Fondrara Dödö ba Niha Nihoröni (Faosatö si 4 moroi ba zi 4 Faosatö)

1-2. (a) Hadia duma-duma zangoromaʼö wa iʼotarai ba waʼatumbu moguna ba niha wondrara dödö ba tola göi larara dödö niha böʼö? (b) Hadia zokho nitaögö ndraono?

IʼOTARAI me tumbu, fefu niha moguna khöra wondrara dödö ba so göi khöra waʼabölö ba wameʼe fondrara dödö ba niha böʼö. Duma-dumania, ba ginötö alabu zi samösa iraono ba mesokho mbalöduhinia, tola manö meʼe ba fagohi ia khö Mamania mazui Bapania. Tebai lafadöhö zokho andrö ira satuania, hizaʼi tola labeʼe khönia wondrara dödö. Te lasofu hadia mbörö wa mesokho ia, laʼosi dawa hörönia, labeʼe wehede si möi fondrara dödö, laforomaʼö waʼomasi ba ladalu-daluni zokhonia. Lö ara aefa daʼö, tebato wege-egenia ba ifuli ilau fawude. Ba ginötönia, döhö manö dania zokho ba mbalöduhinia.

² Hizaʼi, itaria lataögö iraono zokho sabölö-bölö. So ösa ndraono si göna pelecehan seksual. Tola manö alua khöra daʼö ba zi sakali mazui asese alua khöra daʼö ba zi hauga fakhe. Gofu hawaʼoya alua khöra daʼö, tola iʼasogö zokho sabölö-bölö bakha ba dödöra. So ösa zamalua pelecehan seksual niraʼu ba lahuku, so göi zaefa moroi ba hukuma. Hewaʼae na laʼanemaiʼö lahuku niha samalua pelecehan, tefakao sibai dödö ndraono si göna pelecehan irugi ba waʼebuania.

3. Simane nitutunö ba 2 Korindro 1:3, 4, hadia zomasi Yehowa enaʼö larasoi ira mbiri-birinia ba hadia wanofu-nofu nitutunöda?

³ Na so samösa dalifusöda niha Keriso si no irai göna pelecehan me iraono ba irugi ba waʼebuania irasoi nasa waʼafökhö dödö, hadia zi tola manolo yaʼia? (Baso 2 Korindro 1:3, 4.) Omasi Yehowa na larasoi waʼomasi ba terara dödö mbiri-birinia. Datatutunö tölu wanofu andre: (1) Hana wa moguna larara dödö niha sanaögö pelecehan me iraono? (2) Haniha zi tola mondrara tödöra? (3) Hewisa ita ba wondrara tödöra?

HANA WA MOGUNA KHÖRA WONDRARA DÖDÖ?

4-5. (a) Hana wa moguna aboto ba dödöda wa faböʼö sibai ndraono ba niha si no ebua-bua? (b) Na alua khö ndraono pelecehan, hadia lua-luania ba waʼafaduhu dödönia ba niha böʼö?

⁴ So ösa niha sebua-bua si no irai göna pelecehan seksual me iraono, tola manö moguna khöra nasa wondrara dödö hewaʼae no alua daʼö ba zi hauga fakhe silalö. Hadia mbörö? Enaʼö aboto ba dödöda, moguna taʼila wa faböʼö sibai ndraono ba niha si no ebua-bua. Si toʼölönia, na alua ba ndraono zi lö sökhi faböʼö lua-luania na alua zi lö sökhi ba niha si no ebua-bua. Nehegö duma-duma daʼa.

⁵ Moguna fahuwu ndraono ba lafaduhusi tödö niha sangebuaʼö hegöi sondrorogö yaʼira. Na so gamakhaita simane daʼö, tola laʼokhögö waʼahono dödö. Ba lafahaʼö göi ira ba wamaduhusi tödö niha sangomasiʼö yaʼira. (Zin. 22:10) Hizaʼi sasesenia, alua pelecehan moroi yomo ba nomo, ba tenga niha böʼö zamalua daʼö hizaʼi ösi nomo sabölö ahatö khönia mazui si fahuwu ba nösi nomora. Na niha nifaduhusinia tödö zamalua pelecehan khönia, tola manö abua saʼae khönia ba wamaduhusi tödö niha böʼö irugi ba zi hauga fakhe faʼara.

