”Sambö Tödö Ba Ifati Fefu Hadia Ia Niwaʼö”

TÖRA 200 fakhe ba zi lalö, lö faduhu dödö niha hadia zi no irai labaso ba koran. Iadaʼa lö faduhu dödöda hadia zi no tabaso hegöi nifaigida ba Internet. Oya duria niʼilada ba Internet, na taʼogunaʼö fakake teknologi alio tasöndra hadia ia niʼaluida. Oya duria ba Internet so zi duhu, so gunania, hizaʼi, so göi zi tobali famaʼala. Moguna taʼangelamaisi hadia nibasoda. So zawena mangogunaʼö Internet, lawai si ndruhu-ndruhu fefu nibasora andrö ha börö me so ba Internet mazui niʼombakhaʼö nawöra tanö böʼö ba e-mail. Faduhu dödöra fefu duria nibasora hewaʼae daʼö lö tefaudu ba wangera-ngera niha. No ifangelama ita Sura Niʼamoniʼö, ”Sambö tödö, ba ifati fefu hadia ia niwaʼö; ba satua-tua, ba ifaigi nibekainia.”​—Gamaedola 14:15.

Hewisa enaʼö tobali ita niha ”satua-tua” ba wamaehusi turia si lö sökhi enaʼö böi teʼala? Siʼoföna sofu khöu samösa, ’Hadia turia andrö moroi ba situs resmi si tola tafaduhusi tödö? Mazui turia andrö moroi ba situs si lö muʼila hezo moroi ia? Hadia so situs web si tola tafaduhusi tödö sangombakha khöda wa turia daʼö lö atulö?’a (Faigi zi no musura ba gahe zura.) Moguna so khöda ”waʼaboto ba dödö.” (Zinunö 119:66) Na so duria si lö tefaudu ba wangera-ngerada, tola manö lö atulö duria daʼö. Na so duria sangobousi niha tanö böʼö nibasou, angeraigö haniha zomuso tödö na larongo niha duria daʼö, ba hadia mbörö wa omasi ifalua daʼö.

HADIA ÖFULI ÖTOHUGÖ BA NIHA BÖʼÖ E-MAIL SI NO ÖTEMA?

So niha latohugö wameʼe ba niha nösi e-mail si no latema hewaʼae lö nifaresora hadia atulö ma löʼö mazui lö laʼangeraigö hadia lua-luania na labeʼe e-mail andrö ba niha. Wa lafalua daʼa enaʼö adöni dödö niha khöra, ba omasi enaʼö yaʼira ziʼoföna wameʼe turia andrö. (II Zamueli 13:28-33) Tobali, niha satua-tua laʼila hadia lua-luania na lafalua daʼö. Duma-dumania, turia andrö iʼobousi döi zi samösa niha mazui zi sambua angowuloa.

So niha sameʼe e-mail, lö ifareso ua sakali hadia atulö duria daʼö mazui löʼö. Börö me oya ginötö niʼogunaʼö na lafalua daʼa. So ba dödönia wangumaʼö wa niha sotema e-mail andrö zamareso hadia si ndruhu duria andrö mazui löʼö. Tobali niha sotema e-mail göi lö itiboʼö ginötönia ba daʼö. (Efeso 5:15, 16) Na lö faduhu dödöu ba e-mail si no ötema böi tohugö wameʼe ba niha böʼö.

Angeraigö atö: ’Hadia utohugö wameʼe ba niha e-mail si no irai utema? Hadia uʼandrö waʼebolo dödönia na no ubeʼe e-mail si fasala mazui duria si lö atulö? Hadia so zamasugi ba dödögu enaʼö lö utohugö wameʼe e-mail si no utema?’ Törö tödöu wa so göi ndra awöu si so e-mail, tola göi lafaigi samösa Internet ba lö laʼandrö wanolo khöu ba wamaigi ngawalö zadöni dödöra ba Internet. Lö moguna öbeʼe khöra e-mail simane gambara si toʼölö manö si möi famaʼiki niha, video ba tanö böʼönia. Lö baga na mutohugö wameʼe ba niha rekaman-rekaman mazui si no tasura soʼamakhaita ba huhuo sebua.b (Faigi zi no musura ba gahe zura) Törö tödöu abölö baga zi samösa niha na iʼogunaʼö ginötönia ba wamahaʼö yaʼia samösa, ba wombaso Sura Niʼamoniʼö, mazui ifaʼanö ia ba wameʼe mbua wangera-ngerania ba gangowuloa moroi na ihorigö ginötönia ba wombaso e-mail si no tabeʼe khönia.

Hadia nifaluau na so duria zangobousi angowuloa Yehowa ba Internet? Böi faduhu dödöu ba duria andrö! Lö baga na ötohugö ba niha böʼö hadia zi no öbaso mazui öʼandrö mbua wangera-ngerara. Na so nifaigiu ba Internet si möi fangabu dödö, ohe ba wangandrö khö Yehowa ba andrö wanolo moroi khö ndra talifusöda saro ba wamati. (Yakobo 1:5, 6; Yuda 22, 23) Böi tokea ndraʼugö na so niha sangobousi yaʼita. No irai alua daʼa khö Yesu ba ifangelama ndra nifahaʼönia wa samuza inötö göna ira folohi moroi ba niha ba ”siwa mbalö laböbögö khömi si lö sökhi”. (Mataiʼo 5:11; 11:19; Yohane 10:19-21) Na taʼogunaʼö waʼatua-tua si no taʼokhögö, tola tafaehusi hadia si ndruhu niwaʼönia andrö mazui löʼö.​—Gamaedola 2:10-16.

FOSUMANGE NIHA BÖʼÖ

Moguna mangelama ita ba wameʼe duria ba niha böʼö sanandrösa zalua khö ndra talifusöda. Lö khöda faʼomasi na tadunö-dunö ba niha böʼö hadia zagalua khö ndra talifusöda hewaʼae atulö duria andrö. (Mataiʼo 7:12) Duma-dumania, tola ide-ide dödö zi samösa niha na tabeʼe duria si lö baga sanandrösa khönia. (II Tesalonika 3:11; I Timoteo 5:13) So duria nifatunö khöda si tebai larongo niha sato. Si bagania akha niha daö zanutunö ba niha böʼö. Iʼila ginötö si tefaudu hawaʼara ifatunö. Huhuo nifatunö ba zi tenga inötönia, fangabu dödö lua-luania.

Ba ginötö andre, alio tarongo duria gofu hezo manö, hadia atulö mazui löʼö. Na öbeʼe e-mail ba zi samösa niha, tola ba zi sabata manö itohugö wameʼe ba niha sato e-mail andrö. Böi taʼaliokö wamaʼema ba niha hadia duria nirongoda. Hewaʼae faʼomasi andrö ”fefu hadia ia, ba faduhu dödönia”, ba lö manahö-nahö dödö, böi alio tafaduhusi tödö duria nirongoda. (I Korindro 13:7) Lö faduhu dödöda na so duria sangobousi angowuloa Yehowa hegöi ira talifusö niʼomasiʼöda. Törö tödöu wa omuso dödö Gafökha na so niha sameʼe duria si lö baga, börö me yaʼia andrö ”ama zofaya.” (Yohane 8:44) Moguna atua-tua ita ba taʼangelamaisi duria nirongoda ero maʼökhö. Imane Sura Niʼamoniʼö, ”Sambö tödö, ba falukha waʼowöhö; ba satua-tua, ba laʼanaembu waʼaboto ba dödö.”​—Gamaedola 14:18.