Tedou Ia ba ”Fao Khönia Yehowa”

1, 2. Hewisa ndraono Gizaraʼeli me fahuhuo khöra Zamueli, ba hana wa moguna ifarou dödöra enaʼö lafalalini gera-erara?

IFAIGI mbawa nono mbanuania Samueli. Owulo ira ba Giligala, börö me ikaoni ira niha samati andre, si no mangai halöwö gere ba sanguhuku ba zi ngafulu fakhe. Moloʼö fangerai mbaŵa iadaʼa, me luo daʼö baŵa si Lima mazui baŵa si Önö, tefaudu baŵa lökhö. Gandru ba nowi no ibörögö aʼusö tandra wa lö aratö basitö. Lö nini-nini niha sato andrö. Hewisa Zamueli ba wamarou tödöra?

² Lö aboto ba dödö niha mbanua andrö zalua khöra. Laʼandrö enaʼö so samösa razo samatörö yaʼira. Lö aboto ba dödöra nifaluara andrö tenga fangomuso dödö Lowalangira Yehowa hegöi samaʼeleʼö khönia. Sindruhunia, lö omasi ira na Yehowa Razora! Hewisa Zamueli wamarou tödöra enaʼö lafalalini gera-erara?

3, 4. (a) Hana wa itörö tödö Zamueli me awuyu-wuyu ia? (b) Hana wa moguna khöda iadaʼa duma-duma wamati Zamueli?

³ Fahuhuo Zamueli khöra, ”Ba yaʼo, ba si no atua, ba si no tohare huwa.” Börö me no afusi högönia huwa, andrö sinangea fahuhuo ia. Imane, ”Ba iʼotarai iraono ndraʼo, irugi maʼökhö andre, ba no anehe ami döröwagu.” (I Zam. 11:14, 15; 12:2) He no atua Zamueli, lö olifu ia zalua me ide-ide ia. Itörö tödönia fefu. Angetula nihalönia me ide-ide ia, daʼö zolohe yaʼia ba waʼauri safönu famati ba ilulu waʼaurinia khö Lowalangi, Yehowa.

⁴ Moguna iʼaroʼö wamatinia Samueli, hewaʼae no hauga kali ifasui ia niha si lö mamati ba si faröi. Iadaʼa, abua göi khöda wondrouʼö famati börö me so ita ba gulidanö si lö sökhi ba si lö mamati. (Baso Luka 18:8.) Datafaigi wamahaʼö si tola tahalö moroi khö Zamueli iʼotarai me ide-ide ia.

”Sangai Halöwö Föna Yehowa, Iraono Sobaru ba Doto, Tarafali”

5, 6. Hana wa faböʼö waʼauri Zamueli me ide-ide ia, ba hadia mbörö wa faduhu dödö zatuania hasambalö terorogö ia?

⁵ Faböʼö waʼauri Zamueli ba waʼide-ide. Lö ara me no fabali ba mbagi zusu, te me tölu fakhe ia mazui töra, ibörögö ilulu waʼaurinia khö Yehowa ba nose Lowalangi ba Zilo, kira-kira 30 kilometer iʼotarai nomonia ba Rama. Elikana ba Khana, latehegö waʼauri nonora ba halöwö si sökhi tobali Nazir sandrohu faʼauri.a Hadia daʼö geluahania latiboʼö Zamueli, lö laʼomasiʼö ia ira satuania?

⁶ Faya daʼö! Aboto ba dödöra wa terorogö nonora ba Zilo. Ere Sebua sotöi Eli, tatu manö ihenaigö ifaʼanö börö me ba zingania mohalöwö Zamueli. Ato göi ndra alawe sohalöwö ba nose Lowalangi, ba fefu oi toföfö.​—II Moz. 38:8; Zangu. 11:34-40.

7, 8. (a) Ero röfi, hewisa zatua Zamueli wameʼe khönia famarou dödö si fao faʼomasi? (b) Hadia wamahaʼö si tola lahalö ira satua iadaʼa moroi khö zatua Zamueli?

