Sura Sanolo Yaʼita Enaʼö Anau Gölöda Irugi Gamozua

1-2. (a) Hadia zalua ba Yudea me ifaʼoheʼö zurania Faulo khö ndra niha Heberaiʼo? (b) Hana wa tefaudu zura daʼö ba ginötönia?

ME NO aefa mate Yesu me döfi 33 M, oya sibai wamakao salua ba niha Heberaiʼo si toröi ba Yeruzalema hegöi ba Yudea. Lö ara me no tefasindro mbanua niha Keriso, göna ira folohi sabölö-bölö. (Hal. 8:1) Mato 20 fakhe aefa daʼö, tefakao ira börö waʼatosasa hegöi lofo sabölö-bölö. (Hal. 11:​27-30) Hizaʼi, te me döfi 61 M, tola tawaʼö wa daʼö ginötö waʼohahau dödö khöra börö me folohi salua khöra ba ndröfi daʼö tenga simane faʼabölö-bölö zalua khöra ba zi so miföna. Ba ginötö daʼö ibeʼe gehehania Yehowa khö Waulo ba wamaʼoheʼö khöra sura. Tefaudu sibai zura daʼö ba ginötönia.

² Tefaudu sibai zura nifaʼoheʼö Waulo andrö khö ndra niha Heberaiʼo börö me lö arara waʼohahau dödö nirasoira. Ibeʼe khöra mene-mene si sökhi Faulo sanolo yaʼira enaʼö anau gölöra ba wanaögö famakao si lö ara tö alua, yaʼia daʼö faʼadudu Yeruzalema simane si no ifaʼeleʼö Yesu. (Luk. 21:20) Tatu manö, lö aboto ba dödö Waulo hegöi ira niha Keriso si toröi ba Yudea hawaʼara alua daʼö. Hewaʼae simanö, tola laʼogunaʼö ginötö si toröi enaʼö lafaʼanö ira ba wangokhögö famati saro hegöi faʼanau gölö.—Heb. 10:25; 12:​1, 2.

3. Hana wa moguna tafahaʼö ita ba zura nifaʼoheʼö Waulo khö ndra niha Keriso Heberaiʼo?

³ Lö ara tö tataögö wamakao sabölö abua moroi ba zalua khö ndra niha Keriso Heberaiʼo. (Mat. 24:21; Fam. 16:​14, 16) Börö daʼö, datatutunö mene-mene nibeʼe Yehowa sanolo ira niha Keriso me abad siföföna ba sanolo yaʼita iadaʼa.

”ENAʼÖ MOʼAHONOA WAʼABOTO BA DÖDÖDA”

4. Hadia gabula dödö nitaögö ndra niha Keriso Yahudi? (Faigi göi gambara.)

⁴ So gabula dödö sebua nitaögö ndra niha Keriso Yahudi. Me föna, niha Yahudi nifili Yehowa tobali ono mbanuania. Ba zi hauga wulu fakhe, Yeruzalema no tobali ia nahia si tohude. Ba daʼö mamatörö razo sosalahini Yehowa, ba fefu niha somasi mamosumange Yehowa, moguna lafalua daʼö ba gosali si so ba Yeruzalema. Fefu niha Yahudi si lö faröi laforege wamalua Oroisa Moze hegöi ngawalö gamakhoita nifahaʼö ndra sondröniaʼö yaʼira. Duma-dumania, so gamakhoita sanandrösa ba wemanga, ba wosuna hegöi amuatara ba niha si tenga Yahudi. Hizaʼi, me no mate Yesu, lö saʼae moguna mufalua Goroisa Moze, ba lö moguna so zumange nibeʼe ba gosali. Tobali abula dödö daʼa khö ndra niha Keriso Yahudi börö me no toʼölö ira ba wamalua Oroisa Moze. (Heb. 10:​1, 4, 10) Niha saro ba wamati manö simane Fetero, moguna iforege ba woloʼö fanuturu lala si bohou andre. (Hal. 10:​9-14; Gal. 2:​11-14) Baero daʼö, börö nifaduhusira tödö si bohou andre, göna folohi ndra niha Keriso moroi khö ndra sondröniaʼö agama Yahudi.

