Hadia Nifalua Yehowa ba Wangoromaʼö Faʼomasinia Khöda?

1. Hadia nifarou Yohane ita ba hadia mbörö?

IFAROU ita Yohane enaʼö taʼangerönusi ha waʼebua waʼomasi Yehowa khöda. Ba I Yohane 3:1 imane wangumaʼö, ”Mifaigi, ha waʼebua waʼomasi andrö, niʼamualagö nama khöda.” Na taʼangerönusi ha waʼebua waʼomasi Yehowa khöda ba hewisa wangoromaʼönia, itugu ahatö ita khönia ba taʼomasiʼö ia.

2. Hana wa ato niha iadaʼa lö khöra faʼaboto ba dödö wa iʼomasiʼö ira Lowalangi?

² Sahöli dödöda iadaʼa, ato niha lö aboto ba dödöra waʼomasi Lowalangi. So zangumaʼö wa lö ba dödö Lowalangi niha gulidanö. Faduhu dödöra wa Lowalangi andrö ha asala ibeʼe goroisa ba ihuku niha si lö moloʼö. Börö wamahaʼö faya, ato niha sangumaʼö wa lö sökhi Lowalangi ba lö guna taʼomasiʼö ia. So göi zangumaʼö, iʼomasiʼö Lowalangi fefu niha gulidanö gofu hadia ia nifaluara. Hizaʼi, börö me no tafahaʼö ita ba Zura Niʼamoniʼö aboto ba dödöda sanandrösa khö Yehowa. Aboto ba dödöda wa faʼomasi andrö no amuata Lowalangi, no ibeʼe nononia si ha sambua si tobali höli khöda. (Yohane 3:16; I Yohane 4:8) Börö zalua ba waʼaurida andre, itaria lö khöda faʼaboto ba dödö ha waʼebua waʼomasi Yehowa khöda.

3. Hewisa enaʼö aboto ba dödöda waʼomasi Yehowa khöda?

³ Enaʼö so khöda waʼaboto ba dödö wa iʼomasiʼö ita Yehowa, siʼoföna moguna taʼila wa Yehowa zomböi yaʼita. Yaʼia zameʼe khöda faʼauri. (Baso Zinunö 100:3-5.) Daʼö mbörö wa iʼamaedolagö ba Zura Niʼamoniʼö niha si föföna ’ono Lowalangi.’ (Luka 3:38) Daʼö mbörö wa ifahaʼö ita Yesu ba wogaoni Yehowa ”he ama khöma si so ba zorugo.” (Mataiʼo 6:9) Tobali Amada Yehowa, iʼomasiʼö ita hulö zimane satua ba ndraononia.

4. (a) Hadia gamuata niʼokhögö Yehowa? (b) Hadia manö nitutunöda ba duho daʼa hegöi ba duho aefa daʼa?

⁴ Abua ba niha wokhalaigö ha waʼebua waʼomasi nama ba ndraononia. Tola manö me ide-ide ira lö sökhi gamuata namara khöra. Lö irai ifalua Yehowa zimane daʼö ba niha gulidanö. Yaʼia ama sebua faʼomasi. (Zinunö 27:10) Iʼomasiʼö ita ba ifalua hadia ia zi tola molumöʼö yaʼita. Na tarasoi waʼomasi Yehowa, itugu ahatö ita khönia. (Yakobo 4:8) Ba duho daʼa, ifatunö khöda so öfa ngawalö nifalua Yehowa ba wangoromaʼö faʼomasinia khöda. Ba duho aefa daʼa, so öfa ngawalö lala nifaluada ba wangoromaʼö faʼomasida khö Yehowa.

YEHOWA SEBUA FAʼOMASI BA FONDREGE ZOBÖWÖ

5. Hadia nibeʼe Yehowa ba niha fefu?

⁵ Me so Waulo ba danö Ndrawa Heleni ba mbanua Natena, iʼila no fahöna nadu ba mbanua andrö. Ato niha ba mbanua daʼö, faduhu dödöra wa adu andrö zameʼe khöra faʼauri. Imane Faulo khöra, ”Lowalangi andrö samazökhi danöʼa ba ösinia.” Ba ifuli iwaʼö, ”Me no yaʼia zameʼe ba niha fefu noso ba hanu-hanu, awö fefu hadia ia.” ”Ba khönia sa auri ita, ba khönia maliwa-liwa ita, ba khönia so ita.” (Halöwö Zinenge 17:24, 25, 28) Ibeʼe fefu hadia ia zoguna khöda Yehowa enaʼö tasöndra waʼohahau dödö. Törö tödöu hadia zi no ibeʼe Yehowa tandra waʼomasinia khöda.

