Hadia Öʼodödögö Woloʼö Faʼaboto ba Dödö Keriso?

1, 2. Hadia gohitö dödö niha keriso? Beʼe duma-duma.

NA MÖI ita mowöli bua zinanö, hadia nifilida? Tatu manö tenga daʼö nifilida bua zinanö sebua mazui side-ide böli. Tafili mbua sasoso ba si baga.

² Me no ifahaʼö ia si samösa niha sanandrösa khö Yehowa ba ihalö gangetula tebayagö ia idanö, itugu aro wahuwusania khö Lowalangi. Omasi ia na so khönia faʼaboto ba dödö. Tenga dali waʼatua mboto awena so waʼaboto ba dödö. Hizaʼi, faʼatedou ba waʼaboto ba dödö börö me iʼokhögö wahuwusa si sökhi khö Lowalangi. Omasi Waulo enaʼö niha Keriso si so ba mbanua Efeso so khöra waʼaboto ba dödö. Ifarou ira enaʼö so khöra wahasara dödö ba wamati ba lö laböhöli lafahaʼö ira sanandrösa khö Yesu enaʼö ’moʼahonoa ira, dali ndrohu-ndrohu waʼebua Keriso andrö, si no moʼahonoa.’​—Efeso 4:13.

3. Hadia zi fagölö niha keriso ba mbanua Efeso me föna faoma niha keriso ba ginötö andre?

³ No ara tefasindro mbanua niha Keriso ba Efeso awena ibeʼe zurania Waulo. Hewaʼae ato niha Keriso si so faʼaboto ba dödö, hizaʼi so ösa zinangea lafarou tödö enaʼö itugu aro wahuwusara khö Yehowa. Simanö göi ita iadaʼa, ato ndra talifusöda si no ara ba wangai halöwö khö Yehowa ba laʼokhögö waʼaboto ba dödö. Tanö böʼönia, moguna ladouʼö wamatira. Duma-dumania, ato niha nibayagö idanö ero röfi, moguna laʼodödögö enaʼö tedou ira ba wamati. Hewisa ndraʼugö?​—Kolose 2:6, 7.

HEWISA ENAʼÖ TEDOU ITA BA WAMATI?

4, 5. Hadia zi faböʼö-böʼö niha keriso si so faʼaboto ba dödö, ba hadia zi fagölö ira? (Faigi gambara ba ngaʼörö 8.)

⁴ Hewaʼae faoma asoso mbua zinanö, faböʼö-böʼö waʼegebuania. Tobali, mbua zinanö sasoso andrö fagölö dandra-tandra. Simanö göi niha keriso si so faʼaboto ba dödö. Faböʼö-böʼö mbanua, soi, lagu waʼauri, döfi, ba tanö böʼönia. Hizaʼi, niha keriso si so faʼaboto ba dödö, so khöra gamuata si fagölö. Hadia manö gamuata daʼö?

⁵ Niha keriso si so faʼaboto ba dödö ”latara lahe” Yesu. (I Fetero 2:21) Imane Yesu ba niha keriso, moguna laʼomasiʼö Lowalangi soroi ba dödöra, nosora maʼa sambua, era-erara ba enaʼö laʼomasiʼö nawöra simane botora samösa. (Mataiʼo 22:37-39) Niha keriso si so faʼaboto ba dödö iʼodödögö wamalua niwaʼö Yesu. Sabölö moguna ba waʼaurinia yaʼia daʼö fahuwusania khö Lowalangi hegöi ba wangomasiʼö niha böʼö.

6, 7. (a) Hadia gamuata tanö böʼö niʼokhögö niha keriso si so faʼaboto ba dödö? (b) Hadia zinangea taʼangerönusi?

