Yabarani Ndraʼugö Simane Sadoki

1-2. Haniha Zadoki andrö? (1 Ngaʼötö 12:​22, 26-28)

KHALAIGÖ zalua andre. Töra 340.000 ndra matua owulo ira ba wombaliʼö Dawido tobali razo ba ndraono Gizaraʼeli maʼafefu. Sagötö zi tölu hari, terongo misa ba hili-hili sokara sahatö ba Heberona na maʼiki ira, fahuo-huo, hegöi me manunö ira ba wanuno Yehowa. (1 Ng. 12:39) So samösa moroi ba gotaluara zi bohou ebua töinia Sadoki. Te lö tohude ia ba gotalua ndra matua si hauga ribu andrö. Hizaʼi, no itatugöi Yehowa enaʼö taʼila wa so Zadoki ba daʼö. (Baso 1 Ngaʼötö 12:​22, 26-28.) Haniha Zadoki andrö?

² Sadoki andrö samösa ere, falulu fohalöwö ia khö Gere Sebua sotöi Abiataro ba fahuwu sibai ira. Sadoki andrö göi samösa sangiʼila yaʼia daʼö niha sanöndra faʼatua-tua sahöli-höli dödö ba tola aboto ba dödönia gohitö dödö Lowalangi. (2 Sa. 15:27) Si toʼölönia, laʼalu-alui ia ira niha sato ba wangandrö khönia fanuturu lala. Sadoki andrö göi niha si lö faʼataʼu. Daʼö gamuata nitutunöda ba wamahaʼö daʼa.

3. (a) Hana wa moguna waʼabarani ba nono mbanua Yehowa? (b) Hadia nitutunöda ba artikel daʼa?

³ Ba ngaluo safuria andre, itugu iforege Satana ba wolohi ono mbanua Lowalangi. (1 Fe. 5:8) Börö daʼö, moguna khöda waʼabarani gasa-gasa wombaloida inötö si no itatugöi Yehowa ba wangohori Satana hegöi ulidanö si lö sökhi andre. (Si. 31:24) Datatutunö tölu lala enaʼö tola taʼoʼö waʼabarani Zadoki.

TATUHINI WAMATÖRÖ LOWALANGI

4. Hadia mbörö wa moguna waʼabarani ba nono mbanua Yehowa ba wotuhini Famatörö Lowalangi? (Faigi göi gambara.)

⁴ Yaʼita ono mbanua Yehowa, soroi ba dödöda tatuhini Wamatörö Lowalangi, hizaʼi moguna khöda waʼabarani ba wamalua daʼö. (Mat. 6:33) Duma-dumania, moguna khöda waʼabarani ba gulidanö si lö sökhi andre ba woloʼö goi-goi Yehowa hegöi ba wanuriaigö turia somuso dödö sanandrösa ba Wamatörö Lowalangi. (1 Te. 2:2) Moguna göi khöda waʼabarani enaʼö lö faʼawö dambai ita ba politik gulidanö andre si lö fahasara dödö. (Yoh. 18:36) Ato nono mbanua Yehowa zanaögö faʼatosasa ba wangalui soguna, lafakao ira, mazui labeʼe ira ba gurunga börö me lö omasi ira fao ba politik mazui tobali saradadu.

5. Hana wa moguna waʼabarani khö Zadoki ba wotuhini Dawido?

⁵ Möi Zadoki ba Heberona fao ia ba niha sato tenga ha ba wangowasaini hegöi ba wombaliʼö Dawido tobali razo. Hizaʼi, no iʼohe wangönania ba no ifaʼanö ia fasuwö. (1 Ng. 12:38) Itehegö waʼaurinia weʼamöi fasuwö awö Dawido hegöi ba wolumöʼö iraono Gizaraʼeli moroi ba nudu. Tola manö tenga saradadu si toʼölö fasuwö Zadoki andre, hizaʼi so khönia waʼabarani.

6. Hewisa duma-duma Dawido tobali fanolo khö Zadoki irege barani ia? (Sinunö 138:3)

⁶ Hewisa wa tola iʼokhögö waʼabarani Sadoki hewaʼae yaʼia samösa ere? Tatu manö iʼoʼö duma-duma ndra matua sagabölö hegöi si barani si so ba zi fasuinia. Duma-dumania, lö faʼataʼu khö Dawido ba ’wondröniaʼö iraono Gizaraʼeli ba wasuwöta’. Daʼö zamarou tödö ndraono Gizaraʼeli maʼafefu ba wotuhini yaʼia soroi ba dödö. (1 Ng. 11:​1, 2) Lö tebulö göi iʼodaligö wanolo moroi khö Yehowa na ilawa nudunia Dawido. (Si. 28:7; Baso Zinunö 138:3.) Baero Dawido, so nasa ndra matua tanö böʼö si tobali duma-duma khö Zadoki yaʼia daʼö Yehoyada hegöi ononia Benaya samösa saradadu, ba 22 ndra matua sondröniaʼö iraono Gizaraʼeli sotuhini Dawido. (1 Ng. 11:​22-25; 12:​26-28) Fefu ira no lahalö gangetula ba wotuhini Dawido tobali razo hegöi ba wolumöʼö yaʼia.

