Böi Tobali Fangala Khöu Zala Nifalua Niha Böʼö

1, 2. Hadia nifaʼeleʼö Zura Niʼamoniʼö sanandrösa ba waʼatedou nono mbanua Yehowa?

BA GULIDANÖ andre, so organisasi sangomasiʼö Yehowa ba somasi mamosumange yaʼia. Yaʼira andrö Samaduhuʼö Yehowa. Hewaʼae lö moʼahonoa ira ba lafalua zala, iʼogunaʼö gehehania Yehowa ba wameʼe fanuturu lala ba nono mbanuania. Datafaigi hadia manö lala wameʼenia howu-howu khöra.

² Lö ato zamosumange Yehowa me döfi 1914. Hizaʼi, ifahowuʼö Yehowa halöwö fanuriaigö nifaluara. Buania, so haʼuga zuta niha si no mamahaʼö yaʼira ba zindruhu sanandrösa ba Zura Niʼamoniʼö ba tobali ira Samaduhuʼö Yehowa. Sanandrösa ba waʼatedou andre, imane Yehowa, ”Fondrege zide-ide, ba tobali hönö, ba fondrege tou, ba tobali soi sabölö: Yaʼodo, Yehowa zamangaösö dania, na baŵania!” (Yesaya 60:22) No alua zi no tefaʼeleʼö andrö ba ginötö daʼa. Hulö soi sebua nono mbanua Yehowa. Abölö ato nono mbanua Yehowa moroi ba nono mbanua si so ba zi haʼuga soi.

3. Hewisa wangoromaʼö nono mbanua Lowalangi wa so khöra waʼomasi?

³ Sagötö ngaluo safuria andre, itolo nono mbanuania Yehowa enaʼö laʼaʼaroʼö waʼomasira khö nawöra zamösana. ”Lowalangi andrö ba no faʼomasi”, ba laʼoʼö ia. (I Yohane 4:8, NW) Iʼoʼou niha soloʼö khönia Yesu enaʼö ’laʼomasiʼö nawöra’. Imane nasa khöra, ”Ba daʼö aboto ba dödö niha fefu, wa no nifahaʼögu ami, na so khömi waʼomasimi nawömi.” (Yohane 13:34, 35) No laʼoromaʼö ono mbanua Yehowa ba ginötö andre waʼomasi ba nawöra, hewaʼae alua wasuwöta ba ngawalö soi. Duma-dumania, me alua Wasuwöta Gulidanö II, so mato 55 zuta niha si no mate. Hizaʼi, lö labunu niha ono mbanua Yehowa sagötö alua wasuwöta andrö. (Baso Mikha 4:1, 3.) Daʼa zanolo yaʼira enaʼö ’lö horöra ba ndro niha fefu’.​—Halöwö Zinenge 20:26.

4. Hana wa ahöli-höli dödöda waʼatedou nono mbanua Yehowa?

⁴ Itugu monönö waʼato nono mbanua Lowalangi hewaʼae so nudura sabölö yaʼia daʼö Satana. Yaʼia ”lowalangi zi sagötö tanö andre”. (II Korindro 4:4) Satana zamatörö organisasi politik hegöi media berita. Daʼa niʼogunaʼönia enaʼö tebato halöwö fanuriaigö turia somuso dödö. Hizaʼi, lö aʼozu. Iʼila Satana wa lö aratö ginötö nitehe khönia. Börö daʼö, iforege enaʼö tabato wamosumange Yehowa.​—Famaʼeleʼö 12:12.

HADIA LÖ FARÖI NDRAʼUGÖ NA SO ZALA NIFALUA NIHA BÖʼÖ?

5. Hana wa itaria laʼafökhöiʼö dödöda niha böʼö? (Faigi gambara ba wamobörö wamahaʼö.)

⁵ Aboto ba dödö nono mbanua Lowalangi wa moguna wangomasiʼö Lowalangi hegöi niha böʼö. Imane Yesu, ”’Omasiʼö Zoʼaya yaʼugö, Lowalangiu andrö, moroi siʼaikö ba dödöu, nosou maʼasambua zangomasiʼö yaʼia, ba öhorigö gera-erau, wangomasiʼö yaʼia.’ Daʼö zebua goroisa, daʼö zi föföna. Ba sambua tö, si fakhili-khili khönia: ’Omasiʼö zahatö khöu, simane faʼomasiu ndraʼugö.’” (Mataiʼo 22:35-39) Hizaʼi, ifatunö khöda Sura Niʼamoniʼö wa fefu niha oi lö moʼahonoa börö me no ifalua horö Adamo. (Baso Roma 5:12, 19.) Itaria so zangumaʼö mazui samalua hadia ia zi tola mangafökhöiʼö tödöda ba mbanua niha Keriso. Na alua daʼö, hadia nifaluada? Hadia alö waʼomasida khö Yehowa? Hadia lö faröi ita khönia hegöi ba nono mbanuania? So ösa nono mbanua Lowalangi nitutunö ba Zura Niʼamoniʼö sangumaʼö mazui samalua si möi fangafökhö dödö niha böʼö. Datafaigi hadia wamahaʼönia khöda ba zalua andrö.

