Hawaʼatohude Döi Yehowa ba Wamaigida?

1-2. Hadia zangoromaʼö wa tohude sibai döi Yehowa andrö ba wamaigi Yesu?

TOHUDE sibai döi Yehowa andrö ba wamaigi Yesu. Iforege wangamoniʼö töi Namania, töra moroi ba niha tanö böʼö. Simane nitutunöda ba artikel silalö, itehegö mate ia ba wangamoniʼö hegöi ba wamaduhuʼö wa fasala fefu niböbögö ba döi Yehowa. (Mrk. 14:36; Heb. 10:​7-9) Ba na no awai Wamatörö si Saribu Fakhe, ifangawuli fefu wamatörö andrö khö Yehowa enaʼö tefolakhömi Namania. (1 Ko. 15:​26-28) Fefu nifalua Yesu daʼö zangoromaʼö wa iʼomasiʼö sibai Namania, ba tohude sibai göi wamaiginia töi Namania andrö.

² Möi Yesu ba gulidanö ba döi Namania. (Yoh. 5:43; 12:13) Ifatunö göi daʼö khö ndra nifahaʼönia. (Yoh. 17:​6, 26) Ifahaʼö ba ifalua ngawalö dandra sahöli-höli dödö ba döi daʼö. (Yoh. 10:25) Baero daʼö, mangandrö ia khö Yehowa, ”Rorogö [ndra nifahaʼö] börö döimö.” (Yoh. 17:11) Ba daʼa taʼila wa tohude sibai döi Yehowa ba wamaigi Yesu, töra moroi ba danö böʼö. Börö daʼö, hewisa wa lö laʼila ba lö laʼogunaʼö döi Namania andrö niha sangumaʼö wa yaʼira niha Keriso?

3. Hadia nitutunöda ba artikel daʼa?

³ Yaʼita niha Keriso, taforege ba woloʼö duma-duma Yesu yaʼia na tohude ba wamaigida döi Yehowa. (1 Fe. 2:21) Ba artikel daʼa tatutunö hadia mbörö wa ibeʼe döinia Yehowa ba niha sanuriaigö ’turia somuso dödö sanandrösa ba Wamatörö Lowalangi’. (Mat. 24:14) Tatutunö göi hawaʼatohude zinangeania döi Yehowa andrö ba wamaigida zamösana.

”ONO MBANUANIA BA DÖINIA”

4. (a) Fatua lö mangawuli Yesu ba zorugo, hadia halöwö nibeʼenia khö ndra nifahaʼönia? (b) Hadia wanofu si tumbu ba dödöda ba wehede Yesu me iwaʼö, ”Tobali ami samaduhuʼö khögu”?

⁴ Fatua lö mangawuli Yesu ba zorugo, imane khö ndra nifahaʼönia, ”Mitema dania waʼabölö geheha niʼamoniʼö si möi khömi, ba tobali ami samaduhuʼö khögu iʼotarai Yeruzalema, Yudea ba Samaria maʼasagörö, irugi wondrege danö.” (Hal. 1:8) Börö daʼö, teturiaigö dania duria somuso dödö ba zi sagörö ulidanö, tenga ha ba Gizaraʼeli. Ba gafuriata, fefu niha moroi ba ngawalö soi, tebeʼe khöra ginötö tobali soloʼö khö Yesu. (Mat. 28:​19, 20) Hizaʼi, imane mege Yesu, ”Tobali ami samaduhuʼö khögu.” Hadia daʼö geluahania ha Yesu nifaduhuʼö ndra nifahaʼö si bohou andrö? Mazui, hadia moguna laʼila döi Yehowa ba tobali göi ira samaduhuʼö khönia? Tola taʼila wanema linia moroi ba zalua si no mututunö ba Halöwö Zinenge faza 15.

5. Hewisa ndra sinenge hegöi ira satua sokubaloi ba Yeruzalema ba wangoromaʼö wa fefu niha Keriso moguna laʼila döi Yehowa? (Faigi göi gambara.)

