Böi Bato Fahuwu khö Yehowa ba Ginötö Findra ba Nahia Sangogunaʼö Li Böʼö
”No uʼiröʼö ba dödögu bakha niwaʼömö andrö.”—ZINUNÖ 119:11.
1-3. (a) Hadia zi lö tola löʼö taʼofönaiʼö? (b) Hadia manö wanandraigö nirasoi niha samahaʼö yaʼia ba li si bohou, ba hadia zi tobali fanofu? (Faigi gambara ba wamobörö wamahaʼö.)
IADAʼA, ato Zamaduhuʼö Yehowa fao ira ba wamaduhuʼö famaʼeleʼö sanandrösa ba wanuriaigö ”ba ngawalö soi fefu, ba ba ngawalö niwa, ba ba ngawalö li, ba ba ngawalö mado fefu”. (Famaʼeleʼö 14:6) Hadia öfahaʼö göi ndraʼugö ba li tanö böʼö? So zangai halöwö tobali utusan injil mazui manuriaigö ba mbanua si lö ato sanuriaigö. Tanö böʼönia ibörötaigö möi ira ba mbanua niha Keriso sangogunaʼö li böʼö ba mbanuara samösa.
2 Fefu niha samosumange Lowalangi, moguna laʼofönaiʼö wahuwusara khö Yehowa hegöi fahuwusa nösi nomora khö Yehowa. (Mataiʼo 5:3) Hewaʼae itaria oya halöwöda irege abua khöda ba wangalui ginötö si tefaudu ba wamalua famahaʼö samösa si sökhi. Hizaʼi, abölö oya wanandraigö nirasoi niha sangai halöwö ba mbanua niha Keriso sangogunaʼö li böʼö.
3 Niha sangai halöwö ba mbanua niha Keriso sangogunaʼö li böʼö, moguna lafahaʼö ira ba li si bohou, moguna göi laforege wamahaʼö yaʼira ero maʼökhö si fao fangerönusi sanandrösa khö Lowalangi. (I Korindro 2:10) Hewisa tola lafalua daʼa na ambö aboto ba dödöra hadia nifahaʼö ba mbanua niha Keriso? Hadia mbörö wa ira satua si no tobali niha Keriso sangai halöwö ba mbanua niha Keriso sangogunaʼö li böʼö, moguna laʼila hadia tofakha ba dödö ndraonora zindruhu andrö?
TOLA AWUWU WAHUWUSADA KHÖ YEHOWA
4. Hadia zi tobali famaʼala wahuwusada khö Yehowa? Beʼe duma-duma.
4 Na lö aboto ba dödöda wamahaʼö Zura Niʼamoniʼö nifaʼema ba li böʼö, tola tobali famaʼala wahuwusada khö Yehowa daʼö. Ba ginötö mangawuli Nehemia ba Yeruzalema, iʼila wa so ösa ndraono si tebai fahuhuo ba li Heberaiʼo. (Baso Nehemia 13:23, 24.) Börö me lö aboto ba dödö ndraono andrö Daromali Lowalangi, lua-luania ambö aro wahuwusara khö Yehowa.—Nehemia 8:2, 8.
5, 6. Hadia niʼila ndra satua sangai halöwö ba mbanua niha Keriso sangogunaʼö li böʼö, ba hadia mbörö?
5 So ösa satua si no tobali niha Keriso sangai halöwö ba mbanua niha Keriso sangogunaʼö li böʼö, laʼila wa ambö aro wahuwusa ndraonora khö Yehowa. Börö me ambö aboto ba dödö ndraonora hadia nifahaʼö ba gangowuloa, lö tefarou ira ba wamalua famahaʼö andrö. Pedro hegöi ösi nomonia, si findra ba Australia moroi ba Amerika tanö ba Gaekhula imane, ”Ba ginötö tatutunö ngawalö so amakhaita ba wamati, lö tola löʼö tafaogö dödö hegöi fangera-ngerada.”[1] (Faigi gonönöta.)—Luka 24:32.
6 Ba ginötö mombaso ita ba li böʼö, tola manö lö tofakha ba dödöda. Faböʼö simane na tabaso ia ba lida samösa. Börö me abua wahuhuosa ba li böʼö, tola manö erege dödöda ba lua-luania ambö owua-wua dödöda ba wamosumange Yehowa. Hewaʼae omasi sibai ita fao ba mbanua niha Keriso sangogunaʼö li böʼö, hizaʼi moguna göi tarorogö wahuwusada khö Yehowa.—Mataiʼo 4:4.