6. Hana wa tola tawaʼö wa lö mofozu wameʼe Eli wotu ba ndraononia?

⁶ Duma-dumania Eli, yaʼia andre ere sebua ba ndraono Gizaraʼeli. Hizaʼi, lalawa goroisa Yehowa ononia ono matua si darua. Imane Sura Niʼamoniʼö, ”Ba no si lö ngaroro ndraono Eli andrö, lö ba dödöra Yehowa.” (I Zamueli 2:12) Iʼila Eli wa lö sökhi gamuata ndraononia. Hizaʼi, ha asala noa manö wameʼenia fotu. Ba gafuriatania, ihuku Eli hegöi ononia si darua Yehowa. Aefa daʼö, tebai tobali ere sebua ngaʼötö Eli saʼae. (I Zamueli 3:10-14) Na so ndraʼugö me götö Eli andrö, ba öʼila me lö itegu ndraononia me lafalua zi lö sökhi, hadia tobali fangala khöu daʼö? Hadia itugu awuwu wamatimö khö Yehowa irege öbato wamosumange yaʼia?

7. Hadia horö sebua nifalua Dawido, ba hadia nifalua Lowalangi?

⁷ Oya gamuata si sökhi khö Dawido. Andrö wa iʼomasiʼö sibai ia Yehowa. (I Zamueli 13:13, 14; Halöwö Zinenge 13:22) Hizaʼi, no irai ifalua horö sebua Dawido. Me möi fasuwö Guria, ihoröni ndronga Guria Dawido sotöi Mbaseba. Lua-luania, manabina Mbaseba. Lö omasi Dawido na so zangila nifaluania. Börö daʼö, iʼoʼou Guria wamalukhaisi yaʼia ba iʼalui lala enaʼö mangawuli Guria ba nomo. Itötöna Dawido enaʼö orudu Guria khö woʼomonia sotöi Mbaseba ba lamane niha ono si tumbu andrö ngaʼötö Guria. Hizaʼi, lö mangawuli Guria ba nomo. Andrö iʼodödögö Dawido enaʼö mate Guria ba wasuwöta. Me no ifalua horö sebua, göna Dawido wangabu dödö sabölö-bölö hegöi ösi nomonia. (II Zamueli 12:9-12) Ihakhösi tödö ia Yehowa ba iʼefaʼö zalania. Iʼila wa omasi Dawido wamalua satulö. (I Razo 9:4) Na so ndraʼugö me luo daʼö, hewisa dödöu ba zi no ifalua Dawido andre? Hadia öbato wamosumange Yehowa?

8. (a) Hadia zala nifalua Wetero? (b) Hewaʼae no ifalua zala Fetero, hana wa lö iböhöli Yehowa wangogunaʼö yaʼia?

⁸ Duma-duma Zura Niʼamoniʼö tanö böʼö yaʼia daʼö Fetero. Yesu zofili yaʼia tobali sinenge. Hewaʼae simanö, itaria iwaʼö mazui ifalua zala Fetero. Duma-dumania, iwaʼö Fetero lö iröi Yesu hewaʼae laröi ia niha böʼö. (Mareko 14:27-31, 50) Hizaʼi, me laraʼu Yesu, laröi ia fefu ira sinengenia, simanö göi Wetero. Aefa daʼö, tölu kali iʼosilöʼögö Yesu. (Mareko 14:53, 54, 66-72) Maniasa sibai Wetero ba nifaluania andrö. Andrö wa iʼefaʼö zalania Yehowa ba lö iböhöli wangogunaʼö yaʼia. Na samösa nifahaʼö Yesu ndraʼugö me luo daʼö ba öʼila zi no ifalua Fetero, hadia öbato waʼafaduhu dödö khö Yehowa?

