Okhögö Lala Wangera-ngera Lowalangi Sanandrösa ba Duo

NO TARASOI samösa wa oya sibai mbuala nibeʼe Yehowa khöda. Taʼandrö sibai saohagölö me no itehegö khöda ba wamili hewisa lalada ba wangogunaʼö buala andrö. Itutunö khöda Sura Niʼamoniʼö wa agu andrö no buala Lowalangi. Imane, ”Muhenaigö roti enaʼö maʼiki, ba tobali fangomuso dödö wamadu agu.” (Sango. 10:19; Si. 104:15) Hizaʼi, te simane si no öʼila, ato niha si tebai manaha tödönia irege oya sibai ibadu duo. No göi faböʼö-böʼö mbua gera-era niha ba zi sagörö ulidanö sanandrösa ba duo. Börö daʼö, hadia zanolo niha Keriso ba wangai angetula si sökhi sanandrösa ba wamadu tuo?

Gofu hezo toröi mazui teʼebuaʼö ita, moguna taʼodaligö mene-mene hegöi fanuturu lala moroi khö Yehowa ba ginötö tahalö gangetula. Daʼa lala enaʼö tasöndra waʼomuso dödö ba waʼauri.

Simane si no taʼila, ato niha ba zi sagörö ulidanö, asese ba oya sibai ero na labadu duo. So zamadu tuo enaʼö tola ahono dödöra. So göi zamadu enaʼö taya waʼaombö dödö nirasoinia ba gabula dödö salua. Ba nahia böʼö, so niha sangumaʼö wa niha soya mamadu tuo, daʼö niha sabölö ba si pade.

Hizaʼi, ira niha Keriso no tebeʼe khöra wanuturu lala si sökhi moroi khö Zomböi yaʼira safönu faʼomasi. Duma-dumania, itutunö khöda hadia lua-luania na talafo oya tabadu duo. Ba Gamaedola 23:29-35, itutunö ba daʼö sanandrösa khö zi samösa niha samadu tuo hegöi lua-lua nitaögönia.a Ifuli itörö tödö Daniel, samösa satua sokubaloi ba Eropa, hewisa waʼaurinia fatua lö tobali ia niha Keriso. Imane, ”Oya sibai ubadu duo, ba daʼö mbörö wa oya gangetula si fasala nihalögu. Oya zi lö sökhi salua khögu ba lö tebulö urasoi waʼafatö dödö ero na ifuli itörö tödögu daʼö.”

Hewisa enaʼö tola lahalö gangetula si sökhi ira niha Keriso ba lö göna ira abula dödö börö me talafo oya mamadu tuo? Yaʼia daʼö na laʼokhögö lala wangera-ngera Lowalangi ba wangai angetula.

Datafareso hadia niwaʼö Zura Niʼamoniʼö sanandrösa ba wamadu tuo, ba hadia mbörö wa so ösa niha samadu tuo.

GOI-GOI ZURA NIʼAMONIʼÖ

Lö nitegu Daromali Lowalangi ita ba wamadu tuo. Sindruhunia, no iwaʼö Sura Niʼamoniʼö wa so waʼomuso dödö na tabadu duo. Imane, ”Omusoiʼö dödöu ba wemanga göu, badu nagu andrö khöu si fao faʼomuso dödö.” (Sango. 9:7) Itaria ibadu nagu Yesu, simanö göi genoni Yehowa si lö faröi ba götö föna.—Mat. 26:27-29; Luk. 7:34; 1 Ti. 5:23.

Hizaʼi, iʼamenesi ita Taromali Lowalangi enaʼö böi tabadu duo irege mabu. Imane, ”Böi mabu ami agu.” (Ef. 5:18) Aefa daʼö imane nasa, ”Tuka mabu . . . tebai tefaʼamöi ba Wamatörö Lowalangi.” (1 Ko. 6:10) Ba daʼa taʼila wa fatuwu sibai Yehowa ba niha samadu-madu tuo irege mabu. Moroi na tagoʼö-goʼö manö zi toʼölö mufalua ba mbanua si toröi yaʼita, abölö sökhi na taʼameʼegö tödö lala wangera-ngera Lowalangi.