6. Hana wa no amuata si lö sökhi pelecehan seksual ba ndraono ba lö sökhi lua-luania?

⁶ Alio teʼala ndraono moroi ba niha si no ebua-bua, daʼö mbörö wa lö sökhi pelecehan seksual ba möi famakiko. Tebai mangowalu mazui lafalua waʼorudu iraono börö me lö soʼahonoa nasa mbotora, lala wangera-ngerara, hegöi nirasoira. Tobali ba ginötö lafaso ira ba wamalua faʼorudu, lua-luania möi famakikora. Pelecehan andrö tola iʼasogö khöra wangera-ngera si fasala sanandrösa ba waʼorudu. Tola göi iʼasogö ba dödöra wa tenga niha sinangea ira ba abua khöra ba wamaduhusi tödö niha böʼö.

7. (a) Hana wa aoha ba zi samösa niha ba wolimo iraono hegöi ba wamalua khöra pelecehan ba hewisa wamaluania daʼö? (b) Hadia lua-lua moroi ba walimosara?

⁷ Ambö nasa waʼatua-tua ba ndraono ba wofatimbaisi hezo si sökhi, ba wangai angetula, mazui mangelama na so deʼala. (1 Kor. 13:11) Daʼö mbörö wa aoha ba zi samösa niha ba wolimo iraono hegöi ba wamalua pelecehan. Niha samalua pelecehan, ifatunö ba ndraono walimosa si tola mangaʼasogö deʼala. Duma-dumania, lawaʼö wa alua pelecehan börö zala nono andrö. Tola manö göi lawaʼö wa moguna böi ifatunö misa ba niha. Na ifatunö, tola manö lö hadöi niha samaduhusi tödö mazui soʼameʼegö tödö yaʼia. Mazui lawaʼö wa no si toʼölö na orudu niha si no ebua-bua ba ndraono, ba tola mufalua daʼö ba wangoromaʼö faʼomasira khö nawöra. Falimosa simane daʼö, tola möi famakiko lala wangera-ngera ndraono ba zi hauga fakhe. Me no ebua-bua ia dania, tola manö lö aefa ba dödönia wa niha si raʼiö ia ba tenga sinangea laʼomasiʼö mazui nirara tödö ia.

8. Hana wa faduhu dödöda khö Yehowa wa ibeʼe wondrara dödö ba niha nifakao?

⁸ Iadaʼa aboto ba dödöda hana wa tola tefakao dödö niha si göna pelecehan ba zi hauga fakhe. No amuata fondrege zi lö sökhi daʼa! No oya alua misa pelecehan ba ndraono, daʼa zangoromaʼö wa no auri ita ba ngaluo safuria, ato niha ”si lö mangomasiʼö awöra” ba ”niha si lö sökhi, itugu monönö waʼalösökhi”. (2 Tim. 3:1-5, 13) No sambua fangabu dödö na so niha samalua somasi Zatana, börö me sindruhu-ndruhu lö sökhi dandrawa nifaluania. Hizaʼi, abölö nasa Yehowa moroi khö Zatana mazui moroi ba niha samalua somasi Zatana andrö. Aboto ba dödö Yehowa dandrawa Zatana. Aefa daʼö, faduhu dödöda wa iʼila Yehowa hawaʼebua wamakao nitaögöda ba ibeʼe khöda wondrara dödö soguna khöda. Taʼandrö sibai saohagölö börö me tafosumange ”Lowalangi wondrara dödö. Yaʼia zondrara tödöda ba ngawalö wamakao nitaögöda irege tola tabeʼe göi wondrara dödö si no tasöndra moroi khö Lowalangi ba niha si göna famakao.” (2 Kor. 1:3, 4) Haniha niʼogunaʼö Yehowa ba wondrara tödö niha si göna pelecehan?

HANIHA ZI TOLA MAMEʼE FONDRARA DÖDÖ?

9. Moloʼö nisura Razo Dawido ba Zinunö 27:10, hadia nifalua Yehowa ba niha si göna famakao moroi ba nösi nomonia?

⁹ So ösa zatua si lö molumöʼö iraonora si göna pelecehan hewaʼae laʼila wa no alua daʼö ba ndraonora. So ösa göi ndraono si göna pelecehan, ba niha sahatö khöra zamalua daʼö. Iraono simane daʼö zinangea mubeʼe fondrara dödö. Aboto ba dödö Dawido, wa lö tebulö Yehowa ba wondrara tödöda. (Baso Zinunö 27:10.) Mamati Dawido wa Yehowa zi tobali Ama ba niha si göna famakao moroi ba nösi nomonia. Hewisa wamalua Yehowa daʼö? Iʼogunaʼö nono mbanuania si lö faröi. No amaedola nösi nomoda ndra talifusöda ba mbanua niha Keriso. Yesu samösa zangumaʼö wa niha samosumange Yehowa tobali talifusönia ira matua ba talifusönia ira alawe hegöi inania.​—Mat. 12:48-50.

