Hewisa Wangoromaʼöda wa Taʼomasiʼö Yehowa?

1, 2. Hewisa wamahaʼö Yehowa yaʼita ba wangomasiʼö yaʼia?

LALA sabölö sökhi nifalua nama ba wamahaʼö ononia yaʼia daʼö ibeʼe ia duma-duma. Na iʼomasiʼö nononia, no ifahaʼö ira ba wangomasiʼö. Lö niha si tola mamalua faʼomasi simane nifalua Yehowa. Andrö tafamaha ita ba wangomasiʼö, ”me no oföna iʼomasiʼö ita.”​—I Yohane 4:19.

² Hewisa wangoromaʼö Yehowa ’wa no iʼofönaiʼö wangomasiʼö yaʼita’? Imane Sura Niʼamoniʼö, ”Me no mate salahida Keriso, me samazökhi horö ita na.” (Roma 5: 8) No ibeʼe nononia Yehowa sebua faʼomasi ba wangöhöli yaʼita ba horö ba ba waʼamate. Buala Lowalangi fondrege zebua andrö, daʼö zi tola mangahatöʼö yaʼita khönia ba enaʼö so khöda ginötö ba wangoromaʼö faʼomasida khönia. Ba wameʼenia höli khöda no ibeʼe ia duma-duma. Ifahaʼö ita enaʼö tafalua waʼomasi si lö fakhögusa ba si fao faʼoböwö.​—I Yohane 4:10.

3, 4. Hewisa wongoromaʼöda wa taʼomasiʼö Lowalangi?

³ Faʼomasi no amuata Yehowa sabölö ebua. Aboto ba dödöda hana wa iwaʼö khöda Yesu, ”Omasiʼö zoʼaya Lowalangiu andrö moroi siʼaikö ba dödöu, nosou maʼasambua zangomasiʼö yaʼia, ba horigö gera-erau, awö waʼabölöu, wangomasiʼö yaʼia.” (Mareko 12:30) Omasi Yehowa na taʼomasiʼö ia ”moroi siʼaikö ba dödö”. Na abölö taʼomasiʼö danö böʼö moroi khö Yehowa, afökhö sibai dödönia. Böi ha ba mbewe taʼomasiʼö Yehowa. Itötöna Yehowa enaʼö ’tahorigö gera-erada awö waʼabölöda’ wangomasiʼö yaʼia. Eluahania taʼomasiʼö ia moroi ba dödö ba taʼoromaʼö ba nifaluada.​—Baso Mikha 6:8.

⁴ Talulu waʼaurida hegöi gokhötada ba wangomasiʼö Yehowa. Na taʼofönaiʼö Yehowa ba waʼaurida, ba daʼö taforomaʼö wa si ndruhu-ndruhu taʼomasiʼö ia. Ba wamahaʼö moroi furi, no tafatunö öfa ngawalö lala niʼogunaʼö Yehowa ba wangoromaʼö faʼomasi ba nono mbanuania. Iadaʼa, datafaigi hewisa wangoromaʼöda enaʼö itugu taʼomasiʼö Yehowa.

FOROMAʼÖ WA ÖʼANDRÖ SAOHAGÖLÖ KHÖ YEHOWA

5. Na taʼangerönusi fefu zi no ifalua Yehowa ba waʼaurida, hadia zinangea tafalua?

⁵ Na so zamuala khöu, tatu manö öʼandrö khönia saohagölö. Börö me öʼandrö saohagölö ba mbuala andrö, tatu manö öʼogunaʼö ia. Imane Yakobo, ”Ameʼela si sökhi ba ha sambalö buala soʼahonoa si otarai siawa, moroi khö Nama zi haga andrö, mitou. Ba zi lö faʼatobali, ba ha faʼatelumö-lumö.” (Yakobo 1:17) Taʼandrö sibai saohagölö me no ibönökhi fefu zoguna khöda Yehowa irege ohahau dödöda. Tatu manö omasi ita tasulöni waʼomasinia andrö.

6. Hadia zinangea lafalua ndraono Gizaraʼeli na omasi ira latema howu-howu Yehowa?

⁶ Oya howu-howu Yehowa si no latema iraono Gizaraʼeli. Ba zi ngaotu fakhe faʼara, no ibeʼe goroisa khöra Yehowa si tobali fanuturu lala, ba no ibönökhi fefu zoguna khöra enaʼö tola auri ira. (V Moze 4: 7,  8) Lala ndraono Gizaraʼeli ba wangandrö saohagölö khö Yehowa, na laʼoʼö fefu goroisania. Duma-dumania, na labeʼe zumange khö Yehowa, enaʼö sumange, ”fondrege zi sökhi siaʼa mbua nowi” khöra. (II Moze 23:19) Laʼila iraono Gizaraʼeli, wa lö tebato howu-howu Yehowa khöra na laʼoʼö goroisania ba labeʼe zumange fondrege zi sökhi khönia.​—Baso V Moze 8:7-11.