So zangumaʼö wa lö mabu ira hewaʼae na oya labadu duo. Hizaʼi, sindruhunia fasala lala wangera-ngera simane daʼö. Imane Sura Niʼamoniʼö wa niha ”samadu-madu tuo”, tola tedönisi dödönia ba wamalua horö si möi famakiko wahuwusania khö Yehowa. (Tit. 2:3; Amd. 20:1) No ifangelama ita Yesu wa ”famadu-madu”, tola tobali taha-taha khö zi samösa niha irege lö tefaʼamöi ia ba gulidanö si bohou. (Luk. 21:34-36) Na simanö, hadia zi tola manolo yaʼita enaʼö böi alua khöda gabula dödö börö wamadu-madu tuo?

ANGERAGÖ HANA WA ÖBADU DUO BA HAWAʼOYA

Tobali teʼala ba zi samösa niha na iʼodaligö zi toʼölö mufalua ba mbanuania sanandrösa ba wamadu tuo. Niha Keriso satua-tua, iforege wangai angetula sangomusoiʼö tödö Yehowa sanandrösa ba gö hegöi nibadu. Ifangelama ita Sura Niʼamoniʼö, ”He si manga ami mazui samadu ba gofu hadia nifaluami, mifalua ia ba wamolakhömi Lowalangi.” (1 Ko. 10:31) Haogö angeragö wanofu-nofu hegöi goi-goi Zura Niʼamoniʼö andre:

Hadia ubadu duo enaʼö fahuwu khögu niha böʼö? Imane 2 Moze 23:2, ”Böi oʼö niha sato.” Ifangelama ndraono Gizaraʼeli Yehowa enaʼö lö laʼoʼö niha sato si lö mangomusoiʼö tödönia. Moguna göi khöda wamangelama daʼö iadaʼa yaʼita niha Keriso. Na tatehegö niha böʼö zondrönisi lala wangera-ngerada hegöi angetulada sanandrösa ba wamadu-madu tuo, tola manö taröi Yehowa hegöi goi-goinia.—Rom. 12:2.

Hadia ubadu duo ba wangoromaʼö faʼabölögu? Ba zi hauga soi, no si toʼölö na asese ba oya labadu duo. (1 Fe. 4:3) Hizaʼi, nehegö mene-mene nisura ba 1 Korindro 16:13, ”Andrö böi miförö, miʼaroʼö ami ba wamati, yasimane ira matua ami. Yaʼabölö ami.” Hadia tola sindruhu-ndruhu iʼabölöʼö zi samösa niha tuo andrö? Tatu manö löʼö. Börö duo wa tola tekiko lala wangera-ngera zi samösa niha ba ihalö gangetula si fasala. Tobali, niha soya mamadu tuo, tenga niha sabölö, hizaʼi niha si tebai. Itutunö khöda Yesaya 28:7 wa tuo tobali börö wa elungu zi samösa niha, mangole-ngolea wofanönia ba manendre ia.

Faʼabölö sindruhu tohare ia moroi khö Yehowa. Ba enaʼö tola taʼokhögö daʼö, moguna böi mörö ba aro ita ba wamati. (Si. 18:32) Eluahania, moguna mangelama ita, taʼaröuʼö ita moroi ba deʼala ba lö tahalö gangetula si möi famakiko wahuwusada khö Yehowa. No iforomaʼö waʼabölö simane daʼö Yesu me so ia ba gulidanö, ba ato zamosumange yaʼia börö me barani ba lö tebulö ifalua zatulö.

Hadia ubadu duo enaʼö aheta gabula dödögu? Samösa zanura buku Zinunö niʼehehaini Lowalangi imane, ”Me ihawui ndraʼo faʼaombö dödö, örara dödögu [Yehowa] ba öʼokafui.” (Si. 94:19) Na göna ndraʼugö abula dödö sabua, andrö wanolo moroi khö Yehowa, tenga öduhugö wamadu tuo. Lala sabölö sökhi enaʼö tola alö waʼaombö dödömö yaʼia daʼö aseseʼö wangandrö khö Yehowa. Aefa daʼö, ato göi zanema bua börö me laʼalui niha ba gangowuloa si tola mameʼe khöra mene-mene. Na ibadu duo si samösa niha ha enaʼö aheta ia ba gabula dödö, sindruhunia daʼö zowuwu faʼaro dödönia ba wolawa fondrönisi dödö hegöi ba wamalua satulö. (Hos. 4:11) Imane Daniel si no mutötöi moroi yawa mege, ”Uforege wolawa faʼaombö dödö hegöi fatahi-tahisa. Daʼö mbörö wa ubadu duo. Hizaʼi, itugu monönö gabula dödögu, laröi ndraʼo si fahuwu khögu ba lö eluaha waʼaurigu.” Hadia zanolo Daniel ba gafuriata? Imane, ”Aboto ba dödögu wa moguna fao khögu Yehowa, tenga tuo. Ba gafuriata tola ulawa ba utaögö gabula dödögu.” Sindruhunia, lö tebulö itolo ita Yehowa hewaʼae na aetu wanötönada börö zalua khöda.—Fil. 4:6, 7; 1 Fe. 5:7.

