Ibeʼe Wondrara Dödö Yehowa ba Ngawalö Wanandraigö Nitaögöda

1, 2. Hewisa wameʼe Yehowa wondrara dödö ba wanandraigö nitaögöda, ba hadia zi no ifabuʼu si so ba Daromalinia?

SAMÖSA dalifusöda ira matua si bohou ebua si lö sangowalu, iʼangeraigö ngawua wehede si so ba I Korindro 7:28 sangumaʼö wa niha songambatö ”falukha sa wamakao”. Fahuhuo dalifusöda andre khö zi samösa satua sokubaloi si no ara mongambatö. Ilau manofu imane, ”Hadia ’wanandraigö’ daʼö, ba hewisa lala wanaögö yaʼia na ulau mongambatö?” Fatua lö ibeʼe wanema li, ifarou ia satua sokubaloi andrö enaʼö iʼangeraigö hadia zi no isura sinenge sotöi Faulo, sangumaʼö wa Yehowa andrö no ”Lowalangi wondrara dödö, fefu, sondrara tödöma, ba waʼafökhö andrö fefu” mazui ba wamakao andrö.​—II Korindro 1:3, 4.

² Aboto ba dödöda wa iʼomasiʼö ita Amada Yehowa ba ibeʼe khöda wondrara dödö ba ginötö tataögö gabula dödö. Te itörö tödömö me ibeʼe khöu wamarou dödö Yehowa hegöi fanuturu lala moroi ba Daromalinia. Tola faduhu dödöda wa omasi ia na sökhi waʼaurida, simane nifaluania ba niha samosumange yaʼia ba götö föna.​—Baso Yeremia 29:11, 12.

3. Hadia wanofu-nofu nitutunö ba wamahaʼö daʼa?

³ Si toʼölönia, aoha khöda wanaögö abula dödö hegöi famakao na taʼila hadia mbörö wa alua daʼö. Börö daʼö, hadia mbörö wa so gabula dödö ba wongambatö hegöi ba nösi nomoda? Haniha duma-duma ba götö Zura Niʼamoniʼö hegöi ba götöda iadaʼa sanolo yaʼita ba wanöndra fondrara dödö? Datatutunö wanema li moroi ba wanofu-nofu daʼa enaʼö taʼila hewisa wanaögöda abula dödö andrö.

ABULA DÖDÖ BA WONGAMBATÖ

4, 5. Hadia manö gabula dödö nitaögö zi darua niha si no mongambatö?

⁴ Me no aefa iwöwöi ndra alawe siföföna Yehowa, iʼohe ia khö ndra matua andrö, ba tobali foʼomonia. Aefa daʼö imane Yehowa, ”Andrö iʼerogö ndra amania inania niha, ba molemba ia ba ngambatönia, ba tobali ha sambua boto ira.” (I Moze 2:24) Sindruhusa wa fefu ita lö moʼahonoa. (Roma 3:23) Börö daʼö, ba ginötö mangowalu zi darua niha, ira matua ba ira alawe, hasambalö lataögö gabula dödö. Duma-dumania, fatua lö sangowalu zi samösa ira alawe, iʼoʼö fefu li zatuania. Hizaʼi, imane Taromali Lowalangi wa na no mangowalu, foʼomo ira matua zi tobali högö khö woʼomonia ira alawe. (I Korindro 11:3) Ba wamobörö, te abua khö ndra matua ba wameʼe fanuturu lala khö woʼomonia. Ba foʼomo ira alawe te abua göi khönia ba woloʼö fanuturu lala moroi khö woʼomonia, tenga simane foloʼönia khö zatuania. Ba ginötö no mangowalu zi darua niha, tola manö faböʼö lala wangera-ngerara moroi khö nina mazui khö nama matuara, ba no sambua fanandraigö daʼö.

⁵ Angeraigö göi hadia nirasoi woʼomo ira matua hegöi ira alawe me laʼila wa lö aratö so khöra ndraono. Hewaʼae omuso sibai dödöra, hizaʼi si toʼölönia so khöra waʼaombö-aombö dödö. Te manofu-nofu dödöra, hadia lö hadia ia ba dabina andrö, ba hadia lö fökhö nono sawuyu andrö dania na no tumbu. Laʼila göi wa itugu tedou zoguna khöra. Na no tumbu nonora, oya zinangea labulöʼö. Oya iʼogunaʼö ginötönia satua ira alawe ba wondrorogö onora sawena tumbu, irege tebai laʼosambuaʼö dödöra khö nawöra simane nifaluara ba zilalö. Itugu oya göi noro dödö niʼokhögö zatua ira matua. Moguna iʼasogö zoguna khö woʼomonia hegöi khö nononia.

