TUHO SIʼOFÖNA | HANA WA MOGUNA TATÖRÖ ZINDRUHU?
Fangumaʼö Sindruhu—Hadia Lö Moguna Saʼae?
Mohalöwö Hitoshi ba wangerai kefe ba agen samolala halöwö ba Jepang. Me itutunö khö gafalonia hauga gefe niʼogunaʼöra, imane gafalonia enaʼö böi itörö zindruhu wangombakha ba perusahaan sohalöwö ira. Itutunö Hitoshi wa itegu ia tödönia side-ide. Lua-luania, edöna iʼefasi ia gafalonia ba halöwönia.
Hauga waŵa aefa daʼö, abu dödö Hitoshi börö me edöna laʼefasi ia ba halöwönia. Duma-dumania, fatua lö latema ia wohalöwö, so zinangea lasofu-sofu khönia. Ifatunö Hitoshi wa lö omasi ia halöwö si lö manörö sindruhu. Imane sanofu khönia, ”No faböʼö wangera-ngeramö andrö moroi ba niha böʼö!” Lafarou ia ösi nomonia hegöi si fahuwu khönia enaʼö lö tebulö itörö zindruhu, hizaʼi so khönia waʼaombö-aombö dödö. Duma-dumania imane, ”Manofu-nofu dödögu hadia sökhi na uʼombakhaʼö wamatigu andre ma löʼö.”
Salua khö Hitoshi andre zangoromaʼö wa lö fefu niha latörö zindruhu. Ato zangumaʼö wa no sinangea lö tatörö zindruhu, mendrua manö na talau mogale. Samösa ndra alawe sohalöwö ba Afrika Selatan imane, ”No so ndraʼo ba gotalua niha si lö manörö sindruhu, ba itaria oya zondrönisi dödöda enaʼö böi tatörö zindruhu.”
Sambua duma-duma wa lö manörö sindruhu sasese lafalua niha ba ginötö andre yaʼia daʼö, falimosa. Hauga fakhe silalö, samösa psikolog ba Universitas Massachusetts Amherst sotöi Robert S. Feldman itutunö wa so 60 persen niha si töra felewalu fakhe, si löʼö-löʼönia sakali ba zi fulu menit lalau falimo na fahuhuo ira. Imane Feldman, ”Lö utötöna wa simane daʼö lua-luania. Falimosa andre no daʼö zi toʼölö ba waʼauri niha sero maʼökhö.” Andrö, no aröu faböʼö lagu niha ba ginötö daʼa, lö omasi ira telimo, hizaʼi lafalua zi töra moroi ba walimosa.
Hadia mbörö wa asese falimo niha, managö, ba lafalua gamuata si lö tefaudu tanö böʼö ba ginötö andre? Hadia lua-luania ba niha fefu na lö latörö zindruhu? Sabölö moguna, hewisa enaʼö tola taʼaröuʼö ita ba gamuata falömanörö sindruhu?