Lala Wamörögö Fahuhuosa Faoma Risalah

Iʼotarai ba mbaŵa si Sara 2018, so ösa duma-duma wahuhuosa si no mufaʼanö ba ngaʼörö tanö föna Faʼauri Niha Keriso ba Fanuriaigö—Waö-Waö Halöwö ba Gangowuloa. Lafarou dödöda enaʼö asese tabörögö wahuhuosa moroi na tabeʼe publikasi. Enaʼö tola lafaudugö lala wanuriaigöra ira sanuriaigö, so video sangoromaʼö hewisa lala wamörögö fahuhuosa faoma Sura Niʼamoniʼö. Hizaʼi, hadia daʼö geluahania wa tebai taʼogunaʼö publikasi na möi ita manuriaigö? Tenga daʼö geluahania. Duma-dumania, tola taʼogunaʼö risalah ba wamörögö fahuhuosa. So öfa lala si tola tafalua na taʼogunaʼö risalah:

1. Beʼe wanofu ba fili wanema li si so ba ngaʼörö tanö föna.

2. Foromaʼö wanema li Zura Niʼamoniʼö si so tanö yawa ba ngaʼörö si dua. Na tefaudu, baso ba tutunö ösa nösi risalah daʼö.

3. Beʼe risalah daʼö khö zokhö omo, ba farou dödönia enaʼö ibaso risalah daʼö na so ginötönia.

4. Fatua lö mofanöʼö, röi khönia wanofu ”Si Nangea Muʼangeraigö” ba öfabuʼu khönia ba wameʼe fanema li moroi ba zinofu daʼö na öfuli öfalukhaisi ia.

Ba ginötö öfuli öfalukhaisi, beʼe wanema li moroi ba wanofu niröimö. Aefa daʼö, fuli beʼe khönia wanofu enaʼö tola mitutunö na öfuli zui öfalukhaisi ia. Tola öfili wanofu moroi ba situs webda mazui publikasi si so ba ngaʼörö tanö furi risalah. Na tefaudu, beʼe khönia brosur Turia Somuso Dödö moroi khö Lowalangi! mazui publikasi tanö böʼö moroi ba Fakake Niʼogunaʼöda ba Wamahaʼö Zura Niʼamoniʼö.