Hawaʼatohude Döi Yehowa ba Wamaigi Yesu?

1-2. (a) Hadia manö nifalua Yesu ba mbongi fatua lö mate ia? (b) Hadia nitutunöda ba artikel daʼa?

ME BONGI hari Kami tanggal 14 Nisana 33 M, fao Yesu khö ndra sinengenia si lö faröi manga ira ba zi sambua nahia. Iʼila wa lö ara tö laʼa mbölinia, laʼohe ia föna zanguhuku, lafakao, ba lahuku irege mate. Me no aefa manga ira, ifaʼema wehede fabalisa si möi famarou dödö ndra sinengenia. Fatua lö fabali Yesu khö ndra sinengenia ba nahia daʼö, ifaʼema sambua wangandrö si tohude. Isura Yohane wangandrö daʼö ba Yohane faza 17.

² So wamahaʼö si tola tahalö moroi ba wangandrö Yesu andrö. Hadia niʼaombösinia tödö me luo daʼö? Ba hadia zabölö tohude ba wamaiginia sagötö famaluania halöwö fanuriaigö ba gulidanö? Datatutunö.

”NO UʼOMBAKHAʼÖ KHÖRA DÖIMÖ”

3. Hadia niwaʼö Yesu sanandrösa ba döi Yehowa ba hadia geluahania? (Yohane 17:​6, 26)

³ Imane Yesu ba wangandrönia, ”No uʼombakhaʼö khöra döimö.” Mendrua kali itötöi daʼö. (Baso Yohane 17:​6, 26.) Hadia geluahania? Hadia lö laʼila ira nifahaʼö Yesu wa töi Lowalangi andrö Yehowa? Tatu manö laʼila döi daʼö börö me niha Yahudi ira. No tesura döi Yehowa ba Mbuku Niʼamoniʼö Heberaiʼo mato hauga ribu kali. Tenga daʼö geluaha wehede Yesu wa no ifahaʼö ira haniha döi Lowalangi. Hizaʼi, eluaha wehedenia yaʼia daʼö no ifahaʼö ira hewisa Lowalangi sotöi Yehowa andrö. No itolo ndra nifahaʼönia irege aboto ba dödöra haniha Yehowa, farahu ba daʼö gohitö dödönia, halöwönia, hegöi amuatania. Lö hadöi sangila hewisa zindruhunia Yehowa andrö baero Yesu.

4-5. (a) Hewisa döi zi samösa niha itugu moʼeluaha ia khöu? Beʼe duma-duma. (b) Hewisa döi Yehowa itugu moʼeluaha ia khö ndra nifahaʼö Yesu?

⁴ Duma-dumania, khalaigö atö so samösa zatua sokubaloi ba mbanua niha Keriso si farahu yaʼugö si tobali doto. Töinia David. No ara faʼila ami. Samuza maʼökhö, mofökhö ndraʼugö ba lö tola löʼö muʼoperasi. Laʼohe ndraʼugö ba rumah sakit ba nahia wohalöwö zatua sokubaloi andrö. Iʼoperasi ndraʼugö irege döhö wökhöu. Tatu manö, itugu öʼomasiʼö ia. Ero na örongo döinia, itörö tödöu hadia manö zi no ifalua ba wamadöhö yaʼugö. Ba wamaigimö, David andrö tenga ha satua sokubaloi, hizaʼi doto sangoperasi, samadöhö ba sangorifi yaʼugö.

⁵ Simane daʼö göi ndra nifahaʼö Yesu, no laʼila döi Yehowa. Hizaʼi halöwö nifalua Yesu zanolo yaʼira enaʼö itugu aboto ba dödöra sanandrösa khö Yehowa. Hadia mbörö? Börö me iforomaʼö gamuata Namania Yesu ba wehede hegöi ba nifaluania. Tobali, ero na lafondrondrongo ira nifahaʼönia lala wamahaʼö nifalua Yesu ba lanehegö hewisa gamuatania ba niha böʼö, itugu ”aboto ba dödöra” haniha Yehowa andrö.—Yoh. 14:9; 17:3.