⁶ Faʼomasi andrö sambua mbua-bua moroi ba ngawalö gamuata niha keriso si so faʼaboto ba dödö. (Galatia 5:22, 23) Laʼoromaʼö göi mbua-bua simane, faʼohau-hau dödö, fanaha tödö, ba faʼebolo dödö. Börö gamuata daʼa wa tola anau gölöra hewaʼae na göna ira fanandraigö. Ba ginötö lafahaʼö ira samösa, laʼalui wanuturu lala sanandrösa ba goi-goi Zura Niʼamoniʼö si tola manolo yaʼira enaʼö aboto ba dödöra zatulö ba si lö atulö. Tödö side-ide si no tefahaʼö ba Zura Niʼamoniʼö, daʼa zanolo yaʼira wangai angetula si sökhi ba waʼauri. Niha keriso si so faʼaboto ba dödö, so khöra fangide-ngideʼö, ba faduhu dödöra wa fanuturu lala nibeʼe Yehowa daʼö zabölö sökhi moroi ba waʼatua-tuara samösa.a (Faigi zi no musura ba gahe zura.) Owölö-ölö ira weʼamöi manuriaigö ba laʼodödögö enaʼö so wahasara dödö ba gangowuloa.

⁷ Hewaʼae no ara mazui awena tobali ita Samaduhuʼö Yehowa, moguna tasofu khöda samösa: ’Hadia so gamuatagu sinangea ubulöʼö enaʼö tola uʼoʼö Yesu? Hadia so zinangea ufalua?’

”BA ZI NO MOʼAHONOA, BA Ö SABEʼE NIBEʼE”

8. Hadia zangoromaʼö wa so khö Yesu waʼaboto ba dödö Daromali?

⁸ Aboto ba dödö Yesu Zura Niʼamoniʼö. 12 fakhe ndröfi Yesu no iʼogunaʼö gölu-gölu zura me fahuhuo ia khö ndra samahaʼö ba gosali. ”Ba dozi samondro-ndrongo khönia, ba ahöli-höli dödö, ba waʼatua-tuania ba bawanema li.” (Luka 2:46, 47) Ba gafuriatania, atua-tua ia wangogunaʼö Zura Niʼamoniʼö ba wolawa nudunia.​—Mataiʼo 22:41-46.

9. (a) Hadia ginötö sinangea latatugöi niha keriso si so faʼaboto ba dödö? (b) Hana wa moguna tafahaʼö ita ba Zura Niʼamoniʼö?

⁹ Niha keriso somasi tedou ba wamati, iʼoʼö duma-duma nibeʼe Yesu enaʼö itugu aboto ba dödönia Zura Niʼamoniʼö. Asese ifahaʼö ia ba Zura Niʼamoniʼö, börö me aboto ba dödönia wa ”ba zi no moʼahonoa, ba ö sabeʼe nibeʼe.” (Heberaiʼo 5:14) Niha keriso saro ba wamati omasi iʼokhögö ’waʼaboto ba dödö’ sanandrösa ba Zura Niʼamoniʼö. (Efeso 4:13) Tobali, angerönusi atö: ’Hadia no ubaso Zura Niʼamoniʼö ero maʼökhö? Hadia no utatugöi ginötö ba wamahaʼö yaʼo samösa? Hadia no utatugöi ginötö mbongi wamahaʼö ba nomo ero migu?’ Na öfahaʼö ndraʼugö ba Zura Niʼamoniʼö, alui goi-goi Zura Niʼamoniʼö si tola manolo yaʼugö enaʼö aboto ba dödöu hewisa wangera-ngera Yehowa. Aefa daʼö, ogunaʼö goi-goi daʼa ba wanolo yaʼugö ba wangai angetula. Daʼa zi tola manolo yaʼugö enaʼö itugu aro wahuwusamö khö Yehowa.

10. Hewisa niha keriso si so faʼaboto ba dödö wamaiginia goi-goi nibeʼe Lowalangi?

¹⁰ Niha keriso si so faʼaboto ba dödö tenga ha asala iʼila nösi Daromali. Omasi iʼoʼö wanuturu lala hegöi goi-goi nibeʼe Lowalangi. Faʼomasi andre zangoromaʼö na ifalua zomasi Yehowa tenga ba zomasi dödönia samösa. Ibulöʼö gamuatania, lagu waʼaurinia hegöi fangera-ngerania. Duma-dumania, iʼoʼö Yesu ba iʼonukha niha si bohou ”nibeʼe famaedo Lowalangi, wamazökhi yaʼia, ba waʼatulö dödö ba bawaʼohau-hau, ba zi duhu.” (Baso Efeso 4:22-24.) Moguna tatörö tödöda, ibeʼe gehehania Lowalangi ba niha sanura Taromalinia. Ba ginötö tafahaʼö ita ba Zura Niʼamoniʼö, eheha Lowalangi zanolo yaʼita enaʼö tedou waʼomasida, faʼaboto ba dödö ba itugu aro wahuwusada khö Yehowa.

