TUHO SIʼOFÖNA | HANIHA NDRA SAMADUHUʼÖ YEHOWA?
Hadia nifaduhusi tödö ndra Samaduhuʼö Yehowa?
Faduhu dödö ndra Samaduhuʼö Yehowa wa ”fefu nösi zura andrö, eheha Lowalangi zameʼe ba dödö niha, ba moguna ia” ba waʼauri. (II Timoteo 3:16) Maʼogunaʼö Zura Niʼamoniʼö ba wamahaʼö yaʼaga sanandrösa khö Lowalangi ba enaʼö sökhi waʼaurima.
Imane Sura Niʼamoniʼö, ”Ba akha aboto ba dödöra, wa no ha yaʼugö zotöi Yehowa, wa ha yaʼugö wondrege zalaŵa ba gulidanö maʼasagörö.” (Zinunö 83:19)a Börö daʼö, ha Yehowa nifosumangema ba moguna maʼombakhaʼö ba niha enaʼö aboto ba dödöra döi Lowalangi si ndruhu.—Yesaya 43:10-12.
Yaʼaga niha Keriso si ndruhu faduhu dödöma wa Yesu andrö ”ono Lowalangi,”b si möi ba gulidanö tobali Mesia. (Yohane 1:34, 41; 4:25, 26) Me no aefa mate Yesu, tesusugi ia möi ba zorugo. (I Korindro 15:3, 4) Tobali Razo ia ba Mbanua Lowalangi. (Famaʼeleʼö 11:15) Sindruhu-ndruhu alua wamatörönia ba ibaliʼö gulidanö andre tobali faradaiso. (Danieli 2:44) Imane Sura Niʼamoniʼö, ”Sebolo tödö andrö zokhö tanö dania, ba owua-wua dödöra ba waʼafahöna wangorifi.—Zinunö 37:11, 29.
”Ba ginötö lafahaʼö ira ba Zura Niʼamoniʼö, faduhu dödöra wa fahuhuo khöra Lowalangi. Ba ginötö alua gabula dödö ba waʼaurira laʼalui wanuturu lala ba Zura Niʼamoniʼö si tola manolo yaʼira . . . faduhu dödöra wa Sura Niʼamoniʼö andrö mo faʼabölö ba waʼaurira.”—Sondröniaʼö ba agama Katolik sotöi Benjamin Cherayath, koran Münsterländische Volkszeitung, Jerman
Faduhu dödö ndra Samaduhuʼö Yehowa wa goi-goi si so ba Zura Niʼamoniʼö moguna ia ba waʼaurida irugi iadaʼa. (Yesaya 48:17, 18) Börö daʼö, maʼoʼö goi-goi si no tesura ba Zura Niʼamoniʼö. Duma-dumania, no ifangelama ita Sura Niʼamoniʼö enaʼö taʼaröuʼö ita ba ngawalö zi tola mamakiko botoda hegöi era-erada simane foroko ba fangogunaʼö dalu-dalu si lö tefaudu. (II Korindro 7:1) Maʼaröuʼö göi ndraʼaga ba gamuata simane femabu, fohorö, fanagö ba tanö böʼönia.—I Korindro 6:9-11.
a Oya Zura Niʼamoniʼö si no lafoʼeluaha ba li Indonesia laʼogunaʼö ”ZOʼAYA” si tobali töi Lowalangi, lö laʼogunaʼö döi Yehowa. Hana wa lafalua daʼö? Tola öfaigi wanema linia ba mbuku Apa yang Sebenarnya Alkitab Ajarkan? ngaʼörö 195, nifazökhi ndra Samaduhuʼö Yehowa, no tehenaigö ba www.pr2711.com/id.
b Sura Niʼamoniʼö zangombakha khöda wa Yesu ’Ono Lowalangi si ha sambua’, börö me yaʼia si aʼa moroi ba nifazökhi fefu hadia ia, ba Yehowa samösa zomböi yaʼia.—Yohane 3:18; Kolose 1:13-15.