⁵ Me döfi 49 M, owulo ndra sinenge hegöi satua sokubaloi ba Yeruzalema ba wangai angetula hadia zinangea lafalua niha si lö nisuna enaʼö tola tobali ira niha Keriso. Ba gafuriata rafe andrö, imane Yakobo, akhi tiri Yesu, ”No ahori itutunö [Fetero] hewisa ba wamobörö me ifaigi soi böʼö Lowalangi, ba ituyu ba gotaluara zi tobali ono mbanuania ba döinia andrö.” Töi haniha nitutunö Yakobo? Ifuli itötöi Yakobo wehede Gamosi samaʼeleʼö ba imane, ”Enaʼö laʼalui Yehowa soroi ba dödö yaʼira si toröi andrö si fao ba ngawalö soi, ono mbanua nituyu ba döigu andrö, iwaʼö Yehowa.” (Hal. 15:​14-18) Tobali, ira nifahaʼö si bohou andrö tenga ha sanandrösa khö Yehowa lafahaʼö ira, hizaʼi tobali göi ira ’ono mbanua nituyu ba döinia’. Eluahania, laʼotöigö döi Lowalangi ba laʼila ira niha faoma töi daʼö.

6-7. (a) Hana wa möi Yesu ba gulidanö? (b) Hadia gabula dödö sebua irege möi Yesu ba gulidanö?

⁶ Eluaha döi Yesu yaʼia daʼö ”Yehowa No Fangorifi”. Itörö simane eluaha döinia andrö, iʼogunaʼö ia Yehowa ba wangorifi niha sangoromaʼö famati. Möi Yesu ba gulidanö ba wameʼe nosonia tobali höli. (Mat. 20:28) Me ifalua daʼö, no ibokai lala ba niha gulidanö enaʼö teʼorifi ira ba lasöndra waʼauri si lö aetu.—Yoh. 3:16.

⁷ Hizaʼi, hana wa moguna höli ba niha gulidanö? Börö zalua ba Kabu Edena. Simane si no tatutunö ba wamahaʼö silalö, mamadaö niha siföföna, Adamo ba Khawa ba wolawa Yehowa. Lua-luania, yaʼira hegöi ngaʼötöra lö saʼae laʼokhögö waʼauri si lö aetu. (1 Mo. 3:​6, 24) Börö daʼö, moguna höli ba niha gulidanö enaʼö tola teʼorifi ira. Hizaʼi sindruhunia, so gabula dödö sabölö ebua. Me luo daʼö, no teʼobousi döi Yehowa. (1 Mo. 3:​4, 5) Tobali, fefu nifalua Yesu ba wangorifi ngaʼötö Gadamo ba Khawa, moʼamakhaita göi ia ba wangamoniʼö töi Yehowa. Iʼokhögö halöwö si tohude Yesu ba wangamoniʼö töi Yehowa börö me no tobali ia salahi Yehowa ba iʼotöigö döi Namania andrö.

8. Hadia zinangea lafaduhuʼö ira soloʼö khö Yesu?

⁸ Fefu zoloʼö khö Yesu, he niha Yahudi mazui niha moroi ba ngawalö soi, moguna lafaduhuʼö wa fangorifira moroi khö Lowalangi Yehowa, Ama Yesu Keriso. (Yoh. 17:3) Ba simane Yesu, laʼila ba lakaoni ira faoma töi Yehowa. Moguna göi lafaduhuʼö wa tohude sibai ba wangamoniʼö töi Yehowa. Moʼamakhaita daʼö hadia teʼorifi ira mazui löʼö. (Hal. 2:​21, 22) Tobali, fefu zoloʼö khö Yesu moguna lafahaʼö ira sanandrösa khö Yehowa hegöi khö Yesu. Börö daʼö, imane Yesu ba wangasiwai fangandrönia si no musura ba Yohane 17, ”No uʼombakhaʼö khöra döimö, ba utohugö nasa wangombakha enaʼö laʼomasiʼö niha böʼö simane fangomasiʼöu yaʼo ba enaʼö hasara dödöma.”—Yoh. 17:26.

”YAʼAMI ZAMADUHUʼÖ KHÖGU”

9. Hewisa wangoromaʼö ndra soloʼö khö Yesu wa tohude sibai döi Yehowa?

⁹ Moroi ba zi no tatutunö, fefu ndra soloʼö khö Yesu no sinangea na laʼamoniʼö döi Yehowa. (Mat. 6:​9, 10) Moguna so ba wangera-ngerara wa sabölö tohude ba waʼaurira yaʼia daʼö töi Yehowa, ba oroma daʼö moroi ba nifaluara. Na simanö, börö me yaʼita soloʼö khö Yesu, hadia zinangea tafalua enaʼö tola taʼamoniʼö döi Yehowa ba fao ita ba wamaduhuʼö wa fasala fefu niböbögö Zatana?