MANGAʼAROʼÖ FAHASARA DÖDÖ

11. Hadia zalua khö Yesu me so ia ba gulidanö?

¹¹ Yesu niha soʼahonoa. Toröi ia ba gotalua niha si lö moʼahonoa ba gulidanö. Satuania ba talifusönia göi niha si lö moʼahonoa. Nifahaʼö Yesu so khöra gamuata faʼasiliawa ba fakhögusa. Duma-dumania, fatua lö mate Yesu, ira nifahaʼönia ’lafadöni haniha zebua ba gotaluara.’ (Luka 22:24) Hewaʼae lö moʼahonoa wangera-ngerara, iʼila Yesu wa nifahaʼönia andre so khöra waʼaboto ba dödö hegöi fahasara dödö ba mbanua niha keriso. Bongi daʼö mangandrö göi Yesu enaʼö so wahasara dödö ba gotalua ndra nifahaʼönia. Iʼandrö khö Yehowa enaʼö ”simane yaʼugö, Ama, ba khögu ba simane yaʼo ba khöu, enaʼö hasambua dödöra, simane tödöda andrö si hasambua.”​—Yohane 17:21, 22.

12, 13. (a) Hadia gohitö dödöda yaʼita niha keriso? (b) Tutunö hewisa samösa dalifusöda ifahaʼö ia enaʼö so khönia wahasara dödö khö ndra talifusö tanö böʼö.

¹² Niha keriso si so faʼaboto ba dödö, laʼodödögö wahasara dödö ba mbanua niha keriso. (Baso Efeso 4:1-6, 15, 16.) Ohitö dödö niha keriso yaʼia daʼö enaʼö ’teʼosambuaʼö’ ita ba falulu fohalöwö. Moguna so khöda fangide-ngideʼö. Hewaʼae laʼafökhöiʼö dödöda ira talifusöda tanö böʼö börö wa lö moʼahonoara, niha keriso si so faʼaboto ba dödö moguna larorogö wahasara dödö ba gotalua niha keriso. Börö daʼö, moguna taʼangeraigö zamösana: ’Hewisa ndraʼo ba ginötö so dalifusöda samalua amuata si lö tefaudu? Hewisa dödögu na so dalifusö soʼafökhöiʼö tödögu? Hadia lö omasi ndraʼo fahuhuo khönia? Mazui, hadia ufuli uʼaʼazökhi wahuwusagu khönia?’ Niha keriso si so faʼaboto ba dödö omasi iʼefaʼö zala niha soʼafökhöiʼö tödönia tenga iʼalui zimöna ia.

¹³ Datafaigi duma-duma Uwe. Ba zi lalö, alio abao dödönia na iʼila so gamuata ndra talifusöda si lö baga. Ihalö gangetula ba wombaso waö-waö waʼauri Dawido si so ba Zura Niʼamoniʼö hegöi ba mbuku Pemahaman Alkitab. Hana wa ibaso sanandrösa khö Dawido andre? Börö me no irai alua daʼa khö Dawido ba gotalua zamosumange Yehowa. Duma-dumania, Razo Saulo iʼalui lala wamunu Dawido, so niha zo tebu yaʼia kara, ba foʼomonia samösa iʼoʼaya Dawido. (I Zamueli 19:9-11; 30:1-6; II Zamueli 6:14-22) Hewaʼae lafalua zi lö sökhi khönia, faduhu dödö Dawido ba iʼomasiʼö göi Yehowa. Iʼoromaʼö Dawido göi waʼahakhö dödö. Aboto ba dödö Uwe wa moguna ifalua göi zimane daʼö. Ba ginötö ifahaʼö ia ba Zura Niʼamoniʼö, aboto ba dödönia wa moguna ifaböʼöni wangera-ngerania khö ndra talifusöda. Lö moguna itörö tödönia fefu zala nifalua ndra talifusöda enaʼö so wahasara dödö ba mbanua niha keriso. Hadia no öfalua göi zimanö?

