Lala Nifalua Lowalangi ba Wameʼe Fondrara Dödö

Itutunö Faulo wa Yehowaa andrö ”Lowalangi wondrara dödö, fefu, sondrara tödöma, ba waʼafökhö andrö fefu, khöma”. (II Korindro 1:3, 4) Andrö wa ibeʼe khöda waʼafaduhu dödö Zura Niʼamoniʼö wa gofu hadia ia gabula dödö salua khöda, hasambalö itolo ba irara dödöda Lowalangi börö me Amada si so ba zorugo ia.

Tatu manö, so zinangea tafalua na omasi ita tatema wondrara dödö moroi khö Lowalangi. Tola itolo ita doto na no tohöna fazazi ita falukha khönia. Andrö wa ifarou ita Sura Niʼamoniʼö, ”Miʼondrasi Lowalangi, ba iʼondrasi ami!”​—Yakobo 4:8.

Hana faduhu dödöda wa hasambalö ahatö khöda Lowalangi? Si oföna, börö me asese iwaʼö wa hasambalö itolo ita. (Faigi kotak.) Si dua, börö me taʼila hewisa wameʼe Lowalangi fondrara dödö ba niha gulidanö me götö föna hegöi ba ginötöda andre.

Ato niha sangalui fanolo moroi khö Lowalangi, simanö göi Razo Dawido me göna ia wangabu dödö. Mangandrö ia khö Yehowa, ”Fondro-ndrongo li wangandrögu andrö, na muʼaodo khöu.” Hadia itema wangandrönia Lowalangi? Itema. Imane Dawido, ”No teʼorifi ndraʼodo; andrö owua-wua dödögu.”​—Zinunö 28:2, 7.

IRARA DÖDÖ NIHA SI GÖNA WANGABU DÖDÖ YESU

Omasi Lowalangi na irara dödö niha si göna wangabu dödö Yesu. Andrö wa ifatenge Yesu ”ba wodalu-daluni si no arasa tödö” hegöi ”ba wondrara tödö zabu tödö fefu”. (Yesaya 61:1, 2) Tefaudu ba zi no mufaʼeleʼö andrö, iʼameʼegö tödö Yesu niha ”serege tödö, awö zonoro”.​—Mataiʼo 11:28-30.

Lala wameʼe Yesu wondrara dödö ba niha yaʼia daʼö ibeʼe mene-mene si fao faʼatua-tua, ihaogö wangumaʼö, ba ifadöhö zofökhö. Samuza inötö, imane zi göna bou auri khö Yesu, ”Na edöna ndraʼugö, ba öʼila öfadöhö wökhögu.” Börö me ahakhö dödönia, imane Yesu, ”Edöna ndraʼo, yadöhö!” (Mareko 1:40, 41) Ba döhö niha andrö.

Iadaʼa, lö möi Nono Lowalangi andrö tou ba gulidanö ba wameʼe fondrara dödö khöda zamösana. Hizaʼi, Amania, Yehowa, no ”Lowalangi wondrara dödö, fefu”, si lö mamalö-malö ba wameʼe fanolo si tefaudu ba zoguna khöda. (II Korindro 1:3) Datafaigi öfa ngawalö lala si föföna niʼogunaʼö Lowalangi ba wameʼe khöda fondrara tödö.

• Sura Niʼamoniʼö. ”Hadia ia sa nisura föna, ba ba wamahaö yaʼita tesura ia, enaʼö so khöda wanötöna andrö, moroi ba waʼebolo dödö andrö ba moroi ba wondrara dödö andrö, nirongoda ba zura.”​—Roma 15:4.

• Eheha Lowalangi. Lö ara me no mate Yesu, so waʼahono dödö ba mbanua niha Keriso. Hadia mbörö? Börö me ”latörö lala Zoʼaya, laʼataʼufi ia, ba fahöna khöra wondrara dödö khö geheha niʼamoniʼö”. (Halöwö Zinenge 9:31) Eheha niʼamoniʼö no faʼabölö moroi khö Lowalangi. Iʼogunaʼö daʼö Lowalangi ba wameʼe fondrara dödö, gofu haniha ira ba gofu hadia ia zalua khöra.

• Fangandrö. Iʼamenesi ita Sura Niʼamoniʼö, ”Böi mibusi tödö hadia ia . . . mibokai khö Lowalangi . . . Ba irorogö dödömi, awö gera-erami faʼohahau dödö andrö, khö Lowalangi, sabölö moroi ba gera-era niha fefu.”​—Filifi 4:6, 7.

• Talifusöda Niha Keriso göi zameʼe khöda fondrara tödö ba ginötö göna ita abula dödö. Iʼamaedolagö Faulo ndra talifusöda andrö ’tobali fondrara dödöda’ ba ginötö göna ita ”waʼafökhö andrö fefu, ba ba wamakao andrö”.​—Kolose 4:11; I Tesalonika 3:7.

Tola manö manofu dödöda hewisa wa tola möi fanolo fefu daʼö. Moguna tatörö tödöda niha si no irai göna famakao. Simane yaʼira, tola faduhu dödöu wa hasambalö ifalua zi no ifabuʼu Lowalangi, ”Simane na irara dödö nononia ina wondraragu tödömi.”​—Yesaya 66:13.