Lala Wangogunaʼö Video Famahaʼö ba Zura Niʼamoniʼö

So öfa ngawua video famahaʼö ba Zura Niʼamoniʼö si tola taʼogunaʼö ba wanuriaigö. Hadia sibai gohitö dödö wa mufazökhi video andre?

• 

  Hana Wa Moguna Tafahaʼö Ita ba Zura Niʼamoniʼö?—Versi Sanau. Mufazökhi video daʼa ba wanolo niha enaʼö adöni dödöra ba Zura Niʼamoniʼö gofu hadia ia agamara. Ifarou göi ira ba video andre ba wangalui fanema li moroi ba wanofu-nofu sanandrösa ba waʼauri, yaʼia na lafareso Zura Niʼamoniʼö. Ba video daʼa, so göi sambua duma-duma sangoromaʼö wa fanema li moroi ba Zura Niʼamoniʼö no salio aboto ba dödö niha na so wanofu-nofura. Baero daʼö, ifatunö ba video andre hewisa lala zi samösa niha ba wangandrö famahaʼö ba Zura Niʼamoniʼö.

• 

  Hana Wa Moguna Tafahaʼö Ita ba Zura Niʼamoniʼö? (versi sadogo-dogo) So waʼafagölö video daʼa ba versi sanau, hizaʼi faʼanaunia ha sambua niʼotölu moroi ba video andrö. Tefaudu video daʼa ba niha si lö oya inötö ba wahuhuosa.

• 

  Hewisa Halöwö Famahaʼö ba Zura Niʼamoniʼö Nifaluama? Mufazökhi video daʼa ba wanolo niha enaʼö adöni dödöra ba wamahaʼö yaʼira ba Zura Niʼamoniʼö si lö muʼandrö kefe. Ba video daʼa, so göi wanema li moroi ba wanofu-nofu sasese lasofu niha sanandrösa ba wamahaʼö ba Zura Niʼamoniʼö nifaluada. Baero daʼö, ifatunö göi hewisa lala ba wangandrö famahaʼö ba Zura Niʼamoniʼö.

• 

  Matemaʼö Ami Yaʼami Nifahaʼö ba Zura Niʼamoniʼö. Mufazökhi video daʼa ba niha si no mamahaʼö yaʼia ba Zura Niʼamoniʼö. Hewaʼae video daʼa so ia ba ngaʼörö si dua moroi ba mbuku Lala ba Wanöndra Faʼohahau Dödö Sagötö Faʼara!, hizaʼi tola mufuta ia ba ginötö mututunö brosur Lala ba Wanöndra Faʼohahau Dödö Sagötö Faʼara! Ba video daʼa, iʼadogoiʼö wanutunö hadia manö wamahaʼö moroi ba mbuku andrö, ba hadia gunania ba niha nifahaʼö sagötö wamahaʼö yaʼia ba Zura Niʼamoniʼö.

Hewaʼae no faböʼö-böʼö gohitö dödö ero sambua video, hizaʼi tola tafuta mazui takirim ba niha gofu haʼökhö manö. Moguna aboto ba dödö ndra sanuriaigö fefu nösi video andrö enaʼö sökhi wangogunaʼöra ba wanuriaigö.