FARIAWÖ NDRAʼUGÖ BA NIHA SAMOSUMANGE YEHOWA

14. Haniha nifili Yesu zi fahuwu khönia?

¹⁴ Fahuwu Yesu ba niha fefu irege omasi göi ira fahuwu khönia. Hizaʼi, ihaogö wamili haniha zi fahuwu khönia. Imane khö ndra nifahaʼönia ”si no fahuwu khögu ami, na miʼoʼö hadia niwaʼögu khömi.” (Yohane 15:14) Ifili Yesu zi fahuwu khönia moroi ba gotalua niha si lö faröi ba wamosumange Yehowa. Hadia öfili zi fahuwu khöu niha sangomasiʼö Yehowa soroi ba dödö? Hana wa moguna daʼa?

15. Hadia gunania na fariawö zi bohou ebua khö ndra talifusöda si so faʼaboto ba dödö?

¹⁵ Tola asoso mbua zinanö börö me göna haga zino. Simanö göi, fahuwusa si sökhi moroi khö ndra talifusöda daʼö zi tola mondroʼu yaʼita ba wamati. Yaʼami si bohou ebua hadia no mihalö gangetula si sökhi ba waʼaurimi? Na noa, fili zi fahuwu khöu niha si lö faröi ba wamosumange Yehowa ba sangodödögö wamalua fahasara dödö ba mbanua niha keriso. Tola manö no irai göna ira fanandraigö ba wamosumange Yehowa ba tola lataögö zalua andrö. Tola latolo ndraʼugö enaʼö öfili gangetula si sökhi ba waʼauri. Na oya öʼogunaʼö ginötö we fao khöra, latolo ndraʼugö ba wangai angetula si sökhi irege tedou ndraʼugö ba wamati.​—Baso Heberaiʼo 5:14.

16. Hewisa ndra talifusöda si no alawa döfi latolo Helga ba wangai angetula si sökhi?

¹⁶ Itörö tödö Helga me lö aratö tama ia SMA, ato ndra awönia ba zekola ladunö-dunö hadia gohitö dödöra. Ato ba gotaluara zi möi sekola salawa enaʼö tehöngö ira ba lasöndra halöwö si sökhi. Hizaʼi, fahuhuo Helga khö ndra talifusöda si so faʼaboto ba dödö sanandrösa ba gohitö dödönia andrö. Imane, ”Ato ndra talifusöda satua moroi khögu, ba mene-mene nibeʼera daʼö zi tola manolo yaʼo. Lafarou dödögu enaʼö uhalö gangetula weʼamöi merintis. Uhalö perintis biasa lima fakhe faʼara. Omuso sibai dödögu börö me uʼogunaʼö waʼabölögu ba wamosumange Yehowa. Lö irai maniasa ndraʼo ba gangetula si no uhalö.”

17, 18. Hewisa wangoromaʼöda wa tafalua zomasi Yehowa?

¹⁷ Na taʼoʼö nifalua Yesu, itugu aro wamatida. Itugu ahatö ita khö Yehowa, ba owölö-ölö ita wangai halöwö khönia. Na so waʼaboto ba dödö ba zi samösa niha, daʼö zamarou yaʼia enaʼö ifalua zomasi Yehowa. Imane Yesu khö ndra nifahaʼönia, ”Ya simanö hagami andrö, yahumaga ba niha, enaʼö laʼila mbua-buami andrö, si sökhi, ba enaʼö lasuno namami andrö, si so ba zorugo.”​—Mataiʼo 5:16.

¹⁸ No tafahaʼö ita wa niha keriso si so faʼaboto ba dödö, tola möi fanolo ndra talifusöda ba mbanua niha keriso. Niha keriso si so faʼaboto ba dödö oroma moroi ba wangogunaʼönia tödö side-ide. Hewisa dödöda side-ide tola itolo ita ba wangai angetula si sökhi? Hewisa wangandröda saohagölö ba gangetula nihalö ndra talifusöda? Tafatunö aefa daʼa.