⁷ Lö irai olifu Khana hegöi Elikana nonora siaʼa si tumbu börö me no tefondro-ndrongo wangandrö Khana. Iʼandrö khö Yehowa samösa nono matua, ba fawuʼu li ia wa ilulu waʼauri nono andrö wangai halöwö khö Lowalangi. Na laʼondrasi ia ero röfi, iʼohe Khana mbaru si lö taʼio nitagunia samösa soguna khö Zamueli ba nose Lowalangi. Tatu omuso dödö Zamueli na lafalukhaisi ia ira satuania. Omuso dödönia me latuhini halöwönia ba labeʼe khönia wanuturu lala, lafahaʼö ia wa fangai halöwö Yehowa ba nahia daʼö no halöwö fondrege zebua.

⁸ Oya wamahaʼö nihalö zatua iadaʼa moroi khö Khana ba Elikana. Si toʼölönia, ha fangalui balazo ndraono awai niʼodödögö zatua. Hizaʼi, lö ibeʼe dödöra zoguna ba noso. Satua Zamueli, laʼofönaiʼö zoguna ba noso ba daʼö mbörö wa sökhi gamuata hegöi faʼaurinia ba zi so föna.​—Baso Gamaedola 22:6.

9, 10. (a) Tutunö hewisa nose Lowalangi hegöi tödö Zamueli si bohou ebua sanandrösa ba naha niʼamoniʼö andrö. (Faigi nisura ba gahe zura.) (b) Hadia manö halöwö Zamueli, ba hewisa ndraono ba ginötö andre ba woloʼö duma-dumania?

⁹ Tola takhalaigö waʼatedou nono daʼö ba iʼanöröi hili-hili ba zi fasui Zilo. Ifaigi si tou mbanua ba ndraso moroi ba dete hili si so yaʼia, ba omuso dödönia me tefaudu iʼila nose Lowalangi Yehowa. Nose Lowalangi daʼö, sindruhu-ndruhu nahia niʼamoniʼö.b Arakhagö 400 fakhe silalö no mufazökhi barö wondröniaʼö Moze, ha daʼö nahia ba wamosumange satulö ba zi sagörö ulidanö me luo daʼö.

¹⁰ Ibörögö omasi Zamueli toröi ba nose Lowalangi. Ba waö-waö nisurania ba gafuriata imane, ”Ba Samueli andrö, ba no sangai halöwö föna Yehowa, iraono sobaru ba doto, tarafali.” (I Zam. 2:18) Baru sebua si lö taʼio andrö zangoromaʼö wa mohalöwö Zamueli ba wanolo ira ere ba nose Lowalangi. Hewaʼae tenga ere ia, halöwö Zamueli ba wamokai bawandruhö golayama nose Lowalangi ero sihulö wongi ba itolo göi Eli si no atua. Hewaʼae na isöndra waʼomuso dödö ba halöwö nifaluania, ibörögö itegu-tegu ia tödönia side-ide ba gafuriata. So zi lö sökhi salua ba nomo Yehowa.

Lö Fabaya Hadia Ia Hewaʼae No Ifasui Ia si Lö Sökhi

11, 12. (a) Hadia niʼosiwawöi Hofini ba Fineha? (b) Hadia waʼalösökhi ba faʼafaito nifalua Hofini ba Fineha ba nose Lowalangi? (Faigi nisura ba gahe zura.)

¹¹ Me awuyu ndröfi Zamueli, iʼila waʼalösökhi ba faʼafaito sogoro ita. So darua nono Eli, sotöi Hofini ba Fineha. Imane ba waö-waö Zamueli, ”Ba no si lö ngaroro ndraono Eli andrö, lö ba dödöra Yehowa.” (I Zam. 2:12) Oi moʼamakhaita zi dombua bua gera-era ba ayati andrö. Hofini ba Fineha andrö niha ”si lö ngaroro” börö me lö ba dödöra Yehowa. Laʼosiwawöi dane-dane goi-goi salawa. Daʼö mbörö wa lafalua horö tanö böʼö.