5. Hezo manö moroi wolohi salua khö ndra niha Keriso Heberaiʼo?

⁵ Ira niha Keriso Heberaiʼo göna ira folohi moroi ba zi dombua ngawawa: (1) ira sondröniaʼö agama Yahudi, sangumaʼö wa no elungu ira mazui no laröi zindruhu; ba (2) so ösa niha si farahu ba mbanua niha Keriso si fatandro ba wamalua Oroisa Moze, te enaʼö lö göna ira folohi. (Gal. 6:12) Hadia zanolo ira niha Keriso si lö faröi andre enaʼö lö laröi zindruhu?

6. Hadia wamarou dödö nibeʼe Waulo ba niha Heberaiʼo? (Heberaiʼo 5:14–6:1)

⁶ Ba zura nifaʼoheʼö Waulo khö ndra niha Heberaiʼo, ifarou ira enaʼö lahaogö nasa wamareso Taromali Lowalangi. (Baso Heberaiʼo 5:14–6:1.) Iʼogunaʼö nösi ayati moroi ba Mbuku Niʼamoniʼö Heberaiʼo ba ifatunö khöra hadia mbörö wa abölö sökhi lala wamosumange nifalua niha Keriso moroi ba nifalua niha Yahudi.a Ifarou ira Faulo enaʼö laʼalui ba laʼokhögö waʼaboto ba dödö satulö sanandrösa ba zindruhu moroi ba Zura Niʼamoniʼö irege laʼila lafaehusi wamahaʼö faya ba latimbagö daʼö.

7. Hadia gabula dödö salua khöda iadaʼa?

⁷ Ato niha ba götöda iadaʼa samazaewe turia mazui lala wangera-ngera si lö tefaudu ba goi-goi Yehowa sanandrösa ba zatulö. So zangumaʼö wa fasala ndra Samaduhuʼö Yehowa börö me laʼoʼö niwaʼö Zura Niʼamoniʼö sanandrösa ba waʼorudu. Lawaʼö wa yaʼita niha si lö faʼomasi ba si lö faʼahakhö dödö. Me no itugu numalö ginötö, itugu oroma wa lö tefaudu lala wangera-ngera gulidanö daʼa ba lala wangera-ngera Lowalangi. (Amd. 17:15) Börö daʼö, moguna taʼila hadia wangera-ngera si fasala andrö ba talawa daʼö. Böi tatehegö lafetaʼu mazui lafaelungu ita irege taröi Yehowa.—Heb. 13:9.

8. Hadia zanolo yaʼita enaʼö tobali ita niha Keriso saro ba wamati?

⁸ Iʼamenesi ndra niha Keriso Heberaiʼo Faulo enaʼö tobali ira niha saro ba wamati. Moguna göi khöda mene-mene daʼö iadaʼa. Eluahania moguna tahaogö tafareso nösi Zura Niʼamoniʼö enaʼö itugu aboto ba dödöda sanandrösa khö Yehowa hegöi lala wangera-ngerania. Lö taböhöli wamalua daʼö hewaʼae no talulu waʼaurida ba tebayagö ita idanö. Gofu hawaʼara no so ita ba zindruhu, moguna nasa lö tebulö tabaso ba tafahaʼö ita ba Daromali Lowalangi. (Si. 1:2) Na tafalua daʼö, tola taʼokhögö mbua-bua nisura Waulo ba zurania, yaʼia daʼö famati saro.—Heb. 11:​1, 6.