7. Hewisa ndraʼugö ba wangogunaʼö ”ganaʼau” ba wangoromaʼö faʼomasiu khö Yehowa?

⁷ Tola göi taforomaʼö wa taʼomasiʼö Yehowa na tabeʼe zi no amaedola ”ganaʼa”. (Gamaedola 3:9) Tola taʼogunaʼö ia ba wa molakhömi töi Yehowa. Duma-dumania, tabeʼe dolo tolo si no aoha gölö fameʼe ba wolului halöwö fanuriaigö Banua Lowalangi ba zi sagörö ulidanö. Hewaʼae ebua gokhötada mazui löʼö, taʼogunaʼö fefu zi so khöda ba wangoromaʼö faʼomasida khö Yehowa. (II Korindro 8:12) Tobali, oya lala nifaluada ba wangoromaʼö faʼomasida khö Yehowa.

8, 9 Hadia lala tanö böʼö ba wangoromaʼö faʼomasida khö Yehowa? Hadia nifalua Mike awö nösi nomonia?

⁸ Ifahaʼö ita Yesu enaʼö taʼofönaiʼö wangalui Banua Lowalangi, ba böi tabusi dödöda hadia taʼa, ba hadia taʼonukha. No ifabuʼu khöda Yehowa wa ibönökhi fefu zoguna khöda. (Mataiʼo 6:31-33) Faduhu dödöda khö Yehowa hegöi ba zi no ifabuʼu. Baero daʼö, na si ndruhu-ndruhu öʼomasiʼö zi samösa niha, hasambalö faduhu dödöu khönia. Mendrua manö na faduhu dödöda khö Yehowa, taforomaʼö wa abölö taʼomasiʼö ia. (Zinunö 143:8) Tola tasofu khöda samösa, ’Hadia gohitö dödögu, fangogunaʼögu inötö, awö waʼabölögu no uforomaʼö wa uʼomasiʼö Yehowa? Hadia uʼodaligö Yehowa ero maʼökhö ba wombönökhi soguna khögu?’

⁹ Mike ba ösi nomonia faduhu sibai dödöra khö Yehowa. Me awuyu-wuyu ia, omasi ia möi manuriaigö ba soi tanö böʼö. Me no mangowalu ia so khöra darua ndraono, lö manö si tebulö waʼomasinia weʼamöi manuriaigö ba soi böʼö. Me labaso zalua khö ndra talifusöda si möi manuriaigö ba mbanua si lö ato sanuriaigö, lahalö gangetula ba wangalösi isö-isö dödöra. Laʼamawa nomora sebua, ba toröi ira ba nomo side-ide. Laʼalösi halöwöra, iʼalui hadia tola itohugö halöwönia ba wangogunaʼö Internet ba mbanua niruginia. Lua-luania, möi ira ba soi tanö böʼö andrö ba ohahau dödöra wangai halöwö Lowalangi ba daʼö. Imane Mike, ”No marasoi niwaʼö Yesu ba Mataiʼo 6:33.”

ANGERÖNUSI WAMAHAʼÖ NIBEʼE YEHOWA

10. Simane Dawido, hana wa moguna taʼangerönusi hadia zi no tafahaʼö yaʼita sanandrösa khö Yehowa?

¹⁰ Imane Razo Dawido, ”Idunö-dunö lakhömi Lowalangi andrö banua siawa, ba iʼombakhaʼö nifazökhi dangania sebolo andrö.” Imane nasa, ”si no moʼahonoa goroisa Yehowa andrö, fangokafu dödö; si lö mangiwa wamaduhuʼö Yehowa andrö iʼatua-tuaʼö zambö tödö.” Me ifatou-tou tödönia Dawido waʼatua-tua si so ba goroisa Lowalangi ba faʼasökhi nifazökhinia, itugu ahatö ia ba iʼoromaʼö waʼomasinia khö Yehowa. Imane Dawido, ”enaʼö na omasi ndraʼugö wehede mbewegu awö gera-era dödögu andrö, yaʼugö Yehowa nahiagu saro ba sangorifi yaʼodo.”​—Zinunö 19:2, 8, 15.

