Lala Wangogunaʼö Rekaman Audio
1. Baero mbuku si no tefazökhi, hadia danö böʼö si tola taʼogunaʼö?
1 Ato niha sangogunaʼö jw.org ba wombaso fehede omasiʼö ba Taromali si ndruhu. (Zango. 12:10) Hadia no öʼogunaʼö göi rekaman audio? Oya rekaman audio si no lafaʼanö ba situs web khöda ba tola tafondro-ndrongo. Hewisa wa tola moguna khöda rekaman audio?
2. Hewisa lalada wangogunaʼö rekaman audio ba wamahaʼö yaʼita samösa mazui ba wamahaʼö ba nomo?
2 Khöda Samösa mazui ba Wamahaʼöda ba Nomo: Tola tafondro-ndrongo rekaman Zura Niʼamoniʼö, mazui buku tanö böʼö ba ginötö mofanö-fanö ita, ba ba ginötö tafalua halöwöda si ero maʼökhö enaʼö lö tetibo ginötöda. (Ef. 5:15, 16) Ba mbongi wamahaʼö ba nomo, tola tafondro-ndrongo rekaman audio sanandrösa ba mbuku nibasoda. Ogunaʼö rekaman audio na öfahaʼö ndraʼugö samösa, daʼa zi tola manolo yaʼugö enaʼö tedou waʼatua-tuamö ba wombaso mazui na öfahaʼö ndraʼugö ba li tanö böʼö.
3. Haʼökhö manö moguna rekaman audio andrö?
3 Ba Wanuriaigö: Ba mbanua si toröi ita, tola manö abölö omasi niha wamondrongo rekaman audio börö me lö inötöra wombaso. Mazui na falukha ita ba niha si lö mangila lida, abölö laʼameʼegö tödö duria Mbanua Lowalangi nifuta ba rekaman audio ’ba li niʼilara’. (Hal. 2:6-8) So göi, ba mbanua tanö böʼö abölö laʼosinangegö sibai wamondrongo na so zi fahuhuo. Duma-dumania, si toʼölö nifalua niha Hmong yaʼia daʼö, abölö omasi ira ladunö-dunö ba ndraonora waö-waö zalua me föna moroi na lafaʼanö ba mbuku, ba fefu nirongora andrö ba lö olifu ira.[1] Ato niha Afrika somasi mamahaʼö yaʼira moroi ba zi no larongo.[2]
4. Hadia zinangea tasofu khöda samösa?
4 Ba mbanua si toröi yaʼugö, hadia so gunania na öfuta rekaman audio ba li niʼila zokhö omo? Hadia so gunania me no öfaʼoheʼö ba e-mail rekaman audio ba niha? Hadia no tahalö rekaman audio ba tafaʼanö ba zi sambua CD, aefa daʼö tabeʼe ba niha somasi mamondrongo ba tafaogö wameʼe khönia buku sanandrösa ba rekaman andrö? Fefu mbuku nibeʼeda ba niha simane buku side-ide, majalah, mazui risalah niʼodela ba elektronik, tola taʼerai ba laporan dinas. Lafaʼanö rekaman audio enaʼö tola taʼogunaʼö ba wamahaʼö yaʼita samösa ba tabeʼe göi ba niha enaʼö aboto ba dödöra zi duhu.—I Kor. 3:6.