LALA BA WOLAWA FATIUSA

3 | Heta Watiusa ba Gera-erau

Famahaʼö Zura Niʼamoniʼö:

”Mibulöʼö lala wangera-ngerami, enaʼö miʼila mitimba tödömi zomasi Lowalangi, soʼahonoa ba sangomusoiʼö tödönia.”—ROMA 12:2.

Eluahania:

Iʼameʼegö tödö sibai lala wangera-ngerada Lowalangi. (Yeremia 17:10) Lö ibönö na ha asala tatimbagö watiusa moroi ba wehededa mazui amuatada, börö me tola tumbu watiusa ba gera-erada hegöi tödöda. Börö daʼö, moguna taheta ngawalö zi tola mangaʼasogö fatiusa moroi ba gera-erada hegöi tödöda. Na tafalua daʼö, awena tola ’tabulöʼö lala wangera-ngerada’ ba lö khöda fatiusa.

Si Tola Öfalua:

Haogö sekhegö gera-eramö hegöi nirasoimö sanandrösa ba niha böʼö, mendrua manö ba niha si faböʼö mado mazui soi. Sofu khöu samösa, ’Hewisa wamaigigu yaʼira? Hadia sindruhu-ndruhu aboto ba dödögu ira? Mazui, hadia no tedönisi dödögu ba wanahö-nahö tödö?’ Böi faigi-faigi media sosial, film, mazui hiburan sangoromaʼö fatiusa ba faʼalösökhi.

Tola itolo ita Taromali Lowalangi ba wangeheta fatiusa ba dödö hegöi era-erada

Itaria abua khöda wamareso fangera-ngerada hegöi ösi dödöda ba lala si tefaudu. Hizaʼi, tola itolo ita Taromali Lowalangi ba wamareso ’era-era dödö ba söndra dödöda’. (Heberaiʼo 4:12) Börö daʼö, böi böhöli wamahaʼö yaʼugö ba Zura Niʼamoniʼö. Fatimbaisi wamahaʼönia ba gera-eramö, ba forege wangokhögö lala wangera-ngera si möi fangomuso dödö Lowalangi. Tola itolo ita Taromali Lowalangi ba wangeheta fatiusa ’si no aro’ bakha ba dödö hegöi era-erada.—2 Korindro 10:4, 5.

Si No Irai Alua—STEPHEN

Mofozu Ia Wombulöʼö Lala Wangera-ngerania

Fatiu dödö niha safusi uli khö Stephen hegöi ösi nomonia. Börö daʼö, tedönisi dödönia wefao ba ngawawa politik samorege enaʼö so waʼatulö. Ba gafuriata, ifalua göi zi lö sökhi ba niha safusi uli. Imane Stephen, ”Samuza inötö, fao ndraʼo khö ndra awö-awögu ba wamaigi film, sangoromaʼö famakao nitaögö niha Afrika nibaliʼö sawuyu ba Amerika Serikat. Mofönu sibai ndraʼaga, irege maböbözi niha safusi uli si so ba bioskop daʼö. Aefa daʼö, möiga ba nahia tanö böʼö ba wangalui niha safusi uli ba maböbözi ira.”

Tebulö lala wangera-ngera Stephen me no ifahaʼö ia ba Zura Niʼamoniʼö khö ndra Samaduhuʼö Yehowa. Imane wanutunö, ”Börö me no asese lafalua khögu walöʼatulö, tokea sibai ndraʼo me uʼila hewisa gamuata ndra Samaduhuʼö Yehowa khö ndra talifusöra. Duma-dumania, me mofanö ba danö saröu zi samösa talifusöda safusi uli, iröi ndraononia khö zi sambua fongambatö niha saitö uli. Baero daʼö, so göi sambua fongambatö dalifusöda safusi uli, latehegö toröi ba nomora nono matua saitö uli.” Faduhu dödö Stephen wa ira Samaduhuʼö Yehowa andre niha Keriso sindruhu si no irai itutunö Yesu, sangokhögö faʼomasi ba gotalua zi fatalifusö.—Yohane 13:35.

Hadia zanolo Stephen ba wamöhöli fatiusa hegöi faʼalösökhi? Möi fanolonia Roma 12:2. Imane, ”Ibörögö aboto ba dödögu wa moguna ubulöʼö lala wangera-ngeragu. Lö tola löʼö uheta watiusa ba gera-eragu, ba ufahaʼö ndraʼo wa no lala waʼauri sabölö sökhi na atulö ndraʼo ba niha.” Iadaʼa, no töra 40 fakhe irasoi Stephen waʼauri si lö fatiusa.