10. Hewisa Waulo ba wanutunö hadia nifaluania me tobali ia satua sokubaloi?

¹⁰ Ba ngenoli daʼa hegöi aefa daʼa, taʼila dania duma-duma sangoromaʼö wa no amaedola ösi nomoda mbanua niha Keriso. Satua sokubaloi sowölö-ölö ba si lö faröi zinenge sotöi Faulo. No ibeʼe duma-duma si sökhi. Lowalangi zamarou yaʼia ba wanutunö ba niha böʼö enaʼö laʼoʼö ia simane foloʼönia Keriso. (1 Kor. 11:1) Nehegö hewisa Waulo ba wanutunö hadia nifaluania me tobali ia satua sokubaloi, ”Mahaogö-haogö khömi, simane ina na ifaenu nononia sawuyu ba ihaogö wondrorogö.” (1 Tes. 2:7) Iadaʼa, tola laʼogunaʼö wehede si sökhi ira satua sokubaloi ba ginötö laʼogunaʼö Zura Niʼamoniʼö ba wondrara dödö niha sinangea mutolo.

11. Hadia zangoromaʼö wa tenga ha satua sokubaloi zi tola mameʼe fondrara dödö ba niha si göna pelecehan?

¹¹ Hadia ha satua sokubaloi zi tola mameʼe fondrara dödö ba niha si göna pelecehan? Löʼö. Fefu ita no tebeʼe khöda noro dödö enaʼö ’lö taböhöli wondrara dödö nawöda’. (1 Tes. 4:18) Ira talifusöda ira alawe sinangea mubeʼe fondrara dödö, tola teʼaroʼö ira börö dalifusöda ira alawe saro ba wamati. Daʼö mbörö wa tefaudu sibai na iʼamaedolagö yaʼia samösa Yehowa simane ina sondrara tödö nononia. (Yes. 66:13) Ba Zura Niʼamoniʼö so duma-duma ndra alawe sameʼe fondrara dödö ba niha sabu tödö. (Yob. 42:11) Iadaʼa, tatu omuso dödö Yehowa ba ginötö iʼila ndra alawe niha Keriso sameʼe fondrara dödö khö dalifusöra ira alawe samorege ba wolawa fangabu dödö nitaögöra! Itaria, tola manö iʼandrö satua sokubaloi khö dalifusöda ira alawe saro ba wamati ba wameʼe fondrara dödö khö zi samösa dalifusö ira alawe si no tefakao.b

HEWISA WAMEʼEDA FONDRARA DÖDÖ?

12. Hadia zinangea taʼangenanöi?

¹² Ba ginötö tatolo ndra talifusöda, moguna taʼangenanöi enaʼö böi tasofu zi lö omasi latutunö. (1 Tes. 4:11) Tobali, hewisa na so samösa niha sinangea mubeʼe fondrara dödö ba omasi ia na labeʼe khönia wanolo? Hadia zi tola tafalua khönia? Datatutunö lima ngawalö zi tola mufalua ba wameʼe fondrara dödö moloʼö Sura Niʼamoniʼö.

13. Simane nitutunö ba 1 Razo 19:5-8, hadia nifalua malaʼika Yehowa khö Gelia, ba hewisa woloʼöda malaʼika andrö?

¹³ Falua zi tola mameʼe fanolo. Ba ginötö moloi zamaʼeleʼö sotöi Elia moroi ba niha somasi mamunu yaʼia, ide-ide sibai dödönia irege omasi ia mate. Ifatenge Yehowa samösa malaʼika sabölö ba wamalukhaisi ndra matua si no ide-ide tödö andrö. So nifalua malaʼika andrö zi tobali fanolo khö Gelia. Ibeʼe gö khö Gelia ba si fao fehede si sökhi iwaʼö khönia enaʼö ilau manga. (Baso 1 Razo 19:5-8.) Tobali famahaʼö sabölö moguna khöda waö-waö andre: Itaria ba ginötö muforomaʼö waʼasökhi dödö hewaʼae no ide-ide ia, tola möi fanolo khö zi samösa niha. Duma-dumania, tola tarino gönia, tabeʼe khönia mbuala hewaʼae no ide-ide, mazui tasura kartu ucapan ösinia fehede si möi fangabölöʼö yaʼia. Na tafalua daʼö, no tafaduhuʼö ba dödö dalifusöda nifakao andrö wa taʼomasiʼö ira. Na lö omasi ita ba wanutunö sanandrösa ba zalua khöra mazui faʼafökhö nirasoira, tola taforomaʼö wa lö tebulö taʼameʼegö tödö ira ba ginötö tafalua hadia ia ba wanolo yaʼira.