10. Hadia zalua nitutunö ba Yesaya faza 42 irugi 44? (Yesaya 43:9; 44:​7-9) (Faigi göi gambara.)

¹⁰ Ba Yesaya faza 42 irugi 44, tola taʼila hadia zinangea tafalua ba wangamoniʼö töi Yehowa. Ba zi tölu faza daʼa, iʼamaedolagö Yehowa andrö hulö zi so ba gödo zanguhuku. Iwaʼö ba niha samosumange lowalangi böʼö enaʼö laforomaʼö wa sindruhu-ndruhu so lowalangira. Iʼandrö göi khöra enaʼö lakaoni ndra samaduhuʼö ba wamaduhuʼö daʼö. Hizaʼi, samösa lö hadöi si tola mamaduhuʼö!—Baso Yesaya 43:9; 44:​7-9.

11. Hadia niwaʼö Yehowa ba nono mbanuania moloʼö Yesaya 43:​10-12?

¹¹ Baso Yesaya 43:​10-12. Imane Yehowa ba niha samosumange yaʼia, ”Yaʼami zamaduhuʼö khögu, . . . Lowalangimi ndraʼo.” Aefa daʼö, manofu khöra Yehowa imane, ”Hadia so Lowalangi böʼö baero ndraʼo?” (Yes. 44:8) No tebeʼe khöda döi sebua ba wameʼe fanema li moroi ba wanofu daʼö. Moroi ba wehede hegöi nifaluada tola taforomaʼö wa ha samösa Lowalangi sindruhu yaʼia daʼö Yehowa. Ba waʼaurida sero maʼökhö, tola taforomaʼö wa taʼomasiʼö ia ba lö faröi ita khönia gofu hadia nifalua Zatana khöda. Dataʼamoniʼö döi Yehowa ba taforomaʼö wa töinia andrö zabölö tohude ba waʼaurida.

12. Hewisa waʼalua nifaʼeleʼö ba Yesaya 40:​3, 5?

¹² No taʼoʼö Yesu na fao ita ba wangamoniʼö töi Yehowa. Ifaʼeleʼö Yesaya wa so dania samösa ’zangehenaigö lala khö Yehowa’. (Yes. 40:3) Alua daʼö me tohare Yohane Samayagö Idanö ba wangehenaigö lala khö Yesu, si tohare ba döi Yehowa ba fahuhuo ia ba döi daʼö. (Mat. 3:3; Mrk. 1:​2-4; Luk. 3:​3-6) Imane göi famaʼeleʼö andrö, ”Tefaʼeleʼö dania lakhömi Yehowa.” (Yes. 40:5) Hewisa waʼaluania daʼö? Me möi Yesu ba gulidanö, tobali ia salahi soʼahonoa ba woloʼö amuata Yehowa irege hulö Yehowa samösa zi möi ba gulidanö.—Yoh. 12:45.

13. Hewisa woloʼöda duma-duma Yesu?

¹³ Simane Yesu, tobali ita samaduhuʼö Yehowa ba taʼotöigö döinia. Daʼö mbörö wa tafatunö ba niha fefu gamuatania sahöli-höli dödö. Hizaʼi, tenga ha daʼö. Moguna göi tafatunö hadia nifalua Yesu ba wangamoniʼö töi Yehowa. (Hal. 1:8) Yesu zi oföna tobali Samaduhuʼö khö Yehowa, ba moguna taforege ba woloʼö nifaluania. (Fam. 1:5) Hewisa nasa wangoromaʼöda wa tohude sibai döi Yehowa andrö ba waʼaurida?

FOROMAʼÖ WA TOHUDE SIBAI DÖI YEHOWA ANDRÖ BA WAʼAURIMÖ

14. Hewisa dödöda sanandrösa ba döi Yehowa andrö? (Sinunö 105:3)

¹⁴ Miʼalawaʼö döinia. (Baso Zinunö 105:3.) Omuso sibai dödö Yehowa ba ginötö taʼalawaʼö döinia. (Yer. 9:​23, 24; 1 Ko. 1:31; 2 Ko. 10:17) Tatu manö, no sambua töi sebua khöda börö me tola fao ita ba wangamoniʼö hegöi ba wamaduhuʼö wa fasala fefu niböbögö ba döi daʼö. Lö alawö ita wamatunö khö ndra awöda wohalöwö, awöda sekola, si falazi omo khöda hegöi ba niha tanö böʼö, wa yaʼita andre Samaduhuʼö Yehowa. Sindruhu sa wa omasi sibai Zatana na taböhöli wanutunö töi Yehowa. (Yer. 11:21; Fam. 12:17) Omasi ia hegöi ira samaʼeleʼö sofaya si fao khönia na taʼolifugö döi daʼö. (Yer. 23:​26, 27) Hizaʼi börö me taʼomasiʼö döi Yehowa, lö taböhöli wamosumange töi daʼö ”ero maʼökhö”.—Si. 5:11; 89:16.