LAROROGÖ WAHUWUSARA KHÖ YEHOWA
7. Hadia nifalua niha Babilona ba wamaso Danieli woloʼö si toʼölö lafalua hegöi agamara?
7 Ba ginötö latiboʼö Danieli hegöi ira awönia ba Babilona, lafaso ira niha Babilona ba woloʼö si toʼölö lafalua hegöi agamara. Hewisa wa tola? Lafahaʼö ira ”li Ndrawa Galedaia” ba labeʼe döira moloʼö töi Babilona. (Danieli 1:3-7) Ira niha babilona labeʼe döi Danieli yaʼia daʼö Belisasa, börö me moʼamakhaita daʼö ba döi lowalangi sabölö tohude ba daʼö yaʼia daʼö Bel. Omasi Razo Nebukaneza na faduhu dödö Danieli wa abölö lowalangi Babilona moroi khö Yehowa, Lowalangi Danieli.—Danieli 4:5.
Börö me lö aetu ifahaʼö ia ba “zura” ba li Heberaiʼo, andrö wa aro wahuwusa Danieli khö Yehowa
8. Hewisa wondrorogö Danieli enaʼö lö aetu aro wahuwusania khö Yehowa?
8 Ba Babilona, labeʼe khö Danieli gö razo sami sibai. Hizaʼi, no ”iŵaʼö sibai tödönia” ba woloʼö goi-goi Lowalangi. (Danieli 1:8) Börö me lö aetu-aetu ifahaʼö ia ba “zura” ba li Heberaiʼo, andrö wa aro wahuwusania khö Yehowa hewaʼae toröi ia ba soi böʼö. (Danieli 9:2) Sindruhunia, hewaʼae no 70 fakhe toröi ia ba Babilona, hizaʼi laʼila ia niha ba döi Heberaiʼonia yaʼia daʼö Danieli.—Danieli 5:13.
9. Hadia lua-lua Daromali Lowalangi khö sanura Zinunö 119?
9 Duma-duma tanö böʼönia, alua khö sanura Zinunö 119. Anau gölönia ba wanaögö fanandraigö moroi khö ndra sohalöwö ba gödo. Isöndra waʼabölö moroi ba daromali Lowalangi, ba daʼa zanolo yaʼia tola faböʼö moroi ba danö böʼö. (Zinunö 119:23, 61) Itehegö tofakha ba dödönia daromali Lowalangi andrö.—Baso Zinunö 119:11, 46.
BÖI BÖHÖLI AROʼÖ WAHUWUSAMÖ KHÖ YEHOWA
10, 11. (a) Hadia gohitö dödöda ba ginötö tafahaʼö ita ba Daromali Lowalangi? (b) Hewisa enaʼö tola takhamö gohitö dödöda andrö? Beʼe duma-duma.
10 Hewaʼae tola manö ahori ginötöda börö waʼoya halöwö ba mbanua niha Keriso mazui ba nahia wohalöwö, fefu ita moguna tabeʼe ginötöda ba wamahaʼö samösa hegöi ba wamahaʼö zi sambua omo. (Efeso 5:15, 16) Gohitö dödöda tenga hawaʼoya ngaʼörö buku zi no tabaso mazui ba wamaʼanö mbua gera-erada ba gangowuloa. Moguna tatehegö idönisi dödöda Daromali Lowalangi hegöi ba wangaʼaroʼö famatida.
11 Enaʼö alua gohitö dödöda andre moguna tafagölö-gölösi dödöda. Ba ginötö tafahaʼö ita, böi ha ba niha böʼö manö tafoʼamakhaita wamahaʼö andrö, hizaʼi tafakhai ia göi ba waʼaurida samösa. (Filifi 1:9, 10) Moguna aboto ba dödöda ba ginötö tafaʼanö ita weʼamöi ba wanuriaigö, ba gangowuloa, mazui ba wamaʼema huhuo, tola manö lö tafalua zi no tabaso andrö ba waʼaurida. Duma-dumania, samösa sondrino moguna irasoi nirinonia fatua lö ibeʼe ba niha böʼö. Hizaʼi, tebai auri ia na ha irasoi manö gö daʼö. Na omasi ia abölö, moguna irino samösa gönia. Simanö göi na omasi ita aro wahuwusada khö Yehowa, moguna tafahaʼö ita ba Zura Niʼamoniʼö ero maʼökhö. Na taʼabakhaiʼö wamahaʼö samösa, tola tefönui mbalazoda ba wamati.