14. Hadia nasa wamahaʼö si tola tahalö ba zalua khö Gelia?

¹⁴ Haogö ba niha si no tefakao enaʼö irasoi wa telumöʼö ia ba irasoi waʼahono dödö. So danö böʼö nasa zi tola tahalö famahaʼö ba zalua khö Gelia. Ibeʼe Yehowa waʼabölö khö Gelia enaʼö tola mofanö ia ba Hili Horebi hewaʼae fandröndröu döröwa nitörönia. Tola manö irasoi Gelia wa telumöʼö ia ba nahia andrö börö me no fandröndröu sibai ia moroi ba niha somasi mamunu yaʼia, daʼa nahia me ifazökhi Yehowa mbuʼusa li ba nono mbanuania me föna. Hadia wamahaʼönia? Na omasi tarara dödö niha si göna pelecehan, si oföna moguna irasoi wa no telumöʼö ia. Duma-dumania, moguna latörö tödöra ira satua sokubaloi wa tola manö awena irasoi dalifusöda si no tefakao waʼahono dödö ba telumöʼö ia, na lafatunöisi zalua khönia andrö ba nomonia ba fao ira wamadu tesi, moroi na lafatunöisi daʼö ba Balai Mbanua Lowalangi. Hizaʼi, te so göi zomasi ba wanutunö daʼö ba Balai Mbanua Lowalangi.

15-16. Hana wa moguna tobali ita samondrongo si sökhi?

¹⁵ Yatobali ndraʼugö samondrongo si sökhi. Ibeʼe mene-mene Sura Niʼamoniʼö, ”Dozi niha yamuʼalioʼö wamondrongo, böi yamuhulö wehede.” (Yak. 1:19) Hadia samondrongo si sökhi ita? Tola manö so ba dödöda wa enaʼö tobali samondrongo si sökhi, obönö na ha tafaigi-faigi ia ba lö hede-hededa. Hizaʼi, lö tobönö daʼö. Duma-dumania, ba ginötö itutunö Gelia fefu waʼabu dödönia khö Yehowa, ihaogö ifondrondrongo daʼö Yehowa. Aboto ba dödö Yehowa wa so khö Gelia waʼataʼu, lö awönia, ba so ba wangera-ngerania wa zaya-zaya gölö fefu nifaluania. Si fao faʼomasi itolo ia Yehowa ba wanaögö fefu hadia nirasoinia. Iforomaʼö Yehowa wa sindruhu-ndruhu ihaogö ifondrondrongo hadia niwaʼö Gelia.​—1 Raz. 19:9-11, 15-18.

¹⁶ Ba ginötö tafondrondrongo zi samösa niha, hewisa wangoromaʼöda wa tarasoi hadia nirasoinia ba tahakhösi tödö ia? Itaria, hewaʼae ha maʼifu wehede nibeʼeda asala si fao faʼomasi ba foʼameʼegö tödö, no taforomaʼö hadia nirasoida. Tola ömane, ”Tatu abua sibai khöu daʼa! Lö faʼahakhö dödö ba niha daʼö!” Tola öbeʼe khönia sambua mazui dombua wanofu enaʼö aboto ba dödöu hadia niwaʼö dalifusö si tefakao andrö. Ngawua wehede si sökhi nibeʼemö khö dalifusöda andrö, tola möi fangaroʼö dödönia wa sindruhu-ndruhu öfondrondrongo ia ba aboto ba dödöu zalua khönia.​—1 Kor. 13:4, 7.

17. Hana wa moguna khöda waʼebolo dödö ba ’böi tahulö wehede’?

¹⁷ Moguna göi mangelama ita ’faböi tahulö wehede’. Ba ginötö fahuhuo niha daʼö, böi tataba dalu huhuonia ha börö me omasi ita ba woʼamenesi yaʼia mazui ba wangatulöʼö lala wangera-ngerania. Moguna göi khöda waʼebolo dödö! Ba ginötö itutunö Elia nösi dödönia khö Yehowa, fehedenia zangoromaʼö wa tefakao sibai ia ba abu dödönia. Me no iʼaroʼö Yehowa wamati Elia, ifuli itutunö nasa nösi dödönia Elia ba iʼogunaʼö wehede si fagölö. (1 Raz. 19:9, 10, 13, 14) Hadia wamahaʼönia? Itaria, niha si no tefakao irasoi wa moguna tenga ha sakali ba wanutunö nösi dödönia. Simane Yehowa, moguna göi khöda waʼebolo dödö ba ginötö tafondrondrongo. Moguna khöda wangodödögö ba wangalui lala ba wangasiwai. Hizaʼi, moguna göi khöda ba wangoromaʼö wa tarasoi hadia nirasoinia ba so khöda waʼahakhö dödö.​—1 Fet. 3:8.