Na itaria öbadu duo, sökhi na öfareso hawaʼasese mazui hawaʼoya öbadu ia. Sofu khöu samösa, ’Hadia asese lategu-tegu ndraʼo ira ösi nomogu mazui si fahuwu khögu börö me asese ubadu duo?’ Na yaʼia, daʼö zangoromaʼö wa no ibörögö mowaʼa ba dödömö wamalua daʼö. ’Hadia oya ubadu duo moroi ba zi toʼölö?’ Na daʼö zalua, no ibörögö oroma wa sandru ndraʼugö. ’Hadia abua khögu wamalua halöwögu na lö ubadu duo ba zi hauga hari?’ Na simanö, no sindruhu-ndruhu sandru ndraʼugö. Eluahania moguna khöu wanolo moroi khö ndra doto ba wamöhöli wamadu tuo.

Börö me oya gabula dödö salua ba wamadu tuo, so ösa niha Keriso sangai angetula wa lö saʼae labadu duo. So göi zi lö omasi mamadu tuo börö me lö ami worasoinia. Na so zi fahuwu khöu sangai angetula simane daʼö, tola öforomaʼö waʼasökhi dödö, yaʼia na öfosumange ba lö öfaso ia ba gangetula nihalönia.

Te no öhalö gangetula wa abölö sökhi na öbeʼe nola-ola ba wamadu tuo. Te moguna ötatugöi hawaʼoya ba hawaʼasese öbadu ia, duma-dumania sakali samigu mazui öbadu maʼifu ba ginötö wemanga. So göi danö böʼö zotatugöi hadia duo somasi ira labadu, duma-dumania labadu agu mazui bir, hizaʼi lö oya-oya, ba lö labadu duo salawa alkohol hewaʼae na lafaruka daʼö ba danö böʼö. Na no ibeʼe nola-ola si samösa niha ba waʼaurinia, abölö aoha khönia ba wangalösi wamadu tuo. Niha Keriso saro ba wamati, lö moguna aila ia ba niha böʼö börö me no ihalö gangetula simane daʼö, ba moguna iforege wamalua yaʼia.

Moguna göi taʼangeragö hewisa dödö niha böʼö. Imane Roma 14:21, ”Sökhi na lö muʼa nagole mazui mubadu nagu ba gofu hadia nifaluami, moroi na tobali fangala khö dalifusömi.” Hewisa wamaluamö mene-mene daʼö? Foromaʼö waʼomasi. Na öʼila wa möi fangala niha böʼö na öbadu duo, faʼomasi zamarou yaʼugö enaʼö lö öbadu ia ba ginötö daʼö. Na öfalua daʼö, no öforomaʼö waʼomasi ba öʼameʼegö tödö ira moroi ba zomasi-masi dödöu.—1 Ko. 10:24.

Baero daʼö, te so göi gamakhoita nibeʼe ndra samatörö sanandrösa ba wamadu tuo. Tatu laʼoʼö goi-goi daʼö ira niha Keriso. Te no latatugöi hauga ndröfi niha si tola mamadu tuo, labeʼe gamakhoita wa tebai muʼohe moto, hondra mazui wangogunaʼö alat berat na no aefa mubadu duo.—Rom. 13:1-5.

Oya mbuala sahöli-höli dödö nibeʼe Yehowa khöda, ba no itehegö khöda ba wamili hewisa lalada ba wangogunaʼö buala andrö. Farahu ba daʼö ba wangai angetula hadia niʼada mazui hadia nibaduda. Tatötöna enaʼö möi fangomuso dödö Namada si so ba zorugo fefu gangetula nihalöda andrö. Daʼö zangoromaʼö wa taʼameʼegö tödö mbuala nibeʼenia.