ʼTÖIMÖ SI NO ÖBEʼE KHÖGU’

6. Hadia geluahania wa ibeʼe döinia Yehowa khö Yesu? (Yohane 17:​11, 12)

⁶ Me mangandrö Yesu, iʼohe ba wangandrö ndra nifahaʼönia. Imane, ”Rorogö ira börö döimö si no öbeʼe khögu.” (Baso Yohane 17:​11, 12.) Hadia daʼö geluahania wa tola mufotöi Yehowa khö Yesu? Tenga. Nehegö atö ba wangandrönia iwaʼö Yesu ’töimö’ ba wanandrösaigö töi Yehowa. Tobali, lö mukaoni khö Yesu döi Yehowa. Na simanö, hadia geluaha wehedenia andrö? Si oföna, eluahania Yesu andrö no salahi Yehowa ba wahuhuosa. Tohare ia ba döi Namania ba oya ifalua dandra sahöli-höli dödö ba döi andrö. (Yoh. 5:43; 10:25) Baero daʼö, eluaha döi Yesu yaʼia daʼö ”Yehowa No Fangorifi”. Ba daʼa taʼila wa moʼamakhaita döi Yesu ba döi Lowalangi Yehowa.

7. Hana wa tola fahuhuo Yesu ba döi Yehowa? Beʼe duma-duma.

⁷ Enaʼö taʼila hadia mbörö wa tola fahuhuo Yesu ba döi Yehowa, nehegö duma-duma daʼa: Si toʼölönia, so samösa niha nifatenge zamatörö ba wahuhuosa salahinia. Börö me fahuhuo ia salahi zamatörö andrö, faduhu dödö niha wa moroi khö zamatörö fefu wehedenia. Simane daʼö göi, tola fahuhuo Yesu ba döi Yehowa börö me no tobali ia salahi Yehowa.—Mat. 21:9; Luk. 13:35.

8. Hana wa iwaʼö Yehowa ’tohare Yesu ba döinia’ hewaʼae lö nasa si möi Yesu ba gulidanö? (2 Moze 23:​20, 21)

⁸ Börö me Yesu andrö Taromali, mangai halöwö ia tobali salahi Yehowa ba wahuhuosa ba wamaʼema angombakhata hegöi fanuturu lala khö ndra malaʼika tanö böʼö awö niha gulidanö. (Yoh. 1:​1-3) Te Yesu andre malaʼika nifatenge Yehowa ba wondrorogö iraono Gizaraʼeli me so ira ba danö si mate. Me iwaʼö Yehowa ba ndraono Gizaraʼeli enaʼö laʼoʼö niwaʼö malaʼika andrö, imane khöra, ”Ba döigu wa tohare ia.”a (Baso 2 Moze 23:​20, 21.) Eluahania, fahuhuo Yesu salahi Yehowa, ba yaʼia ziföföna zanema noro dödö ba wangamoniʼö hegöi ba wamaduhuʼö wa fasala fefu niböbögö ba döi Namania.

”HE AMA, FOLAKHÖMI DÖIMÖ”

9. Hawaʼatohude döi Yehowa ba wamaigi Yesu, ba hezo taʼila daʼö?

⁹ Simane sawena tatutunö, tohude sibai döi Yehowa ba wamaigi Yesu, hewaʼae lö nasa si möi ia ba gulidanö. Börö daʼö, sagötö so ia ba gulidanö, fefu nifaluania daʼö zangoromaʼö wa tohude sibai ba wamaiginia döi Yehowa. Mato hauga hari fatua lö iʼasiwai halöwönia ba gulidanö, imane Yesu khö Yehowa, ”He Ama, folakhömi döimö.” Iʼanemaiʼö itema linia Amania moroi ba zorugo, ebua linia wangumaʼö, ”No ufolakhömi ba ufolakhömi nasa dania.”—Yoh. 12:28.

10-11. (a) Hewisa wamolakhömi Yesu töi Yehowa? (Faigi göi gambara.) (b) Hana wa moguna muʼamoniʼö ba mufaduhuʼö wa fasala fefu niböbögö ba döi Yehowa?

¹⁰ Ifolakhömi göi döi Namania Yesu. Hewisa wamaluania daʼö? Sambua lala nifaluania yaʼia me itutunö gamuata hegöi nifalua Namania sahöli-höli dödö. Hizaʼi, tenga ha daʼö. Iʼila göi Yesu wa moguna muʼamoniʼö ba mufaduhuʼö wa lö atulö fefu niböbögö ba döi Yehowa. Iforomaʼö wa tohude sibai daʼö yaʼia me ifahaʼö ndra nifahaʼönia ba wangandrö enaʼö lamane, ”He Ama khöma si so ba zorugo, yateʼamoniʼö döimö.”—Mat. 6:9.