18. Hana wa tola terara dödö niha sabu tödö ba ginötö fao ita khönia ba wangandrö?

¹⁸ Angandrö soroi ba dödö na fao ndraʼugö ba niha sabu tödö. Niha si no tefakao, tola manö abua khönia ba wangandrö. Te so ba dödönia wa tenga sinangea fahuhuo ia khö Yehowa. Sambua lala ba wondrara tödönia yaʼia daʼö fao khönia ba wangandrö. Ba ginötö mangandrö tola tatötöi döinia. Tola tawaʼö khö Yehowa wa taʼomasiʼö niha side-ide tödö andrö ba laʼomasiʼö göi ia fefu niha si so ba mbanua niha Keriso. Tola taʼandrö khö Yehowa enaʼö irara ba ifahono dödö nono mbiri-birinia sebua böli andrö. Fangandrö simane daʼö, tola möi fondrara dödö niha andrö.​—Yak. 5:16.

19. Hadia zi tobali fanolo khöda ba wamaʼanö yaʼita fatua lö tarara dödö zi samösa niha?

¹⁹ Ogunaʼö wehede si möi famadöhö hegöi fondrara dödö. Angeragö fatua lö fahuhuoʼö. Fehede si lö laʼangeragö tola möi fangafökhö dödö. Hizaʼi, fehede si sökhi möi famadöhö. (Gamd. 12:18) Tobali angandrö khö Yehowa enaʼö itolo ndraʼugö ba wangogunaʼö fehede si sökhi, si möi fondrara dödö, hegöi si möi faʼahono dödö. Törö tödöu wa lala sabölö sökhi ba wondrara tödö zi samösa niha yaʼia daʼö ba wangogunaʼö Sura Niʼamoniʼö si so fehede Yehowa.​—Heb. 4:12.

20. Hadia nirasoi ndra talifusöda si no irai göna pelecahan, ba hadia zinangea tafasugi ba dödöra?

²⁰ So ösa ndra talifusöda si no irai göna pelecehan, lawaʼö tödöra wa yaʼira andrö niha si raʼiö, tenga sinangea, lö laʼomasiʼö mazui tenga sinangea na laʼomasiʼö ira. Sindruhu-ndruhu wa lö atulö daʼö! Tobali, ogunaʼö Zura Niʼamoniʼö ba wameʼe khöra famasugi ba dödö wa ebua sibai mbölira föna Yehowa. (Faigi kotak ”Fondrara Dödö moroi ba Zura Niʼamoniʼö”.) Törö tödöu hewisa zi samösa malaʼika me iʼabölöʼö zamaʼeleʼö sotöi Danieli si fao faʼasökhi dödö, ba ginötö awuwu ia ba tefakao. Omasi Yehowa enaʼö aboto ba dödö Danieli wa iʼomasiʼö sibai ia Yehowa. (Dan. 10:2, 11, 19) Simane Danieli, iʼomasiʼö göi Yehowa ndra talifusöda si tefakao andrö!

21. Hadia zalua ba niha samalua si lö sökhi ba si lö omasi mamalalini era-erania, hizaʼi hadia gangetula nihalöda?

²¹ Ba ginötö tarara dödö niha böʼö, tafasugi ba dödöra wa iʼomasiʼö ira Yehowa. Baero daʼö, böi olifu ita wa Lowalangi satulö Yehowa. Iʼila fefu na alua pelecehan, hewaʼae lö laʼila daʼö niha. Hasambalö ihuku fefu niha samalua pelecehan si lö omasi mamalalini era-era. (4 Moz. 14:18) Börö daʼö, dataʼodödögö ba wangoromaʼö faʼomasi khö ndra talifusöda si göna pelecehan. Ba zi so fönada, hasambalö ifadöhö Yehowa, fefu niha si göna faʼalösökhi börö Zatana hegöi ulidanönia. Möi fondrara dödöda wanötöna andrö! Ba zi lö ara tö, lö saʼae tatörö tödöda fefu waʼafökhö mazui lö ifuli so ia ba dödöda.​—Yes. 65:17.