FAMAHAʼÖ 4

Haogö Wamaehagö Ayati Zura Niʼamoniʼö

Mataiʼo 22:41-45

RAHU-RAHU: Angeragö hadia zi so ba wangera-ngera niha fatua lö öbaso ayati Zura Niʼamoniʼö.

Angeragö hadia mbörö wa öbaso ayati Zura Niʼamoniʼö. Faehagö ayati Zura Niʼamoniʼö moloʼö lala si tefaudu irege laʼila hadia wamahaʼö si tola lahalö ba ayati daʼö.

Faigi waö-waö ayatinia. Na öfaehagö sambua ayati Zura Niʼamoniʼö ba öʼombakhaʼö haniha zi fahuhuo ba ayati daʼö mazui haniha zanura buku daʼö, moguna so khöu waʼafaduhu dödö wa no tefaudu nifatunömö.
Haogö tötöi ayati Zura Niʼamoniʼö. Na fahuhuo ndraʼugö ba niha si faduhu tödö khö Lowalangi, alui lala enaʼö adöni dödöra ba Zura Niʼamoniʼö me no Taromali Lowalangi daʼö, irege laʼila wa no umbu waʼatua-tua sindruhu ia.
Dönisi dödö zamondrongo ba ayati Zura Niʼamoniʼö. Beʼe wanofu, aefa daʼö baso wanema linia ba ayati, tutunö sambua gabula dödö, baso ba Zura Niʼamoniʼö lala wangasiwai yaʼia mazui foromaʼö goi-goi Zura Niʼamoniʼö sanolo yaʼira irege so khöra waʼaboto ba dödö.

Angeragö hadia zi no aboto ba dödöra sanandrösa ba duho hegöi ayati Zura Niʼamoniʼö andrö. Hewaʼae no irai larongo ngawua wehedenia, haogö wamaʼema yaʼia irege hulö zawena larongo.