¹¹ Hana wa moguna muʼamoniʼö ba mufaduhuʼö wa lö atulö niböbögö ba döi Yehowa? Me föna ba Kabu Edena, no iböbögö zi lö duhu Satana khö Lowalangi Yehowa. Iwaʼö wa Yehowa andrö si falimo börö me itaha zi sökhi khö Gadamo ba Khawa. (1 Mo. 3:​1-5) Hulö amaedola iwaʼö wa lö sökhi lala wamatörö nifalua Yehowa. Fefu niböbögö Zatana andrö tobali fangobousi döi Yehowa. Hauga ngaotu fakhe aefa daʼö ba götö Yobi, iböbögö zi lö duhu Satana wa lafosumange Yehowa niha gulidanö ha enaʼö latema howu-howu. Iwaʼö wa lö hadöi niha sangomasiʼö Yehowa soroi ba dödö. Hasambalö laröi ia na göna ira fanandraigö mazui abula dödö. (Yob. 1:​9-11; 2:4) Börö daʼö, moguna ginötö ba wangoromaʼö haniha sindruhunia zi falimo, hadia Yehowa mazui Satana.

”UTEHEGÖ NOSOGU”

12. Hadia manö nifalua Yesu börö me iʼomasiʼö döi Yehowa?

¹² Börö me iʼomasiʼö Yehowa, ifalua gofu hadia ia Yesu ba wangamoniʼö hegöi ba wamaduhuʼö wa lö atulö fefu niböbögö ba döi Yehowa. Itehegö nosonia salahi döi Namania.b (Yoh. 10:​17, 18) Yaʼia andrö tenga simane Adamo ba Khawa, niha siföföna soʼahonoa solawa Yehowa ba si faʼawö khö Zatana. Sindruhunia, möi Yesu ba gulidanö ba wangoromaʼö faʼomasinia khö Yehowa. Sagötö feʼasonia ba gulidanö, iʼoʼö fefu goroisa hegöi niwaʼö Yehowa. (Heb. 4:15; 5:​7-10) Irorogö waʼalöfaröi sandrohu faʼaurinia hewaʼae itörö waʼamate safökhö ba döla geu famakao. (Heb. 12:2) Me ifalua daʼö, no iforomaʼö Yesu wa iʼomasiʼö Yehowa hegöi töi Namania andrö.

13. Hana wa sindruhunia ha Yesu zi tola mangoromaʼö wa si falimo Zatana? (Faigi göi gambara.)

¹³ Ha Yesu zabölö mangila Yehowa. Tobali, na so sambua manö zatulö moroi ba niböbögö Zatana, tatu iʼila Yesu daʼö. Hizaʼi, börö me sambua lö satulö moroi ba niböbögönia andrö, lö iböhöli ba wangoʼawögö hegöi ba wangamoniʼö töi Namania. Hewaʼae hulö zi no iröi ia Yehowa, lö tebulö itehegö nosonia Yesu ba lö faröi ia khö Namania safönu faʼomasi. (Mat. 27:46)c Sandrohu faʼauri Yesu ba gulidanö, no iforomaʼö wa Satana zi falimo, tenga Yehowa!—Yoh. 8:44.

”NO . . . UʼASIWAI HALÖWÖ NIBEʼEU KHÖGU”

14. Hewisa wamahowuʼö Yehowa waʼalöfaröi Yesu?

¹⁴ Ba mbongi fatua lö mate ia, imane Yesu ba wangandrönia, ”No . . . uʼasiwai halöwö nibeʼeu khögu.” Faduhu dödönia wa hasambalö ifahowuʼö Yehowa waʼalöfaröinia. (Yoh. 17:​4, 5) Ba sindruhu, daʼö nifalua Yehowa. Isusugi Yesu. (Hal. 2:​23, 24) Aefa daʼö, ibeʼe khö Yesu dadaoma sabölö alawa ba zorugo. (Fil. 2:​8, 9) Tobali göi ia razo ba Wamatörö Lowalangi. Na simanö, hadia dania nifalua Wamatörö andrö? Tola taʼila wanema linia ba duma-duma wangandrö nibeʼe Yesu. Ifahaʼö ndra nifahaʼönia enaʼö lamane wangandrö, ”Yatohare Wamatörömö. Yaʼitörö zomasi ndraʼugö [somasi Yehowa], hulö simane ba zorugo, yasimanö göi ba gulidanö.”—Mat. 6:10.

