Hadia So Dötönafö ba Niha si no Mate?

Hadia tola ifuli auri niha si no mate?

FANEMA LI MOROI BA ZURA NIʼAMONIʼÖ: ”Irugi baŵa dania, ba larongo linia dozi si so ba lewatö.”​—Yohane 5:28, 29.

No ifaʼeleʼö Yesu ba wamatörönia dania, lö hadöi niha si so ba lewatö. Imane Fernando, ”Tokea ndraʼo me awena ubaso Yohane 5:28, 29. Daʼa zameʼe khögu fanötöna, ba faduhu dödögu wa hasambalö alua daʼa ba zi so föna.”

Me götö föna, faduhu dödö Yobi na mate ia hasambalö isusugi ia Lowalangi. Imane Yobi, ”Hadia na mate niha, hadia ifuli auri?” Itema si fao faʼafaduhu dödö, ”Na si manö, ba alakha lö aetu wanötönagu, götö wasöndratagu andre, irege aefa ndraʼo! Ba muʼao enaʼö ndraʼugö, ba utema liu.”​—Yobi 14:14, 15.

Fanusugi andre tenga sawena irongo Marata talifusö Lazaro. Me no mate Lazaro, imane Yesu khö Marata: ”Maoso dania dalifusöu andrö. Imane khönia Marata: uʼila sa, maoso ia dania, ba wemaoso andrö na luo safuria. Imane khönia Yesu: Yaʼodo wemaoso ba faʼauri, samati khögu, ba auri, hewaʼae mate ia.” (Yohane 11:23-25) Isusugi Lazaro Yesu! Daʼa zahöli-höli dödöda salua ba zi so föna. Khalaigö atö, alua wanusugi ba zi sagörö ulidanö!

Hadia so nisusugi sauri ba zorugo?

FANEMA LI MOROI BA ZURA NIʼAMONIʼÖ: Sura Niʼamoniʼö zangombakha khöda wa fanusugi Yesu faböʼö moroi ba zi dawalu niha nisusugi. Niha si dawalu nisusugi andre, ifuli auri ira ba gulidanö. Hizaʼi, fanusugi Yesu, no iwaʼö Sura Niʼamoniʼö wa, ”Yesu Keriso andrö . . . si so ba gambölö Lowalangi, me no möi ia ba zorugo.” (I Fetero 3:21, 22) Hadia ha Yesu nisusugi sauri si möi ba zorugo? Imane Yesu khö ndra nifahaʼönia, ”Ba na no möido, na no uhaogö naha khömi, ba mangawulido, ba uhalö ami khögu, enaʼö so ami göi ba zi so yaʼo.”​—Yohane 14:3.

Möi Yesu ba zorugo ba wangehaogö nahia ba wanemaʼö ndra nifahaʼönia si 144.000 nisusugi. (Famaʼeleʼö 14:1, 3) Tobali, hadia nifaluara ba zorugo?

Oya halöwö nifaluara! Ifatunö khöda Zura Niʼamoniʼö, ”Yaʼahowu ba no niʼamoniʼö zogamö femaoso si föföna andrö. Tebai ilawa daʼö faʼamate si samuza andrö; ere ira khö Lowalangi, ba khö Keriso ba salawa ira awönia zi hönö fakhe andrö.” (Famaʼeleʼö 20:6) Yaʼira nisusugi ba zorugo andre, fao ira awö Yesu tobali Razo ba Ere ba wamatörö ulidanö.

Haniha nasa nisusugi?

FANEMA LI MOROI BA ZURA NIʼAMONIʼÖ: Faduhu dödöda wehede Waulo me imane, ”Ba so khögu wanötöna khö Lowalangi, si so khöra göi, wa so wemaoso zi mate, he satulö, ba he si lö atulö.”​—Halöwö Zinenge 24:15.

Haniha niwaʼö Waulo ”niha satulö”? Duma-dumania, ba gafuriata waʼaurinia, teʼombakhaʼö khö Danieli, ”Solombase ndraʼugö ua, ba maosoʼö dania, ba wanema tana khöu andrö, ba gamozua götö danö andre”. (Danieli 12:13) Na tesusugi Danieli, hezo toröi ia? ”Satulö tödö zokhö tanö dania, yaʼira zowanua ba danö, si lö mamalö-malö.” (Zinunö 37:29) No ifaʼeleʼö Yesu, ”Yaʼahowu zebolo tödö, me yaʼira zokhö ulidanö dania.” (Mataiʼo 5:4) Danieli ba fefu niha si lö faröi khö Lowalangi, tesusugi ira ba gulidanö ba lasöndra waʼauri si lö aetu sagötö faʼara.

Haniha niwaʼö Waulo ”niha si lö atulö”? Ngahönö niha si no mate si lö irai mamondrongo Taromali Lowalangi. Na no tesusugi ira, tebeʼe khöra ginötö enaʼö aboto ba dödöra Yehowaa hegöi Yesu. (Yohane 17:3) Yaʼira samosumange Yehowa si lö faröi khönia, tebeʼe khöra waʼauri si lö aetu sagötö faʼara.

Ba zi lö aratö, hadia zalua ba gulidanö?

FANEMA LI MOROI BA ZURA NIʼAMONIʼÖ: ”Iʼosi dania daŵa hörö fefu, ba höröra, ba lö faʼamate saʼae, ba lö faʼabu dödö, ba lö fege-ege, ba lö faʼafökhö saʼae, me no numalö zi föföna andrö.” (Famaʼeleʼö 21:4) ”Ba lalau nomo, ba laʼonahia göi; lafazökhi kabu nagu ba laʼa mbua.”​—Yesaya 65:21.

Khalaigö atö hewisa dania na falukha ndraʼugö ba niha niʼomasiʼöu si no tesusugi. Tobali, fanofu tanö böʼönia, hewisa wa tola faduhu dödöu wa hasambalö alua wanusugi andre?