9. Hana wa faduhu dödöu wa hasambalö ifalua zatulö Lowalangi?

⁹ Moroi ba duma-duma andre taʼila wa no irai lafalua zala ono mbanua Yehowa ba laʼafökhöiʼö dödönia. Na alua daʼö iadaʼa, hadia nifaluau? Hadia öbato weʼamöi ba gangowuloa ma öröi Yehowa hegöi ono mbanuania? Mazui, hadia öʼila wa so waʼahakhö dödö khö Yehowa, ba ibaloi ginötö na ifalalini gera-erania niha samalua sala? Itaria, so niha zamalua sala si lö mamalalini era-erara. Hadia faduhu dödöu wa iʼila Yehowa zalua andrö ba tola ifalua hadia ia ba ginötö si tefaudu? Na moguna, tola manö iheta niha andrö ba gangowuloa. Hadia faduhu dödöu wa hasambalö ifalua zatulö Yehowa?

BÖI FARÖI

10. Hewisa wamaigi Yesu zala nifalua Yuda banua Kariota hegöi Fetero?

¹⁰ Ba Zura Niʼamoniʼö, ato niha si lö faröi khö Yehowa hegöi ba nono mbanuania, hewaʼae no lafalua zala sebua niha ba zi fasui yaʼira. No ibeʼe khöda duma-duma si sökhi Yesu. Me no aefa sara wongi iʼandrö wanolo khö Namania, ifili 12 zinengenia. Hizaʼi, so samösa moroi ba gotaluara zimanga mbölinia yaʼia daʼö Yuda banua Kariota. Baero daʼö, iʼosilöʼögö ia göi Fetero. (Luka 6:12-16; 22:2-6, 31, 32) Lö itahigö Yehowa Yesu hegöi ira nifahaʼönia hewaʼae no labeʼe afatö dödönia. Aro wahuwusania khö Namania ba lö ibato wangai halöwönia. Börö daʼö, ibeʼe khönia mbuala Yehowa, isusugi ia, aefa daʼö tobali ia Razo ba Mbanua zorugo.​—Mataiʼo 28:7, 18-20.

11. Hadia nifaʼeleʼö Zura Niʼamoniʼö sanandrösa ba nono mbanua Yehowa ba ginötö andre?

¹¹ Duma-duma Yesu andre zamahaʼö yaʼita enaʼö lö faröi khö Yehowa hegöi ba nono mbanuania. So mbörö wa tafalua daʼö. Tola taʼila wa ibeʼe Yehowa wanuturu lala ba nono mbanuania ba ngaluo safuria. Itolo ira ba wanuriaigö ba zi sagörö ulidanö. Ba ha yaʼira zamalua halöwö daʼa. Sindruhu-ndruhu wa so khöra wahasara dödö hegöi faʼomuso dödö börö me Yehowa zamahaʼö yaʼira. Imane Yehowa, ”Hiza, saʼiki-iki genonigu, ba waʼowua-wua dödö andrö.”​—Yesaya 65:14.

12. Hewisa dödöda ba zala nifalua niha böʼö?

¹² Omuso sibai dödöda börö me ibeʼe khöda wanuturu lala Yehowa hegöi fanolo ba wamalua ngawalö zatulö. Faböʼö niha ba gulidanö nifatörö Zatana andre, lö khöra faʼohahau dödö hegöi tötönafö ba zi so föna. Sindruhu-ndruhu lö khöda faʼatua-tua hegöi faʼatulö na taröi Yehowa hegöi ono mbanuania ha börö me so zamalua sala mazui sangumaʼö si lö atulö ba mbanua niha Keriso! Böi faröi ita khö Yehowa ba taʼoʼö wanuturu lala nibeʼenia. Moguna göi tafahaʼö ita hewisa dödöda ba zala nifalua niha böʼö ba hadia nifaluada.

HADIA ZINANGEA ÖFALUA?

13, 14. (a) Hana wa moguna ebolo dödöda ba niha böʼö? (b) Hadia mbuʼusa li si tebai taʼolifugö?

¹³ Hadia nifaluau na so ndra talifusöda sangumaʼö mazui samalua hadia ia zi möi fangafökhö dödöu? Ibeʼe khöda mene-mene Sura Niʼamoniʼö, ”Böi alio-lio abao dödöu, me no barö doto zambö era-era so waʼabao dödö.” (Zangombakha 7:9) Fefu ita oi lö moʼahonoa ba tafalua zala. Börö daʼö, böi tatötöna wa satulö manö niwaʼö ndra talifusöda hegöi nifaluara. Böi göi taʼera-era manö zala nifaluara. Na tafalua daʼö, tola manö lö khöda faʼomuso dödö ba wangai halöwö khö Yehowa. Töra-töra nasa awuwu wamatida ba taröi organisasi Yehowa. Lua-luania, lö taʼila tafosumange Yehowa mazui lö khöda fanötöna faʼauri ba gulidanö si bohou.