6. Hadia nahia si sökhi nibeʼe Yehowa khöda? (Faigi gambara ba ngaʼörö 23.)

⁶ Duma-dumania, ibeʼe khöda Yehowa nahia si sökhi. (Zinunö 115:15, 16) Moroi ba nifazökhinia fefu, ulidanö andre nahia si sökhi ba niha. Ira sagalawa sekola no lafareso ngawalö zi so ba dalu mbanua, lö hadöi nahia si sökhi simane ulidanö si tola tobali nahia waʼauri niha. Tenga ha soguna khöda nibeʼe Yehowa, hizaʼi ifazökhi gulidanö tobali nahia si sökhi ba sahono dödö enaʼö tola auri ita. (Yesaya 45:18) Na taʼangerönusi gulidanö si no ibeʼe Yehowa, tarasoi waʼomasinia khöda.​—Baso Yobi 38:4, 7; Zinunö 8:4-6.

7. Moroi ba wamazökhinia yaʼita, hewisa Yehowa wangoromaʼö faʼomasinia khöda?

⁷ Lala tanö böʼö nifalua Yehowa ba wangoromaʼö faʼomasinia khöda, yaʼia daʼö ifazökhi niha si fakhili-khili khönia enaʼö taʼoʼö gamuatania. (I Moze 1:27) Tola tarasoi waʼomasi Yehowa ba taʼomasiʼö ia. Iʼila Yehowa hadia zoguna khöda enaʼö tasöndra waʼomuso dödö. Lasöndra waʼomuso dödö iraono na laʼomasiʼö ira satuara. Moguna tatörö tödöda wamahaʼö Yesu wa so khöda waʼomuso dödö na ahatö ita khö Yehowa. (Mataiʼo 5:4) Yehowa andrö ”si lö mangambösi khöda, wameʼe hadia ia, ba wangogunaʼö yaʼia.” Si ndruhu wa Yehowa sebua faʼomasi ba fondrege zoböwö.​—I Timoteo 6:17; Zinunö 145:16.

IFAHAʼÖ ITA YEHOWA BA ZI DUHU

8. Hana waʼomasi tafahaʼö ita khö Yehowa?

⁸ Satua sebua faʼomasi lö omasi ia na teʼala ba telimo ndraononia. Hizaʼi, ato zatua ba ginötö andre lö laʼoʼö goi-goi Zura Niʼamoniʼö sanandrösa ba zi duhu. Lö lafahaʼö ndraonora ba zi duhu irege tebai labeʼe wanuturu lala si sökhi ba ndraonora. Lua-luania, lö laʼila hadia zinangea lafalua irege lö khöra faʼohahau dödö ba zi sambua omo. (Gamaedola 14:12) Hizaʼi, Yehowa zameʼe fanuturu lala si sökhi, börö me yaʼia ”Lowalangi si lö faröi.” (Zinunö 31:6) Omasi Yehowa ifahaʼö ita sanandrösa khönia ba hewisa lala wamosumangeda yaʼia. Ibeʼe wanuturu lala khöda enaʼö tasöndra waʼauri si sökhi. (Baso Zinunö 43:3.) Datatutunö ia.

9, 10. (a) Hana wa itutunö khöda Yehowa haniha ia? (b) Hadia manö niʼombakhaʼö Yehowa sanandrösa ba gohitö dödönia?

⁹ Siʼoföna, itutunö khöda Yehowa haniha ia. Omasi ia enaʼö aboto ba dödöda haniha ia. (Yakobo 4:8) Iʼombakhaʼö khöda haniha döinia. Oya tesura döi Lowalangi Yehowa ba Zura Niʼamoniʼö moroi ba danö böʼö. Ifatunö khöda haniha ia zi ndruhunia. Na tafaigi nifazökhinia, tola tefahaʼö ita wa yaʼia andrö Lowalangi sabölö ba satua-tua. (Roma 1:20) Na tabaso Zura Niʼamoniʼö, taʼila wa iʼomasiʼö ita ba so khönia waʼatulö. Na aboto ba dödöda gamuata Yehowa, itugu ahatö ita khönia.