11. Hewisa wangogunaʼöda faʼaboto ba dödö moroi Yehowa ba wangoromaʼö faʼomasida khönia? (Faigi gambara ba ngaʼörö 28.)

¹¹ Ba ginötö andre oya zi no ifahaʼö ita Yehowa sanandrösa ba gamuatania, ba gohitö dödönia, ba nifazökhinia, ba taromalinia. Tefarou niha ba gulidanö andre enaʼö lagohi sekola sagalawa, irege taya waʼomasira khö Lowalangi. Lö omasi Yehowa na ha faʼaboto ba dödö zi so khöda, hizaʼi omasi ia na atua-tua ita. Omasi ia na taʼogunaʼö zi no tafahaʼö yaʼita si tobali fangohahau dödöda ba taʼogunaʼö ba wanolo niha böʼö. (Gamaedola 4:5-7) Duma-dumania, omasi Yehowa na tabeʼe ”waʼaboto ba dödö zi ndruhu” ba niha tanö böʼö ba tatolo ira enaʼö tola teʼorifi ira göi. (I Timoteo 2:4) Taforomaʼö waʼomasida khö Yehowa hegöi ba niha böʼö na tafahaʼö ira sanandrösa ba Mbanua Lowalangi hegöi ba gohitö dödönia.​—Baso Zinunö 66:16, 17.

12. Hadia niwaʼö dalifusöda ono alawe me itema mbuala Yehowa?

¹² Si bohou ebua tola miʼangerönusi hadia zi no ifahaʼö Yehowa yaʼami ba hadia zi no ibeʼe khömi. Ifuli itörö tödö Shanon hadia zi no irasoi me möi ia ba gangowuloa sebua me 11 fakhe ndröfinia ba akhinia 10 fakhe. Me lafaehagö huhuo ”Pengabdian Ilahi” ba gangowuloa si tölu ngaluo, fefu zi bohou ebua hegöi Shanon ba akhinia laʼandrö enaʼö mudadao ira ba nahia zi no latatugöi. Siʼoföna so khönia waʼataʼu. Si ndruhunia, labeʼe khöra sambua zamösa mbuku Pertanyaan Kaum Muda—Jawaban yang Praktis. Hewisa dödönia khö Yehowa me itema mbuala fondrege zebua andrö? Imane wangumaʼö, ”Awena aboto ba dödögu wa si ndruhu-ndruhu iʼomasiʼö ndraʼo Yehowa. Ha waʼomuso dödöda me no aboto ba dödöda mbuala Lowalangi khöda fondrege zebua andre!”

TEMA DEGU-DEGU MOROI KHÖ YEHOWA

13, 14. Hadia nifaluada na ifotu ita Yehowa, ba hadia mbörö?

¹³ Ifasugi khöda Sura Niʼamoniʼö, ”Somasi Yehowa sa ba iʼotuʼö, ba ba nono sebua dödönia ba ifatörö zafökhö.” (Gamaedola 3:12) Na tatema degu-degu ba famahaʼö moroi khö Yehowa, ifahaʼö ita ba wamalua satulö ba so khöda waʼohahau dödö. Tatu manö, ”fefu ngawalö wotu sa ba götö iadaʼe tenga faʼomuso dödö tawaʼö, ha faʼabu dödö.” (Heberaiʼo 12:11) Na simanö, hadia nifaluada na itegu ita Yehowa? Böi taʼosiwawöi degu-degunia, mazui mofönu ita börö me lö omasi ita wotunia andrö. Taʼomasiʼö Yehowa ba tafondro-ndrongo linia, ba tafalalini gera-erada.

¹⁴ Me götö Maleakhi, ato niha Yehuda si lö omasi mamondrongo li Yehowa. Lö labeʼe dödöra hadia omasi Yehowa zumange nibeʼera mazui löʼö. Andrö abölö-bölö wanegu Yehowa yaʼira. (Baso Maleakhi 1:12, 13.) Asese ifotu ira Yehowa ba lö lafondro-ndrongo. Andrö imane khöra Yehowa, ”ufataro khömi wangelifi ba uʼelifi wamahuwumi andrö, ba noa saʼae uʼelifi me lö edöna mibeʼe ba dödömi.” (Maleakhi 2:1, 2) Na lö ba dödöda degu-degu Yehowa mazui tamane lö moguna khöda, taya wahuwusada khö Yehowa.