¹² No izara-zara Oroisa Lowalangi hadia manö halöwö ndra ere hegöi lala wameʼe sumange ba nose Lowalangi. Lö ahöli dödöda daʼö! Fefu zumange andrö eluahania si no ihenaigö Lowalangi ba wangefaʼö horö enaʼö ohahau fefu niha ba wamaiginia, ba tola latema howu-howu hegöi fanuturu lala moroi khönia. Hizaʼi, Hofini ba Fineha ladönisi gere böʼö wemanga sumange si fao falömangila huku.c

13, 14. (a) Hewisa wa tola tedönisi niha satulö tödö wamalua si lö sökhi ba nose Lowalangi? (b) Hewisa waʼakala Eli ba waʼasatua hegöi ba waʼaʼerenia?

¹³ Khalaigö Zamueli si bohou ebua me ifehaga hörönia wamaigi amuata falömangila huku ba lö sotegu yaʼira. Hawaʼato niha niʼilania—si numana, niha si so fangide-ngideʼö, ba nifakao-kao—laʼondrasi nose Lowalangi niʼamoniʼö ba manötöna ira wa lasöndra wondrara dödö ba faʼaro wamati, hizaʼi mangawuli ira si fao faʼabua gölö, faʼafökhö dödö, ba teʼobousi ira? Hewisa dödönia me iʼila Hofini ba Fineha laʼosiwawöi goroisa Yehowa sanandrösa ba wohorö, yaʼia me lahoröni ösa ndra alawe sangai halöwö ba nose Lowalangi? (I Zam. 2:22) Te manötöna ia khö Geli wa tola iʼatulöʼö zalua andre.

¹⁴ Tefaudu sibai na Eli zangatulöʼö salua andre. Börö me ere sebua ia, yaʼia zonorogö tödö na so zalua ba nose Lowalangi. Börö me satua ia, moʼömö ia wameʼe fotu ba ndraononia. Mendrua manö, lafakao mbotora iraononia hegöi niha sato ba soi daʼö. Hizaʼi, no kala Eli ba zi dombua ngawalö andre, faʼasatua hegöi faʼaʼerenia. No ikaohasi wameʼe fotu ba ndraononia. (Baso I Zamueli 2:23-25.) Hizaʼi, moguna wotu sabölö abeʼe ba ndraononia. No lafalua horö sebua si möi börö waʼamate!

15. Hadia wamangelama sabeʼe niwaʼö Yehowa khö Eli, ba hewisa wanemaʼönia?

¹⁵ Horö nifaluara tenga itugu alö irege ifatenge ”genoninia” Yehowa khö Geli, samaʼeleʼö si lö mufatunö töi ba wamaʼema turia wanguhuku sabeʼe. Imane Yehowa khö Eli, ”Ba no ebua dödöu ba ndraonou andrö, moroi ba waʼebua dödöu khögu.” Börö daʼö, ifaʼeleʼö Lowalangi wa mate nono Eli ha samuza ba zi maʼökhö, ba ösi nomo Eli latörö waʼatosasa, aheta khöra halöwö faʼaʼere. Hadia tobali famangelama daʼa ba nösi nomonia? Lö itutunö waö-waönia wa so khöra wamalalini era-era.​—I Zam. 2:27–3:1.

16. (a) Hadia nibasoda sanandrösa ba waʼtedou Zamueli si bohou ebua? (b) Hadia tobali fangomuso dödöu daʼa? Tutunö.

¹⁶ Hadia fao göi Zamueli si bohou ebua ba wamalua amuata si lö sökhi andre? Ba huhuo sambö baga andre, fataria taʼila haga side-ide, turia si sökhi sanandrösa ba waʼatedou Zamueli. Törö tödöu niwaʼö I Zamueli 2:18, mamati Zamueli ’wangai halöwö föna Yehowa’ me iraono ia. Hewaʼae awuyu ndröfinia, iʼofönaiʼö wangai halöwö Lowalangi ba waʼaurinia. Ba ayati 21, so zomuso dödöda fombaso, ”Ba ononia Samueli, ba si tedou-dou ba daʼö, khö Yehowa.” Me itugu ebua ia, monönö waʼaro wahuwusania khö Namania ba zorugo. Börö waʼahatönia khö Yehowa, telumöʼö ia moroi ba ngawalö zi lö sökhi.

