu ndraʼugö, tola manö tumbu khöu ndraono. (Si. 127:3) Sökhi na öʼangeragö hewisa enaʼö tobali ndraʼugö ina si sökhi. Amuata hegöi ngawalö waʼonekhe nitutunöda ba artikel daʼa, möi fanolomö enaʼö tobali ndraʼugö foʼomo hegöi ina si sökhi. Na so khöu waʼomasi, faʼasökhi dödö, hegöi faʼebolo dödö, no ötolo nösi nomomö enaʼö larasoi waʼomuso dödö, no ölumöʼö ba öʼomasiʼö ira.—Amd. 24:3.

21. Hewisa dödöda khö ndra talifusöda ira alawe, ba hadia mbörö? (Faigi gambara ba guli majalah.)

²¹ Maʼomasiʼö sibai ami, yaʼami ira talifusöma ira alawe börö me oya zi no mifalua khö Yehowa hegöi ba nono mbanuania. (Heb. 6:10) No miforege wangokhögö amuata niha Keriso, mifahaʼö ami ba ngawalö waʼonekhe soguna ba waʼaurimi hegöi ba niha böʼö, ba no mifaʼanö ami ba wanemaʼö halöwö sebua ba zi so miföna. Sindruhu-ndruhu wa no howu-howu ami ba organisasi Yehowa!