6-8. Hadia nirasoi niha si no mongambatö si tebai mangokhögö iraono?

⁶ So ösa wongambatö sangokhögö abula dödö tanö böʼö. Omasi sibai ira na so khöra ndraono, hizaʼi tebai. Ba ginötö tebai manabina zi samösa ira alawe, tola manö afatö sibai dödönia. (Gamaedola 13:12) Ba götö Zura Niʼamoniʼö, faʼaila sebua ba ndra alawe na lö mangowalu hegöi moʼono. Daʼa mbörö wa afökhö sibai dödö woʼomo Yakobo sotöi Rakhela, börö me tebai moʼono ia, hizaʼi tola moʼono gaʼania alawe. (I Moze 30:1, 2) Ba zi hauga soi iadaʼa, ato niha zi faduhu tödö wa moguna sibai laʼokhögö ndraono. Asese manofu niha khö ndra talifusöda utusan injil si toröi ba soi daʼö hana wa lö hadöi iraonora. Hewaʼae no lahaogö latutunö ira utusan injil hadia mbörö, hizaʼi so ösa zangumaʼö, ”He bale, mangandröga dania salahiu!”

⁷ Angeraigö duma-duma tanö böʼö. Samösa dalifusöda ira alawe ba Inggris omasi sibai so khönia ndraono. Ba ginötö iʼila wa tebai moʼono ia ba götö daʼa, afatö sibai dödönia. Yaʼia hegöi foʼomonia ira matua lahalö gangetula ba wangai ono nisou. Hizaʼi, itaria afatö nasa dödönia. Imane, ”Uʼila wa faböʼö sibai rasonia ba wondrorogö ono nisou moroi na onogu samösa.”

⁸ Imane Sura Niʼamoniʼö wa ’niʼorifisa ndra alawe, ba wadono’. (I Timoteo 2:15) Hizaʼi, tenga daʼö geluahania wa tola isöndra waʼauri si lö aetu ha börö me so khönia ndraono. Hadia geluaha ayati daʼö? Oya ginötö niʼogunaʼö zi samösa ina ba wondrorogö ononia hegöi omora. Daʼa zanolo yaʼia enaʼö lö arörö ia ba wamato-matou niha böʼö mazui ba wamalua zi tenga halöwönia. (I Timoteo 5:13) Hewaʼae simanö, hasambalö so gabula dödö ba wongamba-tö hegöi ba nösi nomonia.

9. Hadia gabula dödö tanö böʼö nitaögö niha si no mongambatö?

⁹ Fanandraigö tanö böʼö nitaögö niha si no mongambatö yaʼia daʼö na mate ngambatöra. Hewaʼae so zangumaʼö wa lö alua khöra daʼö, hizaʼi ato zanaögö yaʼia. Sindruhu-ndruhu terara dödö niha Keriso börö me faduhu dödöra ba mbuʼusa li sanandrösa ba wanusugi. (Yohane 5:28, 29) Ba Daromalinia, oya mbuʼusa li nibeʼe Namada Yehowa sondrara tödöda ba ginötö so gabula dödö. Iadaʼa, datafaigi hewisa wameʼe Yehowa wondrara dödö hegöi fanolo ba niha samosumange yaʼia.