”MAMATI IREGE TASÖNDRA WAʼAURI”

9. Hana wa moguna laʼokhögö wamati saro ira niha Keriso Heberaiʼo?

⁹ Moguna laʼokhögö wamati saro ira niha Keriso Heberaiʼo börö me daʼö zanolo yaʼira enaʼö teʼorifi na alua wamakao ba Yudea. (Heb. 10:​37-39) No ifangelama ndra nifahaʼönia Yesu enaʼö moloi ira ba hili na laʼila no lafasui Yeruzalema ira saradadu. Moguna mene-mene daʼa ba niha Keriso Heberaiʼo maʼafefu, he si so bakha ba Yeruzalema mazui ba zi fasui daʼö. (Luk. 21:​20-24) Ba götö föna, na tohare nudu, si toʼölönia niha si so ba zi fasui Yeruzalema möi ira bakha ba mbanua börö me so dowa solumöʼö yaʼira ba daʼö. Tobali, hulö lö tefaudu wanuturu lala nibeʼe Yesu enaʼö moloi ira ba hili. Börö daʼö, moguna sibai wamati saro khöra enaʼö tola laʼoʼö niwaʼö Yesu.

10. Hadia nifalua ndra niha Keriso Heberaiʼo börö me laʼokhögö wamati saro? (Heberaiʼo 13:17)

¹⁰ Ira niha Keriso Heberaiʼo, moguna lafaduhusi tödö niha nifili Yesu ba wondröniaʼö banua niha Keriso. Tola manö no lazara-zara wameʼe fanuturu lala ba wanolo banua niha Keriso enaʼö laʼoʼö wanuturu lala nibeʼe Yesu ba ginötö hegöi ba lala si tefaudu. (Baso Heberaiʼo 13:17.) Ba li Yunani, ngawua wehede ”miʼoʼö” niʼogunaʼö ba Heberaiʼo 13:​17, daʼö zangoromaʼö wa moloʼö zi samösa niha börö me faduhu dödönia ba niha sameʼe fanuturu lala, tenga börö me nifaso. Börö daʼö, ira niha Keriso Heberaiʼo moguna laʼokhögö waʼafaduhu dödö khö zondröniaʼö yaʼira fatua lö alua wamakao andrö. Na lö tebulö laʼoʼö wanuturu lala ba ginötö waʼohahau dödö, aoha khöra woloʼö fanuturu lala ba ginötö waʼatosasa.

11. Hana wa moguna wamati saro khö ndra niha Keriso iadaʼa?

¹¹ Moguna göi khöda wamati saro simane ira niha Keriso Heberaiʼo. Iadaʼa, ato niha si lö faduhu tödö wa tehori dania gulidanö andre ba zi lö ara tö, simane niwaʼö Zura Niʼamoniʼö. Laʼoʼaya ita börö me tafaduhusi tödö daʼö. (2 Fe. 3:​3, 4) Baero daʼö, hewaʼae so ösa zi no izara-zara wamatunö khöda Sura Niʼamoniʼö sanandrösa ba waʼalua wamakao sabölö-bölö, hizaʼi oya nasa zi lö taʼila. Moguna khöda wamati saro wa hasambalö tohare gamozua götö danö andre ba ginötö si tefaudu ba hasambalö iʼorifi ita Yehowa.—Hab. 2:3.

12. Hadia zanolo yaʼita enaʼö teʼorifi moroi ba wamakao sabölö-bölö?

¹² Moguna göi sindruhu-ndruhu mamati ita wa iʼogunaʼö ”zawuyu si lö faröi ba satua-tua” Yehowa ba wameʼe khöda fanuturu lala iadaʼa. (Mat. 24:45) Me föna, te so wanuturu lala si no muzara-zara nitema ndra niha Keriso Heberaiʼo me tohare zaradadu Romawi. Simanö göi, na ibörögö alua wamakao sabölö-bölö, tola manö tatema wanuturu lala si no muzara-zara si möi fangorifida. Börö daʼö, iʼotarai iadaʼa datadouʼö waʼafaduhu dödöda khö ndra sondröniaʼö ba organisasi Yehowa. Na lö tafaduhusi tödö ira ba lö taʼoʼö wanuturu lala nibeʼera iadaʼa, hasambalö abua khöda woloʼö fanuturu lala nibeʼera na alua wamakao sabölö-bölö.