¹⁰ Ifahaʼö ita Yehowa ba gohitö dödönia. Ifatunö wa ösi nomonia ita. Ifatunö khöda hadia zinangea tafalua enaʼö tola falulu fohalöwö ita ba tasöndra waʼomuso dödö. Ifatunö Sura Niʼamoniʼö wa lö khöda faʼabölö ba wotatugöi hezo zi sökhi ba si lö sökhi. (Yeremia 10:23) Iʼila Yehowa hadia zabölö sökhi khöda. Na tatema ba tafalua goroisa nibeʼe Yehowa, tasöndra waʼohahau dödö ba faʼahono dödö. No ifahaʼö ita Yehowa ba zi duhu börö waʼomasinia.

11. Hadia nifabuʼu Yehowa khöda ba zi so föna?

¹¹ Ama sebua faʼomasi iʼangeraigö zoguna ba ndraononia ba zi so miföna. Omasi ia enaʼö lasöndra waʼauri si sökhi iraononia. Hizaʼi, ato niha ba ginötö daʼa lö aboto ba dödöra hadia zalua ba zi so föna, ba laʼogunaʼö waʼaurira ba zimöi zaya-zaya gölö. (Zinunö 90:10) Taʼandrö saohagölö khö Yehowa, tenga ha ifahaʼö ita ba wanöndra faʼohahau dödö iadaʼa, tobali ifabuʼu khöda wa ibeʼe waʼohahau dödö si lö aetu sagötö faʼara!

YEHOWA ZAMEʼE KHÖDA DEGU-DEGU BA FANUTURU LALA

12. Hewisa wanolo Yehowa Kaʼino hegöi Barukhi?

¹² Me iʼila Yehowa ifalua zi lö sökhi Kaʼino, itandraigö ibeʼe wanolo ba imane, ”Hana wa mofönu ndraʼugö, ba hana waʼabao mbawau? Tenga simanö: na satulö ölau, ba tola öfaöga mbawau.” (I Moze 4:6, 7) Lö itema Kaʼino wanolo moroi khö Yehowa, lua-luania tefakao ia. (I Moze 4:11-13) Samuza inötö, iʼila Yehowa wangera-ngera Mbarukhi si fasala, daʼö zimöi fangerege dödönia ba halöwö nifaluania. Ifangelama ia Yehowa wa moguna ifalalini gera-erania. Iʼoʼö Barukhi wangelama moroi khö Yehowa ba teʼorifi ia.​—Yeremia 45:2-5.

13. Hadia mbuania ba nono mbanua Yehowa me lö faröi ira ba wanaögö famakao?

¹³ Börö me iʼomasiʼö ita Yehowa, andrö ibeʼe khöda degu-degu ba fanuturu lala. Tenga ha ibeʼe khöda degu-degu, hizaʼi ifahaʼö ita. (Heberaiʼo 12:6) No tesura ba Zura Niʼamoniʼö waö-waö niha nifahaʼö Lowalangi enaʼö tobali sökhi. Duma-dumania Yosefo, Moze, hegöi Dawido, ilumöʼö ira Yehowa ba ginötö göna khöra wamakao. Ba zi no latörö andrö, daʼö zi tobali famahaʼö khöra ba wamalua halöwö sebua nibeʼe Yehowa khöra. Na tabaso hewisa Yehowa wameʼenia famahaʼö hegöi ba wanolo ono mbanuania, faduhu dödöda wa iʼomasiʼö ita Yehowa.​—Baso Gamaedola 3:11, 12.

14. Ba ginötö tafalua zala, hewisa Yehowa wangoromaʼö faʼomasinia khöda?

¹⁴ Lö aetu-aetu waʼomasi Yehowa khöda hewaʼae tafalua zala. Na tatema degu-degu ba tafalalini gera-erada, iʼefaʼö zalada Yehowa börö me yaʼia ”sangöhöna dania fameʼe aefa horönia.” (Yesaya 55:7) Hadia geluahania? Moroi ba wehede Dawido andrö zangoromaʼö khöda wa Yehowa sebua faʼahakhö dödö, ”Sameʼe aefa khöu lalöu fefu, ba samadöhö fökhöu fefu. Sangefaʼö nosou ba waʼatekiko, samotakula yaʼugö faʼebua dödö ba faʼahakhö dödö. Simane otaluara gatumbukha gaekhula, simanö waʼebua gotaluada lalöda ibeʼe.” (Zinunö 103:3, 4, 12) Ba wameʼenia degu-degu ba fanuturu lala khöda lö fagölö-gölö. Hadia tatema degu-degu nibeʼenia andrö? Moguna tatörö tödöda wa ibeʼe khöda degu-degu Yehowa börö me iʼomasiʼö ita.​—Zinunö 30:6.