17, 18. (a) Hewisa nono matua niha Keriso si bohou ebua woloʼöra duma-duma Zamueli na alua zi lö sökhi? (b) Hadia zangoromaʼö wa no ifili lala satulö Samueli?

¹⁷ Tola manö iwaʼö Samueli, na ono gere sebua manö lafalua horö, na simanö tola göi ufalua zomasido. Hizaʼi, faʼalösökhi niha böʼö, mendrua manö niha sangai halöwö khö Lowalangi, tenga daʼö dani ba wamalua horö. Iadaʼa, ato nono matua niha Keriso zoloʼö duma-duma Zamueli ba ’itugu tedou ira börö me fao khöra Yehowa’, hewaʼae lö sökhi gamuata niha ba zi fasui yaʼira.

¹⁸ Hadia lua-luania khö Zamueli me iʼoʼö li Yehowa? Tabaso, ”Ba ono matua andrö, Samueli, ba itugu tedou ba itugu falukha ia waʼebua dödö Yehowa ba faʼebua dödö niha.” (I Zam. 2:26) Laʼomasiʼö Zamueli, si löʼö-löʼönia niha somasi ia bua gera-era. Iʼomasiʼö göi ia Yehowa börö wamatinia. Aboto göi ba dödö Zamueli wa ihori fefu zi lö sökhi Lowalangi ba Zilo, hewaʼae manofu-nofu ia hawaʼara alua daʼö. Samuza inötö me bongi, so wanema li ba zinofu andrö.

”Hede, Irongo Enoniu”

19, 20. (a) Tutunö hadia zalua khö Zamueli me bongi ba nose Lowalangi. (b) Hewisa wa iʼila manö Samueli hezo moroi zi hede daʼö, ba hewisa gamuatania khö Eli?

¹⁹ Me luo daʼö arakhagö moluo hizaʼi ogömi nasa; lö si mate haga wandru bakha ba tendra. Ba zi lö nini-nini, irongo Samueli zogaoni töinia. Iwalingagö Eli, niha satua ba arakhagö balunö. ”Fagohi” Zamueli möi ia khö ndra matua satua andrö. Hadia tola ökhalaigö Zamueli me fagohi ia lö sandrala wangondrasi Eli, ma so niʼandrönia tolo? Sindruhu-ndruhu adöni dödöda gamuata Zamueli khö Eli, ifosumange si fao faʼasökhi dödö. Hewaʼae oya zala nifalua Eli, lö nasa si tebulö wa ere sebua ia khö Yehowa.​—I Zam. 3:2-5.

²⁰ Maoso Zamueli ba wanusugi Eli, imane, ”Yaʼe ndraʼodo, me no muʼaoʼö khögu.” Ifatunö Eli wa lö nikaoninia ba iwaʼö, fuli förö. Hizaʼi, ifuli zui terongo li daʼö, ba alua zui! Iʼila Eli hadia zalua sindruhunia. Ha fawaraö ibeʼe gangilata me luo daʼö Yehowa mazui famaʼeleʼö ba nono mbanuania, ba muʼila hadia mbörö. Hizaʼi, iʼila Eli wa ifuli fahuhuo Yehowa—iadaʼa khö nono daʼö! Ifuli iwaʼö khö Zamueli wemörö ba ifomaha hewisa wanema li na so zi hede simane daʼö. Igoʼö Samueli. Lö ara aefa daʼö, irongo li siʼao zui khönia, ”He Samueli! He Samueli!” Itema li ono daʼö, ”Hede, irongo enoniu!”​—I Zam. 3:1, 5-10.

21. Hewisa wamondro-ndrongoda li Yehowa iadaʼa, ba hana wa moguna?

²¹ Ba gafuriata, so genoni Yehowa ba Zilo samondrongo linia. Daʼö zi toʼölö ifalua Samueli ba waʼaurinia. Hadia simane daʼö göi ndraʼugö? Tenga balazi so li siʼao nirongoda ba zi bongi. Iadaʼa, tola tawaʼö lö aetu tarongo li Lowalangi. Fefu daʼö so ba Zura Niʼamoniʼö, Taromalinia. Na tafondro-ndrongo ba taʼoʼö, itugu monönö wamatida. Daʼö göi zalua khö Zamueli.