¹⁴ Tobali, hewisa enaʼö lö faröi ndraʼugö ba wamosumange Yehowa hewaʼae so zangafökhöiʼö tödöu? Böi olifuʼö mbuʼusa linia si möi fondrara dödö, ”Hiza sa, uwöwöi mbanua si yawa si bohou ba tanö si bohou, ba löʼö saʼae itörö tödö zi föföna andrö, löʼö saʼae iʼangeragö niha!” (Yesaya 65:17; II Fetero 3:13) Na lö faröi ndraʼugö khö Yehowa, ibeʼe khöu howu-howu ba zi no ifabuʼu andrö.

15. Moloʼö Yesu, hadia zinangea tafalua na so zangafökhöiʼö tödöda?

¹⁵ Lö nirugida nasa ulidanö si bohou. Börö daʼö, na so zangafökhöiʼö tödöda, taʼangerönusi hadia zomasi Yehowa tafalua. Duma-dumania, imane Yesu, ”Na miʼefaʼö saʼae zala niha, ba iʼefaʼö göi khömi Amami andrö, si so ba zorugo. Ba na lö miʼefaʼö zala niha, ba löʼö göi iʼefaʼö khömi horömi Amami andrö.” Me isofu Fetero khö Yesu hadia ha ”irugi mewitu” taʼefaʼö zala niha, imane Yesu, ”Uwaʼö khöu: tenga ha irugi zi mewitu, irugi zi mewitu ngafulu wa fitu.” Ifahaʼö ita Yesu enaʼö omasi ita taʼefaʼö zala niha böʼö.​—Mataiʼo 6:14, 15; 18:21, 22.

16. Hadia duma-duma si sökhi nifalua Yosefo?

¹⁶ Tola göi tafahaʼö ita moroi ba duma-duma Yosefo na afatö dödöda ba nifalua niha böʼö. Ha Yosefo faoma akhinia ono matua nono Yakobo moroi khö Rakhela. So dafulu nono Yakobo ono matua, hizaʼi Yosefo zabölö iʼomasiʼö. Daʼa mbörö wa afökhö dödöra khö Yosefo. Fatuwu sibai ira khönia, andrö laʼamawa ia tobali sawuyu ba ndrawa Miserai. Haʼuga fakhe aefa daʼö, ifataro ia razo ndrawa Miserai tobali niha numero dua sebua kuaso ba mbanua daʼö börö me toröi-röi ba dödönia halöwö si sökhi nifalua Yosefo. Aefa daʼö, möi ndra talifusönia ba danö Miserai wowöli gö börö me baŵa lofo. Me falukha ira khö Yosefo, lö laʼila haniha ia hizaʼi, iʼila haniha ira. Hewaʼae lö sökhi gamuatara khö Yosefo ba zi lalö, lö ihuku ira Yosefo. Tobali, itandraigö ira enaʼö iʼila hadia sindruhu-ndruhu no labulöʼö gamuatara. Me iʼila Yosefo wa no lafalalini gera-erara, ifatunö khöra wa yaʼia andrö talifusöra ba ibeʼe wondrara dödö. Imane, ”Andrö böi mibusi dödömi; urorogö ami ba iraonomi.”​—I Moze 50:21.

17. Hadia zomasiʼö öfalua na so zamalua sala khöu?

¹⁷ Böi olifu ndraʼugö sagötö lö soʼahonoa ita, tola manö taʼafökhöiʼö dödö niha. Na so zangafökhöiʼö tödöu, oʼö mene-mene Zura Niʼamoniʼö. Andrö khönia enaʼö iʼefaʼö zalamö, ba miʼatulöʼö ami. (Baso Mataiʼo 5:23, 24.) Omasi ita na laʼefaʼö zalada niha böʼö. Andrö moguna tafalua zimane daʼö. Imane khöda Kolose 3:13 wa moguna tabologö dödöda khö nawöda ba faoma taʼefaʼö zala nawöda simane fangefaʼö Yehowa khöda. Na taʼomasiʼö ndra talifusöda, lö itörö-törö tödöda zala si no lafalua ba zilalö. (I Korindro 13:5) Na taʼefaʼö zalara, iʼefaʼö göi zalada Yehowa. Börö daʼö, na so zamalua sala, ya so khöda waʼahakhö dödö khöra simane Amada Yehowa, sahakhö tödö khöda.​—Baso Zinunö 103:12-14.