12, 13. Hadia mbörö wa ato zorasoi fanolo moroi ba wamahaʼö Zura Niʼamoniʼö ba lira samösa?
12 Ato zangai halöwö ba mbanua niha Keriso sangogunaʼö li böʼö, larasoi wanolo moroi ba wamahaʼö Zura Niʼamoniʼö siʼero maʼökhö ba ’li si tumbu yaʼira’. (Halöwö Zinenge 2:8) Aboto ba dödö ndra utusan injil wa enaʼö aro ira ba wamati ba mbanua si so yaʼira, lö ibönö na ha laʼodaligö hadia zi no larongo ba gangowuloa.
13 Alain, si no walu fakhe ifahaʼö ia ba li Persia imane, ”Ba ginötö ufaʼanö ndraʼo ba gangowuloa ba li Persia, ha ngawua wehede ba li daʼö niʼangeraigögu. Andrö, lö tofakha ba dödögu fefu zi no ubaso. Daʼö mbörö wa ubeʼe ginötögu ba wamahaʼö Zura Niʼamoniʼö hegöi publikasi tanö böʼö ba ligu samösa ero maʼökhö.”
ROROGÖ WAMATI NDRAONOMÖ
14. Hadia zinangea aboto ba dödö ndra satua, ba hadia mbörö?
14 Moguna aboto ba dödö zatua si no tobali niha Keriso hadia sindruhu-ndruhu no tofakha ba dödö hegöi ba wangera-ngera ndraonora zindruhu andrö. Duma-dumania, Serge hegöi foʼomonia Muriel, si no töra tölu fakhe mangai halöwö ba mbanua niha Keriso sangogunaʼö li böʼö. Ibörögö laʼila wa onora, si no 17 fakhe, ambö owua-wua dödönia ba wanuriaigö hegöi ba gangowuloa. Imane Muriel, ”Lö omasi ia manuriaigö ba li böʼö, sindruhuniasa fatua lö findra ndraʼaga omasi ia manuriaigö ba linia samösa, Prancis.” Imane Serge, ”Ba ginötö aboto ba dödöma wa tola tobali daha taha daʼa ba waʼatedou wamati nonoma, mahalö gangetula wa mafuliga ba mbanua niha Keriso si fao ndraʼaga mböröta.”
Botogö ba dödömö hadia no tofakha ba dödö ndraonomö zindruhu andrö (Faigi ngenoli si-14, 15)
15. (a) Hadia zi tola manolo satua ba wangai angetula hadia moguna findra ira ba mbanua niha Keriso tanö böʼö? (b) Hadia mene-mene nibeʼe V Moze 6:5-7 khö ndra satua?
15 Hadia zi tola manolo ndra satua ba wangai angetula hadia moguna lafuli ira ba mbanua niha Keriso sangogunaʼö li sabölö aboto ba dödö ndraonora? Si öföna, moguna lahalö gangetula hadia sindruhu-ndruhu ibönö ginötö hegöi waʼabölöra ba wamahaʼö iraonora wangomasiʼö Yehowa hegöi wamahaʼö yaʼira ba li si bohou, ba ginötö si fagölö. Si dua, tola manö laʼila wa lö omasi ndraonora manuriaigö, möi ba gangowuloa mazui findra ba nahia sangogunaʼö li böʼö. Na lafatimbaisi zi dombua ngawalö andre, tola lahalö gangetula ira satua, enaʼö lafuli ira ba mbanua niha Keriso sangogunaʼö li sabölö aboto ba dödö ndraonora. Aefa daʼö, na no aro wahuwusa ndraonora khö Yehowa, tola lahalö gangetula ira satua enaʼö lafuli ira ba mbanua niha Keriso sangogunaʼö li böʼö.—Baso V Moze 6:5-7.
16, 17. Hadia zanolo satua ba wamahaʼö iraonora sanandrösa khö Yehowa?
