Moguna Khöda Wondrara Dödö

Hadia itörö tödöu me alabuʼö me iraono ndraʼugö? Te mesokho dangau mazui azaza mbalö duhiu. Hadia itörö tödöu hewisa me irara dödöu mamau? Tatu manö, idalu-daluni zokhou. Meʼe ndraʼugö, hizaʼi fehedenia si sökhi ba fanalaguinia yaʼugö zameʼe khöu faʼahono dödö. Ba ahono sibai dödöu ba ginötö daʼö. Iʼotarai daʼö lö saʼae tebulö ösöndra wondrara dödö.

Hizaʼi, itugu alawa ndröfida, itugu monönö gabula dödöda ba abua wanöndra fondrara dödö. Abula dödö niha si no alawa döfi, tebai teʼasiwai ia ba dalu-dalu mazui fanalagui zi samösa ina. Angeraigö duma-dumania.

• Hadia no irai so waʼataʼumö me laʼefasi ndraʼugö ba halöwö? Imane Julian, me laʼefasi ia ba halöwönia, tokea ia ba afatö dödönia. Imane tödönia, ’Hewisa wobalazoigu soroi yomogu? No ara mohalöwödo ba daʼö, ba hana wa lö saʼae ba dödöra ndraʼo?’

• Tola manö abu dödöu börö me lö faʼohahau dödö ba wongambatöu. Itutunö Raquel, ”Lö udöna-döna me iröi ndraʼo foʼomogu me 18 waŵa silalö, abu dödögu. Afatö sibai dödögu. Mofökhö ndraʼo ba afökhö dödögu. So khögu waʼataʼu.”

• Tola manö abu dödöu ba wökhöu si lö manö iʼila döhö. Tola manö göi alua khöu simane nirasoi wurugö sotöi Yobi, iʼeʼesi waʼaurinia, ba iwaʼö wa lö omasi ia auri. (Yobi 7:16) Tola manö fagölö dödöu simane Luis, ira matua si 80 fakhe sangumaʼö, ”Itaria hulö zombalo-baloi faʼamate ndraʼo.”

• Mazui, börö waʼamate niha niʼomasiʼöu, andrö wa moguna sibai khöu wondrara dödö. Itutunö Robert, ”Me mate nonogu matua ba waʼatoru göfa si hombo, hulö ambö faduhu dödögu. Ba gafuriata, afökhö sibai dödögu, iwaö Sura Niʼamoniʼö hulö nifahö faoma wöda rasonia.”​—Luka 2:35.

Robert, Luis, Raquel, ba Julian, lasöndra wondrara dödö hewaʼae na göna ira wangabu dödö. Aboto ba dödöra wa so zohenaigö fondrara dödö, yaʼia daʼö Lowalangi si Lö Ambö Faʼabölö. Hewisa wohenaigönia daʼö? Hadia ihenaigö göi wondrara dödö si tefaudu ba zoguna khöu?