FONDRARA DÖDÖ BA GINÖTÖ TATAÖGÖ WANANDRAIGÖ

10. Hadia nifalua Khana ba wanöndra fondrara dödö? (Faigi gambara ba wamobörö wamahaʼö.)

¹⁰ Angeraigö hadia zalua khö Khana, foʼomo Elikana sabölö iʼomasiʼö. Omasi ia na so khönia ndraono hizaʼi tebai. Sindruhunia, oya nono woʼomo ndrongania tanö böʼö sotöi Fenina. (Baso I Zamueli 1:4-7.) Aefa daʼö, iʼoʼaya ia Fenina ”ero röfi” börö me lö hadöi ononia. Afatö sibai dödö Khana. Hadia nifaluania ba wanöndra fondrara dödö? Ilau mangandrö khö Yehowa. Möi ia ba nahia wamosumange Yehowa ba ara sibai wangandrönia. Iʼandrö khö Yehowa enaʼö ibeʼe khönia nono matua ba faduhu dödönia wa hasambalö itolo ia Yehowa. Me no aefa mangandrö ia, aheta noro dödönia ba ”döhö waʼabu dödö” nirasoinia. (I Zamueli 1:12, 17, 18) Faduhu dödönia wa ibeʼe khönia Yehowa samösa nono matua mazui ibeʼe khönia wondrara dödö tanö böʼö.

11. Hewisa wa tola terara dödöda na mangandrö?

¹¹ Börö me lö moʼahonoa ita ba toröi ita ba gulidanö nifatörö Zatana, hasa-mbalö tataögö wanandraigö. (I Yohane 5:19) Hizaʼi, so wanolo. Tola mangandrö ita khö Yehowa, ”Lowalangi wondrara dödö”. Daʼa nifalua Khana. Izara-zara wanutunö khö Yehowa hadia nirasoinia ba iʼandrö wanolo. Simane daʼö göi na so gabula dödöda, tenga ha fangandrö sadogo-dogo nifaʼemada khö Yehowa. Moguna mangalulu ita ba wangandrö fanolo moroi khönia ba tazara-zara ba wanutunö fefu nirasoida.​—Filifi 4:6, 7.

12. Hadia zanolo Ana irege tola omuso dödönia hewaʼae itaögö wanandraigö?

¹² Tola manö afatö dödöda na tebai moʼono ita mazui na mate niha niʼomasiʼöda. Hizaʼi, tola tasöndra wondrara dödö. Angeraigö duma-duma Ana, sauri ba götö Yesu. Me no fitu fakhe mangowalu ia, mate woʼomonia ira matua ba te lö hadöi ononia. Hizaʼi, hadia zanolo yaʼia? ”Lö iröi-röi gosali.” Hewaʼae no 84 fakhe ndröfi Ana, lö mamalö möi ia mangandrö ba gosali ba ifosumange Yehowa. (Luka 2:37) Daʼa zameʼe khönia fondrara dödö ba sanolo yaʼia enaʼö isöndra waʼowua-wua dödö hewaʼae na göna ia fanandraigö.

13. Hewisa wa tola ibeʼe khöda wondrara dödö niha si fahuwu khöda na afatö dödöda labeʼe ira ösi nomoda?

¹³ Tola tasöndra wondrara dödö moroi khö ndra si fahuwu khöda ba mbanua niha Keriso. (Gamaedola 18:24) Awena lima fakhe dröfi Paula me ibato wamosumange Yehowa mamania. Afatö sibai dödö Paula ba abua khönia ba wanaögö daʼa. Hizaʼi, so samösa dalifusöda ira alawe perintis sotöi Ann, ifarou ba iʼomasiʼö sibai Paula. Imane Paula, ”Hewaʼae tenga talifusögu si-ndruhu Ann, urasoi waʼomasinia ba wanolo yaʼodo. Daʼö zanolo yaʼodo irege lö mamalö ufosumange Yehowa.” Iadaʼa, omuso sibai dödö Paula börö me no ifuli ia mamania ba mbanua niha Keriso. Omuso göi dödö Ann börö me tola itolo Paula ba wamosumange Yehowa.

14. Hadia mbua nitemada na tabeʼe wondrara dödö ba niha böʼö?

¹⁴ Na asese tafalua zi sökhi ba niha böʼö, tola olifu ita gabula dödö nitaögöda. Duma-dumania, ato ndra talifusöda ira alawe si no mangowalu mazui si löʼö, laʼila wa ba ginötö laturiaigö Mbanua Lowalangi ba niha böʼö no falulu fohalöwö ira khö Yehowa ba lafalua zomasi ia. Daʼa zameʼe khöra faʼowua-wua dödö. Sindruhunia, fefu ita tola taforomaʼö wa taʼameʼegö tödö niha böʼö na taturiaigö khöra duria somuso dödö. Ba na tafalua zi sökhi khö ndra talifusöda, tola itugu ahatö ita khöra. (Filifi 2:4) Daʼa zi no ifalua Faulo. Iʼameʼegö tödö niha böʼö hulö simane ”zamaenu ono, ba wondrorogö ononia”. Ibeʼe göi wondrara dödö hegöi famarou dödö Faulo khö ndra talifusönia ira matua ”hulö nama khö nononia”.​—Baso I Tesalonika 2:7, 11, 12.