7. (a) Ba götöda iadaʼa, haniha duma-duma sanolo yaʼita enaʼö barani? (b) Hadia wamahaʼö si tola tahalö moroi khö dalifusöda ira matua sotöi Nsilu? (Faigi göi nisura ba gahe zura.)

⁷ Tola taʼokhögö waʼabarani na taʼangerönusi duma-duma niha si lö faʼataʼu ba wotuhini Famatörö Lowalangi. Razoda yaʼia daʼö Yesu Keriso, ihalö gangetula wa lö omasi ia fao ba politik salua ba gulidanö nifatörö Zatana andre. (Mat. 4:​8-11; Yoh. 6:​14, 15) Enaʼö so waʼabarani khö Yesu, lö tebulö iʼodaligö Yehowa. Iadaʼa göi, ato sibai ndra talifusöda si bohou ebua si lö omasi tobali saradadu hegöi ba wamalua halöwö soʼamakhaita ba politik. Tandraigö baso zalua khöra ba jw.org.a

MANOLO IRA TALIFUSÖDA

8. Hawaʼara moguna khö ndra satua sokubaloi waʼabarani ba wanolo ira talifusöda?

⁸ Omasi nono mbanua Yehowa ba wanolo ira talifusöra zamösana. (2 Ko. 8:4) Hizaʼi, itaria moguna khöra waʼabarani ba wamalua daʼö. Duma-dumania, na alua wasuwöta, aboto ba dödö ndra satua sokubaloi wa moguna khö ndra talifusöra wondrara dödö, fotuhini, hegöi fanolo ba wamati mazui soguna ba mboto. Börö me laʼomasiʼö nono mbiri-biri Yehowa, andrö wa latehegö waʼaurira ira satua sokubaloi ba wameʼe fanolo. (Yoh. 15:​12, 13) Sindruhu, no laʼoʼö duma-duma Zadoki si barani.

9. Moloʼö 2 Samueli 15:​27-29, hadia halöwö nibeʼe Dawido khö Zadoki? (Faigi göi gambara.)

⁹ Nehegö hadia nifalua Zadoki me arakhagö teʼala waʼauri Dawido. Samuza maʼökhö, so samösa nono Dawido sotöi Abisalomi, iforege ba worabu dadaoma waʼarazo. (2 Sa. 15:​12, 13) Moguna iʼanemaiʼö moloi Dawido moroi ba Yeruzalema! Imane khö ndra sawuyunia, ”Aine, datalau moloi, börö me tebai teʼefaʼö ita ba danga Gabisalomi!” (2 Sa. 15:14) Hizaʼi, moguna so niha si toröi ba daʼö ba wamatunö khö Dawido hadia niʼera-era Gabisalomi. Börö daʼö, iʼandrö Dawido khö Zadoki ba so ösa gere tanö böʼö enaʼö mangawuli ira ba Yeruzalema tobali samauze. (Baso 2 Samueli 15:​27-29.) Abua sibai halöwö nibeʼe khöra andrö börö me tola manö mate ira na lö khöra fangelama. Abisalomi andrö niha sebua fakhögusa, samuʼi, ba tobali ia si manga mböli khö namania. Khalaigö hadia nifalua Gabisalomi na iʼila wa Sadoki hegöi ira ere andrö samauze nifatenge Dawido!

10. Hadia nifalua Zadoki hegöi tanö böʼönia ba wolumöʼö Dawido?

¹⁰ Iʼandrö Dawido khö Zadoki hegöi Huzaʼi, si fahuwu khönia tanö böʼö si lö faröi ba wanolo yaʼia ba wamalua niʼera-erania. (2 Sa. 15:​32-37) Simane si no muʼera-era, mofozu Huzaʼi irege faduhu dödö Gabisalomi khönia. Ibeʼe mbua gera-erania khö Gabisalomi hadia zinangea mufalua ba ginötö fasuwö, enaʼö so ginötö khö Dawido ba wamaʼanö yaʼia fatua lö lasuwö ia. Lö ara, ifatunö khö Zadoki hegöi Abiataro hadia zi no ifatunö khö Gabisalomi. (2 Sa. 17:​8-16) Aefa daʼö, ira matua si darua andrö lafatenge zangombakha khö Dawido. (2 Sa. 17:17) Börö wanolo moroi khö Yehowa, mofozu Zadoki hegöi ira ere tanö böʼö ba wolumöʼö Dawido.—2 Sa. 17:​21, 22.