22, 23. (a) Hewisa wa alua goroisa nifaʼema Zamueli hewaʼae ataʼu ia wamaʼema ba wamobörö? (b) Hewisa wa tola itugu tehöngö Zamueli?

²² Bongi daʼö ba Zilo, no tobali bongi si tebai iʼolifugö Samueli ba waʼaurinia, börö me ba daʼö ibörögö wahuwusa si sökhi khö Yehowa, tobali ia samaʼeleʼö ba enoni Lowalangi. Ba wamobörö, ataʼu ia wamaʼema oroisa Yehowa khö Eli, börö me daʼö gangombakhata safuria ba nösi nomo Eli wa lö aratö alua nifaʼeleʼö Lowalangi. Iʼoigö dödönia Samueli enöʼö lö ataʼu ia ba itemaʼö wanguhuku daʼö Eli si fao fangide-ngideʼö. Lö ara aefa daʼö, alua fefu niwaʼö Yehowa: fasuwö ndraono Gizaraʼeli khö ndrawa Wilisiti, mate Hofini ba Fineha ba zi maʼökhö daʼö, ba mate göi Eli me irongo no laʼoloiʼö Dawöla Yehowa.​—I Zam. 3:10-18; 4:1-18.

²³ Hizaʼi, itugu tehöngö Zamueli me no tobali samaʼeleʼö ia. Tabaso waö-waönia, ”Ba manöi Zamueli, ba itolo ia Yehowa,” inönö nasa wangombakha, lö zi lö itörö nifaʼeleʼö Yehowa khö Zamueli.​—Baso I Zamueli 3:19.

”Ba Mangandrö Zamueli khö Yehowa”

24. Hadia gangetula ndraono Gizaraʼeli ba gafuriata, ba hana wa tobali horö sebua daʼö?

²⁴ Hadia laʼoʼö iraono Gizaraʼeli niwaʼö Zamueli ba tobali ira niha samati si so faʼalowalangi? Löʼö. Ba gafuriata, lahalö gangetula wa lö omasi ira na ha samösa zamaʼeleʼö sanguhuku yaʼira. Omasi ira simane soi böʼö nifatörö zi samösa razo. Iʼoʼö niwaʼöra andrö Samueli, simane niwaʼö Yehowa. Hizaʼi, iʼombakhaʼö ua sakali hawaʼebua horö nifaluara. Nitimbagöra tenga niha, Yehowa samösa! Andrö, ikaoni fefu soi daʼö ba Giligala.

25, 26. Hewisa Zamueli si no atua wanolo soinia ba Giligala irege laʼila hawaʼebua horö nifaluara khö Yehowa?

²⁵ Datatohugö wamaigi hewisa waʼataʼu ndraono Gizaraʼeli me fahuhuo Zamueli ba Giligala. Ba daʼö, ifasugi ba dödöra hewisa waʼalöfaröinia safönu famati hewaʼae no atua ia. Tabaso aefa daʼö, ”Ba mangandrö Zamueli khö Yehowa.” Iʼandrö khö Yehowa weʼugu mbanua ba teu.​—I Zam. 12:17, 18.

²⁶ Feʼugu mbanua ba teu? Ba mbaŵa lökhö? Lö irai alua daʼö ba zilalö! Lö anau gölö zi lö faduhu tödö mazui sangoʼaya. Ba zi lö mudöna-döna, ogömi mbanua tebalu lawuo. Itörini angi gandru ba nowi. Morata gari mbanua ba afökhö dalinga zamondrongo. Alua deu. Hewisa niha sato? ”Ba ataʼu sibai niha sato Yehowa ba Samueli.” Awena laʼila hawaʼebua horö nifaluara.​—I Zam. 12:18, 19.

27. Hewisa dödö Yehowa ba niha soloʼö famati Zamueli?

²⁷ Tenga Samueli, hizaʼi Lowalanginia, Yehowa zamarou tödö niha samadaö andrö. Iʼotarai me awuyu irugi atua ia, lö tebulö wamati Zamueli khö Lowalanginia. Ibeʼe luonia Yehowa. Irugi iadaʼa, lö si tebulö Yehowa. Itolo niha soloʼö famati Zamueli.