FONDRARA DÖDÖ BA NÖSI NOMO

15. Haniha zangokhögö halöwö ba wamahaʼö iraono sanandrösa khö Yehowa?

¹⁵ Hewisa wameʼeda fondrara dödö ba nösi nomo si so ba mbanua niha Keriso? Itaria, niha sawena mamahaʼö yaʼira ba Zura Niʼamoniʼö, laʼandrö khöda ba wanolo ba wamahaʼö iraonora sanandrösa khö Yehowa mazui ba wamahaʼö iraonora ba Zura Niʼamoniʼö. Imane Sura Niʼamoniʼö wa no ibeʼe halöwö Yehowa khö zatua ba wamahaʼö hegöi ba wangebuaʼö iraonora. (Gamaedola 23:22; Efeso 6:1-4) Hewaʼae tola labeʼe wanolo ira niha böʼö, hizaʼi moguna sibai ifahaʼö ndraononia satua. Moguna göi asese fahuhuo ira khö ndraonora.

16. Hadia zinangea tatörö tödöda ba ginötö tafahaʼö ndraono?

¹⁶ Ba ginötö laʼandrö khöda ira satua ba wamahaʼö iraonora ba Zura Niʼamoniʼö, moguna tatörö tödöda wa tebai tahalö halöwö ndra satua. Itaria so ndraono nifahaʼöda ba Zura Niʼamoniʼö börö me tenga Samaduhuʼö Yehowa zatuania. Ba ginötö tafahaʼö ndraono niha böʼö, moguna tafahaʼö ira ba nomora na so zatuara mazui na so niha Keriso tanö böʼö si no aro ba wamati. Tola göi tafahaʼö ira ba nahia sato niha. Na tafalua daʼö, tola latimbagö wangera-ngera si fasala moroi ba niha böʼö. Ba zi sambua inötö, satua ndraono andrö zamahaʼö iraonora samösa sanandrösa khö Yehowa.

17. Hadia zi tola lafalua iraono ba wameʼe fo-ndrara dödö ba nösi nomora?

¹⁷ Iraono si no mamahaʼö yaʼira ba wangomasiʼö Yehowa, tola lafarou ba labeʼe wondrara dödö ba nösi nomora. Hewisa lalania? Moguna lafosumange ba laforege ba wanolo zatuara ba lala si tefaudu. Na lö faröi göi ndraono khö Yehowa, tola tefarou dödö nösi nomora. Fatua lö Anönö Danö Idanö, ifosumange Yehowa Lamekhi. Imane sanandrösa khö nononia matua sotöi Noakhi, ”Daʼe dania zondrara tödöda ba waʼerege dödöda ba ba waʼakao dangada andre, ba danö, niʼelifi Yehowa.” Alua wamaʼeleʼö andre me no aefa Anönö Danö Idanö me iheta wangelifi andrö Yehowa moroi ba danö. (I Moze 5:29; 8:21) Iadaʼa, iraono si lö faröi khö Yehowa tola larara dödö nösi nomora. Tola latolo nösi nomora enaʼö anau gölöra ba wanaögö ngawalö gabula dödö salua iadaʼa hegöi ba zi so miföna.

18. Hadia zanolo yaʼita enaʼö anau gölöda ba wanaögö gofu hadia ia wanandraigö nitaögöda?

¹⁸ Ono mbanua Yehowa iadaʼa, lasöndra wondrara dödö börö me laʼangerönusi duma-duma si so ba Zura Niʼamoniʼö, fangandrö hegöi börö me fahuwu ira khö ndra talifusö si sara lala wamati. (Baso Zinunö 145:18, 19.) Faduhu dödöda wa hasambalö ibeʼe khöda wondrara dödö Yehowa ba sindruhu-ndruhu itolo ita enaʼö anau gölöda ba wanaögö gofu hadia wana-ndraigö nitaögöda!