Lala ba Wangogunaʼö Duma-Duma Wahuhuosa

Iʼotarai me baŵa si Sara 2018, no mufaʼanö duma-duma wahuhuosa ba ngaʼörö tanö föna ba Faʼauri Niha Keriso ba Fanuriaigö–Waö-Waö Halöwö ba Gangowuloa. Hewisa lalada ba wangogunaʼö yaʼia?

Na Tafalua Wamadumaisi: Moguna öʼogunaʼö wanofu, ayati, hegöi fanofu niröi si so ba Duma-Duma Wahuhuosa. Hizaʼi, lö moguna öʼoʼö sibai wehede niʼogunaʼö ba video Duma-Duma Wahuhuosa. Ba wamadumaisi nifaluamö, tola öfaböʼöni adegan hegöi fehede famasao niʼogunaʼömö. Tola göi öbeʼe publikasi si so ba Fakake Niʼogunaʼöda ba Wamahaʼö, hewaʼae na lö hadöi fanuturu lala ba wamalua daʼö.

Na Möi Manuriaigö: Mufazökhi Duma-Duma Wahuhuosa enaʼö möi fanolomö daʼö ba wanuriaigö. Na so niha sadöni tödö ba duria nifaʼemamö, ba omasi nasa iʼila wamahaʼö tanö böʼönia, tola öʼogunaʼö Duma-Duma Wahuhuosa enaʼö so dane-dane khömö ba wamalukhaisi yaʼia mangawuli. Tola öfaböʼöni maʼifu wahuhuosamö moroi ba Duma-Duma Wahuhuosa, mazui öfaböʼöni fefu. Ba nahiamö wanuriaigö, hadia abölö tefaudu na öʼogunaʼö duho me baŵa silalö mazui ayati si faböʼö? Hadia abölö adöni dödöra na öʼogunaʼö berita mazui salua barö-barö daʼa? Gofu hadia ia lala niʼogunaʼömö, ohitö dödömö yaʼia daʼö ba wamalua ”gofu hadia ia börö duria somuso dödö, ba wangombakha ba niha fefu”.​—1Kor 9:22, 23.