15. Hadia manö dania nifalua Yesu?

¹⁵ Ba zi lö ara tö, fasuwö Yesu ba wolawa udu Lowalangi, ba ihori ira ba Hamagedo. (Fam. 16:​14, 16; 19:​11-16) Lö ara aefa daʼö, itiboʼö Zatana ba ”mbaho sabakha sibai”. Amaedola no lakuru Zatana irege lö hadöi si tola ifalua. (Fam. 20:​1-3) Aefa daʼö, mamatörö Yesu sagötö zi saribu fakhe. Sagötö famatörönia, itolo niha enaʼö moʼahonoa ira ba lasöndra waʼohahau dödö. Isusugi göi niha si no mate ba ibaliʼö Faradaiso zi sagörö ulidanö. Ba daʼö dania alua gohitö dödö Yehowa!—Fam. 21:​1-4.

16. Hewisa dania waʼauri niha na no awai Wamatörö si Saribu Fakhe?

¹⁶ Hewisa dania waʼauri niha na no awai Wamatörö si Saribu Fakhe? Lö saʼae horö niha gulidanö. Börö daʼö, lö moguna laʼandrö wangefa ba höli. Lö göi saʼae moguna khöra gere mazui ere sebua enaʼö laʼokhögö wahuwusa si sökhi khö Yehowa. Baero daʼö, ”udu safuria niheta yaʼia daʼö faʼamate”. Tobali, tesusugi dania niha si no mate. Moʼahonoa göi fefu niha si so ba gulidanö.—1 Ko. 15:​25, 26.

17-18. (a) Hadia nasa zi tohude salua dania na no awai Wamatörö si Saribu Fakhe? (b) Hadia dania nifalua Yesu na no awai Wamatörö si Saribu Fakhe? (1 Korindro 15:​24, 28; faigi göi gambara.)

¹⁷ Hadia nasa zi tohude salua dania na no awai Wamatörö si Saribu Fakhe? Teʼamoniʼö döi Yehowa ba tefaduhuʼö wa lö atulö fefu niböbögö ba döinia andrö. Lö hadöi saʼae si tobali dane-dane ba wotaʼunöisi töi Yehowa. Hadia mbörö? Börö me no iforomaʼö Yehowa wa yaʼia andrö Ama safönu faʼomasi. Me föna ba Kabu Edena, iböbögö zi lö duhu Satana wa Yehowa andrö si falimo ba samatörö si lö faʼahakhö dödö. Hizaʼi, iʼotarai daʼö, fefu nono mbanua Lowalangi sangataʼufi yaʼia laʼamoniʼö döi Yehowa.

¹⁸ Aefa daʼö, hadia dania nifalua Yesu na no awai Wamatörö si Saribu Fakhe? Hadia mamadaö ia khö Yehowa simane Satana? Löʼö! (Baso 1 Korindro 15:​24, 28.) Ifangawuli khö Namania Wamatörö andrö, ba mangalulu ia barö wamatörö Yehowa. Tenga simane Satana, itehegö ibeʼe fefu hadia ia Yesu börö me iʼomasiʼö Yehowa.

19. Hawaʼatohude döi Yehowa ba wamaigi Yesu?

¹⁹ Iadaʼa, no taʼila hadia mbörö wa omasi Yehowa ibeʼe döinia khö Yesu! Moʼahonoa Yesu ba wangoromaʼö hewisa zindruhunia Namania andrö. Na simanö, hawaʼatohude döi Yehowa ba wamaigi Yesu? Tohude sibai daʼö ba wamaiginia irege itehegö mate ia salahi döi daʼö. Ifangawuli göi fefu hadia ia khö Yehowa me no awai Wamatörö si Saribu Fakhe. Börö daʼö, hewisa woloʼöda duma-duma Yesu? Tatutunö ia ba artikel aefa daʼa.