15. Hadia geluahania woʼangaröfili töi Yehowa?

¹⁵ Böi böhöli woʼangaröfili töi Yehowa. (Yoe. 2:32; Rom. 10:​13, 14) Eluahania tenga ha asala taʼila ba taʼogunaʼö döi Lowalangi andrö, hizaʼi moguna sindruhu-ndruhu aboto ba dödöda, tafaduhusi tödö ia ba taʼandrö khönia wanolo hegöi fanuturu lala. (Si. 20:7; 99:6; 116:4; 145:18) Baero daʼö, taturiaigö döinia hegöi amuatania ba niha böʼö. Tatolo ira ba wamaudugö lala waʼaurira ba zomasi Yehowa enaʼö tola laʼomusoiʼö dödönia ba teʼorifi ira.—Yes. 12:4; Hal. 2:​21, 38.

16. Hewisa wamaduhuʼöda wa Satana zi falimo?

¹⁶ Tatehegö tefakao ita börö döi Yehowa. (Yak. 5:​10, 11) Na lö faröi ita khö Yehowa hewaʼae göna ita famakao, no tafaduhuʼö wa Satana zi falimo. Ba götö Yobi me föna, no irai iwaʼö Satana, ”Itehegö gofu hadia zi so khönia niha asala lö mate ia.” (Yob. 2:4) Ifobahulu niha Satana wa awai lafosumange Yehowa ha na sökhi-sökhi manö zalua ba waʼaurira. Na göna ira famakao, hasambalö laröi Yehowa. Hizaʼi, me lö faröi Yobi khö Yehowa, no iforomaʼö wa fasala niböbögö Zatana andrö. Tebeʼe göi khöda ginötö iadaʼa ba wangoromaʼö faʼalöfaröida khö Yehowa, gofu hadia nifalua Zatana khöda. Yafaduhu dödöda wa hasambalö irorogö ita Yehowa börö döinia.—Yoh. 17:11.

17. Simane nisura ba 1 Fetero 2:​12, hewisa nasa wangoromaʼöda wa tafolakhömi döi Yehowa?

¹⁷ Fosumange döi Yehowa. (Amd. 30:9; Yer. 7:​8-11) Börö me no tobali ita salahi Yehowa ba taʼotöigö döinia, tola tefolakhömi mazui teʼobousi döinia moroi ba mbua-buada. (Baso 1 Fetero 2:12.) Börö daʼö, dataforege wamosumange töi Yehowa moroi ba wehede hegöi amuatada. Na tafalua daʼö, no tafolakhömi döinia hewaʼae lö moʼahonoa ita.

18. Hadia nasa zi tola tafalua ba wangoromaʼö wa tohude sibai döi Yehowa andrö ba waʼaurida? (Faigi göi nisura ba gahe zura.)

¹⁸ Abölö taʼalawaʼö döi Yehowa moroi ba döida samösa. (Si. 138:2) Hadia mbörö wa tohude sibai daʼa? Te lö omasi niha ba zi fasuida ba ginötö taʼomusoiʼö dödö Yehowa, lua-luania laʼobousi döida.a No alua khö Yesu zimane daʼö göi me mböröta. Lafobahulu ia, labaliʼö ia niha si lö sökhi irege labunu. Hizaʼi, ”lö aila ia”, itehegö mate ia börö wamolakhömi töi Yehowa. Lö talafo iʼangeragö hewisa wehede niha sanandrösa khönia. (Heb. 12:​2-4) Iʼosambuaʼö manö dödönia ba wamalua ohitö dödö Lowalangi.—Mat. 26:39.

19. Hewisa dödöu sanandrösa ba döi Yehowa, ba hadia mbörö?

¹⁹ Omuso dödöda börö döi Yehowa, ba no sambua töi sebua khöda na laʼila ita wa Samaduhuʼö Yehowa. Börö daʼö, böi taböhöli wanuno yaʼia hewaʼae na laʼoʼaya ita niha böʼö. Abölö tohude döi Yehowa moroi ba döida. Datahalö gangetula ba wamolakhömi töi Yehowa gofu hadia nifalua Zatana ba wanaisi yaʼita. Na lö faröi ita ba wamolakhömi töi Lowalangi simane nifalua Yesu, no tafaduhuʼö wa sabölö tohude ba waʼaurida yaʼia daʼö töi Yehowa.