FAMAHAʼÖ 5
Lö Tebulö Zamueli Ono si Sökhi Amuata
Ba gosali toröi Zamueli meʼide-ide ia ba wangai halöwö Lowalangi. Osali yaʼia daʼö nahia ba wamosumange Yehowa. Öʼila hadia mbörö wa toröi Zamueli ba daʼö? Siʼoföna datafaigi ua waö-waö Hana, ina Zamueli.
Omasi sibai Hana na so nononia, hizaʼi, lö moʼono ia. Mangandrö ia khö Yehowa. Ifabuʼu na ibeʼe khönia nono, itehegö toröi ba gosali ba wangai halöwö Lowalangi. Ifondro-ndrongo wangandrönia Yehowa, ba tumbu khönia nono ibeʼe töi Samueli. Ifalua zi no ifabuʼu Hana. Iʼohe Zamueli ba gosali me no tölu mazui öfa fakhe ndröfinia ba wangai halöwö Yehowa.
Ere sebua Eli me luo daʼö ba gosali. Ere göi nononia si dombua. Börö me osali andrö nahia wamosumange Lowalangi, sinangea na sohalöwö ba daʼö niha si sökhi bua-bua. Hizaʼi, lö sökhi gamuata nono Eli. Iʼila-ila gamuatara andrö Samueli. Hadia igoʼö-goʼö Samueli gamuatara andrö?— Löʼö, lö tebulö ono si sökhi ia, iʼoʼö wamahaʼö zatuania.
Moloʼö yaʼugö, hadia zinangea ifalua Eli ba ndraononia?— Sinangea na ihuku ira Eli ba lö itehe tobali ira ere ba nomo Yehowa. Hizaʼi, lö ifalua daʼö Eli. Andrö mofönu Yehowa khö Eli ba khö ndraononia, ihuku ira fefu Yehowa.
Ifaʼema Samueli goroisa Yehowa khö Eli
Samuza inötö ba zibongi me no mörö Zamueli, irongo so ziʼao khönia, ”He Samueli!” Ba möi Zamueli khö Eli. Imane khönia Eli, ”Lö siʼaodo khöu.” Tölu kali alua zimane daʼö. Me ifuli möi Zamueli ba zi medölu kali khö Eli, imane khönia Eli na so ziʼao khöu dania ba ötema linia ömane, ”Hede Yehowa! Irongo enoniu.” Ifalua daʼö Samueli. Imane Yehowa khö Zamueli, ’Waʼö khö Eli wa no uʼetuʼö huku zi sambua omo andrö khönia börö me lö sökhi gamuatara.’ Moloʼö yaʼugö, hadia aoha wangombakha turia daʼö khö Eli?— Abua wamalua daʼö khö Zamueli. Ataʼu ia wangombakha khö Eli. Hewaʼae simanö, iʼoʼö niwaʼö Yehowa. Alua zi no iwaʼö Yehowa, mate Eli ba ononia si darua.
No ibeʼe khöda duma-duma si sökhi Samueli. Lö tebulö waʼasökhi gamuatania hewaʼae no so ia ba gotalua ndraono si lö sökhi amuata. Hewisa na yaʼugö zimanö? Omasi ndraʼugö simane Samueli? Na öʼoʼö zimane amuatania, omuso dödö Yehowa hegöi satuau.
BASO BA ZURA NIʼAMONIʼÖ
I Zamueli 2:22-26; 3:1-21