13. Hana wa moguna laʼoʼö ira niha Keriso Heberaiʼo mene-mene si so ba Heberaiʼo 13:5?

¹³ Gasa-gasa wombaloira tandra woloi ba hili, moguna laforege ira niha Keriso Heberaiʼo ba woʼöna-önaiʼö faʼaurira, faböi ”laʼomasiʼö gefe”. (Baso Heberaiʼo 13:5.) Barö zilalö, so ösa ba gotaluara zi no irai manaögö baŵa lofo hegöi faʼatosasa. (Heb. 10:​32-34) Anau gölöra wanaögö famakao börö duria somuso dödö. Hizaʼi ba gafuriata, so ösa zi no ibörögö tedönisi tödö ba wolohi faʼakayo enaʼö telumöʼö ira. Hewaʼae simanö, gofu hawaʼebua gefe niʼokhögöra, lö möi fangorifira daʼö ba ginötö tedudugö Yeruzalema. (Yak. 5:3) Sindruhunia, niha sangomasiʼö kefe tola manö abua khöra woloi börö me lö omasi ira laröi nomo mazui okhötara.

14. Na taʼokhögö wamati saro, hewisa lala wangera-ngerada sanandrösa ba gokhöta?

¹⁴ Na sindruhu-ndruhu mamati ita wa no ahatö gamozua götö danö andre, tatu lö taʼodaligö gefe mazui okhöta. Sagötö alua wamakao sabölö-bölö dania fefu niha ’latiboʼö wiröra ba lala ba anuzu dödöra ba ganaʼara’ börö me laʼila wa ”tebai iʼorifi ira firöra hegöi anaʼara ba luo wönu Yehowa”. (Hez. 7:19) Tobali, moroi na taʼosambuaʼö dödöda ba wangalui kefe sebua, sökhi na taforege ba woʼöna-önaiʼö faʼaurida. Böi adöni dödöda ba wamiza kefe ba zi lö moguna, mazui tahorigö ginötöda ba wondrorogö gama-gama niʼokhögöda. Mangelama göi ita enaʼö lö talafo taʼomasiʼö gokhötada. (Mat. 6:​19, 24) Börö me no itugu ahatö gamozua gulidanö daʼa, tola manö tetandraigö wamatida, ba moguna tafili hadia Yehowa niʼodaligöda mazui okhöta.

”MOGUNA ANAU GÖLÖMI”

15. Hana wa moguna anau gölö ndra niha Keriso Heberaiʼo?

¹⁵ Niha Keriso Heberaiʼo, moguna anau gölöra börö me itugu lö sökhi zalua ba Yudea. (Heb. 10:36) Sindruhu sa, ato ba gotaluara zi tobali niha Keriso ba ginötö waʼohahau dödö. Hizaʼi, so göi zi no irai göna folohi sabölö-bölö. Hewaʼae simanö, iwaʼö khöra Faulo wa samösa lö ba gotaluara zi no irai tefakao simane Yesu, ofeta mate. (Heb. 12:4) Baero daʼö, börö me no itugu ato zi tobali niha Keriso, itugu laforege göi ira niha Yahudi ba wolohi yaʼira. Duma-dumania, mato hauga fakhe fatua lö isura zurania andre Faulo, alua waʼakaliru ba Yeruzalema börö me manuriaigö ia ba daʼö. Töra 40 ndra matua niha Yahudi ”fahölu ira wa lö manga ba mamadu ira irege labunu Waulo”. (Hal. 22:22; 23:​12-14) Hewaʼae göna ira folohi simane daʼö, hizaʼi moguna lö laböhöli wamalua angowuloa, fanuriaigö, ba larorogö enaʼö aro wamatira.