ILUMÖʼÖ ITA YEHOWA

15. Hadia lala tanö böʼö nifalua Yehowa ba wangoromaʼö faʼomasinia khöda?

¹⁵ Ama sebua faʼomasi ilumöʼö nösi nomonia moroi ba wamaʼala. Daʼö nifalua Yehowa khöda. Imane Dawido sanandrösa khö Yehowa, ”Yaʼia zondrorogö noso zatulö tödö andrö khönia; iʼefaʼö ira ba danga zebua horö andrö.” (Zinunö 97:10) Angeraigö atö, lö ötehe naso zombambaya ono höröu. Simanö göi Yehowa lö itehe na so zamakao ono mbanuania börö me ebua mbölira ba wamaiginia.​—Baso Zakharia 2:8.

16, 17. Hewisa Yehowa ba wolumöʼö ono mbanuania me föna hegöi iadaʼa?

¹⁶ Lala tanö böʼö nifalua Yehowa ba wolumöʼö ono mbanuania me föna hegöi iadaʼa, yaʼia daʼö ifatenge ndra malaʼikania. (Zinunö 91:11) Ha samösa malaʼika ibunu 185.000 zaradadu Ndrawa Asiria ba zi sara wongi ba iʼefaʼö nono mbanua Yehowa. (II Razo 19:35) Me götö föna, iʼefaʼö Wetero, Faulo ba tanö böʼönia moroi ba gurunga. (Halöwö Zinenge 5:18-20; 12:6-11) Alua wasuwöta ba mbanua Afrika. So waʼudusa, lahoröni ndra alawe, fanagö, ba fabunusa. Lö hadöi ira talifusöda si mate, hizaʼi ahori taya fefu gokhötara. Si ndruhu-ndruhu wa larasoi waʼomasi Yehowa ba faduhu dödöra wa ilumöʼö ira. Hewaʼae tefakao ira, so khöra waʼomuso dödö. So dalifusöda nifatenge moroi ba Gödo Sebua sangondrasi yaʼira ba manofu ia hewisa ndra talifusöda fefu, lamane wangumaʼö, ”Lö hadia ia khöma, maʼandrö saohagölö khö Yehowa!”

¹⁷ Ato nibunu nono mbanua Yehowa me götö föna simane Zitefano ba tanö böʼönia börö me lö faröi ira khönia. Lö fefu gabula dödö salua khöda itimba Yehowa. Hizaʼi, ilumöʼö ita ba zi sambua angowuloa, ifatunö khöda lala Gafökha ba wanandrawaisi yaʼita. (Efeso 6:10-12) Tatema wamangelama moroi ba Zura Niʼamoniʼö hegöi ba mbuku si no lahenaigö ba gangowuloa Yehowa. Duma-dumania, tefahaʼö ita enaʼö mangelama ita ba wangogunaʼö Internet, wangomasiʼö kefe, wamalua horö, wamaigi gambara si lö sökhi, ba oya nasa danö böʼönia. Daʼa zangoromaʼö wa si ndruhu iʼomasiʼö ita Yehowa ba ilumöʼö ita.

SAMBUA TÖI SEBUA KHÖDA

18. Hewisa dödöu me iʼomasiʼö ndraʼugö Yehowa?

¹⁸ Me ifuli iʼangeraigö Moze halöwö zi no ifalua khö Yehowa, faduhu dödönia wa iʼomasiʼö ia Yehowa ba imane, ”Hulö wongi abusoiʼö ndraʼaga faʼebua dödöu andrö, ba owua-wua dödöma ba omuso dödöma, sagötö yaʼaga.” (Zinunö 90:14) Taʼandrö saohagölö me no so khöda waʼaboto ba dödö wa iʼomasiʼö ita Yehowa! Sambua töi sebua khöda me iʼomasiʼö ita Yehowa! Simane Yohane, tamane wangumaʼö, ”Mifaigi, ha waʼebua waʼomasi andrö, niʼamualagö Nama khöda.”​—I Yohane 3:1.