11. Hewisa enaʼö barani ita simane Sadoki ba ginötö tatolo ndra talifusöda?

¹¹ Na so zalua si möi famaʼala waʼauri ndra talifusöda ba laʼandrö khöda ba wanolo yaʼira, hewisa enaʼö barani ita simane Sadoki? (1) Oʼö wanuturu lala. Na alua deʼala, böi tabulöʼö wahasara dödöda. Moguna taʼoʼö wanuturu lala moroi ba gödo ndraha. (Heb. 13:17) Sökhi na asese lafatunö ira satua sokubaloi hadia zinangea mufaʼanö fatua lö alua hegöi ba ginötö alua bencana. (1 Ko. 14:​33, 40) (2) Barani hizaʼi moguna mangelama. (Amd. 22:3) Sökhi na tahaogö taʼera-era fatua lö tahalö gangetula. Böi falua manö zi möi famaʼala waʼaurimö na lö moguna mufalua daʼö. (3) Odaligö Yehowa. Törö tödöu wa iʼameʼegö tödö waʼaurimö Yehowa hegöi faʼauri ndra talifusöda si sara lala wamati. Tola ibeʼe khöu waʼatua-tua ba wameʼe fanolo khö ndra talifusöda ba lala si lö tobali famaʼala waʼaurimö.

12-13. Hadia wamahaʼö si tola öhalö moroi ba zalua khö Viktor hegöi Vitalii? (Faigi göi gambara.)

¹² Nehegö zalua khö dalifusöda Viktor hegöi Vitalii, darua ndra talifusöda satua sokubaloi samasao gö hegöi idanö khö ndra talifusöda ba Ukraina. Imane Viktor, ”Möiga maʼalu-alui misa gamawaö gö ba asese marongo li wana ba zi fasuima. So samösa dalifusöda samualagö ö moroi ba tokonia. Börö nibeʼenia andrö, ato ndra talifusöda si lö mate ba waʼolofo. Samuza inötö me mafaʼanö-anö gö yawa ba moto, ba zi lö madöna-döna atoru bom mato 20 meter moroi ba nahia si so yaʼaga. Ba zi maʼökhö daʼö, lö aetu mangandrö ndraʼo khö Yehowa enaʼö ibeʼe khögu waʼabarani ba wanolo ira talifusöda.”

¹³ Imane Vitalii, ”Sindruhu-ndruhu wa moguna khöma waʼabarani. Fofanögu siföföna, 12 za ndraʼo ba lala. Sagötö fofanögu, lö aetu mangandrö ndraʼo khö Yehowa.” Barani Vitalii hizaʼi mangelama ia göi. Imane nasa, ”Lö aetu uʼandrö wanolo khö Yehowa enaʼö ibeʼe khögu waʼatua-tua ba faʼaboto ba dödö wa so zi tebai ufalua. Awai utörö ha lala si no latehegö ira samatörö. Tefarou sibai dödögu me uʼila falulu fohalöwö ndra talifusöda. Laheta fefu zi no fariwa-riwa föna ba lala motoma, laʼowuloi ba lafaʼanö zoguna khö ndra talifusöda yawa ba moto. Aefa daʼö, labeʼe göma hegöi nahia wolombasema sagötö fofanöma.”

LÖ FARÖI KHÖ YEHOWA

14. Hewisa dödöda na faröi niha niʼomasiʼöda khö Yehowa?

¹⁴ Hadia so nösi nomou hegöi si fahuwu khöu zondröi Yehowa? Te daʼö gabula dödö sabua khöu fanaögö, mendrua manö na fahuwu sibai ami. (Si. 78:40; Amd. 24:10) Na alua khöu zimane daʼö, tola möi fanolomö duma-duma waʼalöfaröi Zadoki.