16. Hewisa zura nifaʼoheʼö Waulo ba niha Keriso Heberaiʼo tobali fanoloda ba wangokhögö lala wangera-ngera satulö sanandrösa ba wolohi? (Heberaiʼo 12:7)

¹⁶ Hadia zanolo ira niha Keriso Heberaiʼo ba wanaögö folohi salua khöra? Aboto ba dödö Waulo wa moguna laʼokhögö lala wangera-ngera satulö sanandrösa ba wanandraigö nitaögöra. Börö daʼö, itutunö khöra wa tola manö itehegö Lowalangi tetandraigö wamatira si tobali faosatö ba wamomaha yaʼira. (Baso Heberaiʼo 12:7.) Famomaha simane daʼö tobali fanolora ba wangokhögö hegöi ba wondrouʼö amuata niha Keriso. Börö me anau gölöra, oya mbua nitemara. Na laʼosambuaʼö dödöra ba daʼö, hasambalö aoha khöra ba wangokhögö faʼanau gölö.—Heb. 12:11.

17. Hadia mene-mene nibeʼe Waulo ba niha Keriso Heberaiʼo sanandrösa ba waʼanau gölö?

¹⁷ Ifarou niha Keriso Heberaiʼo Faulo enaʼö anau gölöra si fao faʼabarani. Tola ibeʼe khöra mene-mene si tefaudu sanandrösa ba daʼa. Hadia mbörö? Me föna, no irai ifakao ndra niha Keriso irege iʼila hawaʼalösökhi zalua khöra me luo daʼö. Ba me no tobali ia niha Keriso, göna göi ia folohi. (2 Ko. 11:​23-25) Daʼö mbörö wa iʼila hadia zoguna khöra enaʼö anau gölöra. Ifasugi ba dödöra enaʼö lö laʼodaligö waʼabölöra samösa, hizaʼi laʼodaligö Yehowa. Si fao faʼabarani tola imane Faulo, ”Yehowa zanolo yaʼo; lö ataʼu ndraʼo.”—Heb. 13:6.

18. Hadia zalua khöda ba zi so miföna, ba hewisa wamaʼanöda yaʼita?

¹⁸ Ato ndra talifusöda sanaögö folohi iadaʼa. Tola tatuhini ira na lö mamalö mangandrö ita salahira. Itaria tola göi tabeʼe hadia zoguna khöra. (Heb. 10:33) Hizaʼi, datatörö tödöda niwaʼö Zura Niʼamoniʼö andre, ”Dozi sedöna moloʼö Keriso ba wamosumange Lowalangi soroi ba dödö, hasambalö göna ira folohi.” (2 Ti. 3:12) Daʼö mbörö wa moguna tafaʼanö ita fefu. Yalötebulö taʼodaligö Yehowa ba faduhu dödöda wa hasambalö itolo ita enaʼö anau gölöda ba wanaögö gofu hadia gabula dödö salua. Ba ginötönia dania, hasambalö iʼefaʼö fefu nono mbanuania si lö faröi.—2 Te. 1:​7, 8.

19. Hewisa wamaʼanöda yaʼita ba wanaögö famakao sabölö-bölö ba zi so miföna? (Faigi göi gambara.)

¹⁹ Sura nifaʼoheʼö Waulo ba niha Keriso Heberaiʼo me abad siföföna, sindruhu-ndruhu möi famaʼanöra ba wanaögö famakao salua khöra. Ifarou ira Faulo enaʼö lafahaʼö ira ba laʼokhögö waʼaboto ba dödö sabölö abakha sanandrösa ba Daromali Lowalangi. Daʼö zanolo yaʼira enaʼö laʼila hezo wamahaʼö faya ba latimbagö daʼö irege lö tekiko wamatira. Ifarou göi ira enaʼö laʼaroʼö wamatira irege lö tebulö laʼoʼö wanuturu lala nibeʼe Yesu hegöi niha sondröniaʼö yaʼira ba mbanua niha Keriso. Baero daʼö, itolo göi ira enaʼö laʼokhögö lala wangera-ngera satulö wa fefu zalua khöra no tobali famomaha moroi khö Namara sebua faʼomasi. Datafalua göi mene-mene Waulo andre irege tola anau gölöda ba lö faröi ita irugi gamozua.—Heb. 3:14.