15. Hadia wangera-ngera si tebai so khöda?

¹⁵ Gulidanö nifatörö Gafökha andre, ifarou niha ba wangalui tana khönia ba waʼasiliawa. Ato niha si lö omasi nitegu mazui lö omasi ira na labeʼe khöra wanuturu lala. Ato niha hulö nifaso ira ba wamondrongo degu-degu. Böi simanö ita. Imane Sura Niʼamoniʼö, ”Böi mifaomagö ami ba niha si sagötö tanö andre.” Moguna aboto ba dödöda hadia nitötöna Yehowa khöda ba tafalua hadia zomasi ia. (Roma 12:2) Iʼogunaʼö gangowuloania Yehowa ba wameʼe khöda degu-degu si tefaudu. Duma-dumania, ifangelama ita hadia zinangea ifalua ono alawe mazui ono matua na falukha ira, lala wangalui si fahuwu khöda, lala ba wangai angetula hezo möi manörö. Na omasi ita tatema degu-degu moroi khö Yehowa ba tafalalini gera-erada enaʼö omuso dödönia, no taforomaʼö wa taʼandrö saohagölö wanuturu lala nibeʼenia ba si ndruhu-ndruhu wa taʼomasiʼö ia.​—Yohane 14:31; Roma 6:17.

ANDRÖ WANOLO BA FOLUMÖʼÖ MOROI KHÖ YEHOWA

16, 17. (a) Hana wa moguna taʼalui wanuturu lala moroi khö Yehowa fatua lö tahalö gangetula? (b) Hadia zangoromaʼö wa iraono Gizaraʼeli lö faduhu dödöra khö Yehowa?

¹⁶ Iraono laʼodaligö zatuara ba wanolo yaʼira. Hewaʼae no egebua ira, laʼandrö wanolo moroi khö zatuara. Hewaʼae tola lahalö gangetula samösa, hizaʼi satua tola labeʼe mene-mene si sökhi ba ndraonora. No itehe khöda Yehowa ba wangai angetula samösa. Börö me faduhu dödöda khönia ba taʼomasiʼö ia, lö tabato wangandrö fanolo moroi khönia ba taʼalui wanuturu lala fatua lö tahalö gangetula. Na taʼodaligö Yehowa, ibeʼe khöda geheha ba wamalua satulö.​—Filifi 2:13.

¹⁷ Me götö Zamueli, kala ndraono Gizaraʼeli me fasuwö ira ba Ndrawa Wilisiti. Börö me lö laʼandrö wanuturu lala moroi khö Yehowa, lamane wangumaʼö, ”Datahalö khöda dawöla zura goroisa Yehowa ba Zilo, enaʼö möi ia awöda ba wangefaʼö yaʼita ba danga nemalida andrö.” Hadia lua-luania? ”No abölö sibai waʼateʼala, 30.000 zimate iraono Gizaraʼeli si lö kudo. Ba tawöla andrö khö Lowalangi larabu Ndrawa Wilisiti.” (I Zamueli 4:2-4, 10, 11) Lawalingagö itolo ira Yehowa na no laʼohe dawölania ba wasuwöta. Lö laʼandrö wanuturu lala moroi khö Yehowa, lö laʼalui zomasi ia. Lafalua zi sökhi ba wamaigira, lua-luania, kala ira ba tefakao.​—Baso Gamaedola 14:12.

18. Sanandrösa ba wangodaligö Yehowa, hadia niwaʼö Zura Niʼamoniʼö?

¹⁸ Imane Dawido sangomasiʼö ba sangodaligö Yehowa, ”Döna-döna khö Lowalangi, usuno nasa ia fangorifigu ba Lowalangigu. No ikaöndrö ia bakha tödögu andrö itörö tödögu ndraʼugö.” (Zinunö 42:6, 7) Hadia simane daʼö dödöu khö Yehowa? Hadia ahatö ndraʼugö khönia ba faduhu dödöu khönia? Moguna öfahaʼö ndraʼugö enaʼö tedou waʼafaduhu dödöu khönia. Imane Sura Niʼamoniʼö, ”Döna-döna khö Yehowa moroi siʼaikö ba dödöu, ba böi abeʼe dödöu ba waʼonekheu. Böi aefa dödöu khönia gofu hadia ia lala khöu, ba yaʼia zangadölöʼö töröwau.”​—Gamaedola 3:5, 6.

19. Hewisa wangoromaʼöda wa taʼomasiʼö Yehowa?

¹⁹ Börö me oföna iʼomasiʼö ita Yehowa, ifahaʼö ita hewisa wangomasiʼö yaʼia. Dataʼangeraigö hadia zi sökhi si no ifalua Yehowa khöda ba hewisa wangomasiʼönia ita. Dataforomaʼö waʼomasida khönia soroi ba dödö, nosoda maʼasambua, gera-erada, awö waʼabölöda.​—Mareko 12:30.