15. Hana wa abua khö Zadoki ba wangoromaʼö faʼalöfaröi khö Yehowa? (1 Razo 1:​5-8)

¹⁵ Lö faröi Zadoki khö Yehowa hewaʼae faröi zi fahuwu khönia sotöi Abiataro. Alua daʼa ba gangohorita wamatörö Dawido, me no atua Dawido ba me arakhagö mate ia. Iforege ononia sotöi Adonia enaʼö tobali ia razo hewaʼae no fawuʼu li Yehowa wa Selomo zi tobali razo. (1 Ng. 22:​9, 10) Hizaʼi, ihalö gangetula Abiataro ba wotuhini Adonia. (Baso 1 Razo 1:​5-8.) Me ifalua daʼö, tenga ha khö Dawido faröi Gabiataro, hizaʼi faröi ia göi khö Yehowa. Khalaigö hawaʼabu dödö ba hawaʼafatö dödö Zadoki me luo daʼö. No fahuwu ira Gabiataro ba falulu fohalöwö ira tobali ere ba zi töra 40 fakhe. (2 Sa. 8:17) No irai fao ira ba wolohe ’Tawöla Lowalangi sindruhu’. (2 Sa. 15:29) Ba zilalö faoma no latuhini Dawido tobali razo ba oya zi no lafalua ba wangai halöwö khö Yehowa.—2 Sa. 19:​11-14.

16. Hadia zanolo Sadoki irege lö faröi ia?

¹⁶ Hewaʼae na faröi Gabiataro, hizaʼi lö faröi Zadoki khö Yehowa. Lö irai aombö dödö Dawido ba waʼalöfaröi Zadoki. Me no oroma gohitö dödö Gadonia, iʼandrö Dawido khö Zadoki, Natano, hegöi Benaya enaʼö lafataro Zelomo tobali razo. (1 Ra. 1:​32-34) Tatu tefarou sibai dödö Zadoki moroi ba duma-duma Natano hegöi enoni Yehowa tanö böʼönia, si lö faröi khö Yehowa hegöi ba wotuhini Razo Dawido. (1 Ra. 1:​38, 39) Me no tobali Razo Zelomo, ifataro Zadoki tobali ere sebua fangali Gabiataro.—1 Ra. 2:35.

17. Na so zahatö khöu sondröi Yehowa, hewisa woloʼömö duma-duma Zadoki?

¹⁷ Hewisa woloʼömö duma-duma Zadoki? Na so zi fahatö khöu sondröi Yehowa, foromaʼö khö Yehowa wa lö faröi ndraʼugö khönia. (Yos. 24:15) Ibeʼe khöu waʼabölö Yehowa hegöi faʼabarani ba wamalua satulö. Böi böhöli wangandrö ba hatöʼö ndraʼugö ba niha si lö faröi khö Yehowa. Iʼameʼegö tödö waʼalöfaröimö Yehowa ba tatu manö ifahowuʼö ndraʼugö.—2 Sa. 22:26.

18. Hadia wamahaʼö si tola öhalö moroi ba zalua khö Marco hegöi Sidse?

¹⁸ Nehegö zalua khö Marco hegöi foʼomonia sotöi Sidse. Darua ndraonora alawe si no egebua-bua, lahalö gangetula ba wondröi sindruhu. Imane Marco, ”Taʼomasiʼö sibai ndraonoda iʼotarai me tumbu ira. Tatu manö tafalua gofu hadia ia ba wolumöʼö yaʼira moroi ba deʼala. Daʼö mbörö wa afatö sibai dödöda na laröi Yehowa.” Imane nasa, ”Hewaʼae simanö, iʼabölöʼö ndraʼaga Yehowa. Iʼalui lala enaʼö faoma mafarou dödö nawöma. Na awuwu ndraʼo, foʼomogu zangabölöʼö yaʼo. Ba na awuwu göi woʼomogu, yaʼo zangabölöʼö yaʼia.” Imane Sidse, ”Lö tola anau gölöma na tenga Yehowa zameʼe khöma faʼabölö. Lö aetu itahi-tahigö manö ia tödögu. Börö daʼö, ututunö fefu nösi dödögu khö Yehowa. Lö ara aefa daʼö, falukha ndraʼo khö dalifusöda ira alawe. No hauga fakhe lö falukha ndraʼaga. Itufa galisigu, itöngö ndraʼo, ba imane, ’Böi olifu ndraʼugö Sidse, tenga salamö daʼö!’ Börö wanolo moroi khö Yehowa lö tebulö urasoi waʼomuso dödö ba wamosumange yaʼia.”

19. Hadia gangetula nihalöu?

¹⁹ Omasi Yehowa na barani nono mbanuania simane faʼabarani Zadoki. (2 Ti. 1:7) Hizaʼi, iʼandrö Yehowa enaʼö taʼodaligö ia tenga faʼabölöda samösa. Börö daʼö, na alua gabula dödö ba moguna khöda waʼabarani, böi alawö ita ba wangandrö fanolo khö Yehowa. Yafaduhu dödöu, ibeʼe khöda waʼabarani simane Sadoki!—1 Fe. 5:10.