16 So zatua si tola mamahaʼö iraonora sanandrösa khö Yehowa ba lira samösa, ba ginötö si fagölö göi fao ira ba mbanua niha Keriso mazui ba kelompok sangogunaʼö li böʼö. Charles, samösa ama sangokhögö tölu nono alawe, faʼalawa ndröfira 9 irugi 13 fakhe. Findra ira ba kelompok sangogunaʼö li Lingala. Imane, ”Mahalö gangetula wa maʼogunaʼö li sasese maʼogunaʼö ba wamahaʼö Zura Niʼamoniʼö hegöi wamahaʼö zi sambua omo khö ndraonoma. Hizaʼi, mafalua göi famomaha hegöi games ba li Lingala irege tola lafahaʼö ira ba li andre si fao faʼowua-wua dödö.”
Forege wamahaʼö li niʼogunaʼö ba nahia si so yaʼugö hegöi wameʼe mbua gera-era ba gangowuloa (Faigi ngenoli si-16, 17)
17 Kevin, samösa ama sangokhögö darua nono alawe, faʼalawa ndröfira lima ba walu fakhe. Iforege ba wamahaʼö sindruhu khöra, börö me ambö aboto ba dödö ndraononia nifaʼema ba gangowuloa mbanua niha Keriso sangogunaʼö li böʼö si fao yaʼira. Imane, ”Yaʼo hegöi foʼomogu, mafahaʼö ndraonoma si darua ba Zura Niʼamoniʼö ba li Prancis, lira samösa. Mahalö gangetula enaʼö fao ndraʼaga ba gangowuloa sangogunaʼö li Prancis sakali sara waŵa, ba na so libur fao ndraʼaga ba kebaktian sangogunaʼö li sasese maʼogunaʼö.”
18. (a) Hewisa Roma 15:1, 2 tola manolo ndraʼugö ba wangai gangetula si sökhi ba wanolo ndraonomö? (b) Hadia mene-mene nibeʼe ndra satua böʼö? (Faigi gonönöta.)
18 Ira satua, moguna lahalö gangetula hadia zabölö sökhi khö ndraonora hegöi ba wahuwusara khö Yehowa.[2] (Faigi gonönöta.) (Galatia 6:5) Itutunö Muriel wa hewaʼae sindruhu-ndruhu omasi sibai ia hegöi foʼomonia enaʼö lö aetu lahalö halöwö ba mbanua niha Keriso sangogunaʼö li böʼö, lahalö gangetula wa lafuli ira ba wanolo onora enaʼö aro wahuwusania khö Yehowa. (Baso Roma 15:1, 2.) Iadaʼa, iʼila Serge wa atulö gangetula nihalöra. Imane, ”Me mangawuli ndraʼaga ba mbanua niha Keriso sangogunaʼö li Prancis, tedou wamati ndraonoma ba tebayagö ia idanö. Iadaʼa, no merintis biasa ia, ba omasi ia ifuli findra ba kelompok sangogunaʼö li böʼö!”
TEHEGÖ TOFAKHA BA DÖDÖMÖ DAROMALI LOWALANGI
19, 20. Hewisa tola taforomaʼö wa taʼomasiʼö Daromali Lowalangi?
19 Iʼomasiʼö fefu niha Yehowa. No ihenaigö Zura Niʼamoniʼö ba ngaotu li enaʼö ’fefu niha’ tola lasöndra waʼatua-tua si tefaudu ba zindruhu. (I Timoteo 2:4) Iʼila wa tola aro wahuwusara khönia na labaso Zura Niʼamoniʼö ba li sabölö aboto ba dödöda.
20 Fefu ita moguna taforege enaʼö lö taböhöli taʼaroʼö wahuwusada khö Yehowa. Tola tafalua daʼö na tafahaʼö ita ba Zura Niʼamoniʼö ero maʼökhö ba li sabölö aboto ba dödöda. Tola tatolo göi nösi nomoda enaʼö aro wahuwusara khö Yehowa, ba taforomaʼö wa sindruhu-ndruhu taʼomasiʼö Daromali Lowalangi.—Zinunö 119:11.
^ [1] (ngenoli si-5) No mufaböʼöni döi.
^ [2] (ngenoli si-18) Enaʼö öʼila goi-goi Zura Niʼamoniʼö si tola manolo nösi nomomö, faigi duho ”Membesarkan Anak di Negeri Asing—Tantangan dan Berkatnya” ba Menara Pengawal 15 mbaŵa si Fulu, 2002.